bhūtaśuddhivarṇanam
śrīnārāyaṇa uvāca
bhūtaśuddhiprakāraṃ ca kathayāmi mahāmune |
mūlādhārātsamutthāya kuṇḍalīṃ paradevatām
||1||भूतशुद्धिप्रकारं च कथयामि महामुने ।
मूलाधारात्समुत्थाय कुण्डलीं परदेवताम्
suṣumṇāmārgamāśritya brahmarandhragatāṃ smaret |
jīvaṃ brahmaṇi saṃyojya haṃsamantreṇa sādhakaḥ
||2||सुषुम्णामार्गमाश्रित्य ब्रह्मरन्ध्रगतां स्मरेत् ।
जीवं ब्रह्मणि संयोज्य हंसमन्त्रेण साधकः
pādādijānuparyantaṃ catuṣkoṇaṃ savajrakam |
laṃ bījākhyaṃ svarṇavarṇaṃ smaredavanimaṇḍalam
||3||पादादिजानुपर्यन्तं चतुष्कोणं सवज्रकम् ।
लं बीजाख्यं स्वर्णवर्णं स्मरेदवनिमण्डलम्
jānvādyānābhicandrārdhanibhaṃ padmadvayāṅkitam |
vaṃ bījayuktaṃ śvetābhamambhaso maṇḍalaṃ smaret
||4||जान्वाद्यानाभिचन्द्रार्धनिभं पद्मद्वयाङ्कितम् ।
वं बीजयुक्तं श्वेताभमम्भसो मण्डलं स्मरेत्
nābherhṛdayaparyantaṃ trikoṇaṃ svastikānvitam |
raṃ bījena yutaṃ raktaṃ smaretpāvakamaṇḍalam
||5||नाभेर्हृदयपर्यन्तं त्रिकोणं स्वस्तिकान्वितम् ।
रं बीजेन युतं रक्तं स्मरेत्पावकमण्डलम्
hṛdo bhūmadhyaparyantaṃ vṛttaṃ ṣaḍbindulāñchitam |
yaṃ bījayuktaṃ dhūmrābhaṃ nabhasvanmaṇḍalaṃ smaret
||6||हृदो भूमध्यपर्यन्तं वृत्तं षड्बिन्दुलाञ्छितम् ।
यं बीजयुक्तं धूम्राभं नभस्वन्मण्डलं स्मरेत्
ābrahmarandhraṃ bhrūmadhyādvṛttaṃ svacchaṃ manoharam |
haṃ bījayuktamākāśamaṇḍalaṃ ca vicintayet
||7||आब्रह्मरन्ध्रं भ्रूमध्याद्वृत्तं स्वच्छं मनोहरम् ।
हं बीजयुक्तमाकाशमण्डलं च विचिन्तयेत्
evaṃ bhūtāni sañcintya pratyekaṃ saṃvilāpayet |
bhuvaṃ jale jalaṃ vahnau vahniṃ vāyau nabhasyamum
||8||एवं भूतानि सञ्चिन्त्य प्रत्येकं संविलापयेत् ।
भुवं जले जलं वह्नौ वह्निं वायौ नभस्यमुम्
vilāpya khamahaṅkāre mahattattve'pyahaṅkṛtim |
mahāntaṃ prakṛtau māyāmātmani pravilāpayet
||9||विलाप्य खमहङ्कारे महत्तत्त्वेऽप्यहङ्कृतिम् ।
महान्तं प्रकृतौ मायामात्मनि प्रविलापयेत्
śuddhasaṃvinmayo bhūtvā cintayetpāpapūruṣam |
vāmakukṣisthitaṃ kṛṣṇamaṅguṣṭhaparimāṇakam
||10||शुद्धसंविन्मयो भूत्वा चिन्तयेत्पापपूरुषम् ।
वामकुक्षिस्थितं कृष्णमङ्गुष्ठपरिमाणकम्
brahmahatyāśiroyuktaṃ kanakasteyabāhukam |
madirāpānahṛdayaṃ gurutalpakaṭīyutam
||11||ब्रह्महत्याशिरोयुक्तं कनकस्तेयबाहुकम् ।
मदिरापानहृदयं गुरुतल्पकटीयुतम्
tatsaṃsargipadadvandvamupapātakamastakam |
khaḍgacarmadharaṃ kṛṣṇamadhovaktraṃ suduḥsaham
||12||तत्संसर्गिपदद्वन्द्वमुपपातकमस्तकम् ।
खड्गचर्मधरं कृष्णमधोवक्त्रं सुदुःसहम्
vāyubījaṃ smaranvāyuṃ sampūryainaṃ viśoṣayet |
svaśarīrayutaṃ mantro vahnibījena nirdahet
||13||वायुबीजं स्मरन्वायुं सम्पूर्यैनं विशोषयेत् ।
स्वशरीरयुतं मन्त्रो वह्निबीजेन निर्दहेत्
kumbhake parijaptena tataḥ pāpanarodbhavam |
bahirbhasma samutsārya vāyubījena recayet
||14||कुम्भके परिजप्तेन ततः पापनरोद्भवम् ।
बहिर्भस्म समुत्सार्य वायुबीजेन रेचयेत्
sudhābījena dehotthaṃ bhasma saṃplāvayetsudhīḥ |
bhūbījena ghanīkṛtya bhasma tatkanakāṇḍavat
||15||सुधाबीजेन देहोत्थं भस्म संप्लावयेत्सुधीः ।
भूबीजेन घनीकृत्य भस्म तत्कनकाण्डवत्
viśuddhamukurākāraṃ japanbījaṃ vihāyasaḥ |
mūrdhādipādaparyantānyaṅgāni racayetsudhīḥ
||16||विशुद्धमुकुराकारं जपन्बीजं विहायसः ।
मूर्धादिपादपर्यन्तान्यङ्गानि रचयेत्सुधीः
ākāśādīni bhūtāni punarutpādayeccitaḥ |
so'haṃ mantreṇa cātmānamānayeddhṛdayāmbuje
||17||आकाशादीनि भूतानि पुनरुत्पादयेच्चितः ।
सोऽहं मन्त्रेण चात्मानमानयेद्धृदयाम्बुजे
kuṇḍalījīvamādāya parasaṅgātsudhāmayam |
saṃsthāpya hṛdayāmbhoje mūlādhāragatāṃ smaret
||18||कुण्डलीजीवमादाय परसङ्गात्सुधामयम् ।
संस्थाप्य हृदयाम्भोजे मूलाधारगतां स्मरेत्
raktāmbhodhisthapotollasadaruṇa- sarojādhirūḍhā karābjaiḥ śūlaṃ kodaṇḍamikṣūdbhavamaṇiguṇa- mapyaṅkuśaṃ pañcabāṇān |
bibhrāṇāsṛkkapālaṃ trinayana- lasitā pīnavakṣoruhāḍhyā devī bālārkavarṇā bhavatu sukhakarī prāṇaśaktiḥ parā naḥ
||19||रक्ताम्भोधिस्थपोतोल्लसदरुण- सरोजाधिरूढा कराब्जैः शूलं कोदण्डमिक्षूद्भवमणिगुण- मप्यङ्कुशं पञ्चबाणान् ।
बिभ्राणासृक्कपालं त्रिनयन- लसिता पीनवक्षोरुहाढ्या देवी बालार्कवर्णा भवतु सुखकरी प्राणशक्तिः परा नः
evaṃ dhyātvā prāṇaśaktiṃ paramātmasvarūpiṇīm |
vibhūtidhāraṇaṃ kāryaṃ sarvādhikṛtisiddhaye
||20||एवं ध्यात्वा प्राणशक्तिं परमात्मस्वरूपिणीम् ।
विभूतिधारणं कार्यं सर्वाधिकृतिसिद्धये
vibhūtervistaraṃ vakṣye dhāraṇe ca mahāphalam |
śrutismṛtipramāṇoktaṃ bhasmadhāraṇamuttamam
||21||विभूतेर्विस्तरं वक्ष्ये धारणे च महाफलम् ।
श्रुतिस्मृतिप्रमाणोक्तं भस्मधारणमुत्तमम्
iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ ekādaśaskandhe bhūtaśuddhivarṇanaṃ nāmāṣṭamo'dhyāyaḥ || 8 ||