liṃgamekādaśaṃ viddhi devi siddheśvaraṃ śubham
śrīmahādeva uvāca
liṃgamekādaśaṃ viddhi devi siddheśvaraṃ śubham ||
vīrabhadrasamīpe tu sarvasiddhipradāyakam
||1||लिंगमेकादशं विद्धि देवि सिद्धेश्वरं शुभम् ॥
वीरभद्रसमीपे तु सर्वसिद्धिप्रदायकम्
deva dāruvane pūrvaṃ viprā yogasamanvitāḥ ||
sparddhayā siddhilabdhyarthaṃ tapo'kurvata saṃyatāḥ
||2||देव दारुवने पूर्वं विप्रा योगसमन्विताः ॥
स्पर्द्धया सिद्धिलब्ध्यर्थं तपोऽकुर्वत संयताः
śākāhārā nirāhārāḥ parṇāhārāstathāpare ||
daṃtolūkhalinaḥ kecidaśmakuṭṭāstathā pare
||3||शाकाहारा निराहाराः पर्णाहारास्तथापरे ॥
दंतोलूखलिनः केचिदश्मकुट्टास्तथा परे
kecidvīrāsanaratā dhūmrapānaratāḥ pare ||
pādairūrdhvairadhovaktraiḥ kecidabhrāvakāśikāḥ
||4||केचिद्वीरासनरता धूम्रपानरताः परे ॥
पादैरूर्ध्वैरधोवक्त्रैः केचिदभ्रावकाशिकाः
kṛcchracāṃdrāyaṇādīni kurvantyanye samāhitāḥ ||
na cāpi paramā prāptā siddhirvarṣaśatairapi
||5||कृच्छ्रचांद्रायणादीनि कुर्वन्त्यन्ये समाहिताः ॥
न चापि परमा प्राप्ता सिद्धिर्वर्षशतैरपि
duḥkhārttāściṃtayāmāsuḥ kathaṃ siddhirbhaviṣyati ||
tapasā duṣkareṇaiva siddhirna vātra labhyate
||6||दुःखार्त्ताश्चिंतयामासुः कथं सिद्धिर्भविष्यति ॥
तपसा दुष्करेणैव सिद्धिर्न वात्र लभ्यते
vyarthā śrutistathā jātā yā gītā munibhiḥ purā ||
tapasā labhyate sarvaṃ tapomūlamidaṃ jagat
||7||व्यर्था श्रुतिस्तथा जाता या गीता मुनिभिः पुरा ॥
तपसा लभ्यते सर्वं तपोमूलमिदं जगत्
aṃjanaṃ guṭikā caiva pādukāgamanaṃ tathā ||
khaḍgasiddhirbile vāsaściṃtāmaṇirapekṣitam
||8||अंजनं गुटिका चैव पादुकागमनं तथा ॥
खड्गसिद्धिर्बिले वासश्चिंतामणिरपेक्षितम्
evaṃ te'ciṃtayasiddhāḥ paramāmarṣapūritāḥ ||
utsārya tattapodharmaṃ nāstikyaṃ bhāvamāgatāḥ
||9||एवं तेऽचिंतयसिद्धाः परमामर्षपूरिताः ॥
उत्सार्य तत्तपोधर्मं नास्तिक्यं भावमागताः
etasminneva kāle tu vāguvācāśarīriṇī ||
āśvāsayaṃtī tānsiddhānmātā putramivaurasam
||10||एतस्मिन्नेव काले तु वागुवाचाशरीरिणी ॥
आश्वासयंती तान्सिद्धान्माता पुत्रमिवौरसम्
mā'vamanyadhvamāryā hi śrutirvyarthā mahītale ||
tapo na niṃdyaṃ dharmo vā śrūyatāmatra kāraṇam
||11||माऽवमन्यध्वमार्या हि श्रुतिर्व्यर्था महीतले ॥
तपो न निंद्यं धर्मो वा श्रूयतामत्र कारणम्
bhavitā bhavatāṃ siddhiratra naiva tapodhanāḥ ||
sparddhayā siddhikāmaiśca tapastaddhi kṛtaṃ vṛthā
||12||भविता भवतां सिद्धिरत्र नैव तपोधनाः ॥
स्पर्द्धया सिद्धिकामैश्च तपस्तद्धि कृतं वृथा
kāmācca tapaso hānirahaṃkārācca vismayaḥ ||
krodhāllobhāttathā mohājjāyate nātra saṃśayaḥ
||13||कामाच्च तपसो हानिरहंकाराच्च विस्मयः ॥
क्रोधाल्लोभात्तथा मोहाज्जायते नात्र संशयः
sparddhayā rahito yastu kāmakrodhavivarjitaḥ ||
karoti karma bhāvena sa tapaḥphalamaśnute
||14||स्पर्द्धया रहितो यस्तु कामक्रोधविवर्जितः ॥
करोति कर्म भावेन स तपःफलमश्नुते
vāsanāvāsito yastu ekacittaḥ samāhitaḥ ||
āstikaḥ śraddadhānaśca sa tapaḥphalamaśnute
||15||वासनावासितो यस्तु एकचित्तः समाहितः ॥
आस्तिकः श्रद्दधानश्च स तपःफलमश्नुते
mātṛvatparadārāṇi paradravyāṇi loṣṭavat ||
yaḥ paśyati naro nityaṃ sa tapaḥ phalamaśnute
||16||मातृवत्परदाराणि परद्रव्याणि लोष्टवत् ॥
यः पश्यति नरो नित्यं स तपः फलमश्नुते
īdṛśe puruṣe viprāstapaḥsiddhiśca dṛśyate ||
bhavaṃtaḥ sparddhayā caiva kṛtavaṃtaśca duṣkaram
||17||ईदृशे पुरुषे विप्रास्तपःसिद्धिश्च दृश्यते ॥
भवंतः स्पर्द्धया चैव कृतवंतश्च दुष्करम्
tasmādvarṣasahasreṇa naiva siddhirbhaviṣyati ||
yadi madvacanaṃ kāryaṃ nirvikalpena cetasā
||18||तस्माद्वर्षसहस्रेण नैव सिद्धिर्भविष्यति ॥
यदि मद्वचनं कार्यं निर्विकल्पेन चेतसा
mahākālavanaṃ gatvā yūyaṃ sarve samāhitāḥ ||
ārādhayadhvaṃ deveśaṃ sadā siddhipradāyakam
||19||महाकालवनं गत्वा यूयं सर्वे समाहिताः ॥
आराधयध्वं देवेशं सदा सिद्धिप्रदायकम्
darśanāttasya devasya labhyate siddhiruttamā ||
sanakādayo'pi ye devamāsādya yogatatparāḥ ||
pūjayitvāpi bhāvena saṃsiddhiṃ paramāṃ gatāḥ
||20||दर्शनात्तस्य देवस्य लभ्यते सिद्धिरुत्तमा ॥
सनकादयोऽपि ये देवमासाद्य योगतत्पराः ॥
पूजयित्वापि भावेन संसिद्धिं परमां गताः
rājñā vasumatā pūrvaṃ khaṅgasiddhiḥ sudurlabhā ||
prāptā darśanamātreṇa liṃgasyāsya prabhāvataḥ
||21||राज्ञा वसुमता पूर्वं खङ्गसिद्धिः सुदुर्लभा ॥
प्राप्ता दर्शनमात्रेण लिंगस्यास्य प्रभावतः
pādukāgamanaṃ labdhaṃ haihayena mahātmanā ||
kṛtavīrātmajenaiva vāhānāṃ ca sahasrakam
||22||पादुकागमनं लब्धं हैहयेन महात्मना ॥
कृतवीरात्मजेनैव वाहानां च सहस्रकम्
adṛśyakaraṇaṃ caiva prāptaṃ cānūruṇā purā ||
svarṇasiddhiśca siddhena pādalepo rasāyanam ||
aṃjanaṃ ca tathā labdhaṃ liṃgasyāsya ca darśanāt
||23||अदृश्यकरणं चैव प्राप्तं चानूरुणा पुरा ॥
स्वर्णसिद्धिश्च सिद्धेन पादलेपो रसायनम् ॥
अंजनं च तथा लब्धं लिंगस्यास्य च दर्शनात्
ākāśavacanaṃ śrutvā te siddhā vismayānvitāḥ ||
samāyātā mudā yuktā mahākālavanottame
||24||आकाशवचनं श्रुत्वा ते सिद्धा विस्मयान्विताः ॥
समायाता मुदा युक्ता महाकालवनोत्तमे
sarvasiddhipradaṃ caiva dadṛśurliṃgamuttamam ||
darśanāttasya liṃgasya saṃsiddhiṃ paramāṃ gatāḥ
||25||सर्वसिद्धिप्रदं चैव ददृशुर्लिंगमुत्तमम् ॥
दर्शनात्तस्य लिंगस्य संसिद्धिं परमां गताः
tataḥprabhṛti vikhyāto devaiḥ siddheśvaraḥ paraḥ ||
ye paśyaṃti narā devi devaṃ siddheśvaraṃ param ||
na teṣāṃ durlabhā siddhirbhaviṣyati mahītale
||26||ततःप्रभृति विख्यातो देवैः सिद्धेश्वरः परः ॥
ये पश्यंति नरा देवि देवं सिद्धेश्वरं परम् ॥
न तेषां दुर्लभा सिद्धिर्भविष्यति महीतले
siddheśvaraṃ gamiṣyaṃti bhāvahīnāḥ prasaṃgataḥ ||
saṃsiddhāste bhaviṣyaṃti niyatā nātra saṃśayaḥ
||27||सिद्धेश्वरं गमिष्यंति भावहीनाः प्रसंगतः ॥
संसिद्धास्ते भविष्यंति नियता नात्र संशयः
mahāpātakasaṃyukto yastu siddheśvaraṃ smaret ||
saṃsiddhastu bhavennūnaṃ jñānaiśvaryasamanvitaḥ
||28||महापातकसंयुक्तो यस्तु सिद्धेश्वरं स्मरेत् ॥
संसिद्धस्तु भवेन्नूनं ज्ञानैश्वर्यसमन्वितः
niyamena tu yaḥ paśyeddevaṃ siddheśvaraṃ param ||
ṣaṇmāsājjāyate siddhirvāṃchitā yā bhaveddhṛdi
||29||नियमेन तु यः पश्येद्देवं सिद्धेश्वरं परम् ॥
षण्मासाज्जायते सिद्धिर्वांछिता या भवेद्धृदि
aṣṭamyāṃ ca caturddaśyāṃ kṛṣṇapakṣe viśeṣataḥ ||
siddheśvaraṃ tu yaḥ paśyetsa paśyenmama maṃdiram
||30||अष्टम्यां च चतुर्द्दश्यां कृष्णपक्षे विशेषतः ॥
सिद्धेश्वरं तु यः पश्येत्स पश्येन्मम मंदिरम्
aputro labhate putraṃ nirdhanastu dhanaṃ labhet ||
vidyārthī labhate vidyāṃ bhāryārthī labhate striyam
||31||अपुत्रो लभते पुत्रं निर्धनस्तु धनं लभेत् ॥
विद्यार्थी लभते विद्यां भार्यार्थी लभते स्त्रियम्
saṃkrāṃtau somavāre ca grahaṇe caiva yo'rcayet ||
kulānāṃ śatamuddhṛtya paitṛkaṃ svādhikaṃ priye ||
modate mama loke ca yāvadiṃdrāścaturdaśa
||32||संक्रांतौ सोमवारे च ग्रहणे चैव योऽर्चयेत् ॥
कुलानां शतमुद्धृत्य पैतृकं स्वाधिकं प्रिये ॥
मोदते मम लोके च यावदिंद्राश्चतुर्दश
eṣa te kathito devi prabhāvaḥ pāpanāśanaḥ ||
siddheśvarasya devasya lokapāleśvaraṃ śṛṇu
||33||एष ते कथितो देवि प्रभावः पापनाशनः ॥
सिद्धेश्वरस्य देवस्य लोकपालेश्वरं शृणु
iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṃgamāhātmye siddheśvaramāhātmyavarṇanaṃnāmaikādaśo'dhyāyaḥ || 11 ||