kālīśaṅkhacūḍayuddhavarṇanam
śrīnārāyaṇa uvāca
śivaṃ praṇamya śirasā dānavendraḥ pratāpavān |
samāruroha yānaṃ ca sahāmātyaiḥ sa satvaraḥ
||1||शिवं प्रणम्य शिरसा दानवेन्द्रः प्रतापवान् ।
समारुरोह यानं च सहामात्यैः स सत्वरः
śivaḥ svasainyaṃ devāṃśca prerayāmāsa satvaram |
dānavendraḥ sasainyaśca yuddhārambhe babhūva ha
||2||शिवः स्वसैन्यं देवांश्च प्रेरयामास सत्वरम् ।
दानवेन्द्रः ससैन्यश्च युद्धारम्भे बभूव ह
svayaṃ mahendro yuyudhe sārdhaṃ ca vṛṣaparvaṇā |
bhāskaro yuyudhe vipracittinā saha satvaraḥ
||3||स्वयं महेन्द्रो युयुधे सार्धं च वृषपर्वणा ।
भास्करो युयुधे विप्रचित्तिना सह सत्वरः
dambhena saha candraśca cakāra paramaṃ raṇam |
kālasvareṇa kālaśca gokarṇena hutāśanaḥ
||4||दम्भेन सह चन्द्रश्च चकार परमं रणम् ।
कालस्वरेण कालश्च गोकर्णेन हुताशनः
kuberaḥ kālakeyena viśvakarmā mayena ca |
bhayaṅkareṇa mṛtyuśca saṃhāreṇa yamastathā
||5||कुबेरः कालकेयेन विश्वकर्मा मयेन च ।
भयङ्करेण मृत्युश्च संहारेण यमस्तथा
vikaṅkaṇena varuṇaścañcalena samīraṇaḥ |
budhaśca ghṛtapṛṣṭhena raktākṣeṇa śanaiścaraḥ
||6||विकङ्कणेन वरुणश्चञ्चलेन समीरणः ।
बुधश्च घृतपृष्ठेन रक्ताक्षेण शनैश्चरः
jayanto ratnasāreṇa vasavo varcasāṃ gaṇaiḥ |
aśvinau ca dīptimatā dhūmreṇa nalakūbaraḥ
||7||जयन्तो रत्नसारेण वसवो वर्चसां गणैः ।
अश्विनौ च दीप्तिमता धूम्रेण नलकूबरः
dhurandhareṇa dharmaśca uṣākṣeṇa ca maṅgalaḥ |
śobhākareṇa vai bhānuḥ piṭhareṇa ca manmathaḥ
||8||धुरन्धरेण धर्मश्च उषाक्षेण च मङ्गलः ।
शोभाकरेण वै भानुः पिठरेण च मन्मथः
godhāmukhena cūrṇena khaḍgena ca dhvajena ca |
kāñcīmukhena piṇḍena dhūmeṇa saha nandinā
||9||गोधामुखेन चूर्णेन खड्गेन च ध्वजेन च ।
काञ्चीमुखेन पिण्डेन धूमेण सह नन्दिना
viśvena ca palāśenādityādyā yuyudhuḥ pare |
ekādaśa ca rudrā vai ekādaśabhayaṅkaraiḥ
||10||विश्वेन च पलाशेनादित्याद्या युयुधुः परे ।
एकादश च रुद्रा वै एकादशभयङ्करैः
mahāmārī ca yuyudhe cogracaṇḍādibhiḥ saha |
nandīśvarādayaḥ sarve dānavānāṃ gaṇaiḥ saha
||11||महामारी च युयुधे चोग्रचण्डादिभिः सह ।
नन्दीश्वरादयः सर्वे दानवानां गणैः सह
yuyudhuśca mahāyuddhe pralaye'pi bhayaṅkare |
vaṭamūle ca śambhuśca tasthau kālyā sutena ca
||12||युयुधुश्च महायुद्धे प्रलयेऽपि भयङ्करे ।
वटमूले च शम्भुश्च तस्थौ काल्या सुतेन च
sarve ca yuyudhuḥ sainyasamūhāḥ satataṃ mune |
ratnasiṃhāsane ramye koṭibhirdānavaiḥ saha
||13||सर्वे च युयुधुः सैन्यसमूहाः सततं मुने ।
रत्नसिंहासने रम्ये कोटिभिर्दानवैः सह
uvāsa śaṅkhacūḍaśca ratnabhūṣaṇabhūṣitaḥ |
śaṅkarasya ca ye yodhā dānavaiśca parājitāḥ
||14||उवास शङ्खचूडश्च रत्नभूषणभूषितः ।
शङ्करस्य च ये योधा दानवैश्च पराजिताः
devāśca dudruvuḥ sarve bhītāśca kṣatavigrahāḥ |
cakāra kopaṃ skandaśca devebhyaścābhayaṃ dadau
||15||देवाश्च दुद्रुवुः सर्वे भीताश्च क्षतविग्रहाः ।
चकार कोपं स्कन्दश्च देवेभ्यश्चाभयं ददौ
balaṃ ca svargaṇānāṃ ca vardhayāmāsa tejasā |
so'yamekaśca yuyudhe dānavānāṃ gaṇaiḥ saha
||16||बलं च स्वर्गणानां च वर्धयामास तेजसा ।
सोऽयमेकश्च युयुधे दानवानां गणैः सह
akṣauhiṇīnāṃ śatakaṃ samare ca jaghāna saḥ |
asurānpātayāmāsa kālī kamalalocanā
||17||अक्षौहिणीनां शतकं समरे च जघान सः ।
असुरान्पातयामास काली कमललोचना
papau raktaṃ dānavānāmatikuddhā tataḥ param |
daśalakṣagajendrāṇāṃ śatalakṣaṃ ca koṭiśaḥ
||18||पपौ रक्तं दानवानामतिकुद्धा ततः परम् ।
दशलक्षगजेन्द्राणां शतलक्षं च कोटिशः
samādāyaikahastena mukhe cikṣepa līlayā |
kabandhānāṃ sahasraṃ ca nanarta samare mune
||19||समादायैकहस्तेन मुखे चिक्षेप लीलया ।
कबन्धानां सहस्रं च ननर्त समरे मुने
skandasya śarajālena dānavāḥ kṣatavigrahāḥ |
bhītāśca dudruvuḥ sarve mahāraṇaparākramāḥ
||20||स्कन्दस्य शरजालेन दानवाः क्षतविग्रहाः ।
भीताश्च दुद्रुवुः सर्वे महारणपराक्रमाः
vṛṣaparvā vipracittirdambhaścāpi vikaṅkaṇaḥ |
skandena sārdhaṃ yuyudhuste sarve vikrameṇa ca
||21||वृषपर्वा विप्रचित्तिर्दम्भश्चापि विकङ्कणः ।
स्कन्देन सार्धं युयुधुस्ते सर्वे विक्रमेण च
mahāmārī ca yuyudhe na babhūva parāṅmukhī |
babhūvuste ca saṃkṣubdhāḥ skandasya śaktipīḍitāḥ
||22||महामारी च युयुधे न बभूव पराङ्मुखी ।
बभूवुस्ते च संक्षुब्धाः स्कन्दस्य शक्तिपीडिताः
na dudruvurbhayātsvarge puṣpavṛṣṭirbabhūva ha |
skandasya samaraṃ dṛṣṭvā mahāraudraṃ samulbaṇam
||23||न दुद्रुवुर्भयात्स्वर्गे पुष्पवृष्टिर्बभूव ह ।
स्कन्दस्य समरं दृष्ट्वा महारौद्रं समुल्बणम्
dānavānāṃ kṣayakaraṃ yathā prākṛtiko layaḥ |
rājā vimānamāruhya cakāra bāṇavarṣaṇam
||24||दानवानां क्षयकरं यथा प्राकृतिको लयः ।
राजा विमानमारुह्य चकार बाणवर्षणम्
nṛpasya śaravṛṣṭiśca ghanasya varṣaṇaṃ yathā |
mahāghorāndhakāraśca vahnyutthānaṃ babhūva ca
||25||नृपस्य शरवृष्टिश्च घनस्य वर्षणं यथा ।
महाघोरान्धकारश्च वह्न्युत्थानं बभूव च
devāḥ pradudruvuḥ sarve'pyanye nandīśvarādayaḥ |
eka eva kārtikeyastasthau samaramūrdhani
||26||देवाः प्रदुद्रुवुः सर्वेऽप्यन्ये नन्दीश्वरादयः ।
एक एव कार्तिकेयस्तस्थौ समरमूर्धनि
parvatānāṃ ca sarpāṇāṃ śilānāṃ śākhināṃ tathā |
nṛpaścakāra vṛṣṭiṃ ca durvārāṃ ca bhayaṅkarīm
||27||पर्वतानां च सर्पाणां शिलानां शाखिनां तथा ।
नृपश्चकार वृष्टिं च दुर्वारां च भयङ्करीम्
nṛpasya śaravṛṣṭyā ca prahitaḥ śivanandanaḥ |
nīhāreṇa ca sāndreṇa prahito bhāskaro yathā
||28||नृपस्य शरवृष्ट्या च प्रहितः शिवनन्दनः ।
नीहारेण च सान्द्रेण प्रहितो भास्करो यथा
dhanuściccheda skandasya durvahaṃ ca bhayaṅkaraḥ |
babhañja ca rathaṃ divyaṃ ciccheda rathapīṭhakān
||29||धनुश्चिच्छेद स्कन्दस्य दुर्वहं च भयङ्करः ।
बभञ्ज च रथं दिव्यं चिच्छेद रथपीठकान्
mayūraṃ jarjarībhūtaṃ divyāstreṇa cakāra saḥ |
śaktiṃ cikṣepa sūryābhāṃ tasya vakṣasya ghātinīm
||30||मयूरं जर्जरीभूतं दिव्यास्त्रेण चकार सः ।
शक्तिं चिक्षेप सूर्याभां तस्य वक्षस्य घातिनीम्
kṣaṇaṃ mūrcchāṃ ca samprāpa babhūva cetanaḥ punaḥ |
gṛhītvā taddhanurdivyaṃ yaddattaṃ viṣṇunā purā
||31||क्षणं मूर्च्छां च सम्प्राप बभूव चेतनः पुनः ।
गृहीत्वा तद्धनुर्दिव्यं यद्दत्तं विष्णुना पुरा
ratnendrasāranirmāṇayānamāruhya kārtikaḥ |
śastrāstraṃ ca gṛhītvā ca cakāra raṇamulbaṇam
||32||रत्नेन्द्रसारनिर्माणयानमारुह्य कार्तिकः ।
शस्त्रास्त्रं च गृहीत्वा च चकार रणमुल्बणम्
sarpāṃśca parvatāṃścaiva vṛkṣāṃśca prastarāṃstathā |
sarvāṃściccheda kopena divyāstreṇa śivātmajaḥ
||33||सर्पांश्च पर्वतांश्चैव वृक्षांश्च प्रस्तरांस्तथा ।
सर्वांश्चिच्छेद कोपेन दिव्यास्त्रेण शिवात्मजः
vahniṃ nirvāpayāmāsa pārjanyena pratāpavān |
rathaṃ dhanuśca ciccheda śaṅkhacūḍasya līlayā
||34||वह्निं निर्वापयामास पार्जन्येन प्रतापवान् ।
रथं धनुश्च चिच्छेद शङ्खचूडस्य लीलया
sannāhaṃ sārathiṃ caiva kirīṭaṃ mukuṭojjvalam |
cikṣepa śaktiṃ śuklābhāṃ dānavendrasya vakṣasi
||35||सन्नाहं सारथिं चैव किरीटं मुकुटोज्ज्वलम् ।
चिक्षेप शक्तिं शुक्लाभां दानवेन्द्रस्य वक्षसि
mūrcchāṃ samprāpya rājā ca cetanaśca babhūva ha |
āruroha yānamanyaddhanurjagrāha satvaraḥ
||36||मूर्च्छां सम्प्राप्य राजा च चेतनश्च बभूव ह ।
आरुरोह यानमन्यद्धनुर्जग्राह सत्वरः
cakāra śarajālaṃ ca māyayā māyināṃ varaḥ |
guhaṃ cacchāda samare śarajālena nārada
||37||चकार शरजालं च मायया मायिनां वरः ।
गुहं चच्छाद समरे शरजालेन नारद
jagrāha śaktimavyagrāṃ śatasūryasamaprabhām |
pralayāgniśikhārūpāṃ viṣṇośca tejasā''vṛtām
||38||जग्राह शक्तिमव्यग्रां शतसूर्यसमप्रभाम् ।
प्रलयाग्निशिखारूपां विष्णोश्च तेजसाऽऽवृताम्
cikṣepa tāṃ ca kopena mahāvegena kārtike |
papāta śaktistadgātre vahnirāśirivojjvalā
||39||चिक्षेप तां च कोपेन महावेगेन कार्तिके ।
पपात शक्तिस्तद्गात्रे वह्निराशिरिवोज्ज्वला
mūrcchāṃ samprāpa śaktyā ca kārtikeyo mahābalaḥ |
kālī gṛhītvā taṃ kroḍe nināya śivasanidhau
||40||मूर्च्छां सम्प्राप शक्त्या च कार्तिकेयो महाबलः ।
काली गृहीत्वा तं क्रोडे निनाय शिवसनिधौ
śivastaṃ cāpi jñānena jīvayāmāsa līlayā |
dadau balamanantaṃ ca samuttasthau pratāpavān
||41||शिवस्तं चापि ज्ञानेन जीवयामास लीलया ।
ददौ बलमनन्तं च समुत्तस्थौ प्रतापवान्
kālī jagāma samaraṃ rakṣituṃ kārtikasya yā |
vīrāstāmanujagmuśca te ca nandīśvarādayaḥ
||42||काली जगाम समरं रक्षितुं कार्तिकस्य या ।
वीरास्तामनुजग्मुश्च ते च नन्दीश्वरादयः
sarve devāśca gandharvā yakṣarākṣasakinnarāḥ |
vādyabhāṇḍāśca bahuśaḥ śataśo madhuvāhakāḥ
||43||सर्वे देवाश्च गन्धर्वा यक्षराक्षसकिन्नराः ।
वाद्यभाण्डाश्च बहुशः शतशो मधुवाहकाः
sā ca gatvātha saṃgrāmaṃ siṃhanādaṃ cakāra ca |
devyāśca siṃhanādena prāpurmūrcchāṃ ca dānavāḥ
||44||सा च गत्वाथ संग्रामं सिंहनादं चकार च ।
देव्याश्च सिंहनादेन प्रापुर्मूर्च्छां च दानवाः
aṭṭāṭṭahāsamaśivaṃ cakāra ca punaḥ punaḥ |
dṛṣṭvā papau ca mādhvīkaṃ nanarta raṇamūrdhani
||45||अट्टाट्टहासमशिवं चकार च पुनः पुनः ।
दृष्ट्वा पपौ च माध्वीकं ननर्त रणमूर्धनि
ugradaṃṣṭrā cogradaṇḍā koṭavī ca papau madhu |
yoginīḍākinīnāṃ ca gaṇāḥ suragaṇādayaḥ
||46||उग्रदंष्ट्रा चोग्रदण्डा कोटवी च पपौ मधु ।
योगिनीडाकिनीनां च गणाः सुरगणादयः
dṛṣṭvā kālīṃ śaṅkhacūḍaḥ śīghramājau samāyayau |
dānavāśca bhayaṃ prāpū rājā tebhyo'bhayaṃ dadau
||47||दृष्ट्वा कालीं शङ्खचूडः शीघ्रमाजौ समाययौ ।
दानवाश्च भयं प्रापू राजा तेभ्योऽभयं ददौ
kālī cikṣepa vahniṃ ca pralayāgniśikhopamam |
rājā nirvāpayāmāsa pārjanyena ca līlayā
||48||काली चिक्षेप वह्निं च प्रलयाग्निशिखोपमम् ।
राजा निर्वापयामास पार्जन्येन च लीलया
cikṣepa vāruṇaṃ sā ca tīvraṃ ca mahadadbhutam |
gāndharveṇa ca ciccheda dānavendraśca līlayā
||49||चिक्षेप वारुणं सा च तीव्रं च महदद्भुतम् ।
गान्धर्वेण च चिच्छेद दानवेन्द्रश्च लीलया
māheśvaraṃ pracikṣepa kālī vahniśikhopamam |
rājā jaghāna taṃ śīghraṃ vaiṣṇavena ca līlayā
||50||माहेश्वरं प्रचिक्षेप काली वह्निशिखोपमम् ।
राजा जघान तं शीघ्रं वैष्णवेन च लीलया
nārāyaṇāstraṃ sā devī cikṣepa mantrapūrvakam |
rājā nanāma tad dṛṣṭvā cāvaruhya rathādasau
||51||नारायणास्त्रं सा देवी चिक्षेप मन्त्रपूर्वकम् ।
राजा ननाम तद् दृष्ट्वा चावरुह्य रथादसौ
ūrdhvaṃ jagāma taccāstraṃ pralayāgniśikhopamam |
papāta śaṅkhacūḍaśca bhaktyā taṃ daṇḍavadbhuvi
||52||ऊर्ध्वं जगाम तच्चास्त्रं प्रलयाग्निशिखोपमम् ।
पपात शङ्खचूडश्च भक्त्या तं दण्डवद्भुवि
brahmāstraṃ sā ca cikṣepa yatnato mantrapūrvakam |
brahmāstreṇa mahārājo nirvāpaṃ ca cakāra saḥ
||53||ब्रह्मास्त्रं सा च चिक्षेप यत्नतो मन्त्रपूर्वकम् ।
ब्रह्मास्त्रेण महाराजो निर्वापं च चकार सः
tadā cikṣepa divyāstraṃ sā devī mantrapūrvakam |
rājā divyāstrajālena tannirvāṇaṃ cakāra ca
||54||तदा चिक्षेप दिव्यास्त्रं सा देवी मन्त्रपूर्वकम् ।
राजा दिव्यास्त्रजालेन तन्निर्वाणं चकार च
tadā cikṣepa śaktiṃ ca yatnato yojanāyatām |
rājā divyāstrajālena śatakhaṇḍāṃ cakāra ha
||55||तदा चिक्षेप शक्तिं च यत्नतो योजनायताम् ।
राजा दिव्यास्त्रजालेन शतखण्डां चकार ह
jagrāha mantrapūtaṃ ca devī pāśupataṃ ruṣā |
nikṣepaṇaṃ niroddhuṃ ca vāgbabhūvāśarīriṇī
||56||जग्राह मन्त्रपूतं च देवी पाशुपतं रुषा ।
निक्षेपणं निरोद्धुं च वाग्बभूवाशरीरिणी
mṛtyuḥ pāśupate nāsti nṛpasya ca mahātmanaḥ |
yāvadasti ca mantrasya kavacaṃ ca hareriti
||57||मृत्युः पाशुपते नास्ति नृपस्य च महात्मनः ।
यावदस्ति च मन्त्रस्य कवचं च हरेरिति
yāvatsatītvamastyeva satyāśca nṛpayoṣitaḥ |
tāvadasya jarāmṛtyurnāstīti brahmaṇo vacaḥ
||58||यावत्सतीत्वमस्त्येव सत्याश्च नृपयोषितः ।
तावदस्य जरामृत्युर्नास्तीति ब्रह्मणो वचः
ityākarṇya bhadrakālī na taccikṣepa śastrakam |
śatalakṣaṃ dānavānāṃ jagrāsa līlayā kṣudhā
||59||इत्याकर्ण्य भद्रकाली न तच्चिक्षेप शस्त्रकम् ।
शतलक्षं दानवानां जग्रास लीलया क्षुधा
grastuṃ jagāma vegena śaṅkhacūḍaṃ bhayaṅkarī |
divyāstreṇa sutīkṣṇena vārayāmāsa dānavaḥ
||60||ग्रस्तुं जगाम वेगेन शङ्खचूडं भयङ्करी ।
दिव्यास्त्रेण सुतीक्ष्णेन वारयामास दानवः
khaḍgaṃ cikṣepa sā devī grīṣmasūryopamaṃ yathā |
divyāstreṇa dānavendraḥ śatakhaṇḍaṃ cakāra saḥ
||61||खड्गं चिक्षेप सा देवी ग्रीष्मसूर्योपमं यथा ।
दिव्यास्त्रेण दानवेन्द्रः शतखण्डं चकार सः
punargrastuṃ mahādevī vegena ca jagāma tam |
sarvasiddheśvaraḥ śrīmānvavṛdhe dānaveśvaraḥ
||62||पुनर्ग्रस्तुं महादेवी वेगेन च जगाम तम् ।
सर्वसिद्धेश्वरः श्रीमान्ववृधे दानवेश्वरः
vegena muṣṭinā kālī kopayuktā bhayaṅkarī |
babhañja ca rathaṃ tasya jaghāna sārathiṃ satī
||63||वेगेन मुष्टिना काली कोपयुक्ता भयङ्करी ।
बभञ्ज च रथं तस्य जघान सारथिं सती
sā ca śūlaṃ pracikṣepa pralayāgniśikhopamam |
vāmahastena jagrāha śaṅkhacūḍaḥ svalīlayā
||64||सा च शूलं प्रचिक्षेप प्रलयाग्निशिखोपमम् ।
वामहस्तेन जग्राह शङ्खचूडः स्वलीलया
muṣṭyā jaghāna taṃ devī mahākopena vegataḥ |
babhrāma ca tayā daityaḥ kṣaṇaṃ mūrcchāmavāpa ca
||65||मुष्ट्या जघान तं देवी महाकोपेन वेगतः ।
बभ्राम च तया दैत्यः क्षणं मूर्च्छामवाप च
kṣaṇena cetanāṃ prāpya samuttasthau pratāpavān |
na cakāra bāhuyuddhaṃ devyā saha nanāma tām
||66||क्षणेन चेतनां प्राप्य समुत्तस्थौ प्रतापवान् ।
न चकार बाहुयुद्धं देव्या सह ननाम ताम्
devyāścāstraṃ sa ciccheda jagrāha ca svatejasā |
nāstraṃ cikṣepa tāṃ bhakto mātṛbhaktyā tu vaiṣṇavaḥ
||67||देव्याश्चास्त्रं स चिच्छेद जग्राह च स्वतेजसा ।
नास्त्रं चिक्षेप तां भक्तो मातृभक्त्या तु वैष्णवः
gṛhītvā dānavaṃ devī bhrāmayitvā punaḥ punaḥ |
ūrdhvaṃ ca prāpayāmāsa mahāvegena kopitā
||68||गृहीत्वा दानवं देवी भ्रामयित्वा पुनः पुनः ।
ऊर्ध्वं च प्रापयामास महावेगेन कोपिता
ūrdhvātpapāta vegena śaṅkhacūḍaḥ pratāpavān |
nipatya ca samuttasthau praṇamya bhadrakālikām
||69||ऊर्ध्वात्पपात वेगेन शङ्खचूडः प्रतापवान् ।
निपत्य च समुत्तस्थौ प्रणम्य भद्रकालिकाम्
ratnendrasāranirmāṇaṃ vimānaṃ sumanoharam |
āruroha harṣayukto na viśrānto mahāraṇe
||70||रत्नेन्द्रसारनिर्माणं विमानं सुमनोहरम् ।
आरुरोह हर्षयुक्तो न विश्रान्तो महारणे
dānavānāṃ ca kṣatajaṃ sā devī ca papau kṣudhā |
pītvā bhuktvā bhadrakālī jagāma śaṅkarāntikam
||71||दानवानां च क्षतजं सा देवी च पपौ क्षुधा ।
पीत्वा भुक्त्वा भद्रकाली जगाम शङ्करान्तिकम्
uvāca raṇavṛttāntaṃ paurvāparyaṃ yathākramam |
śrutvā jahāsa śambhuśca dānavānāṃ vināśanam
||72||उवाच रणवृत्तान्तं पौर्वापर्यं यथाक्रमम् ।
श्रुत्वा जहास शम्भुश्च दानवानां विनाशनम्
lakṣaṃ ca dānavendrāṇāmavaśiṣṭaṃ raṇe'dhunā |
bhuñjantyā nirgataṃ vaktrāttadanyaṃ bhuktamīśvara
||73||लक्षं च दानवेन्द्राणामवशिष्टं रणेऽधुना ।
भुञ्जन्त्या निर्गतं वक्त्रात्तदन्यं भुक्तमीश्वर
saṃgrāme dānavendraṃ ca hantuṃ pāśupatena vai |
avadhyastava rājeti vāgbabhūvāśarīriṇī
||74||संग्रामे दानवेन्द्रं च हन्तुं पाशुपतेन वै ।
अवध्यस्तव राजेति वाग्बभूवाशरीरिणी
rājendraśca mahājñānī mahābalaparākramaḥ |
na ca cikṣepa mayyastraṃ ciccheda mama sāyakam
||75||राजेन्द्रश्च महाज्ञानी महाबलपराक्रमः ।
न च चिक्षेप मय्यस्त्रं चिच्छेद मम सायकम्
iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ navamaskandhe nārāyaṇanāradasavāde kālīśaṅkhacūḍayuddhavarṇanaṃ nāma dvāviṃśo'dhyāyaḥ || 22 ||