guheśvaramāhātmyavarṇanam
śrīrudrauvāca
śṛṇu guheśvaraṃ liṃgaṃ dvitīyaṃ pāpanāśanam ||
yasya darśanamātreṇa jāyate siddhiruttamā
||1||शृणु गुहेश्वरं लिंगं द्वितीयं पापनाशनम् ॥
यस्य दर्शनमात्रेण जायते सिद्धिरुत्तमा
purā rāthaṃtare kalpe devadāruvane śubhe ||
ṛṣirmaṃkaṇakonāma vedavedāṃgapāragaḥ ||
yogābhyāsarato nityaṃ śāṃtidāṃtisamāsthitiḥ
||2||पुरा राथंतरे कल्पे देवदारुवने शुभे ॥
ऋषिर्मंकणकोनाम वेदवेदांगपारगः ॥
योगाभ्यासरतो नित्यं शांतिदांतिसमास्थितिः
siddhikāmastapastepe kathaṃ siddho bhavāmyaham ||
raktamayavikāroyaṃ kathaṃ yāsyati saṃkṣayam
||3||सिद्धिकामस्तपस्तेपे कथं सिद्धो भवाम्यहम् ॥
रक्तमयविकारोयं कथं यास्यति संक्षयम्
iti saṃciṃtya hṛdaye prārabdhaṃ tapa uttamam ||
bahūnyabdasahasrāṇi tasyātītāni pārvati
||4||इति संचिंत्य हृदये प्रारब्धं तप उत्तमम् ॥
बहून्यब्दसहस्राणि तस्यातीतानि पार्वति
kasmiṃścidatha kāle tu viddhasya parvatātmaje ||
karācchākaraso jātaḥ kuśāgreṇa tadaiva hi
||5||कस्मिंश्चिदथ काले तु विद्धस्य पर्वतात्मजे ॥
कराच्छाकरसो जातः कुशाग्रेण तदैव हि
sa ca dṛṣṭvā tadāścaryaṃ vismayaṃ paramaṃ gataḥ ||
mene siddhiṃ parāṃ prāptāṃ sagarvo vākyamabravīt
||6||स च दृष्ट्वा तदाश्चर्यं विस्मयं परमं गतः ॥
मेने सिद्धिं परां प्राप्तां सगर्वो वाक्यमब्रवीत्
aho tapaḥprabhāvo'yaṃ prāptā siddhirmayādya vai ||
mattulyo nāsti vai vipro yena siddhiḥ samāgatā
||7||अहो तपःप्रभावोऽयं प्राप्ता सिद्धिर्मयाद्य वै ॥
मत्तुल्यो नास्ति वै विप्रो येन सिद्धिः समागता
śarīraṃ kutsitaṃ cedaṃ malamūtreṇa saṃyutam ||
mantrasnāyuvasāpṛktamāṃsaśoṇitapūritam ||
harṣeṇa mahatā yuktaḥ sa nanartta dvijastathā
||8||शरीरं कुत्सितं चेदं मलमूत्रेण संयुतम् ॥
मन्त्रस्नायुवसापृक्तमांसशोणितपूरितम् ॥
हर्षेण महता युक्तः स ननर्त्त द्विजस्तथा
etasminnṛtyati vipre jagatsthāvara jaṃgamam ||
anṛtyadrāgasaṃyuktaṃ prabhāvāttasya vai muneḥ
||9||एतस्मिन्नृत्यति विप्रे जगत्स्थावर जंगमम् ॥
अनृत्यद्रागसंयुक्तं प्रभावात्तस्य वै मुनेः
na svādhyāyo vaṣaṭkāraḥ karmakāṃḍo na ca kvacit
||10||न स्वाध्यायो वषट्कारः कर्मकांडो न च क्वचित्
etasminnaṃtare devā brahmaviṣṇu puraḥsarāḥ ||
māmūcurvismitāḥ sarve nātha nṛtyaṃ tadā kuru
||11||एतस्मिन्नंतरे देवा ब्रह्मविष्णु पुरःसराः ॥
मामूचुर्विस्मिताः सर्वे नाथ नृत्यं तदा कुरु
ṛṣau maṃkaṇake deva nṛtyati nṛtyati sarvataḥ ||
sadevāsuramānuṣyaṃ sarvaṃ lokatrayaṃ vibho
||12||ऋषौ मंकणके देव नृत्यति नृत्यति सर्वतः ॥
सदेवासुरमानुष्यं सर्वं लोकत्रयं विभो
calitāḥ parvatāḥ sthānātkṣubhitā meghapaṃktayaḥ ||
śikharāṇi viśīryaṃte dharaṇī pīḍitā bhṛśam
||13||चलिताः पर्वताः स्थानात्क्षुभिता मेघपंक्तयः ॥
शिखराणि विशीर्यंते धरणी पीडिता भृशम्
srotomātrā mahānadyo grahā unmārgataḥ sthitāḥ
||14||स्रोतोमात्रा महानद्यो ग्रहा उन्मार्गतः स्थिताः
trailokyaṃ vyākulībhūtaṃ yāvannāyāti saṃkṣayam ||
tāvannivārayasvainaṃ nānyaḥ śakto vinā tvayā
||15||त्रैलोक्यं व्याकुलीभूतं यावन्नायाति संक्षयम् ॥
तावन्निवारयस्वैनं नान्यः शक्तो विना त्वया
teṣāṃ tadvacanaṃ śrutvā tridaśānāṃ yaśasvini ||
pratijñātaṃ mayātyarthaṃ gatvā tasya samīpataḥ
||16||तेषां तद्वचनं श्रुत्वा त्रिदशानां यशस्विनि ॥
प्रतिज्ञातं मयात्यर्थं गत्वा तस्य समीपतः
dvijarūpaṃ samāsthāya mayā pṛṣṭo dvijottamaḥ ||
kimarthaṃ nṛtyasi brahmankasmātte harṣa āgataḥ
||17||द्विजरूपं समास्थाय मया पृष्टो द्विजोत्तमः ॥
किमर्थं नृत्यसि ब्रह्मन्कस्मात्ते हर्ष आगतः
viruddhamṛṣidharmāṇāṃ kāmarāgeṇa narttanam ||
gītaṃ ca narttanaṃ caiva yuvatījanavallabham
||18||विरुद्धमृषिधर्माणां कामरागेण नर्त्तनम् ॥
गीतं च नर्त्तनं चैव युवतीजनवल्लभम्
brāhmaṇasya tapo bhraṃśaḥ sadācārasya sattama ||
iti matvā dvijaśreṣṭha kimarthaṃ nṛtyase bhṛśam
||19||ब्राह्मणस्य तपो भ्रंशः सदाचारस्य सत्तम ॥
इति मत्वा द्विजश्रेष्ठ किमर्थं नृत्यसे भृशम्
ṛṣiruvāca
kiṃ na paśyasi bho brahmankarācchākarasaṃ cyutam ||
ataeva hi me nṛtyaṃ siddho'haṃ nātra saṃśayaḥ
||20||किं न पश्यसि भो ब्रह्मन्कराच्छाकरसं च्युतम् ॥
अतएव हि मे नृत्यं सिद्धोऽहं नात्र संशयः
tasya tadvacanaṃ śrutvā hāso'tīva mayā kṛtaḥ ||
aṃguṣṭhastāḍitaḥ svīyoṃgulyagreṇa ca pārvati
||21||तस्य तद्वचनं श्रुत्वा हासोऽतीव मया कृतः ॥
अंगुष्ठस्ताडितः स्वीयोंगुल्यग्रेण च पार्वति
tato vinirgataṃ bhasma tatkṣaṇāddhimapāṃḍuram ||
hāsenokto viśālākṣi sagarvo brāhmaṇo mayā
||22||ततो विनिर्गतं भस्म तत्क्षणाद्धिमपांडुरम् ॥
हासेनोक्तो विशालाक्षि सगर्वो ब्राह्मणो मया
paśya meṃ'guṣṭhato brahmanbhūri bhasma vinirgatam ||
na nṛtyehaṃ na me harṣastathāpi munissama
||23||पश्य मेंऽगुष्ठतो ब्रह्मन्भूरि भस्म विनिर्गतम् ॥
न नृत्येहं न मे हर्षस्तथापि मुनिस्सम
taddṛṣṭvā mahadāścaryaṃ lajjito dvijasattamaḥ ||
dhairyaṃ ca tādṛśaṃ dṛṣṭvā vismayaṃ paramaṃ gataḥ
||24||तद्दृष्ट्वा महदाश्चर्यं लज्जितो द्विजसत्तमः ॥
धैर्यं च तादृशं दृष्ट्वा विस्मयं परमं गतः
abravītprāṃjalirbhūtvā vismitenāṃtarātmanā ||
nānyaṃ devamahaṃ manye tvāṃ muktvā vṛṣabhadhvajam
||25||अब्रवीत्प्रांजलिर्भूत्वा विस्मितेनांतरात्मना ॥
नान्यं देवमहं मन्ये त्वां मुक्त्वा वृषभध्वजम्
nānyasya vidyate śakti rīdṛśī bhuvanatraye ||
tasmātkṣamasva deveśa mayājñānādanuṣṭhitam
||26||नान्यस्य विद्यते शक्ति रीदृशी भुवनत्रये ॥
तस्मात्क्षमस्व देवेश मयाज्ञानादनुष्ठितम्
tapaḥkṣayakaraṃ karma viruddhaṃ narttanaṃ satām ||
bahukālārjitaṃ puṇyaṃ tapasā duṣka reṇa tu ||
tadgataṃ sahasā deva madīyaṃ narttanena su
||27||तपःक्षयकरं कर्म विरुद्धं नर्त्तनं सताम् ॥
बहुकालार्जितं पुण्यं तपसा दुष्क रेण तु ॥
तद्गतं सहसा देव मदीयं नर्त्तनेन सु
tasya tadvacanaṃ śrutvā mayokto dvijasattamaḥ ||
varaṃ varaya bhadraṃ te tuṣṭo'haṃ dvijasattama
||28||तस्य तद्वचनं श्रुत्वा मयोक्तो द्विजसत्तमः ॥
वरं वरय भद्रं ते तुष्टोऽहं द्विजसत्तम
jñānenānena vipreṃdra kaṃ te kāmaṃ karomyaham
||29||ज्ञानेनानेन विप्रेंद्र कं ते कामं करोम्यहम्
ṛṣiruvāca
yadi deva prasannastvaṃ śaraṇāgatavatsala ||
yathā na syāttapohānistathā nītirvidhīyatām
||30||यदि देव प्रसन्नस्त्वं शरणागतवत्सल ॥
यथा न स्यात्तपोहानिस्तथा नीतिर्विधीयताम्
mayā proktaṃ prasannena tasya viprasya pārvati ||
tapaste varddhatāṃ vipra mahākālavanaṃ vraja
||31||मया प्रोक्तं प्रसन्नेन तस्य विप्रस्य पार्वति ॥
तपस्ते वर्द्धतां विप्र महाकालवनं व्रज
tatrāste sarvadā puṇyā saptakalpodbhavā guhā ||
piśāceśvaradevasya uttareṇa vyavasthitā
||32||तत्रास्ते सर्वदा पुण्या सप्तकल्पोद्भवा गुहा ॥
पिशाचेश्वरदेवस्य उत्तरेण व्यवस्थिता
tatra drakṣyasi yalliṃgaṃ saptakalpodbhavaṃ śubham ||
tasya darśanamātreṇa tapaste vṛddhimeṣyati
||33||तत्र द्रक्ष्यसि यल्लिंगं सप्तकल्पोद्भवं शुभम् ॥
तस्य दर्शनमात्रेण तपस्ते वृद्धिमेष्यति
kāma krodhodbhavaṃ pāpaṃ lobhamohasamanvitam ||
īrṣyāmatsarajaṃ caiva nāśaṃ yāti ca kilbiṣam
||34||काम क्रोधोद्भवं पापं लोभमोहसमन्वितम् ॥
ईर्ष्यामत्सरजं चैव नाशं याति च किल्बिषम्
madīyaṃ vacanaṃ śrutvā sa vipro vedapāragaḥ ||
śrutvā ca niyamaṃ devi maduktaṃ sa tato dvijaḥ
||35||मदीयं वचनं श्रुत्वा स विप्रो वेदपारगः ॥
श्रुत्वा च नियमं देवि मदुक्तं स ततो द्विजः
niḥsṛto niyato bhūtvā namaskṛtya punaḥpunaḥ ||
ājagāma guhā yatra mahākālavanottame
||36||निःसृतो नियतो भूत्वा नमस्कृत्य पुनःपुनः ॥
आजगाम गुहा यत्र महाकालवनोत्तमे
dadarśa tatra talliṃgaṃ tapaso varddhanaṃ param ||
dvādaśādityasaṃkāśo jāto vai liṃgadarśanāt
||37||ददर्श तत्र तल्लिंगं तपसो वर्द्धनं परम् ॥
द्वादशादित्यसंकाशो जातो वै लिंगदर्शनात्
etasminnaṃtare devi devairuktaṃ nabhastale ||
gopyaṃ liṃgaṃ guhotthaṃ tu dṛṣṭaṃ maṃkaṇakena tu
||38||एतस्मिन्नंतरे देवि देवैरुक्तं नभस्तले ॥
गोप्यं लिंगं गुहोत्थं तु दृष्टं मंकणकेन तु
siddhiḥ prāptā dvijenaiva darśanena sudurlabhā ||
tasmādguheśvaro devi bhaviṣyati mahītale
||39||सिद्धिः प्राप्ता द्विजेनैव दर्शनेन सुदुर्लभा ॥
तस्माद्गुहेश्वरो देवि भविष्यति महीतले
bhaktyā paramayopetā ye drakṣyaṃti guheśvaram ||
na teṣāṃ jāyate vighno dharmasya tapasastathā
||40||भक्त्या परमयोपेता ये द्रक्ष्यंति गुहेश्वरम् ॥
न तेषां जायते विघ्नो धर्मस्य तपसस्तथा
aṣṭamyāṃ vā caturdaśyāṃ darśanaṃ yaḥ kariṣyati ||
brahmalokaṃ gamiṣyaṃti pitarastasya dehinaḥ
||41||अष्टम्यां वा चतुर्दश्यां दर्शनं यः करिष्यति ॥
ब्रह्मलोकं गमिष्यंति पितरस्तस्य देहिनः
atrāgatya prayatnena darśanaṃ yaḥ kariṣyati ||
uddhariṣyati cātmānaṃ puruṣānekaviṃśatim
||42||अत्रागत्य प्रयत्नेन दर्शनं यः करिष्यति ॥
उद्धरिष्यति चात्मानं पुरुषानेकविंशतिम्
kṛtvā pāpasahasrāṇi darśanaṃ yaḥ kariṣyati ||
sa yāti paramaṃ sthānaṃ yatra devo maheśvaraḥ
||43||कृत्वा पापसहस्राणि दर्शनं यः करिष्यति ॥
स याति परमं स्थानं यत्र देवो महेश्वरः
brahmahatyā surāpānaṃ steyaṃ gurvaṃganāgamaḥ ||
darśanāttasyaliṃgasya sarvaṃ yāsyati saṃkṣayam
||44||ब्रह्महत्या सुरापानं स्तेयं गुर्वंगनागमः ॥
दर्शनात्तस्यलिंगस्य सर्वं यास्यति संक्षयम्
yatkiṃcidaśubhaṃ karma janmakoṭiśatārjitam ||
kṣayaṃ yāsyati tatsarvaṃ sparśamātreṇa nānyathā
||45||यत्किंचिदशुभं कर्म जन्मकोटिशतार्जितम् ॥
क्षयं यास्यति तत्सर्वं स्पर्शमात्रेण नान्यथा
mahāpātakayuktā hi dehino ye mahītale ||
te'pi liṃgaṃ samāsādya mucyaṃte sarvapātakaiḥ
||46||महापातकयुक्ता हि देहिनो ये महीतले ॥
तेऽपि लिंगं समासाद्य मुच्यंते सर्वपातकैः
ityuktvā sa dvijo devi divyo maṃkaṇako muniḥ ||
kṛtvāśramapadaṃ puṇyaṃ tatraiva tapasi sthitaḥ
||47||इत्युक्त्वा स द्विजो देवि दिव्यो मंकणको मुनिः ॥
कृत्वाश्रमपदं पुण्यं तत्रैव तपसि स्थितः
eṣa vai kathito devi prabhāvaḥ pāpanāśanaḥ ||
śravaṇātkīrttanādvāpi sarvapāpaiḥ pramucyate
||48||एष वै कथितो देवि प्रभावः पापनाशनः ॥
श्रवणात्कीर्त्तनाद्वापि सर्वपापैः प्रमुच्यते
iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśītiliṅgamāhātmye guheśvaramāhātmyavarṇanaṃnāma dvitīyo'dhyāyaḥ || 2 ||