lakṣmīnārāyaṇastutinirūpaṇam
brahmovāca
vicāryyā'haṃ vedānmuhurupagato niścayamimaṃ ramārāme bhaktistvayi dṛḍhatarā yarhyasubhṛtām ||
bhavettarhyevaiṣāṃ kṣayavirahitā bhoganikarāstathā syurlokā vai paramapuruṣātyaṃtikagatiḥ
||1||विचार्य्याऽहं वेदान्मुहुरुपगतो निश्चयमिमं रमारामे भक्तिस्त्वयि दृढतरा यर्ह्यसुभृताम् ॥
भवेत्तर्ह्येवैषां क्षयविरहिता भोगनिकरास्तथा स्युर्लोका वै परमपुरुषात्यंतिकगतिः
ajānantastvitthaṃ bhṛtarajatamaskānapi hare bhajantyasmāndevānbahuvidhataporccāsaraṇibhiḥ ||
ta evoktā mūḍhāḥ kṣayarahitasaukhyaṃ na kuhacillabhante'tastvāṃ vai nijahṛdi dadhe keśavamaham
||2||अजानन्तस्त्वित्थं भृतरजतमस्कानपि हरे भजन्त्यस्मान्देवान्बहुविधतपोर्च्चासरणिभिः ॥
त एवोक्ता मूढाः क्षयरहितसौख्यं न कुहचिल्लभन्तेऽतस्त्वां वै निजहृदि दधे केशवमहम्
śaṃkara uvāca
trayī sāṃkhyavedāṃtayogāḥ purāṇaṃ tathā pañcarātraṃ prabho dharmaśāstram ||
tavaivātimāhātmyamekasya nityaṃ prakārairanekairhi gāyaṃti bhaktyā
||3||त्रयी सांख्यवेदांतयोगाः पुराणं तथा पञ्चरात्रं प्रभो धर्मशास्त्रम् ॥
तवैवातिमाहात्म्यमेकस्य नित्यं प्रकारैरनेकैर्हि गायंति भक्त्या
tvadeveśa śāstrāṇi caitāni bhūmno babhūvustvadekāśrayāṇyādikalpe ||
ramāsevyapādāmbujaṃ śāstrayoniṃ tamādyaṃ bhavantaṃ bhaje vāsudevam
||4||त्वदेवेश शास्त्राणि चैतानि भूम्नो बभूवुस्त्वदेकाश्रयाण्यादिकल्पे ॥
रमासेव्यपादाम्बुजं शास्त्रयोनिं तमाद्यं भवन्तं भजे वासुदेवम्
dharma uvāca
kathā tvadīyā bhavapāśamocanī sudhaiva tāpatrayataptadehinām ||
anekajanmāghacayāpahāriṇī tanoti bhaktiṃ vayunaṃ tavāñjasā
||5||कथा त्वदीया भवपाशमोचनी सुधैव तापत्रयतप्तदेहिनाम् ॥
अनेकजन्माघचयापहारिणी तनोति भक्तिं वयुनं तवाञ्जसा
sadaiva sā karṇapathena hṛddarī viśatvanantābhidha sammukhodgatā ||
mama tvadanyā haratācca vāsanā dayābdhaye te prabhaviṣṇave namaḥ
||6||सदैव सा कर्णपथेन हृद्दरी विशत्वनन्ताभिध सम्मुखोद्गता ॥
मम त्वदन्या हरताच्च वासना दयाब्धये ते प्रभविष्णवे नमः
prajāpataya ūcuḥ
dhanyā ete kalpavṛkṣā yadīyāṃ chāyāmetāmāśritastvaṃ sahaśrīḥ ||
dhanyaḥ kartā maṇḍapasyāsya te vai dhanyaiṣā bhūryatra pīṭhaṃ taveśa
||7||धन्या एते कल्पवृक्षा यदीयां छायामेतामाश्रितस्त्वं सहश्रीः ॥
धन्यः कर्ता मण्डपस्यास्य ते वै धन्यैषा भूर्यत्र पीठं तवेश
dhanyo loke nūnameṣomburāśiḥ sākṣāttubhyaṃ yena dattā svakanyā ||
dhanyāścaite tvāṃ vayaṃ vīkṣamāṇā dhanyeśānaṃ śrīpatiṃ tvāṃ natāḥ smaḥ
||8||धन्यो लोके नूनमेषोम्बुराशिः साक्षात्तुभ्यं येन दत्ता स्वकन्या ॥
धन्याश्चैते त्वां वयं वीक्षमाणा धन्येशानं श्रीपतिं त्वां नताः स्मः
manava ūcuḥ
dharmaḥ khalu sa hi paramo dharmebhyo mādhava sakalebhyopi ||
bhaktirbhavati yato vai dharmabhuvi tvayi hi niravadyā
||9||धर्मः खलु स हि परमो धर्मेभ्यो माधव सकलेभ्योपि ॥
भक्तिर्भवति यतो वै धर्मभुवि त्वयि हि निरवद्या
dharmātmānaṃ bhagavandharmadhurīṇaṃ ca dharmapātāram ||
sarvātipriyadharmaṃ numastvāṃ dharmasaṃbhūtim
||10||धर्मात्मानं भगवन्धर्मधुरीणं च धर्मपातारम् ॥
सर्वातिप्रियधर्मं नुमस्त्वां धर्मसंभूतिम्
ṛṣaya ūcuḥ
bhaktyā hīnastvadvimukho vayunārthī śrāmyanbhūyopyasya na siddhiṃ samupaiti ||
tarhyāsaktaḥ karmaṇi kāmye tu kutosau saukhyaṃ yāyādakṣayamānandamahābdhe
||11||भक्त्या हीनस्त्वद्विमुखो वयुनार्थी श्राम्यन्भूयोप्यस्य न सिद्धिं समुपैति ॥
तर्ह्यासक्तः कर्मणि काम्ये तु कुतोसौ सौख्यं यायादक्षयमानन्दमहाब्धे
bhaktyā nityaṃ tvāmata eva vayaṃ vai śraddhāyuktā dharmataponigamādyaiḥ ||
māyātītaṃ kālaniyantāramudāraṃ dhyāyāmaḥ śrīkāntaparātparamekam
||12||भक्त्या नित्यं त्वामत एव वयं वै श्रद्धायुक्ता धर्मतपोनिगमाद्यैः ॥
मायातीतं कालनियन्तारमुदारं ध्यायामः श्रीकान्तपरात्परमेकम्
indra uvāca
bhagavannuruduḥkhitā vayaṃ nanu durvāsasa eva helanāt ||
na bhavantamṛte'vituṃ hi no vidhirudrapramukhā ime'śakan
||13||भगवन्नुरुदुःखिता वयं ननु दुर्वासस एव हेलनात् ॥
न भवन्तमृतेऽवितुं हि नो विधिरुद्रप्रमुखा इमेऽशकन्
vigatākhilasaṃpado nirannāḥ samabhāvaṃ bhuvi pāmarairupetāḥ ||
bhavataiva vayaṃ hṛtāpadaḥ smaḥ sapadi śrīharaye namostu tubhyam
||14||विगताखिलसंपदो निरन्नाः समभावं भुवि पामरैरुपेताः ॥
भवतैव वयं हृतापदः स्मः सपदि श्रीहरये नमोस्तु तुभ्यम्
agniruvāca
gīrvāṇadānavanarādyupajīvanānnaṃ yannirmitaṃ hi bhavataiva tato budhāstu ||
yajñeṣu tena yajanaṃ tava kurvate'tho tvaccheṣamanyadiviṣadbhya upānayanti
||15||गीर्वाणदानवनराद्युपजीवनान्नं यन्निर्मितं हि भवतैव ततो बुधास्तु ॥
यज्ञेषु तेन यजनं तव कुर्वतेऽथो त्वच्छेषमन्यदिविषद्भ्य उपानयन्ति
kāmyeṣu karmasu ratā api yājñikāste tatkarmabandhanata āśu vimucya yānti ||
brāhmīṃ gatiṃ taditare tu bhavanti caurāḥ śrīyajñapūruṣamahaṃ praṇamāmi taṃ tvām
||16||काम्येषु कर्मसु रता अपि याज्ञिकास्ते तत्कर्मबन्धनत आशु विमुच्य यान्ति ॥
ब्राह्मीं गतिं तदितरे तु भवन्ति चौराः श्रीयज्ञपूरुषमहं प्रणमामि तं त्वाम्
maruta ūcuḥ
bhaktā ekāntikāste'kṣaraparamapade sevayā te tu hīnaṃ vāsaiśvaryādi necchantyatiśayitasukhaṃ nāpi kaivalyamokṣam ||
tadyuktaṃ tvātmanopi śvapacakulajanurmānayantyuttamaṃ vai taṃ tvāmekāntadharmāśrayaṇamupagatāḥ śrīmahāpūruṣaṃ smaḥ
||17||भक्ता एकान्तिकास्तेऽक्षरपरमपदे सेवया ते तु हीनं वासैश्वर्यादि नेच्छन्त्यतिशयितसुखं नापि कैवल्यमोक्षम् ॥
तद्युक्तं त्वात्मनोपि श्वपचकुलजनुर्मानयन्त्युत्तमं वै तं त्वामेकान्तधर्माश्रयणमुपगताः श्रीमहापूरुषं स्मः
siddhā ūcuḥ
naikabrahmāṇḍasargādikāraṇaṃ tvāmakāraṇam ||
tatsthaṃ tadvyatiriktaṃ ca niyantāraṃ namāmahe
||18||नैकब्रह्माण्डसर्गादिकारणं त्वामकारणम् ॥
तत्स्थं तद्व्यतिरिक्तं च नियन्तारं नमामहे
rudrā ūcuḥ
māyāyāḥ sarvamohinyā mohanaṃ mohavarjitam ||
mahākālasyāpi kālaṃ tvāṃ namaḥ puruṣottamam
||19||मायायाः सर्वमोहिन्या मोहनं मोहवर्जितम् ॥
महाकालस्यापि कालं त्वां नमः पुरुषोत्तमम्
ādityā ūcuḥ
prakāśitā yena vayaṃ jaganti prakāśayāmo bhavatā rameśa ||
svayaṃprakāśaṃ tamuruprakāśaṃ prakāśamūrttiṃ praṇatā bhavantam
||20||प्रकाशिता येन वयं जगन्ति प्रकाशयामो भवता रमेश ॥
स्वयंप्रकाशं तमुरुप्रकाशं प्रकाशमूर्त्तिं प्रणता भवन्तम्
sādhyā ūcuḥ
śāstā nṛpāṇāṃ ca mahoragāṇāṃ daityādhipānāṃ ca surādhipānām ||
tvaṃ vai manūnāṃ ca prajāpatīnāṃ rājādhirājāya namostu tubhyam
||21||शास्ता नृपाणां च महोरगाणां दैत्याधिपानां च सुराधिपानाम् ॥
त्वं वै मनूनां च प्रजापतीनां राजाधिराजाय नमोस्तु तुभ्यम्
vasava ūcuḥ
bhavati bhuvi yadāyadā'surāṃśaiḥ prathitasanātanadharmadhārmikāṇām ||
kadanamuru tadātadā svayaṃ te hyavatarate praṇamāma dharmagoptre
||22||भवति भुवि यदायदाऽसुरांशैः प्रथितसनातनधर्मधार्मिकाणाम् ॥
कदनमुरु तदातदा स्वयं ते ह्यवतरते प्रणमाम धर्मगोप्त्रे
cāraṇā ūcuḥ
caritraṃ śubhaṃ te dhṛtānekamūrtteḥ prabandhairanekairhi gāyanti bhaktāḥ ||
yadu śrotṛvaktṝnpunātyeva sadyo vayaṃ taṃ natāḥ puṇyakīrttiṃ bhavantam
||23||चरित्रं शुभं ते धृतानेकमूर्त्तेः प्रबन्धैरनेकैर्हि गायन्ति भक्ताः ॥
यदु श्रोतृवक्तॄन्पुनात्येव सद्यो वयं तं नताः पुण्यकीर्त्तिं भवन्तम्
gandharvāpsarasa ūcuḥ
ye kathāste vihāyānyagāthāḥ prabho kīrttayante'tha śṛṇvanti vā te janāḥ ||
duḥkhitāḥ syuśca saṃsārapāśaiḥ sitāstaṃ natāḥ smaḥ śaraṇyaṃ bhavantaṃ vayam
||24||ये कथास्ते विहायान्यगाथाः प्रभो कीर्त्तयन्तेऽथ शृण्वन्ति वा ते जनाः ॥
दुःखिताः स्युश्च संसारपाशैः सितास्तं नताः स्मः शरण्यं भवन्तं वयम्
samudra uvāca
ajita tavā'tha tāvakajanasya mudā'lpamapi draviṇa jalānnavastranamanānyatamena sakṛt ||
carati ha sevanaṃ sa padavīṃ mahatīṃ mahatāṃ vrajati janolpakopi tamahaṃ praṇataḥ karuṇam
||25||अजित तवाऽथ तावकजनस्य मुदाऽल्पमपि द्रविण जलान्नवस्त्रनमनान्यतमेन सकृत् ॥
चरति ह सेवनं स पदवीं महतीं महतां व्रजति जनोल्पकोपि तमहं प्रणतः करुणम्
pārṣadā ūcuḥ
pitaro tvamasi svajanastvamasi tvamasīṣṭaguruḥ suhṛdātmapatiḥ ||
tvamasīśvara eva ca naḥ paramastvamasi draviṇaṃ sakalaṃ tvamasi
||26||पितरो त्वमसि स्वजनस्त्वमसि त्वमसीष्टगुरुः सुहृदात्मपतिः ॥
त्वमसीश्वर एव च नः परमस्त्वमसि द्रविणं सकलं त्वमसि
mūrttiruvāca
yatsaṃbandhata eva yānti padavīmuccāṃ mahadbhirnnutāṃ strīśūdrāsuranīcapakṣipaśavaḥ pāpātmajīvā api ||
yaddhīnā vibudheśvarā api bhavantyarccojjhitāstatkṣaṇaṃ golokādhipatiṃ tameva hṛdaye nityaṃ bhaje tvāmaham
||27||यत्संबन्धत एव यान्ति पदवीमुच्चां महद्भिर्न्नुतां स्त्रीशूद्रासुरनीचपक्षिपशवः पापात्मजीवा अपि ॥
यद्धीना विबुधेश्वरा अपि भवन्त्यर्च्चोज्झितास्तत्क्षणं गोलोकाधिपतिं तमेव हृदये नित्यं भजे त्वामहम्
sāvitryuvāca
tvaṃ sargakāle prakṛtiṃ ca pūruṣaṃ dṛṣṭyā svayotthāpya tatastadātmanā ||
tattvāni sṛṣṭvā mahadādimānitairnnaikānvirājo bahudhā sasarjitha
||28||त्वं सर्गकाले प्रकृतिं च पूरुषं दृष्ट्या स्वयोत्थाप्य ततस्तदात्मना ॥
तत्त्वानि सृष्ट्वा महदादिमानितैर्न्नैकान्विराजो बहुधा ससर्जिथ
vairājarūpeṇa jagadvidhātṛtāṃ svīkṛtya devāsuramānuṣoragān ||
tvaṃ sthāvaraṃ jaṃgamamīśa nirmame tvāmādikartāramupāśritāsmyaham
||29||वैराजरूपेण जगद्विधातृतां स्वीकृत्य देवासुरमानुषोरगान् ॥
त्वं स्थावरं जंगममीश निर्ममे त्वामादिकर्तारमुपाश्रितास्म्यहम्
durgovāca
priyatayā'dhikayā hṛdi cintanaṃ vidadhate tava ye bhuvi te vibho ||
na parameṣṭhisukhaṃ na divaḥ sukhaṃ na kamayanti dharaikanareśatām
||30||प्रियतयाऽधिकया हृदि चिन्तनं विदधते तव ये भुवि ते विभो ॥
न परमेष्ठिसुखं न दिवः सुखं न कमयन्ति धरैकनरेशताम्
prasabhamarpitamapyatulaṃ tvayā sukhamidaṃ samavāpya ca tatra te ||
tadapahāya na śaktikṛtaḥ kṣaṇaṃ tamu namāmi ca sātvatanāyakam
||31||प्रसभमर्पितमप्यतुलं त्वया सुखमिदं समवाप्य च तत्र ते ॥
तदपहाय न शक्तिकृतः क्षणं तमु नमामि च सात्वतनायकम्
nadya ūcuḥ
varada namanamātraṃ nāmasaṃkīrtanaṃ vā vidadhati tava ye vai jñānato'jñānato vā ||
janimṛtiyamabhītestānapi trāyamāṇaṃ narasakhamupayātāḥ smo'dya nārāyaṇaṃ tvām
||32||वरद नमनमात्रं नामसंकीर्तनं वा विदधति तव ये वै ज्ञानतोऽज्ञानतो वा ॥
जनिमृतियमभीतेस्तानपि त्रायमाणं नरसखमुपयाताः स्मोऽद्य नारायणं त्वाम्
devapatnya ūcuḥ
bhuvi dhṛtākṛterjanma maṅgalaṃ caritamadbhutaṃ lokapāvanam ||
bhavati nirguṇaṃ sarvameva te bhavasi nirguṇabrahma yatparam
||33||भुवि धृताकृतेर्जन्म मङ्गलं चरितमद्भुतं लोकपावनम् ॥
भवति निर्गुणं सर्वमेव ते भवसि निर्गुणब्रह्म यत्परम्
tava samāśrayāttāmasā janā api ca rājasāḥ sāttvikāśca ye ||
nanu bhavanti te nirguṇāstato vayamupāsmahe tvāṃ hi nirguṇam
||34||तव समाश्रयात्तामसा जना अपि च राजसाः सात्त्विकाश्च ये ॥
ननु भवन्ति ते निर्गुणास्ततो वयमुपास्महे त्वां हि निर्गुणम्
ṛṣipatnya ūcuḥ
ārtānāmuruvṛjinaistridhā ca tāpaiḥ sarvāpatpraśamanamekameva viṣṇoḥ ||
pādābjaṃ tava bhavatīti tadvayaṃ vai prāptāḥ smaḥ śaraṇamananta devadeva
||35||आर्तानामुरुवृजिनैस्त्रिधा च तापैः सर्वापत्प्रशमनमेकमेव विष्णोः ॥
पादाब्जं तव भवतीति तद्वयं वै प्राप्ताः स्मः शरणमनन्त देवदेव
pṛthivyuvāca
pūrṇaśāradasudhākarānanaṃ śāradābjadaladīrghalocanam ||
śrīviyogabahudhārtimocanaṃ vā'sudevamahamekamāśraye
||36||पूर्णशारदसुधाकराननं शारदाब्जदलदीर्घलोचनम् ॥
श्रीवियोगबहुधार्तिमोचनं वाऽसुदेवमहमेकमाश्रये
sarasvatyuvāca
nayane mamācyuta tavātisundare mukhaśītarociṣi cakoratāṃ gate ||
na hi gacchato'nyata itīyameva me hṛdi mūrtirastu satataṃ nahītarā
||37||नयने ममाच्युत तवातिसुन्दरे मुखशीतरोचिषि चकोरतां गते ॥
न हि गच्छतोऽन्यत इतीयमेव मे हृदि मूर्तिरस्तु सततं नहीतरा
skanda uvāca
iti stuto'khilairdevaiḥ sobhinandya dṛśaiva tān ||
prāha śriyaṃ śubhe paśya devādīṃstvamimāniti
||38||इति स्तुतोऽखिलैर्देवैः सोभिनन्द्य दृशैव तान् ॥
प्राह श्रियं शुभे पश्य देवादींस्त्वमिमानिति
tataḥ samīkṣitāḥ prītyā tayā madhurayā dṛśā ||
trilokīvāsinaḥ sarve ṛddhā āsanyathā purā
||39||ततः समीक्षिताः प्रीत्या तया मधुरया दृशा ॥
त्रिलोकीवासिनः सर्वे ऋद्धा आसन्यथा पुरा
lebhire svasvaṛddhiṃ te gṛhiṇastyāginopi ca ||
dharmādayaśca sānandaṃ pracaranti sma pūrvavat
||40||लेभिरे स्वस्वऋद्धिं ते गृहिणस्त्यागिनोपि च ॥
धर्मादयश्च सानन्दं प्रचरन्ति स्म पूर्ववत्
tasyāḥ śriyaśca bhagavāndadau sthānamuraḥ svakam ||
tatra sthitvaiva sā vyāpattrailokyaṃ saṃpadātmanā
||41||तस्याः श्रियश्च भगवान्ददौ स्थानमुरः स्वकम् ॥
तत्र स्थित्वैव सा व्यापत्त्रैलोक्यं संपदात्मना
tato ratnākaraḥ svasmācchrījaneranubhāvataḥ ||
babhūvānvarthasaṃjño vai saṃpūrṇakṣayaratnavān
||42||ततो रत्नाकरः स्वस्माच्छ्रीजनेरनुभावतः ॥
बभूवान्वर्थसंज्ञो वै संपूर्णक्षयरत्नवान्
caturvidhairbahurasaiḥ sadannairamṛtopamaiḥ ||
sarvānsamāgatāṃstatra tarpayāmāsa sādaram
||43||चतुर्विधैर्बहुरसैः सदन्नैरमृतोपमैः ॥
सर्वान्समागतांस्तत्र तर्पयामास सादरम्
anarghyāṇi ca vastrāṇi ratnabhūṣāḥ paricchadān ||
devādibhyo dadau prītyā sarvebhyopi pṛthakpṛthak
||44||अनर्घ्याणि च वस्त्राणि रत्नभूषाः परिच्छदान् ॥
देवादिभ्यो ददौ प्रीत्या सर्वेभ्योपि पृथक्पृथक्
jāmātustuṣṭaye svasya tadīyebhyastadāmbudheḥ ||
nāsītkimapyadeyaṃ vai ghanavaddhanavarṣiṇaḥ
||45||जामातुस्तुष्टये स्वस्य तदीयेभ्यस्तदाम्बुधेः ॥
नासीत्किमप्यदेयं वै घनवद्धनवर्षिणः
bhagavānapi taddattaṃ yautakaṃ ca dhanaṃ bahu ||
brāhmaṇebhyaḥ pradāyaiva śriyā saha tirodadhe
||46||भगवानपि तद्दत्तं यौतकं च धनं बहु ॥
ब्राह्मणेभ्यः प्रदायैव श्रिया सह तिरोदधे
lakṣmīnārāyaṇābhyāṃ te bhṛśamānanditāḥ surāḥ ||
indrādayo divaṃ jagmuḥ svaṃsvaṃ dhāmā'pare yayuḥ
||47||लक्ष्मीनारायणाभ्यां ते भृशमानन्दिताः सुराः ॥
इन्द्रादयो दिवं जग्मुः स्वंस्वं धामाऽपरे ययुः
adhikāraṃ ca saṃprāpya yathāpūrvaṃ nijaṃnijam ||
sarvepi sukhino jātāḥ prasādātkamalāpateḥ
||48||अधिकारं च संप्राप्य यथापूर्वं निजंनिजम् ॥
सर्वेपि सुखिनो जाताः प्रसादात्कमलापतेः
mandaraṃ ca giriṃ tārkṣyaḥ punarbhagavadājñayā ||
svasthānaṃ samupānīya sthāpayāmāsa līlayā
||49||मन्दरं च गिरिं तार्क्ष्यः पुनर्भगवदाज्ञया ॥
स्वस्थानं समुपानीय स्थापयामास लीलया
evamindreṇa brahmarṣe naṣṭā brāhmaṇaśāpataḥ ||
upalabdhā punaḥ saṃpannārāyaṇaprasādataḥ
||50||एवमिन्द्रेण ब्रह्मर्षे नष्टा ब्राह्मणशापतः ॥
उपलब्धा पुनः संपन्नारायणप्रसादतः
ya etāṃ śṛṇuyātpuṇyāṃ kathāṃ bhagavato mune ||
kīrtayetprayato vāpi saṃpadaṃ prāpnuto hi tau
||51||य एतां शृणुयात्पुण्यां कथां भगवतो मुने ॥
कीर्तयेत्प्रयतो वापि संपदं प्राप्नुतो हि तौ
gṛhiṇāṃ dhanasiddhiḥ syāttyāgināṃ ca yathepsitā ||
bhaktijñānavirāgāderbhavetsiddhiranena vai
||52||गृहिणां धनसिद्धिः स्यात्त्यागिनां च यथेप्सिता ॥
भक्तिज्ञानविरागादेर्भवेत्सिद्धिरनेन वै
iti te kathitaṃ brahmanyathendraḥ prāpa saṃpadam ||
nāradopi yathā śvetaṃ dvīpaṃ sa gatavānṛṣiḥ ||
tatte sarvaṃ pravakṣyāmi śṛṇuṣvaikena caitasā
||53||इति ते कथितं ब्रह्मन्यथेन्द्रः प्राप संपदम् ॥
नारदोपि यथा श्वेतं द्वीपं स गतवानृषिः ॥
तत्ते सर्वं प्रवक्ष्यामि शृणुष्वैकेन चैतसा
iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye lakṣmīnārāyaṇastutinirūpaṇaṃ nāma pañcadaśo'dhyāyaḥ || 15 ||