svadhopākhyānavarṇanam
śrīnārāyaṇa uvāca
śṛṇu nārada vakṣyāmi svadhopākhyānamuttamam |
pitṝṇāṃ ca tṛptikaraṃ śrāddhāntaphalavardhanam
||1||शृणु नारद वक्ष्यामि स्वधोपाख्यानमुत्तमम् ।
पितॄणां च तृप्तिकरं श्राद्धान्तफलवर्धनम्
sṛṣṭerādau pitṛgaṇānsasarja jagatāṃ vidhiḥ |
caturaśca mūrtimatastrīṃśca tejaḥsvarūpiṇaḥ
||2||सृष्टेरादौ पितृगणान्ससर्ज जगतां विधिः ।
चतुरश्च मूर्तिमतस्त्रींश्च तेजःस्वरूपिणः
dṛṣṭvā saptapitṛgaṇān sukharūpānmanoharān |
āhāraṃ sasṛje teṣāṃ śrāddhaṃ tarpaṇapūrvakam
||3||दृष्ट्वा सप्तपितृगणान् सुखरूपान्मनोहरान् ।
आहारं ससृजे तेषां श्राद्धं तर्पणपूर्वकम्
snānaṃ tarpaṇaparyantaṃ śrāddhaṃ tu devapūjanam |
āhnikaṃ ca trisandhyāntaṃ viprāṇāṃ ca śrutau śrutam
||4||स्नानं तर्पणपर्यन्तं श्राद्धं तु देवपूजनम् ।
आह्निकं च त्रिसन्ध्यान्तं विप्राणां च श्रुतौ श्रुतम्
nityaṃ na kuryādyo viprastrisandhyaṃ śrāddhatarpaṇam |
baliṃ vedadhvaniṃ so'pi viṣahīno yathoragaḥ
||5||नित्यं न कुर्याद्यो विप्रस्त्रिसन्ध्यं श्राद्धतर्पणम् ।
बलिं वेदध्वनिं सोऽपि विषहीनो यथोरगः
devīsevāvihīnaśca śrīhareranivedyabhuk |
bhasmāntaṃ sūtakaṃ tasya na karmārhaśca nārada
||6||देवीसेवाविहीनश्च श्रीहरेरनिवेद्यभुक् ।
भस्मान्तं सूतकं तस्य न कर्मार्हश्च नारद
brahmā śrāddhādikaṃ sṛṣṭvā jagāma pitṛhetave |
na prāpnuvanti pitaro dadati brāhmaṇādayaḥ
||7||ब्रह्मा श्राद्धादिकं सृष्ट्वा जगाम पितृहेतवे ।
न प्राप्नुवन्ति पितरो ददति ब्राह्मणादयः
sarve ca jagmuḥ kṣudhitāḥ khinnāstu brahmaṇaḥ sabhām |
sarvaṃ nivedanaṃ cakrustameva jagatāṃ vidhim
||8||सर्वे च जग्मुः क्षुधिताः खिन्नास्तु ब्रह्मणः सभाम् ।
सर्वं निवेदनं चक्रुस्तमेव जगतां विधिम्
brahmā ca mānasīṃ kanyāṃ sasṛje ca manoharām |
rūpayauvanasampannāṃ śatacandranibhānanām
||9||ब्रह्मा च मानसीं कन्यां ससृजे च मनोहराम् ।
रूपयौवनसम्पन्नां शतचन्द्रनिभाननाम्
vidyāvatīṃ guṇavatīmatirūpavatīṃ satīm |
śvetacampakavarṇābhāṃ ratnabhūṣaṇabhūṣitām
||10||विद्यावतीं गुणवतीमतिरूपवतीं सतीम् ।
श्वेतचम्पकवर्णाभां रत्नभूषणभूषिताम्
viśuddhāṃ prakṛteraṃśāṃ sasmitāṃ varadāṃ śubhām |
svadhābhidhāṃ ca sudatīṃ lakṣmīlakṣaṇasaṃyutām
||11||विशुद्धां प्रकृतेरंशां सस्मितां वरदां शुभाम् ।
स्वधाभिधां च सुदतीं लक्ष्मीलक्षणसंयुताम्
śatapadmapadanyastapādapadmaṃ ca bibhratīm |
patnīṃ pitṝṇāṃ padmāsyāṃ padmajāṃ padmalocanām
||12||शतपद्मपदन्यस्तपादपद्मं च बिभ्रतीम् ।
पत्नीं पितॄणां पद्मास्यां पद्मजां पद्मलोचनाम्
pitṛbhyaśca dadau brahmā tuṣṭebhyastuṣṭirūpiṇīm |
brāhmaṇānāṃ copadeśaṃ cakāra gopanīyakam
||13||पितृभ्यश्च ददौ ब्रह्मा तुष्टेभ्यस्तुष्टिरूपिणीम् ।
ब्राह्मणानां चोपदेशं चकार गोपनीयकम्
svadhāntaṃ mantramuccārya pitṛbhyo deyamityapi |
krameṇa tena viprāśca pitre dānaṃ daduḥ purā
||14||स्वधान्तं मन्त्रमुच्चार्य पितृभ्यो देयमित्यपि ।
क्रमेण तेन विप्राश्च पित्रे दानं ददुः पुरा
svāhā śastā devadāne pitṛdāne svadhā smṛtā |
sarvatra dakṣiṇā śastā hataṃ yajñamadakṣiṇam
||15||स्वाहा शस्ता देवदाने पितृदाने स्वधा स्मृता ।
सर्वत्र दक्षिणा शस्ता हतं यज्ञमदक्षिणम्
pitaro devatā viprā munayo manavastathā |
pūjāṃ cakruḥ svadhāṃ śāntāṃ tuṣṭuvuḥ paramādarāt
||16||पितरो देवता विप्रा मुनयो मनवस्तथा ।
पूजां चक्रुः स्वधां शान्तां तुष्टुवुः परमादरात्
devādayaśca santuṣṭāḥ paripūrṇamanorathāḥ |
viprādayaśca pitaraḥ svadhādevīvareṇa ca
||17||देवादयश्च सन्तुष्टाः परिपूर्णमनोरथाः ।
विप्रादयश्च पितरः स्वधादेवीवरेण च
ityevaṃ kathitaṃ sarvaṃ svadhopākhyānameva ca |
sarveṣāṃ ca tuṣṭikaraṃ kiṃ bhūyaḥ śrotumicchasi
||18||इत्येवं कथितं सर्वं स्वधोपाख्यानमेव च ।
सर्वेषां च तुष्टिकरं किं भूयः श्रोतुमिच्छसि
nārada uvāca
svadhāpūjāvidhānaṃ ca dhyānaṃ stotraṃ mahāmune |
śrotumicchāmi yatnena vada vedavidāṃvara
||19||स्वधापूजाविधानं च ध्यानं स्तोत्रं महामुने ।
श्रोतुमिच्छामि यत्नेन वद वेदविदांवर
śrīnārāyaṇa uvāca
dhyānaṃ ca stavanaṃ brahman vedoktaṃ sarvamaṅgalam |
sarvaṃ jānāsi ca kathaṃ jñātumicchasi vṛddhaye
||20||ध्यानं च स्तवनं ब्रह्मन् वेदोक्तं सर्वमङ्गलम् ।
सर्वं जानासि च कथं ज्ञातुमिच्छसि वृद्धये
śaratkṛṣṇatrayodaśyāṃ maghāyāṃ śrāddhavāsare |
svadhāṃ sampūjya yatnena tataḥ śrāddhaṃ samācaret
||21||शरत्कृष्णत्रयोदश्यां मघायां श्राद्धवासरे ।
स्वधां सम्पूज्य यत्नेन ततः श्राद्धं समाचरेत्
svadhāṃ nābhyarcya yo vipraḥ śrāddhaṃ kuryādahaṃmatiḥ |
na bhavetphalabhāksatyaṃ śrāddhasya tarpaṇasya ca
||22||स्वधां नाभ्यर्च्य यो विप्रः श्राद्धं कुर्यादहंमतिः ।
न भवेत्फलभाक्सत्यं श्राद्धस्य तर्पणस्य च
brahmaṇo mānasīṃ kanyāṃ śaśvatsusthirayauvanām |
pūjyāṃ vai pitṛdevānāṃ śrāddhānāṃ phaladāṃ bhaje
||23||ब्रह्मणो मानसीं कन्यां शश्वत्सुस्थिरयौवनाम् ।
पूज्यां वै पितृदेवानां श्राद्धानां फलदां भजे
iti dhyātvā śilāyāṃ vā hyathavā maṅgale ghaṭe |
dadyātpādyādikaṃ tasyai mūleneti śrutau śrutam
||24||इति ध्यात्वा शिलायां वा ह्यथवा मङ्गले घटे ।
दद्यात्पाद्यादिकं तस्यै मूलेनेति श्रुतौ श्रुतम्
oṃ hrīṃ śrīṃ klīṃ svadhādevyai svāheti ca mahāmune |
samuccārya tu sampūjya stutvā tāṃ praṇamed dvijaḥ
||25||ओं ह्रीं श्रीं क्लीं स्वधादेव्यै स्वाहेति च महामुने ।
समुच्चार्य तु सम्पूज्य स्तुत्वा तां प्रणमेद् द्विजः
stotraṃ śṛṇu muniśreṣṭha brahmaputra viśārada |
sarvavāñchāpradaṃ nṝṇāṃ brahmaṇā yatkṛtaṃ purā
||26||स्तोत्रं शृणु मुनिश्रेष्ठ ब्रह्मपुत्र विशारद ।
सर्ववाञ्छाप्रदं नॄणां ब्रह्मणा यत्कृतं पुरा
śrīnārāyaṇa uvāca
svadhoccāraṇamātreṇa tīrthasnāyī bhavennaraḥ |
mucyate sarvapāpebhyo vājapeyaphalaṃ labhet
||27||स्वधोच्चारणमात्रेण तीर्थस्नायी भवेन्नरः ।
मुच्यते सर्वपापेभ्यो वाजपेयफलं लभेत्
svadhā svadhā svadhetyevaṃ yadi vāratrayaṃ smaret |
śrāddhasya phalamāpnoti baleśca tarpaṇasya ca
||28||स्वधा स्वधा स्वधेत्येवं यदि वारत्रयं स्मरेत् ।
श्राद्धस्य फलमाप्नोति बलेश्च तर्पणस्य च
śrāddhakāle svadhāstotraṃ yaḥ śṛṇoti samāhitaḥ |
sa labhecchrāddhasambhūtaṃ phalameva na saṃśayaḥ
||29||श्राद्धकाले स्वधास्तोत्रं यः शृणोति समाहितः ।
स लभेच्छ्राद्धसम्भूतं फलमेव न संशयः
svadhā svadhā svadhetyevaṃ trisandhyaṃ yaḥ paṭhennaraḥ |
priyāṃ vinītāṃ sa labhetsādhvīṃ putraguṇānvitām
||30||स्वधा स्वधा स्वधेत्येवं त्रिसन्ध्यं यः पठेन्नरः ।
प्रियां विनीतां स लभेत्साध्वीं पुत्रगुणान्विताम्
pitṝṇāṃ prāṇatulyā tvaṃ dvijajīvanarūpiṇī |
śrāddhādhiṣṭhātṛdevī ca śrāddhādīnāṃ phalapradā
||31||पितॄणां प्राणतुल्या त्वं द्विजजीवनरूपिणी ।
श्राद्धाधिष्ठातृदेवी च श्राद्धादीनां फलप्रदा
nityā tvaṃ satyarūpāsi puṇyarūpāsi suvrate |
āvirbhāvatirobhāvau sṛṣṭau ca pralaye tava
||32||नित्या त्वं सत्यरूपासि पुण्यरूपासि सुव्रते ।
आविर्भावतिरोभावौ सृष्टौ च प्रलये तव
oṃ svastiśca namaḥ svāhā svadhā tvaṃ dakṣiṇā tathā |
nirūpitāścaturvedaiḥ praśastāḥ karmiṇāṃ punaḥ
||33||ॐ स्वस्तिश्च नमः स्वाहा स्वधा त्वं दक्षिणा तथा ।
निरूपिताश्चतुर्वेदैः प्रशस्ताः कर्मिणां पुनः
karmapūrtyarthamevaitā īśvareṇa vinirmitāḥ |
ityevamuktvā sa brahmā brahmaloke svasaṃsadi
||34||कर्मपूर्त्यर्थमेवैता ईश्वरेण विनिर्मिताः ।
इत्येवमुक्त्वा स ब्रह्मा ब्रह्मलोके स्वसंसदि
tasthau ca sahasā sadyaḥ svadhā sā''virbabhūva ha |
tadā pitṛbhyaḥ pradadau tāmeva kamalānanām
||35||तस्थौ च सहसा सद्यः स्वधा साऽऽविर्बभूव ह ।
तदा पितृभ्यः प्रददौ तामेव कमलाननाम्
tāṃ samprāpya yayuste ca pitaraśca praharṣitāḥ |
svadhāstotramidaṃ puṇyaṃ yaḥ śṛṇoti samāhitaḥ |
sa snātaḥ sarvatīrtheṣu vāñchitaṃ phalamāpnuyāt
||36||तां सम्प्राप्य ययुस्ते च पितरश्च प्रहर्षिताः ।
स्वधास्तोत्रमिदं पुण्यं यः शृणोति समाहितः ।
स स्नातः सर्वतीर्थेषु वाञ्छितं फलमाप्नुयात्
iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ navamaskandhe nārāyaṇanāradasaṃvāde svadhopākhyānavarṇanaṃ nāma catuścatvāriśo'dhyāyaḥ || 44 ||