śaṅkhacūḍena saha tulasīsaṅgamavarṇanam
nārada uvāca
vicitramidamākhyānaṃ bhavatā samudāhṛtam |
śrutena yena me tṛptirna kadāpi hi jāyate
||1||विचित्रमिदमाख्यानं भवता समुदाहृतम् ।
श्रुतेन येन मे तृप्तिर्न कदापि हि जायते
tataḥ paraṃ tu yajjātaṃ tattvaṃ vada mahāmate |
śrīnārāyaṇa uvāca |
ityevamāśiṣaṃ dattvā svālayaṃ ca yayau vidhiḥ
||2||ततः परं तु यज्जातं तत्त्वं वद महामते ।
श्रीनारायण उवाच ।
इत्येवमाशिषं दत्त्वा स्वालयं च ययौ विधिः
gāndharveṇa vivāhena jagṛhe tāṃ ca dānavaḥ |
svarge dundubhivādyaṃ ca puṣpavṛṣṭirbabhūva ha
||3||गान्धर्वेण विवाहेन जगृहे तां च दानवः ।
स्वर्गे दुन्दुभिवाद्यं च पुष्पवृष्टिर्बभूव ह
sa reme rāmayā sārdhaṃ vāsagehe manorame |
mūrcchāṃ sā prāpa tulasī navasaṅgamasaṅgatā
||4||स रेमे रामया सार्धं वासगेहे मनोरमे ।
मूर्च्छां सा प्राप तुलसी नवसङ्गमसङ्गता
nimagnā nirjale sādhvī sambhogasukhasāgare |
catuḥṣaṣṭikalāmānaṃ catuḥṣaṣṭividhaṃ sukham
||5||निमग्ना निर्जले साध्वी सम्भोगसुखसागरे ।
चतुःषष्टिकलामानं चतुःषष्टिविधं सुखम्
kāmaśāstre yanniruktaṃ rasikānāṃ yathepsitam |
aṅgapratyaṅgasaṃśleṣapūrvakaṃ strīmanoharam
||6||कामशास्त्रे यन्निरुक्तं रसिकानां यथेप्सितम् ।
अङ्गप्रत्यङ्गसंश्लेषपूर्वकं स्त्रीमनोहरम्
tatsarvaṃ rasaśṛṅgāraṃ cakāra rasikeśvaraḥ |
atīva ramyadeśe ca sarvajantuvivarjite
||7||तत्सर्वं रसशृङ्गारं चकार रसिकेश्वरः ।
अतीव रम्यदेशे च सर्वजन्तुविवर्जिते
puṣpacandanatalpe ca puṣpacandanavāyunā |
puṣpodyāne nadītīre puṣpacandanacarcite
||8||पुष्पचन्दनतल्पे च पुष्पचन्दनवायुना ।
पुष्पोद्याने नदीतीरे पुष्पचन्दनचर्चिते
gahītvā rasiko rāse puṣpacandanacarcitām |
bhūṣito bhūṣaṇenaiva ratnabhūṣaṇabhūṣitām
||9||गहीत्वा रसिको रासे पुष्पचन्दनचर्चिताम् ।
भूषितो भूषणेनैव रत्नभूषणभूषिताम्
surate viratirnāsti tayoḥ surativijñayoḥ |
jahāra mānasaṃ bharturlolayā līlayā satī
||10||सुरते विरतिर्नास्ति तयोः सुरतिविज्ञयोः ।
जहार मानसं भर्तुर्लोलया लीलया सती
cetanāṃ rasikāyāśca jahāra rasabhāvavit |
vakṣasaścandanaṃ rājñastilakaṃ vijahāra sā
||11||चेतनां रसिकायाश्च जहार रसभाववित् ।
वक्षसश्चन्दनं राज्ञस्तिलकं विजहार सा
sa ca jahāra tasyāśca sindūraṃ bindupatrakam |
tadvakṣasyuroje ca nakharekhāṃ dadau mudā
||12||स च जहार तस्याश्च सिन्दूरं बिन्दुपत्रकम् ।
तद्वक्षस्युरोजे च नखरेखां ददौ मुदा
sā dadau tadvāmapārśve karabhūṣaṇalakṣaṇam |
rājā tadoṣṭhapuṭake dadau radanadaṃśanam
||13||सा ददौ तद्वामपार्श्वे करभूषणलक्षणम् ।
राजा तदोष्ठपुटके ददौ रदनदंशनम्
tadgaṇḍayugale sā ca pradadau taccaturguṇam |
āliṅganaṃ cumbanaṃ ca jaṅghādimardanaṃ tathā
||14||तद्गण्डयुगले सा च प्रददौ तच्चतुर्गुणम् ।
आलिङ्गनं चुम्बनं च जङ्घादिमर्दनं तथा
evaṃ parasparaṃ krīḍāṃ cakratustau vijānatau |
surate virate tau ca samutthāya parasparam
||15||एवं परस्परं क्रीडां चक्रतुस्तौ विजानतौ ।
सुरते विरते तौ च समुत्थाय परस्परम्
suveṣaṃ cakratustatra yadyanmanasi vāñchitam |
candanaiḥ kuṅkumāraktaiḥ sā tasya tilakaṃ dadau
||16||सुवेषं चक्रतुस्तत्र यद्यन्मनसि वाञ्छितम् ।
चन्दनैः कुङ्कुमारक्तैः सा तस्य तिलकं ददौ
sarvāṅge sundare ramye cakāra cānulepanam |
suvāsaṃ caiva tāmbūlaṃ vahniśuddhe ca vāsasī
||17||सर्वाङ्गे सुन्दरे रम्ये चकार चानुलेपनम् ।
सुवासं चैव ताम्बूलं वह्निशुद्धे च वाससी
pārijātasya kusumaṃ jarārogaharaṃ param |
amūlyaratnanirmāṇamaṅgulīyakamuttamam
||18||पारिजातस्य कुसुमं जरारोगहरं परम् ।
अमूल्यरत्ननिर्माणमङ्गुलीयकमुत्तमम्
sundaraṃ ca maṇivaraṃ triṣu lokeṣu durlabham |
dāsī tavāhamityevaṃ samuccārya punaḥ punaḥ
||19||सुन्दरं च मणिवरं त्रिषु लोकेषु दुर्लभम् ।
दासी तवाहमित्येवं समुच्चार्य पुनः पुनः
nanāma parayā bhaktyā svāminaṃ guṇaśālinam |
sasmitā tanmukhāmbhojaṃ locanābhyāṃ punaḥ punaḥ
||20||ननाम परया भक्त्या स्वामिनं गुणशालिनम् ।
सस्मिता तन्मुखाम्भोजं लोचनाभ्यां पुनः पुनः
nimeṣarahitābhyāṃ cāpyapaśyatkāmasundaram |
sa ca tāṃ ca samākṛṣya cakāra vakṣasi priyām
||21||निमेषरहिताभ्यां चाप्यपश्यत्कामसुन्दरम् ।
स च तां च समाकृष्य चकार वक्षसि प्रियाम्
sasmitaṃ vāsasācchannaṃ dadarśa mukhapaṅkajam |
cucumba kaṭhine gaṇḍe bimboṣṭhau punareva ca
||22||सस्मितं वाससाच्छन्नं ददर्श मुखपङ्कजम् ।
चुचुम्ब कठिने गण्डे बिम्बोष्ठौ पुनरेव च
dadau tasyai vastrayugmaṃ varuṇādāhṛtaṃ ca yat |
tadāhṛtāṃ ratnamālāṃ triṣu lokeṣu durlabhām
||23||ददौ तस्यै वस्त्रयुग्मं वरुणादाहृतं च यत् ।
तदाहृतां रत्नमालां त्रिषु लोकेषु दुर्लभाम्
dadau mañjīrayugmaṃ ca svāhāyā āhṛtaṃ ca yat |
keyūrayugmaṃ chāyāyā rohiṇyāścaiva kuṇḍalam
||24||ददौ मञ्जीरयुग्मं च स्वाहाया आहृतं च यत् ।
केयूरयुग्मं छायाया रोहिण्याश्चैव कुण्डलम्
aṅgulīyakaratnāni ratyāśca karabhūṣaṇam |
śaṅkhaṃ ca ruciraṃ citraṃ yaddattaṃ viśvakarmaṇā
||25||अङ्गुलीयकरत्नानि रत्याश्च करभूषणम् ।
शङ्खं च रुचिरं चित्रं यद्दत्तं विश्वकर्मणा
vicitrapadmakaśreṇīṃ śayyāṃ cāpi sudurlabhām |
bhūṣaṇāni ca dattvā sa bhūpo hāsaṃ cakāra ha
||26||विचित्रपद्मकश्रेणीं शय्यां चापि सुदुर्लभाम् ।
भूषणानि च दत्त्वा स भूपो हासं चकार ह
nirmame kabarībhāre tasyā māṅgalyabhūṣaṇam |
sucitraṃ patrakaṃ gaṇḍamaṇḍale'syāḥ samaṃ tathā
||27||निर्ममे कबरीभारे तस्या माङ्गल्यभूषणम् ।
सुचित्रं पत्रकं गण्डमण्डलेऽस्याः समं तथा
candralekhātribhiryuktaṃ candanena sugandhinā |
parītaṃ paritaścitraiḥ sārdhaṃ kuṅkumabindubhiḥ
||28||चन्द्रलेखात्रिभिर्युक्तं चन्दनेन सुगन्धिना ।
परीतं परितश्चित्रैः सार्धं कुङ्कुमबिन्दुभिः
jvalatpradīpākāraṃ ca sindūratilakaṃ dadau |
tatpādapadmayugale sthalapadmavinindite
||29||ज्वलत्प्रदीपाकारं च सिन्दूरतिलकं ददौ ।
तत्पादपद्मयुगले स्थलपद्मविनिन्दिते
citrālaktakarāgaṃ ca nakhareṣu dadau mudā |
svavakṣasi muhurnyasya sarāgaṃ caraṇāmbujam
||30||चित्रालक्तकरागं च नखरेषु ददौ मुदा ।
स्ववक्षसि मुहुर्न्यस्य सरागं चरणाम्बुजम्
he devi tava dāso'hamityuccārya punaḥ punaḥ |
ratnabhūṣitahastena tāṃ ca kṛtvā svavakṣasi
||31||हे देवि तव दासोऽहमित्युच्चार्य पुनः पुनः ।
रत्नभूषितहस्तेन तां च कृत्वा स्ववक्षसि
tapovanaṃ parityajya rājā sthānāntaraṃ yayau |
malaye devanilaye śaile śaile tapovane
||32||तपोवनं परित्यज्य राजा स्थानान्तरं ययौ ।
मलये देवनिलये शैले शैले तपोवने
sthāne sthāne'tiramye ca puṣpodyāne ca nirjane |
kandare kandare sindhutīre caivātisundare
||33||स्थाने स्थानेऽतिरम्ये च पुष्पोद्याने च निर्जने ।
कन्दरे कन्दरे सिन्धुतीरे चैवातिसुन्दरे
puṣpabhadrānadītīre nīravātamanohare |
puline puline divye nadyāṃ nadyāṃ nade nade
||34||पुष्पभद्रानदीतीरे नीरवातमनोहरे ।
पुलिने पुलिने दिव्ये नद्यां नद्यां नदे नदे
madhau madhukarāṇāṃ ca madhuradhvaninādite |
vispandane surasane nandane gandhamādane
||35||मधौ मधुकराणां च मधुरध्वनिनादिते ।
विस्पन्दने सुरसने नन्दने गन्धमादने
devodyāne nandane ca citracandanakānane |
campakānāṃ ketakīnāṃ mādhavīnāṃ ca mādhave
||36||देवोद्याने नन्दने च चित्रचन्दनकानने ।
चम्पकानां केतकीनां माधवीनां च माधवे
kundānāṃ mālatīnāṃ ca kumudāmbhojakānane |
kalpavṛkṣe kalpavṛkṣe pārijātavane vane
||37||कुन्दानां मालतीनां च कुमुदाम्भोजकानने ।
कल्पवृक्षे कल्पवृक्षे पारिजातवने वने
nirjane kāñcane sthāne dhanye kāñcanaparvate |
kāñcīvane kiñjalake kañcuke kāñcanākare
||38||निर्जने काञ्चने स्थाने धन्ये काञ्चनपर्वते ।
काञ्चीवने किञ्जलके कञ्चुके काञ्चनाकरे
puṣpacandanatalpeṣu puṃskokilarutaśrute |
puṣpacandanasaṃyuktaḥ puṣpacandanavāyunā
||39||पुष्पचन्दनतल्पेषु पुंस्कोकिलरुतश्रुते ।
पुष्पचन्दनसंयुक्तः पुष्पचन्दनवायुना
kāmukyā kāmukaḥ kāmātsa reme rāmayā saha |
na hi tṛpto dānavendrastṛptiṃ naiva jagāma sā
||40||कामुक्या कामुकः कामात्स रेमे रामया सह ।
न हि तृप्तो दानवेन्द्रस्तृप्तिं नैव जगाम सा
haviṣā kṛṣṇavartmeva vavṛdhe madanastayoḥ |
tayā saha samāgatya svāśramaṃ dānavastataḥ
||41||हविषा कृष्णवर्त्मेव ववृधे मदनस्तयोः ।
तया सह समागत्य स्वाश्रमं दानवस्ततः
ramyaṃ krīḍālayaṃ gatvā vijahāra punaḥ punaḥ |
evaṃ sa bubhuje rājyaṃ śaṅkhacūḍaḥ pratāpavān
||42||रम्यं क्रीडालयं गत्वा विजहार पुनः पुनः ।
एवं स बुभुजे राज्यं शङ्खचूडः प्रतापवान्
ekamanvantaraṃ pūrṇaṃ rājarājeśvaro mahān |
devānāmasurāṇāṃ ca dānavānāṃ ca santatam
||43||एकमन्वन्तरं पूर्णं राजराजेश्वरो महान् ।
देवानामसुराणां च दानवानां च सन्ततम्
gandharvāṇāṃ kinnarāṇāṃ rākṣasānāṃ ca śāntidaḥ |
hṛtādhikārā devāśca caranti bhikṣukā yathā
||44||गन्धर्वाणां किन्नराणां राक्षसानां च शान्तिदः ।
हृताधिकारा देवाश्च चरन्ति भिक्षुका यथा
te sarve'tiviṣaṇṇāśca prajagmurbrahmaṇaḥ sabhām |
vṛttāntaṃ kathayāmāsū ruruduśca bhṛśaṃ muhuḥ
||45||ते सर्वेऽतिविषण्णाश्च प्रजग्मुर्ब्रह्मणः सभाम् ।
वृत्तान्तं कथयामासू रुरुदुश्च भृशं मुहुः
tadā brahmā suraiḥ sārdhaṃ jagāma śaṅkarālayam |
sarveśaṃ kathayāmāsa vidhātā candraśekharam
||46||तदा ब्रह्मा सुरैः सार्धं जगाम शङ्करालयम् ।
सर्वेशं कथयामास विधाता चन्द्रशेखरम्
brahmā śivaśca taiḥ sārdhaṃ vaikuṇṭhaṃ ca jagāma ha |
durlabhaṃ paramaṃ dhāma jarāmṛtyuharaṃ param
||47||ब्रह्मा शिवश्च तैः सार्धं वैकुण्ठं च जगाम ह ।
दुर्लभं परमं धाम जरामृत्युहरं परम्
samprāpa ca varaṃ dvāramāśramāṇāṃ hareraho |
dadarśa dvārapālāṃśca ratnasiṃhāsanasthitān
||48||सम्प्राप च वरं द्वारमाश्रमाणां हरेरहो ।
ददर्श द्वारपालांश्च रत्नसिंहासनस्थितान्
śobhitānpītavastraiśca ratnabhūṣaṇabhūṣitān |
vanamālānvitānsarvān śyāmasundaravigrahān
||49||शोभितान्पीतवस्त्रैश्च रत्नभूषणभूषितान् ।
वनमालान्वितान्सर्वान् श्यामसुन्दरविग्रहान्
śaṅkhacakragadāpadmadharāṃścaiva caturbhujān |
sasmitānsmeravaktrāsyānpadmanetrānmanoharān
||50||शङ्खचक्रगदापद्मधरांश्चैव चतुर्भुजान् ।
सस्मितान्स्मेरवक्त्रास्यान्पद्मनेत्रान्मनोहरान्
brahmā tānkathayāmāsa vṛttāntaṃ gamanārthakam |
te'nujñāṃ ca dadustasmai praviveśa tadājñayā
||51||ब्रह्मा तान्कथयामास वृत्तान्तं गमनार्थकम् ।
तेऽनुज्ञां च ददुस्तस्मै प्रविवेश तदाज्ञया
evaṃ ṣoḍaśa dvārāṇi nirīkṣya kamalodbhavaḥ |
devaiḥ sārdhaṃ tānatītya praviveśa hareḥ sabhām
||52||एवं षोडश द्वाराणि निरीक्ष्य कमलोद्भवः ।
देवैः सार्धं तानतीत्य प्रविवेश हरेः सभाम्
devarṣibhiḥ parivṛtāṃ pārṣadaiśca caturbhujaiḥ |
nārāyaṇasvarūpaiśca sarvaiḥ kaustubhabhūṣitaiḥ
||53||देवर्षिभिः परिवृतां पार्षदैश्च चतुर्भुजैः ।
नारायणस्वरूपैश्च सर्वैः कौस्तुभभूषितैः
navendumaṇḍalākārāṃ caturasrāṃ manoharām |
maṇīndrahāranirmāṇāṃ hīrāsārasuśobhitām
||54||नवेन्दुमण्डलाकारां चतुरस्रां मनोहराम् ।
मणीन्द्रहारनिर्माणां हीरासारसुशोभिताम्
amūlyaratnakhacitāṃ racitāṃ svecchayā hareḥ |
māṇikyamālājālābhāṃ muktāpaṅktivibhūṣitām
||55||अमूल्यरत्नखचितां रचितां स्वेच्छया हरेः ।
माणिक्यमालाजालाभां मुक्तापङ्क्तिविभूषिताम्
maṇḍitāṃ maṇḍalākārai ratnadarpaṇakoṭibhiḥ |
vicitraiścitrarekhābhirnānācitravicitritām
||56||मण्डितां मण्डलाकारै रत्नदर्पणकोटिभिः ।
विचित्रैश्चित्ररेखाभिर्नानाचित्रविचित्रिताम्
padmarāgendraracitāṃ rucirāṃ maṇipaṅkajaiḥ |
sopānaśatakairyuktāṃ syamantakavinirmitaiḥ
||57||पद्मरागेन्द्ररचितां रुचिरां मणिपङ्कजैः ।
सोपानशतकैर्युक्तां स्यमन्तकविनिर्मितैः
paṭṭasūtragranthiyuktaiścārucandanapallavaiḥ |
indranīlastambhavaryairveṣṭitāṃ sumanoharām
||58||पट्टसूत्रग्रन्थियुक्तैश्चारुचन्दनपल्लवैः ।
इन्द्रनीलस्तम्भवर्यैर्वेष्टितां सुमनोहराम्
sadratnapūrṇakumbhānāṃ samūhaiśca samanvitām |
pārijātaprasūnānāṃ mālājālairvirājitām
||59||सद्रत्नपूर्णकुम्भानां समूहैश्च समन्विताम् ।
पारिजातप्रसूनानां मालाजालैर्विराजिताम्
kastūrīkuṅkumāraktaiḥ sugandhicandanadrumaiḥ |
susaṃskṛtāṃ tu sarvatra vāsitāṃ gandhavāyunā
||60||कस्तूरीकुङ्कुमारक्तैः सुगन्धिचन्दनद्रुमैः ।
सुसंस्कृतां तु सर्वत्र वासितां गन्धवायुना
vidyādharīsamūhānāṃ nṛtyajālairvirājitām |
sahasrayojanāyāmāṃ paripūrṇāṃ ca kiṅkaraiḥ
||61||विद्याधरीसमूहानां नृत्यजालैर्विराजिताम् ।
सहस्रयोजनायामां परिपूर्णां च किङ्करैः
dadarśa śrīhariṃ brahmā śaṅkaraśca suraiḥ saha |
vasantaṃ tanmadhyadeśe yathenduṃ tārakāvṛtam
||62||ददर्श श्रीहरिं ब्रह्मा शङ्करश्च सुरैः सह ।
वसन्तं तन्मध्यदेशे यथेन्दुं तारकावृतम्
amūlyaratnanirmāṇacitrasiṃhāsane sthitam |
kirīṭinaṃ kuṇḍalinaṃ vanamālāvibhūṣitam
||63||अमूल्यरत्ननिर्माणचित्रसिंहासने स्थितम् ।
किरीटिनं कुण्डलिनं वनमालाविभूषितम्
candanokṣitasarvāṅgaṃ bibhrataṃ kelipaṅkajam |
purato nṛtyagītaṃ ca paśyantaṃ sasmitaṃ mudā
||64||चन्दनोक्षितसर्वाङ्गं बिभ्रतं केलिपङ्कजम् ।
पुरतो नृत्यगीतं च पश्यन्तं सस्मितं मुदा
śāntaṃ sarasvatīkāntaṃ lakṣmīdhṛtapadāmbujam |
lakṣmyā pradattaṃ tāmbūlaṃ bhuktavantaṃ suvāsitam
||65||शान्तं सरस्वतीकान्तं लक्ष्मीधृतपदाम्बुजम् ।
लक्ष्म्या प्रदत्तं ताम्बूलं भुक्तवन्तं सुवासितम्
gaṅgayā parayā bhaktyā sevitaṃ śvetacāmaraiḥ |
sarvaiśca stūyamānaṃ ca bhaktinamrātmakandharaiḥ
||66||गङ्गया परया भक्त्या सेवितं श्वेतचामरैः ।
सर्वैश्च स्तूयमानं च भक्तिनम्रात्मकन्धरैः
evaṃ viśiṣṭaṃ taṃ dṛṣṭvā paripūrṇatamaṃ prabhum |
brahmādayaḥ surāḥ sarve praṇamya tuṣṭuvustadā
||67||एवं विशिष्टं तं दृष्ट्वा परिपूर्णतमं प्रभुम् ।
ब्रह्मादयः सुराः सर्वे प्रणम्य तुष्टुवुस्तदा
pulakāñcitasarvāṅgāḥ sāśrunetrāśca gadgadāḥ |
bhaktāśca parayā bhaktyā bhītā namrātmakandharāḥ
||68||पुलकाञ्चितसर्वाङ्गाः साश्रुनेत्राश्च गद्गदाः ।
भक्ताश्च परया भक्त्या भीता नम्रात्मकन्धराः
kṛtāñjalipuṭo bhūtvā vidhātā jagatāmapi |
vṛttāntaṃ kathayāmāsa vinayena hareḥ puraḥ
||69||कृताञ्जलिपुटो भूत्वा विधाता जगतामपि ।
वृत्तान्तं कथयामास विनयेन हरेः पुरः
haristadvacanaṃ śrutvā sarvajñaḥ sarvabhāvavit |
prahasyovāca brahmāṇaṃ rahasyaṃ ca manoharam
||70||हरिस्तद्वचनं श्रुत्वा सर्वज्ञः सर्वभाववित् ।
प्रहस्योवाच ब्रह्माणं रहस्यं च मनोहरम्
śrībhagavānuvāca
śaṅkhacūḍasya vṛttāntaṃ sarvaṃ jānāmi padmaja |
madbhaktasya ca gopasya mahātejasvinaḥ purā
||71||शङ्खचूडस्य वृत्तान्तं सर्वं जानामि पद्मज ।
मद्भक्तस्य च गोपस्य महातेजस्विनः पुरा
śṛṇu tatsarvavṛttāntamitihāsaṃ purātanam |
golokasyaiva caritaṃ pāpaghnaṃ puṇyakārakam
||72||शृणु तत्सर्ववृत्तान्तमितिहासं पुरातनम् ।
गोलोकस्यैव चरितं पापघ्नं पुण्यकारकम्
sudāmā nāma gopaśca pārṣadapravaro mama |
sa prāpa dānavīṃ yoniṃ rādhāśāpātsudāruṇāt
||73||सुदामा नाम गोपश्च पार्षदप्रवरो मम ।
स प्राप दानवीं योनिं राधाशापात्सुदारुणात्
tatraikadāhamagamaṃ svālayādrāsamaṇḍalam |
virajāmapi nītvā ca mama prāṇādhikā parā
||74||तत्रैकदाहमगमं स्वालयाद्रासमण्डलम् ।
विरजामपि नीत्वा च मम प्राणाधिका परा
sā māṃ virajayā sārdhaṃ vijñāya kiṅkarīmukhāt |
paścātkruddhā sājagāma na dadarśa ca tatra mām
||75||सा मां विरजया सार्धं विज्ञाय किङ्करीमुखात् ।
पश्चात्क्रुद्धा साजगाम न ददर्श च तत्र माम्
virajāṃ ca nadīrūpāṃ māṃ jñātvā ca tirohitam |
punarjagāma sā dṛṣṭvā svālayaṃ sakhibhiḥ saha
||76||विरजां च नदीरूपां मां ज्ञात्वा च तिरोहितम् ।
पुनर्जगाम सा दृष्ट्वा स्वालयं सखिभिः सह
māṃ dṛṣṭvā mandire devī sudāmnā sahitaṃ purā |
bhṛśaṃ sā bhartsayāmāsa maunībhūtaṃ ca susthiram
||77||मां दृष्ट्वा मन्दिरे देवी सुदाम्ना सहितं पुरा ।
भृशं सा भर्त्सयामास मौनीभूतं च सुस्थिरम्
tacchrutvāsahamānaśca sudāmā tāṃ cukopa ha |
sa ca tāṃ bhartsayāmāsa kopena mama sanidhau
||78||तच्छ्रुत्वासहमानश्च सुदामा तां चुकोप ह ।
स च तां भर्त्सयामास कोपेन मम सनिधौ
tacchrutvā kopayuktā sā raktapaṅkajalocanā |
bahiṣkartuṃ cakārājñāṃ saṃtrastaṃ mama saṃsadi
||79||तच्छ्रुत्वा कोपयुक्ता सा रक्तपङ्कजलोचना ।
बहिष्कर्तुं चकाराज्ञां संत्रस्तं मम संसदि
sakhīlakṣaṃ samuttasthau durvāraṃ tejasolbaṇam |
bahiścakāra taṃ tūrṇaṃ jalpantaṃ ca punaḥ punaḥ
||80||सखीलक्षं समुत्तस्थौ दुर्वारं तेजसोल्बणम् ।
बहिश्चकार तं तूर्णं जल्पन्तं च पुनः पुनः
sā ca tattāḍanaṃ tāsāṃ śrutvā ruṣṭā śaśāpa ha |
yāhi re dānavīṃ yonimityevaṃ dāruṇaṃ vacaḥ
||81||सा च तत्ताडनं तासां श्रुत्वा रुष्टा शशाप ह ।
याहि रे दानवीं योनिमित्येवं दारुणं वचः
taṃ gacchantaṃ śapantaṃ ca rudantaṃ māṃ praṇamya ca |
vārayāmāsa tuṣṭā sā rudatī kṛpayā punaḥ
||82||तं गच्छन्तं शपन्तं च रुदन्तं मां प्रणम्य च ।
वारयामास तुष्टा सा रुदती कृपया पुनः
he vatsa tiṣṭha mā gaccha kva yāsīti punaḥ punaḥ |
samuccārya ca tatpaścājjagāma sā ca viklavam
||83||हे वत्स तिष्ठ मा गच्छ क्व यासीति पुनः पुनः ।
समुच्चार्य च तत्पश्चाज्जगाम सा च विक्लवम्
gopyaśca ruruduḥ sarvā gopāścāpi suduḥkhitāḥ |
te sarve rādhikā cāpi tatpaścād bodhitā mayā
||84||गोप्यश्च रुरुदुः सर्वा गोपाश्चापि सुदुःखिताः ।
ते सर्वे राधिका चापि तत्पश्चाद् बोधिता मया
āyāsyati kṣaṇārdhena kṛtvā śāpasya pālanam |
sudāmaṃstvamihāgacchetyuktvā sā ca nivāritā
||85||आयास्यति क्षणार्धेन कृत्वा शापस्य पालनम् ।
सुदामंस्त्वमिहागच्छेत्युक्त्वा सा च निवारिता
golokasya kṣaṇārdhena caikaṃ manvantaraṃ bhavet |
pṛthivyāṃ jagatāṃ dhātarityeva vacanaṃ dhruvam
||86||गोलोकस्य क्षणार्धेन चैकं मन्वन्तरं भवेत् ।
पृथिव्यां जगतां धातरित्येव वचनं ध्रुवम्
ityevaṃ śaṅkhacūḍaśca punastatraiva yāsyati |
mahābaliṣṭho yogeśaḥ sarvamāyāviśāradaḥ
||87||इत्येवं शङ्खचूडश्च पुनस्तत्रैव यास्यति ।
महाबलिष्ठो योगेशः सर्वमायाविशारदः
mama śūlaṃ gṛhītvā ca śīghraṃ gacchata bhāratam |
śivaḥ karotu saṃhāraṃ mama śūlena rakṣasaḥ
||88||मम शूलं गृहीत्वा च शीघ्रं गच्छत भारतम् ।
शिवः करोतु संहारं मम शूलेन रक्षसः
mamaiva kavacaṃ kaṇṭhe sarvamaṅgalakārakam |
bibharti dānavaḥ śaśvatsaṃsāre vijayī tataḥ
||89||ममैव कवचं कण्ठे सर्वमङ्गलकारकम् ।
बिभर्ति दानवः शश्वत्संसारे विजयी ततः
tasmin brahman sthite caiva na ko'pi hiṃsituṃ kṣamaḥ |
tadyācanāṃ kariṣyāmi viprarūpo'hameva ca
||90||तस्मिन् ब्रह्मन् स्थिते चैव न कोऽपि हिंसितुं क्षमः ।
तद्याचनां करिष्यामि विप्ररूपोऽहमेव च
satītvahānistatpatnyā yatra kāle bhaviṣyati |
tatraiva kāle tanmṛtyuriti datto varastvayā
||91||सतीत्वहानिस्तत्पत्न्या यत्र काले भविष्यति ।
तत्रैव काले तन्मृत्युरिति दत्तो वरस्त्वया
tatpatnyāścodare vīryamarpayiṣyāmi niścitam |
tatkṣaṇe caiva tanmṛtyurbhaviṣyati na saṃśayaḥ
||92||तत्पत्न्याश्चोदरे वीर्यमर्पयिष्यामि निश्चितम् ।
तत्क्षणे चैव तन्मृत्युर्भविष्यति न संशयः
paścātsā dehamutsajya bhaviṣyati mama priyā |
ityuktvā jagatāṃ nātho dadau śūlaṃ harāya ca
||93||पश्चात्सा देहमुत्सज्य भविष्यति मम प्रिया ।
इत्युक्त्वा जगतां नाथो ददौ शूलं हराय च
śūlaṃ dattvā yayau śīghraṃ harirabhyantare mudā |
bhārataṃ ca yayurdevā brahyarudrapurogamāḥ
||94||शूलं दत्त्वा ययौ शीघ्रं हरिरभ्यन्तरे मुदा ।
भारतं च ययुर्देवा ब्रह्यरुद्रपुरोगमाः
iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ navamaskandhe śaṅkhacūḍena saha tulasīsaṅgamavarṇanaṃ nāmaikonaviṃśo'dhyāyaḥ || 19 ||