cāṇḍālājñayā hariścandrasya khaḍgagrahaṇavarṇanam
sūta uvāca
ekadā tu gato rantuṃ bālakaiḥ sahito bahiḥ |
vārāṇasyā nātidūre rohitākhyaḥ kumārakaḥ
||1||एकदा तु गतो रन्तुं बालकैः सहितो बहिः ।
वाराणस्या नातिदूरे रोहिताख्यः कुमारकः
krīḍāṃ kṛtvā tato darbhān grahītumupacakrame |
komalānalpamūlāṃśca sāgrāñchaktyanusārataḥ
||2||क्रीडां कृत्वा ततो दर्भान् ग्रहीतुमुपचक्रमे ।
कोमलानल्पमूलांश्च साग्राञ्छक्त्यनुसारतः
āryaprītyarthamityuktvā hastayugmena yatnataḥ |
salakṣaṇāśca samidho barhiridhmaṃ salakṣaṇam
||3||आर्यप्रीत्यर्थमित्युक्त्वा हस्तयुग्मेन यत्नतः ।
सलक्षणाश्च समिधो बर्हिरिध्मं सलक्षणम्
palāśakāṣṭhānyādāya tvagnihomārthamādarāt |
mastake bhārakaṃ kṛtvā khidyamānaḥ pade pade
||4||पलाशकाष्ठान्यादाय त्वग्निहोमार्थमादरात् ।
मस्तके भारकं कृत्वा खिद्यमानः पदे पदे
udakasthānamāsādya tadā bālastṛṣānvitaḥ |
bhuvi bhāraṃ vinikṣipya jalasthāne tadā śiśuḥ
||5||उदकस्थानमासाद्य तदा बालस्तृषान्वितः ।
भुवि भारं विनिक्षिप्य जलस्थाने तदा शिशुः
kāmataḥ salilaṃ pītvā viśramya ca muhūrtakam |
valmīkopari vinyastabhāro hartuṃ pracakrame
||6||कामतः सलिलं पीत्वा विश्रम्य च मुहूर्तकम् ।
वल्मीकोपरि विन्यस्तभारो हर्तुं प्रचक्रमे
viśvāmitrājñayā tāvatkṛṣṇasarpo bhayāvahaḥ |
mahāviṣo mahāghoro valmīkānnirgatastadā
||7||विश्वामित्राज्ञया तावत्कृष्णसर्पो भयावहः ।
महाविषो महाघोरो वल्मीकान्निर्गतस्तदा
tenāsau bālako daṣṭastadaiva ca papāta ha |
rohitākhyaṃ mṛtaṃ dṛṣṭvā yayurbālā dvijālayam
||8||तेनासौ बालको दष्टस्तदैव च पपात ह ।
रोहिताख्यं मृतं दृष्ट्वा ययुर्बाला द्विजालयम्
tvaritā bhayasaṃvignāḥ procustanmāturagrataḥ |
he vipradāsi te putraḥ krīḍāṃ kartuṃ bahirgataḥ
||9||त्वरिता भयसंविग्नाः प्रोचुस्तन्मातुरग्रतः ।
हे विप्रदासि ते पुत्रः क्रीडां कर्तुं बहिर्गतः
asmābhiḥ sahitastatra sarpadaṣṭo mṛtastataḥ |
iti sā tadvacaḥ śrutvā vajrapātopamaṃ tadā
||10||अस्माभिः सहितस्तत्र सर्पदष्टो मृतस्ततः ।
इति सा तद्वचः श्रुत्वा वज्रपातोपमं तदा
papāta mūrcchitā bhūmau chinneva kadalī yathā |
atha tāṃ brāhmaṇo ruṣṭaḥ pānīyenābhyaṣiñcata
||11||पपात मूर्च्छिता भूमौ छिन्नेव कदली यथा ।
अथ तां ब्राह्मणो रुष्टः पानीयेनाभ्यषिञ्चत
muhūrtāccetanāṃ prāptā brāhmaṇastāmathābravīt |
brāhmaṇa uvāca |
alakṣmīkārakaṃ nindyaṃ jānatī tvaṃ niśāmukhe
||12||मुहूर्ताच्चेतनां प्राप्ता ब्राह्मणस्तामथाब्रवीत् ।
ब्राह्मण उवाच ।
अलक्ष्मीकारकं निन्द्यं जानती त्वं निशामुखे
rodanaṃ kuruṣe duṣṭe lajjā te hṛdaye na kim |
brāhmaṇenaivamuktā sā na kiñcidvākyamabravīt
||13||रोदनं कुरुषे दुष्टे लज्जा ते हृदये न किम् ।
ब्राह्मणेनैवमुक्ता सा न किञ्चिद्वाक्यमब्रवीत्
ruroda karuṇaṃ dīnā putraśokena pīḍitā |
aśrupūrṇamukhī dīnā dhūsarā muktamūrdhajā
||14||रुरोद करुणं दीना पुत्रशोकेन पीडिता ।
अश्रुपूर्णमुखी दीना धूसरा मुक्तमूर्धजा
atha tāṃ kupito vipro rājapatnīmabhāṣata |
dhiktvāṃ duṣṭe krayaṃ gṛhya mama kāryaṃ vilumpasi
||15||अथ तां कुपितो विप्रो राजपत्नीमभाषत ।
धिक्त्वां दुष्टे क्रयं गृह्य मम कार्यं विलुम्पसि
aśaktā cetkathaṃ tarhi gṛhītaṃ mama taddhanam |
evaṃ nirbhartsitā tena krūravākyaiḥ punaḥ punaḥ
||16||अशक्ता चेत्कथं तर्हि गृहीतं मम तद्धनम् ।
एवं निर्भर्त्सिता तेन क्रूरवाक्यैः पुनः पुनः
ruditā kāraṇaṃ prāha vipraṃ gadgadayā girā |
svāmin mama suto bālaḥ sarpadaṣṭo mṛto bahiḥ
||17||रुदिता कारणं प्राह विप्रं गद्गदया गिरा ।
स्वामिन् मम सुतो बालः सर्पदष्टो मृतो बहिः
anujñāṃ me prayacchasva draṣṭuṃ yāsyāmi bālakam |
durlabhaṃ darśanaṃ tena sañjātaṃ mama suvrata
||18||अनुज्ञां मे प्रयच्छस्व द्रष्टुं यास्यामि बालकम् ।
दुर्लभं दर्शनं तेन सञ्जातं मम सुव्रत
ityuktvā karuṇaṃ bālā punareva ruroda ha |
punastāṃ kupito vipro rājapatnīmabhāṣata
||19||इत्युक्त्वा करुणं बाला पुनरेव रुरोद ह ।
पुनस्तां कुपितो विप्रो राजपत्नीमभाषत
brāhmaṇa uvāca
śaṭhe duṣṭasamācāre kiṃ na jānāsi pātakam |
yaḥ svāmivetanaṃ gṛhya tasya kāryaṃ vilumpati
||20||शठे दुष्टसमाचारे किं न जानासि पातकम् ।
यः स्वामिवेतनं गृह्य तस्य कार्यं विलुम्पति
narake pacyate so'tha mahārauravapūrvake |
uṣitvā narake kalpaṃ tato'sau kukkuṭo bhavet
||21||नरके पच्यते सोऽथ महारौरवपूर्वके ।
उषित्वा नरके कल्पं ततोऽसौ कुक्कुटो भवेत्
kimanenāthavā kāryaṃ dharmasaṃkīrtanena me |
yastu pāparato mūrkhaḥ krūro nīco'nṛtaḥ śaṭhaḥ
||22||किमनेनाथवा कार्यं धर्मसंकीर्तनेन मे ।
यस्तु पापरतो मूर्खः क्रूरो नीचोऽनृतः शठः
tadvākyaṃ niṣphalaṃ tasminbhaved bījamivoṣare |
ehi te vidyate kiñcitparalokabhayaṃ yadi
||23||तद्वाक्यं निष्फलं तस्मिन्भवेद् बीजमिवोषरे ।
एहि ते विद्यते किञ्चित्परलोकभयं यदि
evamuktātha sā vipraṃ vepamānābravīdvacaḥ |
kāruṇyaṃ kuru me nātha prasīda sumukho bhava
||24||एवमुक्ताथ सा विप्रं वेपमानाब्रवीद्वचः ।
कारुण्यं कुरु मे नाथ प्रसीद सुमुखो भव
prasthāpaya muhūrtaṃ māṃ yāvad drakṣyāmi bālakam |
evamuktvātha sā mūrdhnā nipatya dvijapādayoḥ
||25||प्रस्थापय मुहूर्तं मां यावद् द्रक्ष्यामि बालकम् ।
एवमुक्त्वाथ सा मूर्ध्ना निपत्य द्विजपादयोः
ruroda karuṇaṃ bālā putraśokena pīḍitā |
athāha kupito vipraḥ krodhasaṃraktalocanaḥ
||26||रुरोद करुणं बाला पुत्रशोकेन पीडिता ।
अथाह कुपितो विप्रः क्रोधसंरक्तलोचनः
vipra uvāca
kiṃ te putreṇa me kāryaṃ gṛhakarma kuruṣva me |
kiṃ na jānāsi me krodhaṃ kaśāghātaphalapradam
||27||किं ते पुत्रेण मे कार्यं गृहकर्म कुरुष्व मे ।
किं न जानासि मे क्रोधं कशाघातफलप्रदम्
evamuktā sthitā dhairyād gṛhakarma cakāra ha |
ardharātro gatastasyāḥ pādābhyaṅgādikarmaṇā
||28||एवमुक्ता स्थिता धैर्याद् गृहकर्म चकार ह ।
अर्धरात्रो गतस्तस्याः पादाभ्यङ्गादिकर्मणा
brāhmaṇenātha sā proktā putrapārśvaṃ vrajādhunā |
tasya dāhādikaṃ kṛtvā punarāgaccha satvaram
||29||ब्राह्मणेनाथ सा प्रोक्ता पुत्रपार्श्वं व्रजाधुना ।
तस्य दाहादिकं कृत्वा पुनरागच्छ सत्वरम्
na lupyeta yathā prātargṛhakarma mameti ca |
tatastvekākinī rātrau vilapantī jagāma ha
||30||न लुप्येत यथा प्रातर्गृहकर्म ममेति च ।
ततस्त्वेकाकिनी रात्रौ विलपन्ती जगाम ह
dṛṣṭvā mṛtaṃ nijaṃ putraṃ bhṛśaṃ śokena pīḍitā |
yūthabhraṣṭā kuraṅgīva vivatsā saurabhī yathā
||31||दृष्ट्वा मृतं निजं पुत्रं भृशं शोकेन पीडिता ।
यूथभ्रष्टा कुरङ्गीव विवत्सा सौरभी यथा
vārāṇasyā bahirgatvā kṣaṇād dṛṣṭvā nijaṃ sutam |
śayānaṃ raṅkavadbhūmau kāṣṭhadarbhatṛṇopari
||32||वाराणस्या बहिर्गत्वा क्षणाद् दृष्ट्वा निजं सुतम् ।
शयानं रङ्कवद्भूमौ काष्ठदर्भतृणोपरि
vilalāpātiduḥkhārtā śabdaṃ kṛtvā suniṣṭhuram |
ehi me sammukhaṃ kasmādroṣito'si vadādhunā
||33||विललापातिदुःखार्ता शब्दं कृत्वा सुनिष्ठुरम् ।
एहि मे सम्मुखं कस्माद्रोषितोऽसि वदाधुना
āyāsyabhimukho nityamambetyuktvā punaḥ punaḥ |
gatvā skhalatpadā tasya papātopari mūrchitā
||34||आयास्यभिमुखो नित्यमम्बेत्युक्त्वा पुनः पुनः ।
गत्वा स्खलत्पदा तस्य पपातोपरि मूर्छिता
punaḥ sā cetanāṃ prāpya dorbhyāmāliṅgya bālakam |
tanmukhe vadanaṃ nyasya rurodārtasvanaistadā
||35||पुनः सा चेतनां प्राप्य दोर्भ्यामालिङ्ग्य बालकम् ।
तन्मुखे वदनं न्यस्य रुरोदार्तस्वनैस्तदा
karābhyāṃ tāḍanaṃ cakre mastakasyodarasya ca |
hā bāla hā śiśo vatsa hā kumāraka sundara
||36||कराभ्यां ताडनं चक्रे मस्तकस्योदरस्य च ।
हा बाल हा शिशो वत्स हा कुमारक सुन्दर
hā rājan kva gato'si tvaṃ paśyemaṃ bālakaṃ nijam |
prāṇebhyo'pi garīyāṃsaṃ bhūtale patitaṃ mṛtam
||37||हा राजन् क्व गतोऽसि त्वं पश्येमं बालकं निजम् ।
प्राणेभ्योऽपि गरीयांसं भूतले पतितं मृतम्
tathāpaśyanmukhaṃ tasya bhūyo jīvitaśaṅkayā |
nirjīvavadanaṃ jñātvā mūrchitā nipapāta ha
||38||तथापश्यन्मुखं तस्य भूयो जीवितशङ्कया ।
निर्जीववदनं ज्ञात्वा मूर्छिता निपपात ह
hastena vadanaṃ gṛhya punarevamabhāṣata |
śayanaṃ tyaja he bāla śīghraṃ jāgṛhi bhīṣaṇam
||39||हस्तेन वदनं गृह्य पुनरेवमभाषत ।
शयनं त्यज हे बाल शीघ्रं जागृहि भीषणम्
niśārdhaṃ vardhate cedaṃ śivāśatanināditam |
bhūtapretapiśācādiḍākinīyūthanāditam
||40||निशार्धं वर्धते चेदं शिवाशतनिनादितम् ।
भूतप्रेतपिशाचादिडाकिनीयूथनादितम्
mitrāṇi te gatānyastāttvamekastu kutaḥ sthitaḥ |
sūta uvāca |
evamuktvā punastanvī karuṇaṃ praruroda ha
||41||मित्राणि ते गतान्यस्तात्त्वमेकस्तु कुतः स्थितः ।
सूत उवाच ।
एवमुक्त्वा पुनस्तन्वी करुणं प्ररुरोद ह
hā śiśo bāla hā vatsa rohitākhya kumāraka |
re putra pratiśabdaṃ me kasmāttvaṃ na prayacchasi
||42||हा शिशो बाल हा वत्स रोहिताख्य कुमारक ।
रे पुत्र प्रतिशब्दं मे कस्मात्त्वं न प्रयच्छसि
tavāhaṃ jananī vatsa kiṃ na jānāsi paśya mām |
deśatyāgādrājyanāśātputra bhartrā svavikrayāt
||43||तवाहं जननी वत्स किं न जानासि पश्य माम् ।
देशत्यागाद्राज्यनाशात्पुत्र भर्त्रा स्वविक्रयात्
yaddāsītvācca jīvāmi tvāṃ dṛṣṭvā putra kevalam |
te janmasamaye viprairādiṣṭaṃ yattvanāgatam
||44||यद्दासीत्वाच्च जीवामि त्वां दृष्ट्वा पुत्र केवलम् ।
ते जन्मसमये विप्रैरादिष्टं यत्त्वनागतम्
dīrghāyuḥ pṛthivīrājaḥ putrapautrasamanvitaḥ |
śauryadānaratiḥ sattvo gurudevadvijārcakaḥ
||45||दीर्घायुः पृथिवीराजः पुत्रपौत्रसमन्वितः ।
शौर्यदानरतिः सत्त्वो गुरुदेवद्विजार्चकः
mātāpitrostu priyakṛtsatyavādī jitendriyaḥ |
ityādi sakalaṃ jātamasatyamadhunā suta
||46||मातापित्रोस्तु प्रियकृत्सत्यवादी जितेन्द्रियः ।
इत्यादि सकलं जातमसत्यमधुना सुत
cakramatsyāvātapatraśrīvatsasvastikadhvajāḥ |
tava pāṇitale putra kalaśaścāmaraṃ tathā
||47||चक्रमत्स्यावातपत्रश्रीवत्सस्वस्तिकध्वजाः ।
तव पाणितले पुत्र कलशश्चामरं तथा
lakṣaṇāni tathānyāni tvaddhaste yāni santi ca |
tāni sarvāṇi moghāni sañjātānyadhunā suta
||48||लक्षणानि तथान्यानि त्वद्धस्ते यानि सन्ति च ।
तानि सर्वाणि मोघानि सञ्जातान्यधुना सुत
hā rājanpṛthivīnātha kva te rājyaṃ kva mantriṇaḥ |
kva te siṃhāsanaṃ chatraṃ kva te khaḍgaḥ kva taddhanam
||49||हा राजन्पृथिवीनाथ क्व ते राज्यं क्व मन्त्रिणः ।
क्व ते सिंहासनं छत्रं क्व ते खड्गः क्व तद्धनम्
kva sāyodhyā kva harmyāṇi kva gajāśvarathaprajāḥ |
sarvametattathā putra māṃ tyaktvā kva gato'si re
||50||क्व सायोध्या क्व हर्म्याणि क्व गजाश्वरथप्रजाः ।
सर्वमेतत्तथा पुत्र मां त्यक्त्वा क्व गतोऽसि रे
hā kānta hā nṛpāgaccha paśyemaṃ svasutaṃ priyam |
yena te riṅgatā vakṣaḥ kuṃkumenāvalepitam
||51||हा कान्त हा नृपागच्छ पश्येमं स्वसुतं प्रियम् ।
येन ते रिङ्गता वक्षः कुंकुमेनावलेपितम्
svaśarīrarajaḥpaṅkairviśālaṃ malinīkṛtam |
yena te bālabhāvena mṛganābhivilepitaḥ
||52||स्वशरीररजःपङ्कैर्विशालं मलिनीकृतम् ।
येन ते बालभावेन मृगनाभिविलेपितः
bhraṃśito bhālatilakastavāṅkasthena bhūpate |
yasya vaktraṃ mṛdā liptaṃ snehādvai cumbitaṃ mayā
||53||भ्रंशितो भालतिलकस्तवाङ्कस्थेन भूपते ।
यस्य वक्त्रं मृदा लिप्तं स्नेहाद्वै चुम्बितं मया
tanmukhaṃ makṣikāliṅgyaṃ paśye kīṭairvidūṣitam |
hā rājan paśya taṃ putraṃ bhuvisthaṃ raṅkavanmṛtam
||54||तन्मुखं मक्षिकालिङ्ग्यं पश्ये कीटैर्विदूषितम् ।
हा राजन् पश्य तं पुत्रं भुविस्थं रङ्कवन्मृतम्
hā deva kiṃ mayā kṛtyaṃ kṛtaṃ pūrvabhavāntare |
tasya karmaphalasyeha na pāramupalakṣaye
||55||हा देव किं मया कृत्यं कृतं पूर्वभवान्तरे ।
तस्य कर्मफलस्येह न पारमुपलक्षये
hā putra hā śiśo vatsa kā kumāraka sundara |
evaṃ tasyā vilāpaṃ te śrutvā nagarapālakāḥ
||56||हा पुत्र हा शिशो वत्स का कुमारक सुन्दर ।
एवं तस्या विलापं ते श्रुत्वा नगरपालकाः
jāgṛtāstvaritāstasyāḥ pārśvamīyuḥ suvismitāḥ |
janā ūcuḥ |
kā tvaṃ bālasya kasyāyaṃ patiste kutra tiṣṭhati
||57||जागृतास्त्वरितास्तस्याः पार्श्वमीयुः सुविस्मिताः ।
जना ऊचुः ।
का त्वं बालस्य कस्यायं पतिस्ते कुत्र तिष्ठति
ekaiva nirbhayā rātrau kasmāttvamiha rodiṣi |
evamuktātha sā tanvī na kiñcidvākyamabravīt
||58||एकैव निर्भया रात्रौ कस्मात्त्वमिह रोदिषि ।
एवमुक्ताथ सा तन्वी न किञ्चिद्वाक्यमब्रवीत्
bhūyo'pi pṛṣṭā sā tūṣṇīṃ stabdhībhūtā babhūva ha |
vilalāpātiduḥkhārtā śokāśruplutalocanā
||59||भूयोऽपि पृष्टा सा तूष्णीं स्तब्धीभूता बभूव ह ।
विललापातिदुःखार्ता शोकाश्रुप्लुतलोचना
atha te śaṅkitāstasyāṃ romāñcitatanūruhāḥ |
saṃtrastāḥ prāhuranyonyamuddhṛtāyudhapāṇayaḥ
||60||अथ ते शङ्कितास्तस्यां रोमाञ्चिततनूरुहाः ।
संत्रस्ताः प्राहुरन्योन्यमुद्धृतायुधपाणयः
nūnaṃ strī na bhavatyeṣā yataḥ kiñcinna bhāṣate |
tasmādvadhyā bhavedeṣā yatnato bālaghātinī
||61||नूनं स्त्री न भवत्येषा यतः किञ्चिन्न भाषते ।
तस्माद्वध्या भवेदेषा यत्नतो बालघातिनी
śubhā cettarhi kiṃ hyatra niśārdhe tiṣṭhate bahiḥ |
bhakṣārthamanayā nūnamānītaḥ kasyacicchiśuḥ
||62||शुभा चेत्तर्हि किं ह्यत्र निशार्धे तिष्ठते बहिः ।
भक्षार्थमनया नूनमानीतः कस्यचिच्छिशुः
ityuktvā tairgṛhitā sā gāḍhaṃ keśeṣu satvaram |
bhujayoraparaiścaiva kaiścāpi galake tathā
||63||इत्युक्त्वा तैर्गृहिता सा गाढं केशेषु सत्वरम् ।
भुजयोरपरैश्चैव कैश्चापि गलके तथा
khecarī yāsyatītyuktaṃ bahubhiḥ śastrapāṇibhiḥ |
ākṛṣya pakkaṇe nītā cāṇḍālāya samarpitā
||64||खेचरी यास्यतीत्युक्तं बहुभिः शस्त्रपाणिभिः ।
आकृष्य पक्कणे नीता चाण्डालाय समर्पिता
he cāṇḍāla bahirdṛṣṭā hyasmābhirbālaghātinī |
vadhyatāṃ vadhyatāmeṣa śīghraṃ nītvā bahiḥsthale
||65||हे चाण्डाल बहिर्दृष्टा ह्यस्माभिर्बालघातिनी ।
वध्यतां वध्यतामेष शीघ्रं नीत्वा बहिःस्थले
cāṇḍālaḥ prāha tāṃ dṛṣṭvā jñāteyaṃ lokaviśrutā |
na dṛṣṭapūrvā kenāpi lokaḍimbhānyanekadhā
||66||चाण्डालः प्राह तां दृष्ट्वा ज्ञातेयं लोकविश्रुता ।
न दृष्टपूर्वा केनापि लोकडिम्भान्यनेकधा
bhakṣitānyanayā bhūri bhavadbhiḥ puṇyamārjitam |
khyātirvaḥ śāśvatī loke gacchadhvaṃ ca yathāsukham
||67||भक्षितान्यनया भूरि भवद्भिः पुण्यमार्जितम् ।
ख्यातिर्वः शाश्वती लोके गच्छध्वं च यथासुखम्
dvijastrībālagoghātī svarṇasteyī ca yo naraḥ |
agnido vartmaghātī ca madyapo gurutalpagaḥ
||68||द्विजस्त्रीबालगोघाती स्वर्णस्तेयी च यो नरः ।
अग्निदो वर्त्मघाती च मद्यपो गुरुतल्पगः
mahājanavirodhī ca tasya puṇyaprado vadhaḥ |
dvijasyāpi striyo vāpi na doṣo vidyate vadhe
||69||महाजनविरोधी च तस्य पुण्यप्रदो वधः ।
द्विजस्यापि स्त्रियो वापि न दोषो विद्यते वधे
asyā vadhaśca me yogya ityuktvā gāḍabandhanaiḥ |
baddhvā keśeṣvathākṛṣya rajjubhistāmatāḍayat
||70||अस्या वधश्च मे योग्य इत्युक्त्वा गाडबन्धनैः ।
बद्ध्वा केशेष्वथाकृष्य रज्जुभिस्तामताडयत्
hariścandramathovāca vācā paruṣayā tadā |
re dāsa vadhyatāmeṣā duṣṭātmā mā vicāraya
||71||हरिश्चन्द्रमथोवाच वाचा परुषया तदा ।
रे दास वध्यतामेषा दुष्टात्मा मा विचारय
tadvākyaṃ bhūpatiḥ śrutvā vajrapātopamaṃ tadā |
vepamāno'tha cāṇḍālaṃ prāha strīvadhaśaṅkitaḥ
||72||तद्वाक्यं भूपतिः श्रुत्वा वज्रपातोपमं तदा ।
वेपमानोऽथ चाण्डालं प्राह स्त्रीवधशङ्कितः
na śakto'hamidaṃ kartuṃ preṣyaṃ dehi mamāparam |
asādhyamapi yatkarma tatkariṣye tvayoditam
||73||न शक्तोऽहमिदं कर्तुं प्रेष्यं देहि ममापरम् ।
असाध्यमपि यत्कर्म तत्करिष्ये त्वयोदितम्
śrutvā taduktaṃ vacanaṃ śvapaco vākyamabravīt |
mā bhaiṣīstvaṃ gṛhāṇāsiṃ vadho'syāḥ puṇyado mataḥ
||74||श्रुत्वा तदुक्तं वचनं श्वपचो वाक्यमब्रवीत् ।
मा भैषीस्त्वं गृहाणासिं वधोऽस्याः पुण्यदो मतः
bālānāmeva bhayadā neyaṃ rakṣyā kadācana |
tacchrutvā vacanaṃ tasya rājā vacanamabravīt
||75||बालानामेव भयदा नेयं रक्ष्या कदाचन ।
तच्छ्रुत्वा वचनं तस्य राजा वचनमब्रवीत्
striyo rakṣyāḥ prayatnena na hantavyāḥ kadācana |
strīvadhe kīrtitaḥ pāpaṃ munibhirdharmatatparaiḥ
||76||स्त्रियो रक्ष्याः प्रयत्नेन न हन्तव्याः कदाचन ।
स्त्रीवधे कीर्तितः पापं मुनिभिर्धर्मतत्परैः
puruṣo yaḥ striyaṃ hanyājjñānato'jñānato'pi vā |
narake pacyate so'tha mahārauravapūrvake
||77||पुरुषो यः स्त्रियं हन्याज्ज्ञानतोऽज्ञानतोऽपि वा ।
नरके पच्यते सोऽथ महारौरवपूर्वके
cāṇḍāla uvāca
mā vadāsiṃ gṛhāṇainaṃ tīkṣṇaṃ vidyutsamaprabham |
yatraikasminvadhaṃ nīte bahūnāṃ tu sukhaṃ bhavet
||78||मा वदासिं गृहाणैनं तीक्ष्णं विद्युत्समप्रभम् ।
यत्रैकस्मिन्वधं नीते बहूनां तु सुखं भवेत्
tasya hiṃsā kṛtaṃ nūnaṃ bahupuṇyapradā bhavet |
bhakṣitānyanayā bhūri loke ḍimbhāni duṣṭayā
||79||तस्य हिंसा कृतं नूनं बहुपुण्यप्रदा भवेत् ।
भक्षितान्यनया भूरि लोके डिम्भानि दुष्टया
tatkṣipraṃ vadhyatāmeṣā lokaḥ svastho bhaviṣyati |
rājovāca |
cāṇḍālādhipate tīvraṃ vrataṃ strīvadhavarjanam
||80||तत्क्षिप्रं वध्यतामेषा लोकः स्वस्थो भविष्यति ।
राजोवाच ।
चाण्डालाधिपते तीव्रं व्रतं स्त्रीवधवर्जनम्
ājanmatastato yatnaṃ na kuryāṃ strīvadhe tava |
cāṇḍāla uvāca |
svāmikāryaṃ vinā duṣṭa kiṃ kāryaṃ vidyate'param
||81||आजन्मतस्ततो यत्नं न कुर्यां स्त्रीवधे तव ।
चाण्डाल उवाच ।
स्वामिकार्यं विना दुष्ट किं कार्यं विद्यतेऽपरम्
gṛhītvā vetanaṃ me'dya kasmātkāryaṃ vilumpasi |
yaḥ svāmivetanaṃ gṛhya svāmikāryaṃ vilumpati
||82||गृहीत्वा वेतनं मेऽद्य कस्मात्कार्यं विलुम्पसि ।
यः स्वामिवेतनं गृह्य स्वामिकार्यं विलुम्पति
narakānniṣkṛtistasya nāsti kalpāyutairapi |
rājovāca |
cāṇḍālanātha me dehi prāpyamanyatsudāruṇam
||83||नरकान्निष्कृतिस्तस्य नास्ति कल्पायुतैरपि ।
राजोवाच ।
चाण्डालनाथ मे देहि प्राप्यमन्यत्सुदारुणम्
svaśatruṃ brūhi taṃ kṣipraṃ ghātayiṣyāmyasaṃśayam |
ghātayitvā tu taṃ śatruṃ tava dāsyāmi medinīm
||84||स्वशत्रुं ब्रूहि तं क्षिप्रं घातयिष्याम्यसंशयम् ।
घातयित्वा तु तं शत्रुं तव दास्यामि मेदिनीम्
deva devoragaiḥ siddhairgandharvairapi saṃyutam |
devendramapi jeṣyāmi nihatya niśitaiḥ śaraiḥ
||85||देव देवोरगैः सिद्धैर्गन्धर्वैरपि संयुतम् ।
देवेन्द्रमपि जेष्यामि निहत्य निशितैः शरैः
etacchrutvā tato vākyaṃ hariścandrasya bhūpateḥ |
cāṇḍālaḥ kupitaḥ prāha vepamānaṃ mahīpatim
||86||एतच्छ्रुत्वा ततो वाक्यं हरिश्चन्द्रस्य भूपतेः ।
चाण्डालः कुपितः प्राह वेपमानं महीपतिम्
cāṇḍāla uvāca
(naitadvākyaṃ sughaṭitaṃ yadvākyaṃ dāsakīrtitam) cāṇḍāladāsatāṃ kṛtvā surāṇāṃ bhāṣase vacaḥ |
dāsa kiṃ bahunā nūnaṃ śṛṇu me gadato vacaḥ
||87||(नैतद्वाक्यं सुघटितं यद्वाक्यं दासकीर्तितम्) चाण्डालदासतां कृत्वा सुराणां भाषसे वचः ।
दास किं बहुना नूनं शृणु मे गदतो वचः
nirlajja tava cedasti kiñcitpāpabhayaṃ hṛdi |
kimarthaṃ dāsatāṃ yātaścāṇḍālasya tu veśmani
||88||निर्लज्ज तव चेदस्ति किञ्चित्पापभयं हृदि ।
किमर्थं दासतां यातश्चाण्डालस्य तु वेश्मनि
gṛhāṇainaṃ tataḥ khaḍgamasyāśchindhi śiro'mbujam |
evamuktvātha cāṇḍālo rājñe khaḍgaṃ nyavedayat
||89||गृहाणैनं ततः खड्गमस्याश्छिन्धि शिरोऽम्बुजम् ।
एवमुक्त्वाथ चाण्डालो राज्ञे खड्गं न्यवेदयत्
iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ saptamaskandhe cāṇḍālājñayā hariścandrasya khaḍgagrahaṇavarṇanaṃ nāma pañcaviṃśo'dhyāyaḥ || 25 ||