akrūreśvaramekonacatvāriṃśattamaṃ śṛṇu
hara uvāca
akrūreśvaramekonacatvāriṃśattamaṃ śṛṇu ||
yasya darśanamātreṇa subuddhirjāyate nṛṇām
||1||अक्रूरेश्वरमेकोनचत्वारिंशत्तमं शृणु ॥
यस्य दर्शनमात्रेण सुबुद्धिर्जायते नृणाम्
purā tvayaiva kalpādau parayā śaktirūpayā ||
kṛtaṃ kṛtsnaṃ varārohe trailokyaṃ sacarācaram
||2||पुरा त्वयैव कल्पादौ परया शक्तिरूपया ॥
कृतं कृत्स्नं वरारोहे त्रैलोक्यं सचराचरम्
tatastvaṃ saṃstutā devaiḥ sakiṃnaramahoragaiḥ ||
pradakṣiṇāṃ prakurvati gaṇā nānāvidhāstu te
||3||ततस्त्वं संस्तुता देवैः सकिंनरमहोरगैः ॥
प्रदक्षिणां प्रकुर्वति गणा नानाविधास्तु ते
namaskāraṃ prakurvati stotraṃ kurvaṃti cāpare ||
na karoti namaskārameko bhṛṃgiriṭistadā
||4||नमस्कारं प्रकुर्वति स्तोत्रं कुर्वंति चापरे ॥
न करोति नमस्कारमेको भृंगिरिटिस्तदा
krūrāṃ buddhiṃ samāsādya garveṇatīva garvitaḥ
||5||क्रूरां बुद्धिं समासाद्य गर्वेणतीव गर्वितः
eko devo mahādevaḥ striyā kimanayā mama ||
yadā nāyāti te pārśvaṃ tadā proktastvayā gataḥ
||6||एको देवो महादेवः स्त्रिया किमनया मम ॥
यदा नायाति ते पार्श्वं तदा प्रोक्तस्त्वया गतः
kasmānna kuruṣe pūjāṃ pradakṣiṇamatho stutim ||
madbhakto madadhīno'si mama putro mayā kṛtaḥ ||
itthaṃbhūtagaṇeśa tvaṃ kiṃ vai laulyena varttase
||7||कस्मान्न कुरुषे पूजां प्रदक्षिणमथो स्तुतिम् ॥
मद्भक्तो मदधीनोऽसि मम पुत्रो मया कृतः ॥
इत्थंभूतगणेश त्वं किं वै लौल्येन वर्त्तसे
iti bhṛṃgiriṭiḥ śrutvā kuddhastvāmāha garvitaḥ ||
nāhaṃ pārvati te putraḥ putro'haṃ śaṃkarasya tu
||8||इति भृंगिरिटिः श्रुत्वा कुद्धस्त्वामाह गर्वितः ॥
नाहं पार्वति ते पुत्रः पुत्रोऽहं शंकरस्य तु
eṣa eva ca me mātā eṣa eva ca me pitā ||
evaṃ rātridinaṃ yāmi śaraṇaṃ parameṣṭhinam
||9||एष एव च मे माता एष एव च मे पिता ॥
एवं रात्रिदिनं यामि शरणं परमेष्ठिनम्
tvamapyasyaiva śaraṇaṃ nanu pārvati saṃsthitā ||
yadi ca tvāmahaṃ vaṃde tadvaṃde sakalāngaṇān
||10||त्वमप्यस्यैव शरणं ननु पार्वति संस्थिता ॥
यदि च त्वामहं वंदे तद्वंदे सकलान्गणान्
iti bhṛṃgiriṭeḥ śrutvā vākyaṃ kupitayā tvayā ||
tasyoktaṃ pramatheśasya bhīru bhṛṃgiriṭeridam
||11||इति भृंगिरिटेः श्रुत्वा वाक्यं कुपितया त्वया ॥
तस्योक्तं प्रमथेशस्य भीरु भृंगिरिटेरिदम्
suto bhūtvā bhavānkasmādadākṣiṇyaṃ bravīṣi mām ||
tvaṅmāṃsaśoṇitāṃtraṃ ca mātṛkaṃ tanayasya tu
||12||सुतो भूत्वा भवान्कस्माददाक्षिण्यं ब्रवीषि माम् ॥
त्वङ्मांसशोणितांत्रं च मातृकं तनयस्य तु
nakhadaṃtāsthisaṃghātaḥ śiśnaṃ vākca śirastathā ||
tathaiva śukraṃ gaṇapa paitṛkaṃ tu śarīrakam
||13||नखदंतास्थिसंघातः शिश्नं वाक्च शिरस्तथा ॥
तथैव शुक्रं गणप पैतृकं तु शरीरकम्
iti bhṛṃgiriṭiḥ śrutvā sadyo yogabalena tu ||
māṃsādi tyaktavānsarvaṃ mātṛkaṃ bhāgameva hi
||14||इति भृंगिरिटिः श्रुत्वा सद्यो योगबलेन तु ॥
मांसादि त्यक्तवान्सर्वं मातृकं भागमेव हि
tataḥ prabhṛti vāmoru nakhadaṃtāsthināsikaḥ ||
sa ca krūrāṃ matiṃ kṛtvā krodhasaṃraktalocanaḥ
||15||ततः प्रभृति वामोरु नखदंतास्थिनासिकः ॥
स च क्रूरां मतिं कृत्वा क्रोधसंरक्तलोचनः
tvāṃ parityajya duḥkhārtta ājagāma mamāṃtikam ||
atha tvayā tadā śapto gaṇo bhṛṃgiriṭiḥ priye
||16||त्वां परित्यज्य दुःखार्त्त आजगाम ममांतिकम् ॥
अथ त्वया तदा शप्तो गणो भृंगिरिटिः प्रिये
krūrā buddhiḥ kṛtā yasmāttvayā kumatinā bhṛśam ||
tasmāttvaṃ mānuṣe loke gamiṣyasi na saṃśayaḥ
||17||क्रूरा बुद्धिः कृता यस्मात्त्वया कुमतिना भृशम् ॥
तस्मात्त्वं मानुषे लोके गमिष्यसि न संशयः
ityuktastu tvayā devi gaṇo bhṛṃgiriṭistathā ||
papāta mānuṣaṃ lokaṃ puṇyāṃte sukṛtī yathā
||18||इत्युक्तस्तु त्वया देवि गणो भृंगिरिटिस्तथा ॥
पपात मानुषं लोकं पुण्यांते सुकृती यथा
sa gatvā puṣkaradvīpaṃ tapase bhāvitātmavān ||
tatraikapādūrddhvabhujo daśapadmānyavasthitaḥ ||
dagdhībhūtaṃ ca tapasā jagadvai duṣkareṇa tu
||19||स गत्वा पुष्करद्वीपं तपसे भावितात्मवान् ॥
तत्रैकपादूर्द्ध्वभुजो दशपद्मान्यवस्थितः ॥
दग्धीभूतं च तपसा जगद्वै दुष्करेण तु
tato brahmā ca viṣṇuśca śakraśca tridaśaiḥ saha ||
vayaṃ ca cārujaghane tatsamīpaṃ samāgataḥ
||20||ततो ब्रह्मा च विष्णुश्च शक्रश्च त्रिदशैः सह ॥
वयं च चारुजघने तत्समीपं समागतः
upagamya tatastasya kathitaṃ purato mayā ||
alaṃ krūreṇa tapasā lokasyotsādanena vai
||21||उपगम्य ततस्तस्य कथितं पुरतो मया ॥
अलं क्रूरेण तपसा लोकस्योत्सादनेन वै
trailokyamapi niḥsaṃjñaṃ jātamevaṃ sthite tvayi ||
saṃharasva tapo ghoraṃ lokasaṃtāpanaṃ mahat
||22||त्रैलोक्यमपि निःसंज्ञं जातमेवं स्थिते त्वयि ॥
संहरस्व तपो घोरं लोकसंतापनं महत्
prārthyatāṃ pārvatī putra sā dāsyati varaṃ ca te ||
asyāḥ prasādānmuktiste śāpāccaiva bhaviṣyati ||
evamuktastadā tena prārthitā tvaṃ maheśvari ||
gaṇena bhṛṃgiriṭinā bhaktinamreṇa sādarāt
||24||प्रार्थ्यतां पार्वती पुत्र सा दास्यति वरं च ते ॥
अस्याः प्रसादान्मुक्तिस्ते शापाच्चैव भविष्यति ॥
एवमुक्तस्तदा तेन प्रार्थिता त्वं महेश्वरि ॥
गणेन भृंगिरिटिना भक्तिनम्रेण सादरात्
tvayā proktaṃ viśālākṣi putra gaccha mamājñayā ||
mahākālavane ramye tatrā'krūro bhaviṣyasi
||25||त्वया प्रोक्तं विशालाक्षि पुत्र गच्छ ममाज्ञया ॥
महाकालवने रम्ये तत्राऽक्रूरो भविष्यसि
punaḥ prāpsyasi kailāsaṃ siddhagaṃdharvasevitam ||
aṃkapādāgrato liṃgaṃ saptakalpānugaṃ mahat ||
yasya darśanamātreṇa śubhā buddhiḥ prajāyate
||26||पुनः प्राप्स्यसि कैलासं सिद्धगंधर्वसेवितम् ॥
अंकपादाग्रतो लिंगं सप्तकल्पानुगं महत् ॥
यस्य दर्शनमात्रेण शुभा बुद्धिः प्रजायते
kṛtaghnā nāstikāḥ krūrā ye ca viśvāsaghātakāḥ ||
mahāpātakino ye ca ye ca śāpavaśaṃ gatāḥ ||
darśanāttasya liṃgasya te'pi svarga bhujo narāḥ
||27||कृतघ्ना नास्तिकाः क्रूरा ये च विश्वासघातकाः ॥
महापातकिनो ये च ये च शापवशं गताः ॥
दर्शनात्तस्य लिंगस्य तेऽपि स्वर्ग भुजो नराः
krūrāṃ buddhiṃ samāsādya kaṃsaṃ hatvā ca keśihā ||
baladevena sahitastyaktvā tāṃ mathurāṃ purīm
||28||क्रूरां बुद्धिं समासाद्य कंसं हत्वा च केशिहा ॥
बलदेवेन सहितस्त्यक्त्वा तां मथुरां पुरीम्
mahākālavanaṃ gatvā toṣa yitvā maheśvaram ||
akrūratvaṃ ca saṃprāptaṃ kīrttirlabdhā ca śāśvatī
||29||महाकालवनं गत्वा तोष यित्वा महेश्वरम् ॥
अक्रूरत्वं च संप्राप्तं कीर्त्तिर्लब्धा च शाश्वती
tvadīyaṃ vacanaṃ śrutvā gaṇo bhṛṃgiriṭistadā ||
tatheti pratyayī jāto mahā kālavanaṃ gataḥ ||
devamārādhayāmāsa tapasā duṣkareṇa tu
||30||त्वदीयं वचनं श्रुत्वा गणो भृंगिरिटिस्तदा ॥
तथेति प्रत्ययी जातो महा कालवनं गतः ॥
देवमाराधयामास तपसा दुष्करेण तु
etasminnaṃtare devi liṃgamadhyāttvamutthitā ||
arddhāṃgaṃ māmakaṃ kṛtvā svakīyāṃgamathā rddhataḥ ||
phaṇīṃdrabaddhajūṭārddhamarddhadhamillabhūṣitam
||31||एतस्मिन्नंतरे देवि लिंगमध्यात्त्वमुत्थिता ॥
अर्द्धांगं मामकं कृत्वा स्वकीयांगमथा र्द्धतः ॥
फणींद्रबद्धजूटार्द्धमर्द्धधमिल्लभूषितम्
patravallīvicitrārdhamarddhacaṃdravirājitam ||
muktāhāranibaddhārddhamarddhaṃ sarpaiśca veṣṭitam
||32||पत्रवल्लीविचित्रार्धमर्द्धचंद्रविराजितम् ॥
मुक्ताहारनिबद्धार्द्धमर्द्धं सर्पैश्च वेष्टितम्
tato bhṛṃgiriṭirdevi dṛṣṭvā tanmahadadrutam ||
ciṃtayāmāsa hṛdaye mayā'jñānādanuṣṭhitam
||33||ततो भृंगिरिटिर्देवि दृष्ट्वा तन्महदद्रुतम् ॥
चिंतयामास हृदये मयाऽज्ञानादनुष्ठितम्
umā ca śaṃkaraścaiva dehamekaṃ sanātanam ||
ekā mūrttiranirdeśyā dvidhā bhedena dṛśyate
||34||उमा च शंकरश्चैव देहमेकं सनातनम् ॥
एका मूर्त्तिरनिर्देश्या द्विधा भेदेन दृश्यते
evaṃ ciṃtayatastasya bhaktinamrasya pārvvati ||
proktaṃ tvayā prasannāhaṃ varaṃ varaya putraka
||35||एवं चिंतयतस्तस्य भक्तिनम्रस्य पार्व्वति ॥
प्रोक्तं त्वया प्रसन्नाहं वरं वरय पुत्रक
tenoktaṃ yadi tuṣṭāsi mātarmama maheśvari ||
asya liṃgasya māhātmyātkrūrā buddhirgatā mama
||36||तेनोक्तं यदि तुष्टासि मातर्मम महेश्वरि ॥
अस्य लिंगस्य माहात्म्यात्क्रूरा बुद्धिर्गता मम
akrūreśvaranāmāyaṃ devaḥ khyāto bhavatviti ||
tvaṃ devi sarvabhāvānāmekā kāraṇamucyate
||37||अक्रूरेश्वरनामायं देवः ख्यातो भवत्विति ॥
त्वं देवि सर्वभावानामेका कारणमुच्यते
tvaṃ mūrtā puṇyanicayā tvaṃ gatiḥ puṇyasevinām ||
pitā mātā suhṛdbandhustvamekā kāraṇaṃ param
||38||त्वं मूर्ता पुण्यनिचया त्वं गतिः पुण्यसेविनाम् ॥
पिता माता सुहृद्बन्धुस्त्वमेका कारणं परम्
kuru puṇyatamaṃ sthānaṃ brahmahatyādināśanam ||
bhuktidaṃ muktidaṃ caiva vāṃchitārthapradāyakam
||39||कुरु पुण्यतमं स्थानं ब्रह्महत्यादिनाशनम् ॥
भुक्तिदं मुक्तिदं चैव वांछितार्थप्रदायकम्
tatheti ca tvayā proktaṃ girā madhurayā tadā ||
yatte priyatamaṃ vatsa tatpūrvaṃ prakaromyaham
||40||तथेति च त्वया प्रोक्तं गिरा मधुरया तदा ॥
यत्ते प्रियतमं वत्स तत्पूर्वं प्रकरोम्यहम्
na me'sti duṣkaraṃ putra tvatkṛte kanakaprabha ||
asminsthāne tu ye devamakūreśvarasaṃjñakam ||
prasaṃgādapi paśyaṃti api pāparatā narāḥ ||
te'pyavaśyaṃ bhaviṣyaṃti tvatsamā niyataṃ gaṇāḥ
||41||न मेऽस्ति दुष्करं पुत्र त्वत्कृते कनकप्रभ ॥
अस्मिन्स्थाने तु ये देवमकूरेश्वरसंज्ञकम् ॥
प्रसंगादपि पश्यंति अपि पापरता नराः ॥
तेऽप्यवश्यं भविष्यंति त्वत्समा नियतं गणाः
bhaktyā stoṣyaṃti ye nāma liṃgasyāsya ca mānavāḥ ||
mānasaiḥ pātakairmuktā yāsyaṃti svargamakṣayam
||42||भक्त्या स्तोष्यंति ये नाम लिंगस्यास्य च मानवाः ॥
मानसैः पातकैर्मुक्ता यास्यंति स्वर्गमक्षयम्
snātvā tu vidhivatpūjāṃ yaḥ kariṣyati mānavaḥ ||
sa muktaḥ pātakaiḥ sarvaiḥ prāpsyate ravimaṃḍalam
||43||स्नात्वा तु विधिवत्पूजां यः करिष्यति मानवः ॥
स मुक्तः पातकैः सर्वैः प्राप्स्यते रविमंडलम्
āyurārogyamaiśvaryaṃ kāmamatra hi vāṃchitam ||
gosahasraphalaṃ cātra spṛṣṭvā prāpsyati mānavaḥ
||44||आयुरारोग्यमैश्वर्यं काममत्र हि वांछितम् ॥
गोसहस्रफलं चात्र स्पृष्ट्वा प्राप्स्यति मानवः
snātvā maṃdākinīkuṃḍe yo'kūreśvaramīśvaram ||
pūjayedvividhaiḥ puṣpairmahāpāpahatopi vā
||45||स्नात्वा मंदाकिनीकुंडे योऽकूरेश्वरमीश्वरम् ॥
पूजयेद्विविधैः पुष्पैर्महापापहतोपि वा
vimānaṃ divyamārūḍho yāvatkalpacatuṣṭayam ||
gaṃdharvairgīyamānastu so'pi svargaṃ gamiṣyati
||46||विमानं दिव्यमारूढो यावत्कल्पचतुष्टयम् ॥
गंधर्वैर्गीयमानस्तु सोऽपि स्वर्गं गमिष्यति
ityuktaḥ sa gaṇo devi matsamīpamupāgataḥ ||
śāpānmuktastvayā sārdhaṃ vismṛtā kiṃ varānane
||47||इत्युक्तः स गणो देवि मत्समीपमुपागतः ॥
शापान्मुक्तस्त्वया सार्धं विस्मृता किं वरानने
eṣa te kathito devi prabhāvaḥ pāpanāśanaḥ ||
akrūreśvaradevasya śṛṇu kuṃḍeśvaraṃ param
||48||एष ते कथितो देवि प्रभावः पापनाशनः ॥
अक्रूरेश्वरदेवस्य शृणु कुंडेश्वरं परम्
iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṅgamāhātmye'krūreśvaramāhātmyavarṇanaṃnāmai konacatvāriṃśo'dhyāyaḥ || 39 ||