kārtikasnānavidhinirūpaṇam
brahmovāca
nāḍīdvayāvaśiṣṭāyāṃ rātryāṃ gacchejjalāśayam ||
tulasīmṛttikāyuktaḥ savastrakalaśo mune
||1||नाडीद्वयावशिष्टायां रात्र्यां गच्छेज्जलाशयम् ॥
तुलसीमृत्तिकायुक्तः सवस्त्रकलशो मुने
āgatya toyanikaṭe tīre saṃsthāpya pātrakam ||
pādaprakṣālanaṃ kṛtvā deśakālādi coccaret
||2||आगत्य तोयनिकटे तीरे संस्थाप्य पात्रकम् ॥
पादप्रक्षालनं कृत्वा देशकालादि चोच्चरेत्
smaredgaṃgādikā nadyo viṣṇuśarvādidevatāḥ ||
nābhimātre jale sthitvā maṃtrametamudīrayet
||3||स्मरेद्गंगादिका नद्यो विष्णुशर्वादिदेवताः ॥
नाभिमात्रे जले स्थित्वा मंत्रमेतमुदीरयेत्
kārtike'haṃ kariṣyāmi prātaḥsnānaṃ janārdana ||
prītyarthaṃ tava deveśa dāmodara mayā saha
||4||कार्तिकेऽहं करिष्यामि प्रातःस्नानं जनार्दन ॥
प्रीत्यर्थं तव देवेश दामोदर मया सह
nitye naimittike kṛtvā kārtike pāpanāśana ||
snānaṃ cārghaṃ pradāsyāmi nirvighnaṃ kuru keśava
||5||नित्ये नैमित्तिके कृत्वा कार्तिके पापनाशन ॥
स्नानं चार्घं प्रदास्यामि निर्विघ्नं कुरु केशव
tīrthādidevatābhyaśca kramādarghyādi dāpayet ||
gṛhāṇārghyaṃ mayā dattaṃ rādhayā sahito hare
||6||तीर्थादिदेवताभ्यश्च क्रमादर्घ्यादि दापयेत् ॥
गृहाणार्घ्यं मया दत्तं राधया सहितो हरे
namaḥ kamalanābhāya namaste jalaśāyine ||
namaste'stu hṛṣīkeśa gṛhāṇārghyaṃ namo'stu te
||7||नमः कमलनाभाय नमस्ते जलशायिने ॥
नमस्तेऽस्तु हृषीकेश गृहाणार्घ्यं नमोऽस्तु ते
vratinaḥ kārtike māsi snātasya vidhivanmama ||
gṛhāṇārghyaṃ mayā dattaṃ danujeṃdraniṣūdana
||8||व्रतिनः कार्तिके मासि स्नातस्य विधिवन्मम ॥
गृहाणार्घ्यं मया दत्तं दनुजेंद्रनिषूदन
kiraṇā dhūtapāpā ca puṇyatoyā sarasvatī ||
gaṃgā ca yamunā caiva paṃcanadyaḥ punaṃtu mām
||9||किरणा धूतपापा च पुण्यतोया सरस्वती ॥
गंगा च यमुना चैव पंचनद्यः पुनंतु माम्
anyāsāṃ ca nadīnāṃ ca dadyādarghyaṃ yathāvidhi ||
jāhnavīsmaraṇaṃ kuryātsarvatīrtheṣu mānavaḥ
||10||अन्यासां च नदीनां च दद्यादर्घ्यं यथाविधि ॥
जाह्नवीस्मरणं कुर्यात्सर्वतीर्थेषु मानवः
nānyattīrthaṃ tu jāhnavyāṃ smaraṇīyaṃ kadācana ||
etānmaṃtrānsamuccārya malasnānaṃ samācaret
||11||नान्यत्तीर्थं तु जाह्नव्यां स्मरणीयं कदाचन ॥
एतान्मंत्रान्समुच्चार्य मलस्नानं समाचरेत्
mṛtsnānaṃ ca pitṛsnānaṃ gurusnānaṃ tataḥ param ||
tatastu pāvamānībhirabhiṣiṃcetsvamastakam
||12||मृत्स्नानं च पितृस्नानं गुरुस्नानं ततः परम् ॥
ततस्तु पावमानीभिरभिषिंचेत्स्वमस्तकम्
aghamarṣaṇakaṃ kṛtvā snānāṃgaṃ tarpaṇaṃ tathā ||
tataḥ puruṣasūktena jalaṃ śirasi siṃcayet
||13||अघमर्षणकं कृत्वा स्नानांगं तर्पणं तथा ॥
ततः पुरुषसूक्तेन जलं शिरसि सिंचयेत्
tatastu bahirāgatya tīrthaṃ śirasi nikṣipet ||
tīrthaṃ pītvā trivāraṃ tu tulasīṃ gṛhya pāṇinā
||14||ततस्तु बहिरागत्य तीर्थं शिरसि निक्षिपेत् ॥
तीर्थं पीत्वा त्रिवारं तु तुलसीं गृह्य पाणिना
tato jalādviniṣkramya cāṃcalaṃ pīḍayedbahiḥ ||
yanmayā dūṣitaṃ toyaṃ śārīramalasaṃcayaiḥ
||15||ततो जलाद्विनिष्क्रम्य चांचलं पीडयेद्बहिः ॥
यन्मया दूषितं तोयं शारीरमलसंचयैः
taddoṣaparihārārthaṃ yakṣmaṇaṃ tarpayāmyaham ||
vastraniṣpīḍanaṃ kṛtvā kuryācca tilakādikam
||16||तद्दोषपरिहारार्थं यक्ष्मणं तर्पयाम्यहम् ॥
वस्त्रनिष्पीडनं कृत्वा कुर्याच्च तिलकादिकम्
sūta uvāca
śṛṇudhvamṛṣayaḥ sarve kārtikasnānajaṃ phalam ||
aruṇaṃ prati sūryeṇa yaduktaṃ ca savistaram
||17||शृणुध्वमृषयः सर्वे कार्तिकस्नानजं फलम् ॥
अरुणं प्रति सूर्येण यदुक्तं च सविस्तरम्
aruṇa uvāca
kasmiṃstīrthe viśeṣeṇa phalaṃ kārtikasaṃbhavam ||
kṣetre vā etadā''khyāhi bhagavansnānayogataḥ
||18||कस्मिंस्तीर्थे विशेषेण फलं कार्तिकसंभवम् ॥
क्षेत्रे वा एतदाऽऽख्याहि भगवन्स्नानयोगतः
sūrya uvāca
yatra kutrā'pi kartavyaṃ jale snānaṃ tu kārtikaṃ ||
uṣṇodakena kartavyaṃ snānaṃ kutrā'pi kārtike
||19||यत्र कुत्राऽपि कर्तव्यं जले स्नानं तु कार्तिकं ॥
उष्णोदकेन कर्तव्यं स्नानं कुत्राऽपि कार्तिके
tato daśaguṇaṃ puṇyaṃ śītatoyanimajjanāt ||
tataḥ śataguṇaṃ puṇyaṃ bahiḥ kūpodake kṛtam
||20||ततो दशगुणं पुण्यं शीततोयनिमज्जनात् ॥
ततः शतगुणं पुण्यं बहिः कूपोदके कृतम्
kūpātsahasraguṇitaṃ phalaṃ vāpīniṣekataḥ ||
tato'yutaguṇaṃ puṇyaṃ taḍāgasnānato bhavet
||21||कूपात्सहस्रगुणितं फलं वापीनिषेकतः ॥
ततोऽयुतगुणं पुण्यं तडागस्नानतो भवेत्
tato daśaguṇaṃ puṇyaṃ nirjhareṣu nimajjanāt ||
tato'dhikataraṃ puṇyaṃ nadīsnānasya kārtike
||22||ततो दशगुणं पुण्यं निर्झरेषु निमज्जनात् ॥
ततोऽधिकतरं पुण्यं नदीस्नानस्य कार्तिके
nadyā daśaguṇaṃ proktaṃ tīrthasnānaṃ khagottama ||
tato daśaguṇaṃ puṇyaṃ nadyoryatra ca saṃgamaḥ
||23||नद्या दशगुणं प्रोक्तं तीर्थस्नानं खगोत्तम ॥
ततो दशगुणं पुण्यं नद्योर्यत्र च संगमः
nadītrayasya saṃyoge puṇyasyāṃ'to na vidyate ||
siṃdhuḥ kṛṣṇā ca veṇī ca yamunā ca sarasvatī
||24||नदीत्रयस्य संयोगे पुण्यस्यांऽतो न विद्यते ॥
सिंधुः कृष्णा च वेणी च यमुना च सरस्वती
godāvarī vipāśā ca narmadā tamasā mahī ||
kāverī śarayūḥ śiprā tathā carmaṇvatī nadī
||25||गोदावरी विपाशा च नर्मदा तमसा मही ॥
कावेरी शरयूः शिप्रा तथा चर्मण्वती नदी
vitastā vedikā śoṇo vetravatyaparājitā ||
gaṃḍakī gomatī pūrṇā brahmaputrā sarovaram
||26||वितस्ता वेदिका शोणो वेत्रवत्यपराजिता ॥
गंडकी गोमती पूर्णा ब्रह्मपुत्रा सरोवरम्
vāgmatī ca śatadruśca tathā badarikāśramaḥ ||
durlabhāḥ kārtike tvete tīrthānyatha nibodha me
||27||वाग्मती च शतद्रुश्च तथा बदरिकाश्रमः ॥
दुर्लभाः कार्तिके त्वेते तीर्थान्यथ निबोध मे
sarvebhyaśca sthalebhyaśca āryāvartaṃ tu puṇyadam ||
kolhāpurī tataḥ śreṣṭhā tataḥ kāṃcīdvayaṃ smṛtam
||28||सर्वेभ्यश्च स्थलेभ्यश्च आर्यावर्तं तु पुण्यदम् ॥
कोल्हापुरी ततः श्रेष्ठा ततः कांचीद्वयं स्मृतम्
anaṃtasenavasatirvarāhakṣetrameva ca ||
cakrakṣetraṃ tataḥ puṇyaṃ muktikṣetraṃ tato'dhikam
||29||अनंतसेनवसतिर्वराहक्षेत्रमेव च ॥
चक्रक्षेत्रं ततः पुण्यं मुक्तिक्षेत्रं ततोऽधिकम्
avaṃtikā tataḥ śreṣṭhā tato badarikāśramaḥ ||
ayodhyā ca tataḥ śreṣṭhā gaṃgādvāraṃ tato'dhikam
||30||अवंतिका ततः श्रेष्ठा ततो बदरिकाश्रमः ॥
अयोध्या च ततः श्रेष्ठा गंगाद्वारं ततोऽधिकम्
tataḥ kanakhalaṃ tīrthaṃ tato madhupurī varā ||
eko'pi kārtiko māso mathurāyamunājale
||31||ततः कनखलं तीर्थं ततो मधुपुरी वरा ॥
एकोऽपि कार्तिको मासो मथुरायमुनाजले
yaiḥ snātaste tu vaikuṃṭhe bahukālaṃ vasaṃti hi ||
rādhādāmodarastatra svayaṃ snātastu kārtike
||32||यैः स्नातस्ते तु वैकुंठे बहुकालं वसंति हि ॥
राधादामोदरस्तत्र स्वयं स्नातस्तु कार्तिके
ato madhupurī śreṣṭhā yamunā ca viśeṣataḥ
||33||अतो मधुपुरी श्रेष्ठा यमुना च विशेषतः
dvārāvatī tataḥ śreṣṭhā pratyahaṃ snāti keśavaḥ ||
ṣoḍaśastrīsahasreṇa sārddhaṃ yādavasaṃyutaḥ
||34||द्वारावती ततः श्रेष्ठा प्रत्यहं स्नाति केशवः ॥
षोडशस्त्रीसहस्रेण सार्द्धं यादवसंयुतः
dvārakāyāṃ mṛttikāyāstilako yena mastake ||
dhāryate'sau naro jñeyo jīvanmukto na saṃśayaḥ ||
dvārakāsnānamāhātmyaṃ na vaktuṃ śakyate mayā
||35||द्वारकायां मृत्तिकायास्तिलको येन मस्तके ॥
धार्यतेऽसौ नरो ज्ञेयो जीवन्मुक्तो न संशयः ॥
द्वारकास्नानमाहात्म्यं न वक्तुं शक्यते मया
goviṃdārpitacittānāṃ jāyate puṇyabhāskarā ||
tato bhāgīrathī śreṣṭhā yatra viṃdhyena saṃgatā
||36||गोविंदार्पितचित्तानां जायते पुण्यभास्करा ॥
ततो भागीरथी श्रेष्ठा यत्र विंध्येन संगता
tasmāddaśaguṇaṃ puṇyaṃ tīrtharāje'tra jāyate
||37||तस्माद्दशगुणं पुण्यं तीर्थराजेऽत्र जायते
kalau daśasahasrāṃ'te viṣṇustyakṣyati medinīm ||
tadarddhaṃ jāhnavītoyaṃ tadardhaṃ devatāgaṇāḥ
||38||कलौ दशसहस्रांऽते विष्णुस्त्यक्ष्यति मेदिनीम् ॥
तदर्द्धं जाह्नवीतोयं तदर्धं देवतागणाः
yāvattiṣṭhati gaṃgā'tra tāvattīrthāni saṃti ca ||
svasvasthāne nṛṇāṃ pāpaṃ tāvadeva haraṃti ca
||39||यावत्तिष्ठति गंगाऽत्र तावत्तीर्थानि संति च ॥
स्वस्वस्थाने नृणां पापं तावदेव हरंति च
yadaiva gaṃgā naṣṭā syātko vā tatpāpamāharet ||
vicāryaivaṃ sutīrthāni gamiṣyaṃti dharātale
||40||यदैव गंगा नष्टा स्यात्को वा तत्पापमाहरेत् ॥
विचार्यैवं सुतीर्थानि गमिष्यंति धरातले
tasmānmunīśvarāḥ sarve yāvattiṣṭhati jāhnavī ||
tāvacca kriyatāṃ dharmastato bhūmau nilīyatām
||41||तस्मान्मुनीश्वराः सर्वे यावत्तिष्ठति जाह्नवी ॥
तावच्च क्रियतां धर्मस्ततो भूमौ निलीयताम्
samādhiṃ gṛhya sudṛḍhāṃ yāvatkṛtayugaṃ bhavet ||
anyathā kalikālena bhraṃśanīyo bhavetsudhīḥ
||42||समाधिं गृह्य सुदृढां यावत्कृतयुगं भवेत् ॥
अन्यथा कलिकालेन भ्रंशनीयो भवेत्सुधीः
tataḥ śreṣṭhatarā kāśī yasyā nāśo na jāyate ||
yadāśrayeṇa gaṃgāpi sarvapāpaṃ vyapohati
||43||ततः श्रेष्ठतरा काशी यस्या नाशो न जायते ॥
यदाश्रयेण गंगापि सर्वपापं व्यपोहति
kāśikāyā naiva nāśo brahmaṇyapi mṛte sati ||
yaddarśanārthaṃ gaṃgā'pi jātā cottaravāhinī ||
tasyāṃ paṃcanadaṃ tīrthaṃ triṣu lokeṣu viśrutam
||44||काशिकाया नैव नाशो ब्रह्मण्यपि मृते सति ॥
यद्दर्शनार्थं गंगाऽपि जाता चोत्तरवाहिनी ॥
तस्यां पंचनदं तीर्थं त्रिषु लोकेषु विश्रुतम्
āgate kārtike māsi rauravaṃ narakaṃ gatāḥ ||
ākrośaṃte tu pitaro vaṃśe'smākaṃ bhaviṣyati
||45||आगते कार्तिके मासि रौरवं नरकं गताः ॥
आक्रोशंते तु पितरो वंशेऽस्माकं भविष्यति
kaścidbhāgyavatāṃ śreṣṭho gatvā paṃcanade śubhe ||
asmākaṃ tarpaṇaṃ kuryānnarakārṇavatārakam
||46||कश्चिद्भाग्यवतां श्रेष्ठो गत्वा पंचनदे शुभे ॥
अस्माकं तर्पणं कुर्यान्नरकार्णवतारकम्
tīrtharājāditīrthāni prāpte kārtikamāsake ||
snānārthaṃ pañcagaṃgaṃ tu samāyāṃti na saṃśayaḥ
||47||तीर्थराजादितीर्थानि प्राप्ते कार्तिकमासके ॥
स्नानार्थं पञ्चगंगं तु समायांति न संशयः
kṛtvā tu lakṣapāpāni snātvā paṃcanade śubhe ||
biṃdumādhavamabhyarcya vilayaṃ yāṃti tatkṣaṇāt
||48||कृत्वा तु लक्षपापानि स्नात्वा पंचनदे शुभे ॥
बिंदुमाधवमभ्यर्च्य विलयं यांति तत्क्षणात्
yaiḥ snātaṃ kārtike māsi sakṛtpaṃcanade śubhe ||
sarvatīrthakṛtāsnānātphalaṃ koṭiguṇaṃ bhavet
||49||यैः स्नातं कार्तिके मासि सकृत्पंचनदे शुभे ॥
सर्वतीर्थकृतास्नानात्फलं कोटिगुणं भवेत्
brahmovāca
kārtike māsi kāveryyāṃ yaḥ snānaṃ kartumicchati ||
tāvatā vai vimuktā'gho viṣṇusāyujyamāpnuyāt
||50||कार्तिके मासि कावेर्य्यां यः स्नानं कर्तुमिच्छति ॥
तावता वै विमुक्ताऽघो विष्णुसायुज्यमाप्नुयात्
kāveryyāścaiva māhātmyaṃ ko vadetparamuttamam ||
atra te varṇayiṣyāmi itihāsaṃ purātanam
||51||कावेर्य्याश्चैव माहात्म्यं को वदेत्परमुत्तमम् ॥
अत्र ते वर्णयिष्यामि इतिहासं पुरातनम्
kāveryā viṣaye brahmansāvadhānamanāḥ śṛṇu ||
gautamyā uttare tīre viṣṇupādābjasaṃbhavā
||52||कावेर्या विषये ब्रह्मन्सावधानमनाः शृणु ॥
गौतम्या उत्तरे तीरे विष्णुपादाब्जसंभवा
gaṃgā trailokyapāpaghnī vartate lokapūjitā ||
sā gaṃgā ciṃtayāmāsa kadācitpāpaśaṃkitā
||53||गंगा त्रैलोक्यपापघ्नी वर्तते लोकपूजिता ॥
सा गंगा चिंतयामास कदाचित्पापशंकिता
sarvalokāḥ samāgatya mayi pāpaṃ tyajaṃti hi ||
tatpāpaṃ tu kathaṃ gacchediti cintāparā tadā
||54||सर्वलोकाः समागत्य मयि पापं त्यजंति हि ॥
तत्पापं तु कथं गच्छेदिति चिन्तापरा तदा
praṣṭuṃ jagāma kailāsaṃ girijāvallabhaṃ bhavam ||
tatra dṛṣṭvā mahārudraṃ provāca haripādajā
||55||प्रष्टुं जगाम कैलासं गिरिजावल्लभं भवम् ॥
तत्र दृष्ट्वा महारुद्रं प्रोवाच हरिपादजा
gaṅgovāca
mahārudra namaste'stu tvāṃ praṣṭumahamāgatā ||
sarve lokāḥ samāgatya mayi pāpaṃ tyajaṃti hi
||56||महारुद्र नमस्तेऽस्तु त्वां प्रष्टुमहमागता ॥
सर्वे लोकाः समागत्य मयि पापं त्यजंति हि
tatpāpaṃ tu mayā soḍhuṃ na śakyaṃ pārvatīpate ||
yenopāyena tatpāpaṃ nā''gacchenmama tadvada
||57||तत्पापं तु मया सोढुं न शक्यं पार्वतीपते ॥
येनोपायेन तत्पापं नाऽऽगच्छेन्मम तद्वद
evaṃ gaṃgāvacaḥ śrutvā pratyāha parameśvaraḥ ||
rudra uvāca ||
pāpanirharaṇāyādau padmanābhāṃghripaṃkajāt
||58||एवं गंगावचः श्रुत्वा प्रत्याह परमेश्वरः ॥
रुद्र उवाच ॥
पापनिर्हरणायादौ पद्मनाभांघ्रिपंकजात्
prādurbhūtā'si tvaṃ devi kimarthaṃ tapyate tvayā ||
pāpaprahārā''dhipatyaṃ kalpitaṃ tava viṣṇunā
||59||प्रादुर्भूताऽसि त्वं देवि किमर्थं तप्यते त्वया ॥
पापप्रहाराऽऽधिपत्यं कल्पितं तव विष्णुना
tathā'pi pāpanirhāra upāyaṃ te bravīmyaham ||
kaveśca tanayā devī kāverī saritāṃ varā
||60||तथाऽपि पापनिर्हार उपायं ते ब्रवीम्यहम् ॥
कवेश्च तनया देवी कावेरी सरितां वरा
sarvotkṛṣṭā ca sarveṣāṃ harerbalavaśāttu sā ||
sarvapāpapraharaṇe sāmarthyaṃ tatra vartate
||61||सर्वोत्कृष्टा च सर्वेषां हरेर्बलवशात्तु सा ॥
सर्वपापप्रहरणे सामर्थ्यं तत्र वर्तते
kārtike māsi kāveryāṃ yaḥ snānaṃ kurute naraḥ ||
sa tu pāpavinirmukto yāti viṣṇoḥ paraṃ padam
||62||कार्तिके मासि कावेर्यां यः स्नानं कुरुते नरः ॥
स तु पापविनिर्मुक्तो याति विष्णोः परं पदम्
tasmāttāṃ gaccha devi tvaṃ tataḥ pāpādvimokṣyase ||
ityuktā sā tadāgacchatkāverīṃ pāpahāriṇīm
||63||तस्मात्तां गच्छ देवि त्वं ततः पापाद्विमोक्ष्यसे ॥
इत्युक्ता सा तदागच्छत्कावेरीं पापहारिणीम्
tajjalasparśamātreṇa kārtike viṣṇupādajā ||
nirdhūtapātakā gaṃgā jagāma svaniketanam
||64||तज्जलस्पर्शमात्रेण कार्तिके विष्णुपादजा ॥
निर्धूतपातका गंगा जगाम स्वनिकेतनम्
kārtike prativarṣaṃ tu gaṃgā trailokyapāvanīm ||
snātuṃ bhaktyā samāyāti kāverīṃ pāpahāriṇīm
||65||कार्तिके प्रतिवर्षं तु गंगा त्रैलोक्यपावनीम् ॥
स्नातुं भक्त्या समायाति कावेरीं पापहारिणीम्
tajjalasparśamātreṇa kārtike viṣṇupādajā ||
nirdhūtapātakā gaṃgā jagāma svaniketanam
||66||तज्जलस्पर्शमात्रेण कार्तिके विष्णुपादजा ॥
निर्धूतपातका गंगा जगाम स्वनिकेतनम्
tasmācchastaṃ tulāsnānaṃ kāveryyāṃ śasyate budhaiḥ ||
yaḥ kāveryāṃ tulāsnānaṃ bhaktyā tu kurute mune
||67||तस्माच्छस्तं तुलास्नानं कावेर्य्यां शस्यते बुधैः ॥
यः कावेर्यां तुलास्नानं भक्त्या तु कुरुते मुने
vimuktaduritaḥ sadyastato yāti parāṃ gatim ||
tasmātsnānaṃ tu kāveryāṃ kārtike māsi śasyate
||68||विमुक्तदुरितः सद्यस्ततो याति परां गतिम् ॥
तस्मात्स्नानं तु कावेर्यां कार्तिके मासि शस्यते
itihāsamimaṃ śrutvā kārtikavratatatparaḥ ||
sa kāverī snānaphalaṃ prāpnoti ca parāṃ gatim
||69||इतिहासमिमं श्रुत्वा कार्तिकव्रततत्परः ॥
स कावेरी स्नानफलं प्राप्नोति च परां गतिम्
rātriśeṣe bhavetsnānamuttamaṃ viṣṇutuṣṭikṛt ||
sūryodaye madhyamaṃ syādyāvannā''stā tu kṛttikā
||70||रात्रिशेषे भवेत्स्नानमुत्तमं विष्णुतुष्टिकृत् ॥
सूर्योदये मध्यमं स्याद्यावन्नाऽऽस्ता तु कृत्तिका
tāvadeva bhavetsnānamanyathā tanna kārtikam ||
snānaṃ strībhirvidhātavyaṃ gṛhītvā''jñāṃ dhavasya ca
||71||तावदेव भवेत्स्नानमन्यथा तन्न कार्तिकम् ॥
स्नानं स्त्रीभिर्विधातव्यं गृहीत्वाऽऽज्ञां धवस्य च
apṛṣṭvā yatkṛtaṃ dharmyaṃ bhartāraṃ tatkṣayaṃ nayet ||
strīṇāṃ nāstyaparo dharmo bhartāraṃ projjhya kaścana
||72||अपृष्ट्वा यत्कृतं धर्म्यं भर्तारं तत्क्षयं नयेत् ॥
स्त्रीणां नास्त्यपरो धर्मो भर्तारं प्रोज्झ्य कश्चन
kuryātsahasrapāpāni bhartrā''jñāṃ yā samācaret ||
saiṣā dharmavatī loke na jāyeta vratādinā
||73||कुर्यात्सहस्रपापानि भर्त्राऽऽज्ञां या समाचरेत् ॥
सैषा धर्मवती लोके न जायेत व्रतादिना
daridraḥ patito mūrkho dīno'pi yadi cetpatiḥ ||
tādṛśaḥ śaraṇaṃ strīṇāṃ tattyāgānnirayaṃ vrajet
||74||दरिद्रः पतितो मूर्खो दीनोऽपि यदि चेत्पतिः ॥
तादृशः शरणं स्त्रीणां तत्त्यागान्निरयं व्रजेत्
kalau vatsa manuṣyāṇāṃ śaithilyaṃ snānakarmaṇi ||
tathāpi kathayiṣyāmi snānaṃ kārtikamāghayoḥ
||75||कलौ वत्स मनुष्याणां शैथिल्यं स्नानकर्मणि ॥
तथापि कथयिष्यामि स्नानं कार्तिकमाघयोः
yasya hastau ca pādau ca vāṅmanaśca susaṃyatam ||
vidyā tapaśca kīrtiśca sa tīrthaphalabhāṅnaraḥ
||76||यस्य हस्तौ च पादौ च वाङ्मनश्च सुसंयतम् ॥
विद्या तपश्च कीर्तिश्च स तीर्थफलभाङ्नरः
aśraddadhānaḥ pāpātmā nāstikaśchinnamānasaḥ ||
hetuvādī ca paṃcaite na tīrthaphalabhāginaḥ
||77||अश्रद्दधानः पापात्मा नास्तिकश्छिन्नमानसः ॥
हेतुवादी च पंचैते न तीर्थफलभागिनः
prātarutthāya yo viprastīrthasnāyī sadā bhavet ||
sarvapāpavinirmuktaḥ paraṃ brahmā'dhigacchati
||78||प्रातरुत्थाय यो विप्रस्तीर्थस्नायी सदा भवेत् ॥
सर्वपापविनिर्मुक्तः परं ब्रह्माऽधिगच्छति
snānaṃ caturvidhaṃ proktaṃ snānavidbhirmanīṣibhiḥ ||
vāyavyaṃ vāruṇaṃ divyaṃ brāhmaṃ ceti tathā smṛtam
||79||स्नानं चतुर्विधं प्रोक्तं स्नानविद्भिर्मनीषिभिः ॥
वायव्यं वारुणं दिव्यं ब्राह्मं चेति तथा स्मृतम्
vāyavyaṃ gorajaḥsnānaṃ vāruṇaṃ sāgarādiṣu ||
brāhmaṃ brāhmaṇamaṃtroktaṃ divyaṃ meghāṃ'bu bhāskaram
||80||वायव्यं गोरजःस्नानं वारुणं सागरादिषु ॥
ब्राह्मं ब्राह्मणमंत्रोक्तं दिव्यं मेघांऽबु भास्करम्
snānānāṃ caiva sarveṣāṃ viśiṣṭaṃ tatra vāruṇam ||
brāhmaṇaḥ kṣatriyo vaiśyo maṃtravatsnānamācaret
||81||स्नानानां चैव सर्वेषां विशिष्टं तत्र वारुणम् ॥
ब्राह्मणः क्षत्रियो वैश्यो मंत्रवत्स्नानमाचरेत्
tūṣṇīmeva hi śūdrasya strīṇāṃ caiva tathā smṛtam ||
bālā ca taruṇī vṛddhā naranārīnapuṃsakāḥ
||82||तूष्णीमेव हि शूद्रस्य स्त्रीणां चैव तथा स्मृतम् ॥
बाला च तरुणी वृद्धा नरनारीनपुंसकाः
pāpaiḥ sarvaiḥ pramucyaṃte snānātkārtikamāghayoḥ ||
snātā vai kārtike lokāḥ prāpnuvaṃtīpsitaṃ phalam
||83||पापैः सर्वैः प्रमुच्यंते स्नानात्कार्तिकमाघयोः ॥
स्नाता वै कार्तिके लोकाः प्राप्नुवंतीप्सितं फलम्
puṣkare tīrthavarye tu naṃdāyāḥ saṃgame purā ||
prabhaṃjanaśca muktobhūttadaiva vyāghrajanmataḥ
||84||पुष्करे तीर्थवर्ये तु नंदायाः संगमे पुरा ॥
प्रभंजनश्च मुक्तोभूत्तदैव व्याघ्रजन्मतः
* naṃdāyā vacanenaiva kārtike sā paraṃ yayau ||
evaṃ snānavidhiḥ proktaḥ kiṃ bhūyaḥ śrotumicchasi
||85||* नंदाया वचनेनैव कार्तिके सा परं ययौ ॥
एवं स्नानविधिः प्रोक्तः किं भूयः श्रोतुमिच्छसि
iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye kārtikasnānavidhinirūpaṇaṃnāma caturtho'dhyāyaḥ || 4 2.4.4.84 purā prabhaṃjanonāma nṛpaḥ mṛgayāyāṃ gulmāṃtare sthitāṃ vatsaṃ pāyayatīṃ mṛgīṃ vivyādha, tadā mṛgī uvāca-he nṛpa tanayasya stanaṃ prayacchaṃtī tvayā hatā | atastvaṃ vyāghrarūpatvamāpnuhi | tadā śāpena trasto rājā prāṃjaliḥ sannuvāca-he mṛgi vyāghrarūpaṃ muktvā mānuṣaṃ kadā prāpsyāmi, tadvadāmṛgyuvāca-he nṛpa, kārtike puṣkare yadā naṃdayā saha tava saṃvādo bhaviṣyati tadā mukto bhaviṣyati evamuktvā sā mṛtā, nṛpo'pi varṣaśataṃ vyāghrarūpeṇa vane .paribhraman kadā muktirbhaviṣyatīti citayannekadā naṃdānāmikāṃ gāṃ dṛṣṭvā khāditumārebhe tadā naṃdā anekavidhasatyapratijñāṃ kṛtvā vatsaṃ pāyayitvā punaḥ vyāghrasamīpamāgatya anekavidhadharmabhāṣaṇenopadeśaṃ cakāra | tadā vyāghra uvāca-he naṃdaḥ, ahaṃ pūrvaṃ mṛgyā śaptaḥ vyāghrarūpo jātaḥ, paraṃ tvadya tvatsaṃparkopadeśena jātasmaraṇaḥ punarnṛpatvamāpannaḥ, nāhaṃ vyāghraḥ, etasminnaṃtare dharmastatrāgatya naṃdāmuvāca-he naṃde tvaṃ naṃdānāma sarasvatī nadī bhaviṣyasi, kiṃca ūrje puṣkare māsamātraṃ snānaṃ kuru tato muktirbhaviṣyati ityuktvāṃ'tarhitaḥ | prabhaṃjano'pi vasiṣṭhopedeśena kārtikasevanānmuktiṃ prāpeti || 84 ||
iti kārtikamāsamāhātmyaṭīkāyāṃ caturtho'dhyāyaḥ
||4||इति कार्तिकमासमाहात्म्यटीकायां चतुर्थोऽध्यायः