kaṃṭeśvaramāhātmyavarṇanam
śrīmahādeva uvāca
catuḥpaṃcāśataṃ viddhi devaṃ kaṃṭeśvaraṃ priye ||
yasya darśanamātreṇa kṛtakṛtyo naro bhaveta
||1||चतुःपंचाशतं विद्धि देवं कंटेश्वरं प्रिये ॥
यस्य दर्शनमात्रेण कृतकृत्यो नरो भवेत
ādyakalpe purā devi rājābhūtsatyavikramaḥ ||
sa śatrubhirjitaḥ saṃkhye hṛtakośo'tiduḥkhitaḥ
||2||आद्यकल्पे पुरा देवि राजाभूत्सत्यविक्रमः ॥
स शत्रुभिर्जितः संख्ये हृतकोशोऽतिदुःखितः
vanaṃ jagāma gahanamekākī śramakarśitaḥ ||
tatrāśramaṃ dadarśātha vasiṣṭhasya mahātmanaḥ
||3||वनं जगाम गहनमेकाकी श्रमकर्शितः ॥
तत्राश्रमं ददर्शाथ वसिष्ठस्य महात्मनः
tenarṣiṇā vasiṣṭhena dṛṣṭamātraḥ sa bhūpatiḥ ||
pūjito viṣṭarādyena rājārheṇa ca sādaram
||4||तेनर्षिणा वसिष्ठेन दृष्टमात्रः स भूपतिः ॥
पूजितो विष्टराद्येन राजार्हेण च सादरम्
jñātvā tapaḥprabhāvena sūryavaṃśodbhavaṃ nṛpam ||
papracchāgamanaṃ devi kuśalaṃ ca punaḥ punaḥ
||5||ज्ञात्वा तपःप्रभावेन सूर्यवंशोद्भवं नृपम् ॥
पप्रच्छागमनं देवि कुशलं च पुनः पुनः
sa nṛpaḥ kathayāmāsa vasiṣṭhāya suduḥkhitaḥ ||
rājyaṃ ca sakalaṃ brahmanhṛtaṃ vidveṣibhirmama
||6||स नृपः कथयामास वसिष्ठाय सुदुःखितः ॥
राज्यं च सकलं ब्रह्मन्हृतं विद्वेषिभिर्मम
tvāmahaṃ śaraṇaṃ prāpto duḥkhaikāyatano yataḥ ||
niṣkaṇṭakaṃ kathaṃ rājyaṃ bhaviṣyati punaḥ prabho ||
upadeśapradānena prasādaṃ kartumarhasi
||7||त्वामहं शरणं प्राप्तो दुःखैकायतनो यतः ॥
निष्कण्टकं कथं राज्यं भविष्यति पुनः प्रभो ॥
उपदेशप्रदानेन प्रसादं कर्तुमर्हसि
tasya tadvacanaṃ śrutvā vasiṣṭho bhagavānṛṣiḥ ||
dhyātvā ca kathayāmāsa bahukautū halānvitaḥ
||8||तस्य तद्वचनं श्रुत्वा वसिष्ठो भगवानृषिः ॥
ध्यात्वा च कथयामास बहुकौतू हलान्वितः
mahākālavanaṃ bhūpa vraja tvaṃ kāryasiddhaye ||
divyā nadī vane tatra viśrutā bhuvanatraye
||9||महाकालवनं भूप व्रज त्वं कार्यसिद्धये ॥
दिव्या नदी वने तत्र विश्रुता भुवनत्रये
tasyāstīre śubhaṃ liṃgaṃ pṛthukeśvara dakṣiṇe ||
drakṣyase nṛpaśārdūla tapasyaṃtaṃ ca tāpasam ||
asthicarmāvaśeṣaṃ tu cīravalkaladhāriṇam
||10||तस्यास्तीरे शुभं लिंगं पृथुकेश्वर दक्षिणे ॥
द्रक्ष्यसे नृपशार्दूल तपस्यंतं च तापसम् ॥
अस्थिचर्मावशेषं तु चीरवल्कलधारिणम्
vacanāttasya viprasya vasiṣṭhasya mahātmanaḥ ||
jagāma sahasā rājā mahākālavanaṃ śubham
||11||वचनात्तस्य विप्रस्य वसिष्ठस्य महात्मनः ॥
जगाम सहसा राजा महाकालवनं शुभम्
dadarśa tāpasaṃ tatra ciraṃjīvinamavyayam ||
upavāsakṛtakṣāmaṃ dvādaśādityavarcasam
||12||ददर्श तापसं तत्र चिरंजीविनमव्ययम् ॥
उपवासकृतक्षामं द्वादशादित्यवर्चसम्
tāpasena nṛpo dṛṣṭo mitro'yaṃ mama vallabhaḥ ||
prāpto rājyaparibhraṣṭo jñātvā vacanamabravīt
||13||तापसेन नृपो दृष्टो मित्रोऽयं मम वल्लभः ॥
प्राप्तो राज्यपरिभ्रष्टो ज्ञात्वा वचनमब्रवीत्
ehyehi nṛpaśārdūla diṣṭyā prāpto'si meṃ'tike ||
ityuktvā tāpasenaiva huṃkāraśca kṛtastadā
||14||एह्येहि नृपशार्दूल दिष्ट्या प्राप्तोऽसि मेंऽतिके ॥
इत्युक्त्वा तापसेनैव हुंकारश्च कृतस्तदा
taddhuṃkārāttu pātālaṃ bhittvā paṃca ca kanyakāḥ ||
niryayuḥ kāṃcanaṃ pīṭhamekā tāsāṃ pragṛhya vai
||15||तद्धुंकारात्तु पातालं भित्त्वा पंच च कन्यकाः ॥
निर्ययुः कांचनं पीठमेका तासां प्रगृह्य वै
bhṛṃgāraṃ tu gṛhītvānyā niḥsṛtā jalasaṃbhṛtam ||
pādaprakṣālanārthāya tṛtīyā samupasthitā
||16||भृंगारं तु गृहीत्वान्या निःसृता जलसंभृतम् ॥
पादप्रक्षालनार्थाय तृतीया समुपस्थिता
anye dve vyajane gṛhya pārśvābhyāṃ ca vyavasthite ||
tato huṃkāramakarotpunareva mahātapāḥ
||17||अन्ये द्वे व्यजने गृह्य पार्श्वाभ्यां च व्यवस्थिते ॥
ततो हुंकारमकरोत्पुनरेव महातपाः
tena huṃkāraśabdena devalokātsamāgatam ||
dṛṣṭvā cāpsarasāṃ saṃghaṃ nṛtyagītamano haram
||18||तेन हुंकारशब्देन देवलोकात्समागतम् ॥
दृष्ट्वा चाप्सरसां संघं नृत्यगीतमनो हरम्
anaṃtaraṃ dadarśātha liṃgaṃ jyotiṣkaraṃ param ||
utpannaṃ ca jagadyasmim̐llīyate sacarācaram
||19||अनंतरं ददर्शाथ लिंगं ज्योतिष्करं परम् ॥
उत्पन्नं च जगद्यस्मिँल्लीयते सचराचरम्
taddṛṣṭvā vismayāviṣṭo babhūva nṛpasattamaḥ ||
praṇamya śirasā vipraṃ kimidaṃ dvijasattama
||20||तद्दृष्ट्वा विस्मयाविष्टो बभूव नृपसत्तमः ॥
प्रणम्य शिरसा विप्रं किमिदं द्विजसत्तम
evaṃ pṛṣṭo nṛpeṇātha sa vipro vākyamabravīt ||
saptajanmāni rājeṃdra tvayāhaṃ paritoṣitaḥ
||21||एवं पृष्टो नृपेणाथ स विप्रो वाक्यमब्रवीत् ॥
सप्तजन्मानि राजेंद्र त्वयाहं परितोषितः
ataste darśitā māyā tapasā duṣkareṇa tu ||
liṃgasyāsya prabhāveṇa paśya me tapaso balam
||22||अतस्ते दर्शिता माया तपसा दुष्करेण तु ॥
लिंगस्यास्य प्रभावेण पश्य मे तपसो बलम्
huṃkāreṇa kṛtā pṛthvī jalapūrṇā tu tatkṣaṇāt ||
huṃkārācca jalaṃ grastaṃ mukhādagnirajāyata
||23||हुंकारेण कृता पृथ्वी जलपूर्णा तु तत्क्षणात् ॥
हुंकाराच्च जलं ग्रस्तं मुखादग्निरजायत
huṃkārātpṛthivī sarvā jātā vahnimayī tadā ||
saṃhṛtya tatkṣaṇādvahniṃ mukhādvāyurviniryayau
||24||हुंकारात्पृथिवी सर्वा जाता वह्निमयी तदा ॥
संहृत्य तत्क्षणाद्वह्निं मुखाद्वायुर्विनिर्ययौ
huṃkāreṇa kṛtaṃ sarvaṃ tatkṣaṇādeva pārvati ||
na diśaḥ pradiśo vāpi na nakṣatragrahāstadā
||25||हुंकारेण कृतं सर्वं तत्क्षणादेव पार्वति ॥
न दिशः प्रदिशो वापि न नक्षत्रग्रहास्तदा
tato babhrāma tannāsti sa nṛpo vismayānvitaḥ ||
ciṃtayāmāsa sahasā kva liṃgaṃ kva ca tāpasaḥ
||26||ततो बभ्राम तन्नास्ति स नृपो विस्मयान्वितः ॥
चिंतयामास सहसा क्व लिंगं क्व च तापसः
evaṃ ciṃtayatastasya tataḥ śabdo mahānabhūt ||
tasmācchabdācca saṃjātaṃ puraṃ prākārasaṃvṛtam
||27||एवं चिंतयतस्तस्य ततः शब्दो महानभूत् ॥
तस्माच्छब्दाच्च संजातं पुरं प्राकारसंवृतम्
suharmyakakṣyāracitaṃ viśālaṃ viśuddhajāṃbūnadabhūṣitaṃ ca ||
divyairjanaiḥ sevitamātmavidbhirdadarśa rājā sahasā puraṃ tat
||28||सुहर्म्यकक्ष्यारचितं विशालं विशुद्धजांबूनदभूषितं च ॥
दिव्यैर्जनैः सेवितमात्मविद्भिर्ददर्श राजा सहसा पुरं तत्
bhūyobhavanmahāśabdastasmātstrīyugalaṃ vabhau ||
sitavastradharā caikā kṛṣṇavastradharā sitā
||29||भूयोभवन्महाशब्दस्तस्मात्स्त्रीयुगलं वभौ ॥
सितवस्त्रधरा चैका कृष्णवस्त्रधरा सिता
punaḥ śabdo babhūvātha tasmātpuruṣasattamaḥ ||
dviśirāḥ ṣaṇmukhaścaiva pādairdvādaśabhiryutaḥ
||30||पुनः शब्दो बभूवाथ तस्मात्पुरुषसत्तमः ॥
द्विशिराः षण्मुखश्चैव पादैर्द्वादशभिर्युतः
punaḥ śabdācca saṃjajñe puruṣaḥ saptadhā gataḥ ||
saṃhṛtaṃ hi punastacca darśayitvā dvijena tu ||
proktamitthaṃ viśālākṣi jātakaṃṭakitaṃ nṛpam
||31||पुनः शब्दाच्च संजज्ञे पुरुषः सप्तधा गतः ॥
संहृतं हि पुनस्तच्च दर्शयित्वा द्विजेन तु ॥
प्रोक्तमित्थं विशालाक्षि जातकंटकितं नृपम्
paśya lokamimaṃ mahyaṃ tapasā nirmitaṃ nṛpa ||
tvatpriyārthamayaṃ loko darśitaste nṛpottama
||32||पश्य लोकमिमं मह्यं तपसा निर्मितं नृप ॥
त्वत्प्रियार्थमयं लोको दर्शितस्ते नृपोत्तम
evamuktastadā tena tāpasena narādhipaḥ ||
vismayāpannahṛdayaḥ papraccha prayataḥ sudhīḥ
||33||एवमुक्तस्तदा तेन तापसेन नराधिपः ॥
विस्मयापन्नहृदयः पप्रच्छ प्रयतः सुधीः
bhagavansitakṛṣṇe dve ke striyau dvijasa ttama ||
ko'sau dvādaśapādvipra dviśirāḥ ṣaṇmukhaḥ punaḥ
||34||भगवन्सितकृष्णे द्वे के स्त्रियौ द्विजस त्तम ॥
कोऽसौ द्वादशपाद्विप्र द्विशिराः षण्मुखः पुनः
kaścāsau puruṣo brahmanya ekaḥ saptadhā'bhavat ||
tasya tadvacanaṃ śrutvā kathayāmāsa tāpasaḥ
||38||कश्चासौ पुरुषो ब्रह्मन्य एकः सप्तधाऽभवत् ॥
तस्य तद्वचनं श्रुत्वा कथयामास तापसः
ete striyau tvayā dṛṣṭe sitakṛṣṇe nṛpottama ||
te ca rātryahanī prokte brahmaṇā nirmite purā
||36||एते स्त्रियौ त्वया दृष्टे सितकृष्णे नृपोत्तम ॥
ते च रात्र्यहनी प्रोक्ते ब्रह्मणा निर्मिते पुरा
śīrṣadvayaṃ ca yaddṛṣṭaṃ te'yane dve prakīrtite ||
mukhāni yāni dṛṣṭāni ṣaṭ ca te hyṛtavaḥ smṛtāḥ ||
pādā dvādaśa ye dṛṣṭā māsā dvādaśa te smṛtāḥ
||37||शीर्षद्वयं च यद्दृष्टं तेऽयने द्वे प्रकीर्तिते ॥
मुखानि यानि दृष्टानि षट् च ते ह्यृतवः स्मृताः ॥
पादा द्वादश ये दृष्टा मासा द्वादश ते स्मृताः
yaḥ pumānsaptadhā jāta ekībhūto nareśvara ||
sa samudrastu vijñeyaḥ saptadhaiko vyavasthitaḥ
||388||यः पुमान्सप्तधा जात एकीभूतो नरेश्वर ॥
स समुद्रस्तु विज्ञेयः सप्तधैको व्यवस्थितः
etatsaṃvatsaraṃ cakraṃ tvatpriyārthaṃ nidarśitam ||
evaṃ viditvā rājeṃdra na śokaṃ kartumarhasi
||39||एतत्संवत्सरं चक्रं त्वत्प्रियार्थं निदर्शितम् ॥
एवं विदित्वा राजेंद्र न शोकं कर्तुमर्हसि
sarvo vinaśvaro lokaḥ sadevāsuramānuṣaḥ ||
mayā dṛṣṭo hi bahuśo liṃgasyāsya prabhāvataḥ
||40||सर्वो विनश्वरो लोकः सदेवासुरमानुषः ॥
मया दृष्टो हि बहुशो लिंगस्यास्य प्रभावतः
kuru śatruvināśāya liṃga syāsya ca darśanam ||
rājyaṃ niṣkaṇṭakaṃ rājanbhavipyati na saṃśayaḥ
||41||कुरु शत्रुविनाशाय लिंग स्यास्य च दर्शनम् ॥
राज्यं निष्कण्टकं राजन्भविप्यति न संशयः
evamuktastadā rājā dṛṣṭavām̐lliṃgamuttamam ||
darśanāttasya liṃgasya kaṇṭakā ye mahībhṛtaḥ ||
vidveṣiṇo mṛtāste'pi śrutāstena mahībhṛtā
||42||एवमुक्तस्तदा राजा दृष्टवाँल्लिंगमुत्तमम् ॥
दर्शनात्तस्य लिंगस्य कण्टका ये महीभृतः ॥
विद्वेषिणो मृतास्तेऽपि श्रुतास्तेन महीभृता
gatastaṃ viṣayaṃ rājā cakravartī babhūva ha ||
liṃgasyāsya prabhāvena rājyaṃ kṛtvā mahādhanaiḥ
||43||गतस्तं विषयं राजा चक्रवर्ती बभूव ह ॥
लिंगस्यास्य प्रभावेन राज्यं कृत्वा महाधनैः
yajñaiśca vividhairiṣṭvā paraṃ nirvāṇamāptavān ||
tāpasena śrutaṃ sarvaṃ dṛṣṭaṃ dhyānena tena vai
||44||यज्ञैश्च विविधैरिष्ट्वा परं निर्वाणमाप्तवान् ॥
तापसेन श्रुतं सर्वं दृष्टं ध्यानेन तेन वै
labdhaṃ niṣkaṇṭakaṃ rājyaṃ liṃgasyāsya ca darśanāt ||
mama mitreṇa sahasā rājyabhraṣṭena tena vai
||45||लब्धं निष्कण्टकं राज्यं लिंगस्यास्य च दर्शनात् ॥
मम मित्रेण सहसा राज्यभ्रष्टेन तेन वै
ato nāma suvikhyātaṃ kaṇṭeśvara iti kṣitau ||
bhaviṣyati na saṃdeho darśanādrājyadāyakaḥ
||46||अतो नाम सुविख्यातं कण्टेश्वर इति क्षितौ ॥
भविष्यति न संदेहो दर्शनाद्राज्यदायकः
adyaprabhṛti paśyanti devaṃ kaṇṭeśvaraṃ śivam ||
teṣāṃ ca kaṇṭakāḥ sadyo vinaśyanti na saṃśayaḥ
||47||अद्यप्रभृति पश्यन्ति देवं कण्टेश्वरं शिवम् ॥
तेषां च कण्टकाः सद्यो विनश्यन्ति न संशयः
naimiṣetha kurukṣetre gaṃgādvāre ca puṣkare ||
snānātsaṃsevanādvāpi yatpuṇyaṃ ca bhaviṣyati ||
tatpuṇyaṃ bhavitā samyakchrīgaṇeśvaradarśanāt
||48||नैमिषेथ कुरुक्षेत्रे गंगाद्वारे च पुष्करे ॥
स्नानात्संसेवनाद्वापि यत्पुण्यं च भविष्यति ॥
तत्पुण्यं भविता सम्यक्छ्रीगणेश्वरदर्शनात्
gṛhiṇo liṃgino vāpi ye paśyaṃti yatavratāḥ ||
devaṃ kaṇṭeśvaraṃ bhaktyā teṣāṃ siddhirbhaviṣyati
||49||गृहिणो लिंगिनो वापि ये पश्यंति यतव्रताः ॥
देवं कण्टेश्वरं भक्त्या तेषां सिद्धिर्भविष्यति
janmāṃtarasahasreṇa yatpāpaṃ pūrvasaṃcitam ||
tatsarvaṃ yāsyati kṣipraṃ śrīkaṇṭeśvaradarśanāt
||50||जन्मांतरसहस्रेण यत्पापं पूर्वसंचितम् ॥
तत्सर्वं यास्यति क्षिप्रं श्रीकण्टेश्वरदर्शनात्
dattaṃ japtaṃ hutaṃ ceṣṭaṃ tapastaptaṃ kṛtaṃ ca yat ||
dhyānamadhyayanaṃ caiva sarvaṃ bhavati cākṣayam
||51||दत्तं जप्तं हुतं चेष्टं तपस्तप्तं कृतं च यत् ॥
ध्यानमध्ययनं चैव सर्वं भवति चाक्षयम्
evaṃ bruvāṇaṃ taṃ vipraṃ tāpasaṃ saṃśitavratam ||
liṃgenoktaṃ viśālākṣi tuṣṭena varapūrvakam
||52||एवं ब्रुवाणं तं विप्रं तापसं संशितव्रतम् ॥
लिंगेनोक्तं विशालाक्षि तुष्टेन वरपूर्वकम्
jarārogavinirmuktaḥ sarvaśokavivarjitaḥ ||
bhaviṣyati gaṇādhyakṣo varadaḥ sarvapūjitaḥ ||
avadhyaścāpi sarveṣāṃ yogaiśvaryasamanvitaḥ
||53||जरारोगविनिर्मुक्तः सर्वशोकविवर्जितः ॥
भविष्यति गणाध्यक्षो वरदः सर्वपूजितः ॥
अवध्यश्चापि सर्वेषां योगैश्वर्यसमन्वितः
evamukto'tha liṃgena tāpaso gaṇatāṃ gataḥ ||
gaṇaiḥ parivṛto devi mama pārśvamupāgataḥ
||54||एवमुक्तोऽथ लिंगेन तापसो गणतां गतः ॥
गणैः परिवृतो देवि मम पार्श्वमुपागतः
andhakena purā yuddhe siṃhanādo yadā kṛtaḥ ||
tadā devi madīyaṃ tu jātaṃ kaṇṭakitaṃ vapuḥ
||55||अन्धकेन पुरा युद्धे सिंहनादो यदा कृतः ॥
तदा देवि मदीयं तु जातं कण्टकितं वपुः
utpannaṃ ca tadā liṃgamaśeṣārivināśanam ||
devānāṃ kaṇṭakā ye ca dagdhā liṃgāgninā yataḥ ||
ataḥ kaṃṭeśvaro devo vikhyāto bhuvanatraye
||56||उत्पन्नं च तदा लिंगमशेषारिविनाशनम् ॥
देवानां कण्टका ये च दग्धा लिंगाग्निना यतः ॥
अतः कंटेश्वरो देवो विख्यातो भुवनत्रये
eṣa te kathito devi prabhāvaḥ pāpanāśanaḥ ||
kaṃṭeśvarasya devasya śṛṇu siṃheśvaraṃ param
||57||एष ते कथितो देवि प्रभावः पापनाशनः ॥
कंटेश्वरस्य देवस्य शृणु सिंहेश्वरं परम्
iti śrīskāṃde mahāpurāṇa ekaśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmye kaṃṭeśvaramāhātmyavarṇanaṃnāma catuḥpañcāśattamo'dhyāyaḥ || 54 ||