te gaṇādhipatīndṛṣṭvā naṃdībhamukhaṣaṇmukhān
nārada uvāca
te gaṇādhipatīndṛṣṭvā naṃdībhamukhaṣaṇmukhān ||
amarṣādabhyadhāvaṃta dvaṃdvayuddhāya dānavāḥ
||1||ते गणाधिपतीन्दृष्ट्वा नंदीभमुखषण्मुखान् ॥
अमर्षादभ्यधावंत द्वंद्वयुद्धाय दानवाः
naṃdinaṃ kālanemiśca śumbho laṃbodaraṃ tathā ||
niśumbhaḥ ṣaṇmukhaṃ vegādabhyadhāvata daṃśitaḥ
||2||नंदिनं कालनेमिश्च शुम्भो लंबोदरं तथा ॥
निशुम्भः षण्मुखं वेगादभ्यधावत दंशितः
niśumbhaḥ kārtikeyasya mayūraṃ paṃcabhiḥ śaraiḥ ||
hṛdi vivyādha vegena mūrcchitaḥ sa papāta ca
||3||निशुम्भः कार्तिकेयस्य मयूरं पंचभिः शरैः ॥
हृदि विव्याध वेगेन मूर्च्छितः स पपात च
tataḥ śaktidharaḥ śaktiṃ yāvajjagrāha roṣitaḥ ||
tāvanniśuṃbho vegena svaśaktyā tamapātayat
||4||ततः शक्तिधरः शक्तिं यावज्जग्राह रोषितः ॥
तावन्निशुंभो वेगेन स्वशक्त्या तमपातयत्
naṃdīśvaraḥ śaravrātaiḥ kālanemimavadhyata ||
saptabhiśca hayānketuṃ tribhiḥ sārathimacchinat
||5||नंदीश्वरः शरव्रातैः कालनेमिमवध्यत ॥
सप्तभिश्च हयान्केतुं त्रिभिः सारथिमच्छिनत्
kālanemistu saṃkruddho dhanuściccheda naṃdinaḥ ||
tadapāsya sa śūlena taṃ vakṣasyahanadbalī
||6||कालनेमिस्तु संक्रुद्धो धनुश्चिच्छेद नंदिनः ॥
तदपास्य स शूलेन तं वक्षस्यहनद्बली
sa śūlabhinnahṛdayo hatāśvo hatasārathiḥ ||
adreḥ śikharamāmucya śailādiṃ so'pyapātayat
||7||स शूलभिन्नहृदयो हताश्वो हतसारथिः ॥
अद्रेः शिखरमामुच्य शैलादिं सोऽप्यपातयत्
atha śumbho gaṇeśaśca rathamūṣakavāhanau ||
yudhyamānau śaravrātaiḥ parasparamavidhyatām
||8||अथ शुम्भो गणेशश्च रथमूषकवाहनौ ॥
युध्यमानौ शरव्रातैः परस्परमविध्यताम्
gaṇeśastu tadā śumbhaṃ hṛdi vivyādha patriṇā ||
sārathiṃ ca tribhirbāṇaiḥ pātayāmāsa bhūtale
||9||गणेशस्तु तदा शुम्भं हृदि विव्याध पत्रिणा ॥
सारथिं च त्रिभिर्बाणैः पातयामास भूतले
tato'tikruddhaḥ śumbho'pi bāṇaṣaṣṭyā gaṇādhipam ||
mūṣakaṃ ca tribhirviddhvā nanāda jaladasvanaḥ
||10||ततोऽतिक्रुद्धः शुम्भोऽपि बाणषष्ट्या गणाधिपम् ॥
मूषकं च त्रिभिर्विद्ध्वा ननाद जलदस्वनः
mūṣakaḥ śarabhinnāṃgaścacāla dṛḍhavedanaḥ ||
laṃbodaraśca patitaḥ padātirabhavannṛpa
||11||मूषकः शरभिन्नांगश्चचाल दृढवेदनः ॥
लंबोदरश्च पतितः पदातिरभवन्नृप
tato laṃbodaraḥ śumbhaṃ hatvā paraśunā hṛdi ||
apātayattadā bhūmau mūṣakaṃ cāruhatpunaḥ
||12||ततो लंबोदरः शुम्भं हत्वा परशुना हृदि ॥
अपातयत्तदा भूमौ मूषकं चारुहत्पुनः
kālanemirniśuṃbhaścā'pyubhau laṃbodaraṃ śaraiḥ ||
yugapajjaghnatuḥ krodhāttotrairiva mahādvipam
||13||कालनेमिर्निशुंभश्चाऽप्युभौ लंबोदरं शरैः ॥
युगपज्जघ्नतुः क्रोधात्तोत्रैरिव महाद्विपम्
taṃ pīḍayamānamālokya vīrabhadro mahābalaḥ ||
abhyadhāvata vegena bhūtakoṭiyutastadā
||14||तं पीडयमानमालोक्य वीरभद्रो महाबलः ॥
अभ्यधावत वेगेन भूतकोटियुतस्तदा
kūṣmāṃḍabhairavāścā'pi vetālā yoginīgaṇāḥ ||
piśācayoginīsaṃghā gaṇāścā'pi tamanvayuḥ
||15||कूष्मांडभैरवाश्चाऽपि वेताला योगिनीगणाः ॥
पिशाचयोगिनीसंघा गणाश्चाऽपि तमन्वयुः
tataḥ kilakilāśabdaiḥ siṃhanādaiḥ sughargharaiḥ ||
bherītālamṛdaṃgaiśca pṛthivī samakaṃpata
||16||ततः किलकिलाशब्दैः सिंहनादैः सुघर्घरैः ॥
भेरीतालमृदंगैश्च पृथिवी समकंपत
tato bhūtānyadhāvaṃta bhakṣayaṃtisma dānavān ||
utpataṃtyāpataṃti sma nanṛtuśca raṇāṃgaṇe
||17||ततो भूतान्यधावंत भक्षयंतिस्म दानवान् ॥
उत्पतंत्यापतंति स्म ननृतुश्च रणांगणे
nandī ca kārtikeyaśca samāśvasya tvaratvitau ||
nijaghnatū raṇe daityānniraṃtaraśaravrajaiḥ
||18||नन्दी च कार्तिकेयश्च समाश्वस्य त्वरत्वितौ ॥
निजघ्नतू रणे दैत्यान्निरंतरशरव्रजैः
chinnabhinnā hatairdetyaiḥ patitairbhakṣitaistadā ||
vyākulā sā'bhavatsenā viṣaṇṇavadanā tadā
||19||छिन्नभिन्ना हतैर्देत्यैः पतितैर्भक्षितैस्तदा ॥
व्याकुला साऽभवत्सेना विषण्णवदना तदा
pravidhvastāṃ tadā senāṃ dṛṣṭvā sāgaranaṃdanaḥ ||
rathenā'tipatākena gaṇānabhiyayau balī
||20||प्रविध्वस्तां तदा सेनां दृष्ट्वा सागरनंदनः ॥
रथेनाऽतिपताकेन गणानभिययौ बली
hastyaśvarathasaṃhrādāḥ śaṃkhabherīsvanāstathā ||
abhavansiṃhanādāśca senayorubhayostadā
||21||हस्त्यश्वरथसंह्रादाः शंखभेरीस्वनास्तथा ॥
अभवन्सिंहनादाश्च सेनयोरुभयोस्तदा
jalaṃdharaśaravrātairnīhārapaṭalairiva ||
dyāvāpṛthivyorācchinnamaṃtaraṃ samapadyata
||22||जलंधरशरव्रातैर्नीहारपटलैरिव ॥
द्यावापृथिव्योराच्छिन्नमंतरं समपद्यत
gaṇeśaṃ paṃcabhirviddhvā śailādiṃ navabhiḥ śaraiḥ ||
vīrabhadraṃ ca viṃśatyā nanāda jaladasvanaḥ
||23||गणेशं पंचभिर्विद्ध्वा शैलादिं नवभिः शरैः ॥
वीरभद्रं च विंशत्या ननाद जलदस्वनः
kārtikeyastadā daityaṃ śaktyā vivyādha satvaraḥ ||
yuyudhe śaktinirbhinnaḥ kiṃcidvyākulamānasaḥ
||24||कार्तिकेयस्तदा दैत्यं शक्त्या विव्याध सत्वरः ॥
युयुधे शक्तिनिर्भिन्नः किंचिद्व्याकुलमानसः
tataḥ krodhaparītākṣaḥ kārtikeyaṃ jalaṃdharaḥ ||
gadayā tāḍayāmāsa sa ca bhūmitale'patat
||25||ततः क्रोधपरीताक्षः कार्तिकेयं जलंधरः ॥
गदया ताडयामास स च भूमितलेऽपतत्
tathaiva naṃdinaṃ vegādapātayata bhūtale ||
tato gaṇeśvaraḥ kruddho gadāṃ paraśunā'hanat
||26||तथैव नंदिनं वेगादपातयत भूतले ॥
ततो गणेश्वरः क्रुद्धो गदां परशुनाऽहनत्
vīrabhadrastribhirbāṇairhṛdi vivyādha dānavam ||
saptabhiśca hayānketuṃ dhanuśchatraṃ ca cicchide
||27||वीरभद्रस्त्रिभिर्बाणैर्हृदि विव्याध दानवम् ॥
सप्तभिश्च हयान्केतुं धनुश्छत्रं च चिच्छिदे
tato'tikruddho daityeṃdraḥ śaktimudyamya dāruṇām ||
gaṇeśaṃ pātayāmāsa rathaṃ cā'nyamathā''ruhat
||28||ततोऽतिक्रुद्धो दैत्येंद्रः शक्तिमुद्यम्य दारुणाम् ॥
गणेशं पातयामास रथं चाऽन्यमथाऽऽरुहत्
abhyayādatha vegena vīrabhadraṃ ruṣānvitaḥ ||
tatastau sūryasaṃkāśau yuyudhāte parasparam
||29||अभ्ययादथ वेगेन वीरभद्रं रुषान्वितः ॥
ततस्तौ सूर्यसंकाशौ युयुधाते परस्परम्
vīrabhadraḥ punastasya hayānbāṇairapātayat ||
dhanuściccheda daityeṃdraḥ pupluve parighāyudhaḥ
||30||वीरभद्रः पुनस्तस्य हयान्बाणैरपातयत् ॥
धनुश्चिच्छेद दैत्येंद्रः पुप्लुवे परिघायुधः
sa vīrabhadraṃ tvarayā'bhigamya jaghāna daityaḥ parigheṇa mūrdhni ||
sa cā'pi vīraḥ pravibhinnamūrddhā papāta bhūmau rudhiraṃ samudgiran
||31||स वीरभद्रं त्वरयाऽभिगम्य जघान दैत्यः परिघेण मूर्ध्नि ॥
स चाऽपि वीरः प्रविभिन्नमूर्द्धा पपात भूमौ रुधिरं समुद्गिरन्
iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye jalaṃdharopākhyāne vīrabhadrapatananāmaikonaviṃśo'dhyāyaḥ || 19 ||