mahālakṣmyāḥ dhyānastotravarṇanam
nārada uvāca
harerutkīrtanaṃ bhadraṃ śrutaṃ tajjñānamuttamam |
īpsitaṃ lakṣmyupākhyānaṃ dhyānaṃ stotraṃ vada prabho
||1||हरेरुत्कीर्तनं भद्रं श्रुतं तज्ज्ञानमुत्तमम् ।
ईप्सितं लक्ष्म्युपाख्यानं ध्यानं स्तोत्रं वद प्रभो
śrīnārāyaṇa uvāca
snātvā tīrthe purā śakro dhṛtvā dhaute ca vāsasī |
ghaṭaṃ saṃsthāpya kṣīrode ṣaḍdevān paryapūjayat
||2||स्नात्वा तीर्थे पुरा शक्रो धृत्वा धौते च वाससी ।
घटं संस्थाप्य क्षीरोदे षड्देवान् पर्यपूजयत्
gaṇeśaṃ ca dineśaṃ ca vahniṃ viṣṇuṃ śivaṃ śivām |
etān bhaktyā samabhyarcya puṣpagandhādibhistadā
||3||गणेशं च दिनेशं च वह्निं विष्णुं शिवं शिवाम् ।
एतान् भक्त्या समभ्यर्च्य पुष्पगन्धादिभिस्तदा
āvāhya ca mahālakṣmīṃ paramaiśvaryarūpiṇīm |
pūjāñcakāra deveśo brahmaṇā ca purodhasā
||4||आवाह्य च महालक्ष्मीं परमैश्वर्यरूपिणीम् ।
पूजाञ्चकार देवेशो ब्रह्मणा च पुरोधसा
puraḥsthiteṣu muniṣu brāhmaṇeṣu gurau harau |
devādiṣu sudeśe ca jñānānandaṃ śive mune
||5||पुरःस्थितेषु मुनिषु ब्राह्मणेषु गुरौ हरौ ।
देवादिषु सुदेशे च ज्ञानानन्दं शिवे मुने
pārijātasya puṣpaṃ ca gṛhītvā candanokṣitam |
dhyātvā devīṃ mahālakṣmīṃ pūjayāmāsa nārada
||6||पारिजातस्य पुष्पं च गृहीत्वा चन्दनोक्षितम् ।
ध्यात्वा देवीं महालक्ष्मीं पूजयामास नारद
dhyānaṃ ca sāmavedoktaṃ yaddattaṃ brahmaṇe purā |
hariṇā tena dhyānena tannibodha vadāmi te
||7||ध्यानं च सामवेदोक्तं यद्दत्तं ब्रह्मणे पुरा ।
हरिणा तेन ध्यानेन तन्निबोध वदामि ते
sahasradalapadmasthakarṇikāvāsinīṃ parām |
śaratpārvaṇakoṭīnduprabhāmuṣṭikarāṃ parām
||8||सहस्रदलपद्मस्थकर्णिकावासिनीं पराम् ।
शरत्पार्वणकोटीन्दुप्रभामुष्टिकरां पराम्
svatejasā prajvalantīṃ sukhadṛśyāṃ manoharām |
prataptakāñcananibhaśobhāṃ mūrtimatīṃ satīm
||9||स्वतेजसा प्रज्वलन्तीं सुखदृश्यां मनोहराम् ।
प्रतप्तकाञ्चननिभशोभां मूर्तिमतीं सतीम्
ratnabhūṣaṇabhūṣāḍhyāṃ śobhitāṃ pītavāsasā |
īṣaddhāsyaprasannāsyāṃ śaśvatsusthirayauvanām
||10||रत्नभूषणभूषाढ्यां शोभितां पीतवाससा ।
ईषद्धास्यप्रसन्नास्यां शश्वत्सुस्थिरयौवनाम्
sarvasampatpradātrīṃ ca mahālakṣmīṃ bhaje śubhām |
dhyānenānena tāṃ dhyātvā nānāguṇasamanvitām
||11||सर्वसम्पत्प्रदात्रीं च महालक्ष्मीं भजे शुभाम् ।
ध्यानेनानेन तां ध्यात्वा नानागुणसमन्विताम्
sampūjya brahmavākyena copacārāṇi ṣoḍaśa |
dadau bhaktyā vidhānena pratyekaṃ mantrapūrvakam
||12||सम्पूज्य ब्रह्मवाक्येन चोपचाराणि षोडश ।
ददौ भक्त्या विधानेन प्रत्येकं मन्त्रपूर्वकम्
praśastāni prakṛṣṭāni varāṇi vividhāni ca |
amūlyaratnasāraṃ ca nirmitaṃ viśvakarmaṇā
||13||प्रशस्तानि प्रकृष्टानि वराणि विविधानि च ।
अमूल्यरत्नसारं च निर्मितं विश्वकर्मणा
āsanaṃ ca vicitraṃ ca mahālakṣmi pragṛhyatām |
śuddhaṃ gaṅgodakamidaṃ sarvavanditamīpsitam
||14||आसनं च विचित्रं च महालक्ष्मि प्रगृह्यताम् ।
शुद्धं गङ्गोदकमिदं सर्ववन्दितमीप्सितम्
pāpedhmavahnirūpaṃ ca gṛhyatāṃ kamalālaye |
puṣpacandanadūrvādisaṃyutaṃ jāhnavījalam
||15||पापेध्मवह्निरूपं च गृह्यतां कमलालये ।
पुष्पचन्दनदूर्वादिसंयुतं जाह्नवीजलम्
śaṅkhagarbhasthitaṃ svarghyaṃ gṛhyatāṃ padmavāsini |
sugandhipuṣpatailaṃ ca sugandhāmalakīphalam
||16||शङ्खगर्भस्थितं स्वर्घ्यं गृह्यतां पद्मवासिनि ।
सुगन्धिपुष्पतैलं च सुगन्धामलकीफलम्
dehasaundaryabījaṃ ca gṛhyatāṃ śrīhareḥ priye |
kārpāsajaṃ ca kṛmijaṃ vasanaṃ devi gṛhyatām
||17||देहसौन्दर्यबीजं च गृह्यतां श्रीहरेः प्रिये ।
कार्पासजं च कृमिजं वसनं देवि गृह्यताम्
ratnasvarṇavikāraṃ ca dehabhūṣāvivardhanam |
śobhāyai śrīkaraṃ ratnaṃ bhūṣaṇaṃ devi gṛhyatām
||18||रत्नस्वर्णविकारं च देहभूषाविवर्धनम् ।
शोभायै श्रीकरं रत्नं भूषणं देवि गृह्यताम्
sarvasaundaryabījaṃ ca sadyaḥ śobhākaraṃ param |
vṛkṣaniryāsarūpaṃ ca gandhadravyādisaṃyutam
||19||सर्वसौन्दर्यबीजं च सद्यः शोभाकरं परम् ।
वृक्षनिर्यासरूपं च गन्धद्रव्यादिसंयुतम्
śrīkṛṣṇakānte dhūpaṃ ca pavitraṃ pratigṛhyatām |
sugandhiyuktaṃ sukhadaṃ candanaṃ devi gṛhyatām
||20||श्रीकृष्णकान्ते धूपं च पवित्रं प्रतिगृह्यताम् ।
सुगन्धियुक्तं सुखदं चन्दनं देवि गृह्यताम्
jagaccakṣuḥsvarūpaṃ ca pavitraṃ timirāpaham |
pradīpaṃ sukharūpaṃ ca gṛhyatāṃ ca sureśvari
||21||जगच्चक्षुःस्वरूपं च पवित्रं तिमिरापहम् ।
प्रदीपं सुखरूपं च गृह्यतां च सुरेश्वरि
nānopahārarūpaṃ ca nānārasasamanvitam |
atisvādukaraṃ caiva naivedyaṃ pratigṛhyatām
||22||नानोपहाररूपं च नानारससमन्वितम् ।
अतिस्वादुकरं चैव नैवेद्यं प्रतिगृह्यताम्
annaṃ brahmasvarūpaṃ ca prāṇarakṣaṇakāraṇam |
tuṣṭidaṃ puṣṭidaṃ caiva devyannaṃ pratigṛhyatām
||23||अन्नं ब्रह्मस्वरूपं च प्राणरक्षणकारणम् ।
तुष्टिदं पुष्टिदं चैव देव्यन्नं प्रतिगृह्यताम्
śālyannajaṃ supakvaṃ ca śarkarāgavyasaṃyutam |
svāduyuktaṃ mahālakṣmi paramānnaṃ pragṛhyatām
||24||शाल्यन्नजं सुपक्वं च शर्करागव्यसंयुतम् ।
स्वादुयुक्तं महालक्ष्मि परमान्नं प्रगृह्यताम्
śarkarāgavyapakvaṃ ca susvādu sumanoharam |
svastikaṃ nāma naivedyaṃ gṛhāṇa parameśvari
||25||शर्करागव्यपक्वं च सुस्वादु सुमनोहरम् ।
स्वस्तिकं नाम नैवेद्यं गृहाण परमेश्वरि
nānāvidhāni ramyāṇi pakvānnāni phalāni ca |
surabhistanasaṃtyaktaṃ susvādu sumanoharam
||26||नानाविधानि रम्याणि पक्वान्नानि फलानि च ।
सुरभिस्तनसंत्यक्तं सुस्वादु सुमनोहरम्
martyāmṛtaṃ sugavyaṃ ca gṛhyatāmacyutapriye |
susvādu rasasaṃyuktamikṣuvṛkṣasamudbhavam
||27||मर्त्यामृतं सुगव्यं च गृह्यतामच्युतप्रिये ।
सुस्वादु रससंयुक्तमिक्षुवृक्षसमुद्भवम्
agnipakvamatisvādu guḍaṃ ca pratigṛhyatām |
yavagodhūmasasyānāṃ cūrṇareṇusamudbhavam
||28||अग्निपक्वमतिस्वादु गुडं च प्रतिगृह्यताम् ।
यवगोधूमसस्यानां चूर्णरेणुसमुद्भवम्
supakvaṃ guḍagavyāktaṃ miṣṭānnaṃ devi gṛhyatām |
sasyacūrṇodbhavaṃ pakvaṃ svastikādisamanvitam
||29||सुपक्वं गुडगव्याक्तं मिष्टान्नं देवि गृह्यताम् ।
सस्यचूर्णोद्भवं पक्वं स्वस्तिकादिसमन्वितम्
mayā niveditaṃ bhaktyā naivedyaṃ pratigṛhyatām |
śītavāyupradaṃ caiva dāhe ca sukhadaṃ param
||30||मया निवेदितं भक्त्या नैवेद्यं प्रतिगृह्यताम् ।
शीतवायुप्रदं चैव दाहे च सुखदं परम्
kamale gṛhyatāṃ cedaṃ vyajanaṃ śvetacāmaram |
tāmbūlaṃ ca varaṃ ramyaṃ karpūrādisuvāsitam
||31||कमले गृह्यतां चेदं व्यजनं श्वेतचामरम् ।
ताम्बूलं च वरं रम्यं कर्पूरादिसुवासितम्
jihvājāḍyacchedakaraṃ tāmbūlaṃ pratigṛhyatām |
suvāsitaṃ suśītaṃ ca pipāsānāśakāraṇam
||32||जिह्वाजाड्यच्छेदकरं ताम्बूलं प्रतिगृह्यताम् ।
सुवासितं सुशीतं च पिपासानाशकारणम्
jagajjīvanarūpaṃ ca jīvanaṃ devi gṛhyatām |
dehasaundaryabījaṃ ca sadā śobhāvivardhanam
||33||जगज्जीवनरूपं च जीवनं देवि गृह्यताम् ।
देहसौन्दर्यबीजं च सदा शोभाविवर्धनम्
kārpāsajaṃ ca kṛmijaṃ vasanaṃ devi gṛhyatām |
raktasvarṇavikāraṃ ca dehabhūṣādivardhanam
||34||कार्पासजं च कृमिजं वसनं देवि गृह्यताम् ।
रक्तस्वर्णविकारं च देहभूषादिवर्धनम्
śobhādhāraṃ śrīkaraṃ ca bhūṣaṇaṃ devi gṛhyatām |
nānāṛtuṣu nirmāṇaṃ bahuśobhāśrayaṃ param
||35||शोभाधारं श्रीकरं च भूषणं देवि गृह्यताम् ।
नानाऋतुषु निर्माणं बहुशोभाश्रयं परम्
surabhūpapriyaṃ śuddhaṃ mālyaṃ devi pragṛhyatām |
śuddhidaṃ śuddharūpaṃ ca sarvamaṅgalamaṅgalam
||36||सुरभूपप्रियं शुद्धं माल्यं देवि प्रगृह्यताम् ।
शुद्धिदं शुद्धरूपं च सर्वमङ्गलमङ्गलम्
gandhavastūdbhavaṃ ramyaṃ gandhaṃ devi pragṛhyatām |
puṇyatīrthodakaṃ caiva viśuddhaṃ śuddhidaṃ sadā
||37||गन्धवस्तूद्भवं रम्यं गन्धं देवि प्रगृह्यताम् ।
पुण्यतीर्थोदकं चैव विशुद्धं शुद्धिदं सदा
gṛhyatāṃ kṛṣṇakānte tvaṃ ramyamācamanīyakam |
ratnasārādinirmāṇaṃ puṣpacandanacarcitam
||38||गृह्यतां कृष्णकान्ते त्वं रम्यमाचमनीयकम् ।
रत्नसारादिनिर्माणं पुष्पचन्दनचर्चितम्
ratnabhūṣaṇabhūṣāḍhyaṃ sutalpaṃ devi gṛhyatām |
yadyad dravyamapūrvaṃ ca pṛthivyāmapi durlabham
||39||रत्नभूषणभूषाढ्यं सुतल्पं देवि गृह्यताम् ।
यद्यद् द्रव्यमपूर्वं च पृथिव्यामपि दुर्लभम्
devabhūṣārhabhogyaṃ ca tad dravyaṃ devi gṛhyatām |
dravyāṇyetāni dattvā ca mūlena devapuṅgavaḥ
||40||देवभूषार्हभोग्यं च तद् द्रव्यं देवि गृह्यताम् ।
द्रव्याण्येतानि दत्त्वा च मूलेन देवपुङ्गवः
mūlaṃ jajāpa bhaktyā ca daśalakṣaṃ vidhānataḥ |
japena daśalakṣeṇa mantrasiddhirbabhūva ha
||41||मूलं जजाप भक्त्या च दशलक्षं विधानतः ।
जपेन दशलक्षेण मन्त्रसिद्धिर्बभूव ह
mantraśca brahmaṇā dattaḥ kalpavṛkṣaśca sarvataḥ |
lakṣmīrmāyā kāmavāṇī ṅe'ntā kamalavāsinī
||42||मन्त्रश्च ब्रह्मणा दत्तः कल्पवृक्षश्च सर्वतः ।
लक्ष्मीर्माया कामवाणी ङेऽन्ता कमलवासिनी
vaidiko mantrarājo'yaṃ prasiddhaḥ svāhayānvitaḥ |
kubero'nena mantreṇa paramaiśvaryamāptavān
||43||वैदिको मन्त्रराजोऽयं प्रसिद्धः स्वाहयान्वितः ।
कुबेरोऽनेन मन्त्रेण परमैश्वर्यमाप्तवान्
rājarājeśvaro dakṣaḥ sāvarṇirmanureva ca |
maṅgalo'nena mantreṇa saptadvīpe'vanīpatiḥ
||44||राजराजेश्वरो दक्षः सावर्णिर्मनुरेव च ।
मङ्गलोऽनेन मन्त्रेण सप्तद्वीपेऽवनीपतिः
priyavratottānapādau kedāro nṛpa eva ca |
ete siddhāśca rājendrā mantreṇānena nārada
||45||प्रियव्रतोत्तानपादौ केदारो नृप एव च ।
एते सिद्धाश्च राजेन्द्रा मन्त्रेणानेन नारद
siddhe mantre mahālakṣmīḥ śakrāya darśanaṃ dadau |
ratnendrasāranirmāṇavimānasthā varapradā
||46||सिद्धे मन्त्रे महालक्ष्मीः शक्राय दर्शनं ददौ ।
रत्नेन्द्रसारनिर्माणविमानस्था वरप्रदा
saptadvīpavatīṃ pṛthvīṃ chādayantī tviṣā ca sā |
śvetacampakavarṇābhā ratnabhūṣaṇabhūṣitā
||47||सप्तद्वीपवतीं पृथ्वीं छादयन्ती त्विषा च सा ।
श्वेतचम्पकवर्णाभा रत्नभूषणभूषिता
īṣaddhāsyaprasannāsyā bhaktānugrahakātarā |
bibhratī ratnamālāṃ ca koṭicandrasamaprabhām
||48||ईषद्धास्यप्रसन्नास्या भक्तानुग्रहकातरा ।
बिभ्रती रत्नमालां च कोटिचन्द्रसमप्रभाम्
dṛṣṭvā jagatprasūṃ śāntāṃ tuṣṭāvaitāṃ purandaraḥ |
pulakāñcitasarvāṅgaḥ sāśrunetraḥ kṛtāñjaliḥ
||49||दृष्ट्वा जगत्प्रसूं शान्तां तुष्टावैतां पुरन्दरः ।
पुलकाञ्चितसर्वाङ्गः साश्रुनेत्रः कृताञ्जलिः
brahmaṇā ca pradattena stotrarājena saṃyutaḥ |
sarvābhīṣṭapradenaiva vaidikenaiva tatra ca
||50||ब्रह्मणा च प्रदत्तेन स्तोत्रराजेन संयुतः ।
सर्वाभीष्टप्रदेनैव वैदिकेनैव तत्र च
purandara uvāca
namaḥ kamalavāsinyai nārāyaṇyai namo namaḥ |
kṛṣṇapriyāyai satataṃ mahālakṣyai namo namaḥ
||51||नमः कमलवासिन्यै नारायण्यै नमो नमः ।
कृष्णप्रियायै सततं महालक्ष्यै नमो नमः
padmapatrekṣaṇāyai ca padmāsyāyai namo namaḥ |
padmāsanāyai padminyai vaiṣṇavyai ca namo namaḥ
||52||पद्मपत्रेक्षणायै च पद्मास्यायै नमो नमः ।
पद्मासनायै पद्मिन्यै वैष्णव्यै च नमो नमः
sarvasampatsvarūpiṇyai sarvārādhyai namo namaḥ |
haribhaktipradātryai ca harṣadātryai namo namaḥ
||53||सर्वसम्पत्स्वरूपिण्यै सर्वाराध्यै नमो नमः ।
हरिभक्तिप्रदात्र्यै च हर्षदात्र्यै नमो नमः
kṛṣṇavakṣaḥsthitāyai ca kṛṣṇeśāyai namo namaḥ |
candraśobhāsvarūpāyai ratnapadme ca śobhane
||54||कृष्णवक्षःस्थितायै च कृष्णेशायै नमो नमः ।
चन्द्रशोभास्वरूपायै रत्नपद्मे च शोभने
sampattyadhiṣṭhātṛdevyai mahādevyai namo namaḥ |
namo vṛddhisvarūpāyai vṛddhidāyai namo namaḥ
||55||सम्पत्त्यधिष्ठातृदेव्यै महादेव्यै नमो नमः ।
नमो वृद्धिस्वरूपायै वृद्धिदायै नमो नमः
vaikuṇṭhe yā mahālakṣmīryā lakṣmīḥ kṣīrasāgare |
svargalakṣmīrindragehe rājalakṣmīrnṛpālaye
||56||वैकुण्ठे या महालक्ष्मीर्या लक्ष्मीः क्षीरसागरे ।
स्वर्गलक्ष्मीरिन्द्रगेहे राजलक्ष्मीर्नृपालये
gṛhalakṣmīśca gṛhiṇāṃ gehe ca gṛhadevatā |
surabhiḥ sāgare jātā dakṣiṇā yajñakāminī
||57||गृहलक्ष्मीश्च गृहिणां गेहे च गृहदेवता ।
सुरभिः सागरे जाता दक्षिणा यज्ञकामिनी
aditirdevamātā tvaṃ kamalā kamalālayā |
svāhā tvaṃ ca havirdāne kavyadāne svadhā smṛtā
||58||अदितिर्देवमाता त्वं कमला कमलालया ।
स्वाहा त्वं च हविर्दाने कव्यदाने स्वधा स्मृता
tvaṃ hi viṣṇusvarūpā ca sarvādhārā vasundharā |
śuddhasattvasvarūpā tvaṃ nārāyaṇaparāyaṇā
||59||त्वं हि विष्णुस्वरूपा च सर्वाधारा वसुन्धरा ।
शुद्धसत्त्वस्वरूपा त्वं नारायणपरायणा
krodhahiṃsāvarjitā ca varadā śāradā śubhā |
paramārthapradā tvaṃ ca haridāsyapradā parā
||60||क्रोधहिंसावर्जिता च वरदा शारदा शुभा ।
परमार्थप्रदा त्वं च हरिदास्यप्रदा परा
yayā vinā jagatsarvaṃ bhasmībhūtamasārakam |
jīvanmṛtaṃ ca viśvaṃ ca śaśvatsarvaṃ yayā vinā
||61||यया विना जगत्सर्वं भस्मीभूतमसारकम् ।
जीवन्मृतं च विश्वं च शश्वत्सर्वं यया विना
sarveṣāṃ ca parā mātā sarvabāndhavarūpiṇī |
dharmārthakāmamokṣāṇāṃ tvaṃ ca kāraṇarūpiṇī
||62||सर्वेषां च परा माता सर्वबान्धवरूपिणी ।
धर्मार्थकाममोक्षाणां त्वं च कारणरूपिणी
yathā mātā stanāndhānāṃ śiśūnāṃ śaiśave sadā |
tathā tvaṃ sarvadā mātā sarveṣāṃ sarvarūpataḥ
||63||यथा माता स्तनान्धानां शिशूनां शैशवे सदा ।
तथा त्वं सर्वदा माता सर्वेषां सर्वरूपतः
mātṛhīnaḥ stanāndhastu sa ca jīvati daivataḥ |
tvayā hīno janaḥ ko'pi na jīvatyeva niścitam
||64||मातृहीनः स्तनान्धस्तु स च जीवति दैवतः ।
त्वया हीनो जनः कोऽपि न जीवत्येव निश्चितम्
suprasannasvarūpā tvaṃ māṃ prasannā bhavāmbike |
vairigrastaṃ ca viṣayaṃ dehi mahyaṃ sanātani
||65||सुप्रसन्नस्वरूपा त्वं मां प्रसन्ना भवाम्बिके ।
वैरिग्रस्तं च विषयं देहि मह्यं सनातनि
ahaṃ yāvattvayā hīno bandhuhīnaśca bhikṣukaḥ |
sarvasampadvihīnaśca tāvadeva haripriye
||66||अहं यावत्त्वया हीनो बन्धुहीनश्च भिक्षुकः ।
सर्वसम्पद्विहीनश्च तावदेव हरिप्रिये
jñānaṃ dehi ca dharmaṃ ca sarvasaubhāgyamīpsitam |
prabhāvañca pratāpaṃ ca sarvādhikārameva ca
||67||ज्ञानं देहि च धर्मं च सर्वसौभाग्यमीप्सितम् ।
प्रभावञ्च प्रतापं च सर्वाधिकारमेव च
jayaṃ parākramaṃ yuddhe paramaiśvaryameva ca |
ityuktvā ca mahendraśca sarvaiḥ suragaṇaiḥ saha
||68||जयं पराक्रमं युद्धे परमैश्वर्यमेव च ।
इत्युक्त्वा च महेन्द्रश्च सर्वैः सुरगणैः सह
praṇanāma sāśrunetro mūrdhnā caiva punaḥ punaḥ |
brahmā ca śaṅkaraścaiva śeṣo dharmaśca keśavaḥ
||69||प्रणनाम साश्रुनेत्रो मूर्ध्ना चैव पुनः पुनः ।
ब्रह्मा च शङ्करश्चैव शेषो धर्मश्च केशवः
sarve cakruḥ parīhāraṃ surārthe ca punaḥ punaḥ |
devebhyaśca varaṃ dattvā puṣpamālāṃ manoharām
||70||सर्वे चक्रुः परीहारं सुरार्थे च पुनः पुनः ।
देवेभ्यश्च वरं दत्त्वा पुष्पमालां मनोहराम्
keśavāya dadau lakṣmīḥ santuṣṭā surasaṃsadi |
yayurdevāśca santuṣṭāḥ svaṃ svaṃ sthānaṃ ca nārada
||71||केशवाय ददौ लक्ष्मीः सन्तुष्टा सुरसंसदि ।
ययुर्देवाश्च सन्तुष्टाः स्वं स्वं स्थानं च नारद
devī yayau hareḥ sthānaṃ hṛṣṭā kṣīrodaśāyinaḥ |
yayatuścaiva svagṛhaṃ brahmeśānau ca nārada
||72||देवी ययौ हरेः स्थानं हृष्टा क्षीरोदशायिनः ।
ययतुश्चैव स्वगृहं ब्रह्मेशानौ च नारद
dattvā śubhāśiṣaṃ tau ca devebhyaḥ prītipūrvakam |
idaṃ stotraṃ mahāpuṇyaṃ trisandhyaṃ yaḥ paṭhennaraḥ
||73||दत्त्वा शुभाशिषं तौ च देवेभ्यः प्रीतिपूर्वकम् ।
इदं स्तोत्रं महापुण्यं त्रिसन्ध्यं यः पठेन्नरः
kuberatulyaḥ sa bhavedrājarājeśvaro mahān |
pañcalakṣajapenaiva stotrasiddhirbhavennṛṇām
||74||कुबेरतुल्यः स भवेद्राजराजेश्वरो महान् ।
पञ्चलक्षजपेनैव स्तोत्रसिद्धिर्भवेन्नृणाम्
siddhastotraṃ yadi paṭhenmāsamekaṃ tu santatam |
mahāsukhī ca rājendro bhaviṣyati na saṃśayaḥ
||75||सिद्धस्तोत्रं यदि पठेन्मासमेकं तु सन्ततम् ।
महासुखी च राजेन्द्रो भविष्यति न संशयः
iti śrīmaddevībhāgavate mahāpurāṇe'ṣṭādatasāhasryā saṃhitāyāṃ navamaskandhe mahālakṣmyāḥ dhyānastotravarṇanaṃ nāma dvicatvāriṃpto'dhyāyaḥ || 42 ||