varadākhyānaṃ nāma saptatriṃśattamo'dhyāyaḥ
brahmovācaḥ |
bhramanmunirdadarśāgre vanaṃ puṣpakasaṃjñitam |
nānādrumalatākīrṇaṃ puṣpaprakāraśobhitam
||1||ब्रह्मोवाचः ।
भ्रमन्मुनिर्ददर्शाग्रे वनं पुष्पकसंज्ञितम् ।
नानाद्रुमलताकीर्णं पुष्पप्रकारशोभितम्
śobhitaṃ nirjharajalairnirjarairmunisattamaiḥ |
nanāma tān gṛtsamado nyavasacca tadājñayā
||2||शोभितं निर्झरजलैर्निर्जरैर्मुनिसत्तमैः ।
ननाम तान् गृत्समदो न्यवसच्च तदाज्ञया
tatra snātvā japaṃ cakre pādāṅguṣṭhāgranirbharaḥ(dhiṣṭhitaḥ) |
sthireṇa manasā dhyāyandevaṃ vighneśvaraṃ vibhum
||3||तत्र स्नात्वा जपं चक्रे पादाङ्गुष्ठाग्रनिर्भरः(धिष्ठितः) ।
स्थिरेण मनसा ध्यायन्देवं विघ्नेश्वरं विभुम्
nāsāgranyastadṛṣṭiḥ sannirīkṣan sa diśodiśa |
jitendriyo jitaśvāso jitātmā mārutāśanaḥ
||4||नासाग्रन्यस्तदृष्टिः सन्निरीक्षन् स दिशोदिश ।
जितेन्द्रियो जितश्वासो जितात्मा मारुताशनः
divyavarṣasahasraṃ sa tapastepe sudāruṇam |
unmīlya nayane'paśyad yadā gṛtsamado muniḥ
||5||दिव्यवर्षसहस्रं स तपस्तेपे सुदारुणम् ।
उन्मील्य नयनेऽपश्यद् यदा गृत्समदो मुनिः
tadā netroddhavo vahnīstridaśān paryatāpayat |
śaśaṅkire tadā devāḥ kasyāyaṃ padabhāg bhavet
||6||तदा नेत्रोद्धवो वह्नीस्त्रिदशान् पर्यतापयत् ।
शशङ्किरे तदा देवाः कस्यायं पदभाग् भवेत्
aparaṃ galitaṃ patraṃ bhakṣayannekameva ca |
yatnamāsthāya paramaṃ sthāṇubhuto'tiniścalaḥ
||7||अपरं गलितं पत्रं भक्षयन्नेकमेव च ।
यत्नमास्थाय परमं स्थाणुभुतोऽतिनिश्चलः
daśapañcasahasrāṇi tepe niścalamānasaḥ |
tatovināyako dṛṣṭvā tapanaṃ tasya durghaṭam
||8||दशपञ्चसहस्राणि तेपे निश्चलमानसः ।
ततोविनायको दृष्ट्वा तपनं तस्य दुर्घटम्
anugrahāya tasyā'tha prādurāsīt sudīptimān |
yathā dhenurvatsaravaṃ śrutvā dhāvati satvaram
||9||अनुग्रहाय तस्याऽथ प्रादुरासीत् सुदीप्तिमान् ।
यथा धेनुर्वत्सरवं श्रुत्वा धावति सत्वरम्
tathā vināyako devaḥ śīghra gṛtsamadaṃ yayau |
bhāsayam̐stejasā viśvaṃ sahasraravisannibhaḥ
||10||तथा विनायको देवः शीघ्र गृत्समदं ययौ ।
भासयँस्तेजसा विश्वं सहस्ररविसन्निभः
calatkarṇatālo bṛhaddantilīlo mudā cārūkhelo lasaccandrabhālaḥ |
bṛhatpadmamālo jagatkāryamūlaḥ karakañjanālo namatsevimelaḥ
||11||चलत्कर्णतालो बृहद्दन्तिलीलो मुदा चारूखेलो लसच्चन्द्रभालः ।
बृहत्पद्ममालो जगत्कार्यमूलः करकञ्जनालो नमत्सेविमेलः
siṃhārūḍho daśabhujo vyālayajñopavītavān |
kuṅkumāgarukastūrīcārūcandanacarcitaḥ
||12||सिंहारूढो दशभुजो व्यालयज्ञोपवीतवान् ।
कुङ्कुमागरुकस्तूरीचारूचन्दनचर्चितः
siddhibuddhi yutaḥ śrīmān koṭisūryādhikadyutiḥ |
anirvācyasvarupo'pi lilayā''sītpuro mune
||13||सिद्धिबुद्धि युतः श्रीमान् कोटिसूर्याधिकद्युतिः ।
अनिर्वाच्यस्वरुपोऽपि लिलयाऽऽसीत्पुरो मुने
tattejasā hṛtaṃ tejā munestasya mahātmanaḥ |
bradhnasya tejasā yadvan nākṣatraṃ cāndrajaṃ mahaḥ
||14||तत्तेजसा हृतं तेजा मुनेस्तस्य महात्मनः ।
ब्रध्नस्य तेजसा यद्वन् नाक्षत्रं चान्द्रजं महः
nimīlya nayane so'tha cakampe bhṛśavivhalaḥ |
papāta mūrchito bhūmau vismṛta dhyānamaṅgalaḥ
||15||निमील्य नयने सोऽथ चकम्पे भृशविव्हलः ।
पपात मूर्छितो भूमौ विस्मृत ध्यानमङ्गलः
punaśca manasā dhyāyan gajānanamanāmayam |
manasā tarkayan vighnanimittaṃ vyākulo muniḥ
||16||पुनश्च मनसा ध्यायन् गजाननमनामयम् ।
मनसा तर्कयन् विघ्ननिमित्तं व्याकुलो मुनिः
kimetat kṣobhajananaṃ sahasā samupasthitam |
adya prabhṛti yat taptaṃ tatkathaṃ me vṛthā gatam
||17||किमेतत् क्षोभजननं सहसा समुपस्थितम् ।
अद्य प्रभृति यत् तप्तं तत्कथं मे वृथा गतम्
pāhi deveśa sarvātman vighnādasmād bhayānakāt |
tvāmṛte śaraṇaṃ yāmi kamanyaṃ jagadīśvaram
||18||पाहि देवेश सर्वात्मन् विघ्नादस्माद् भयानकात् ।
त्वामृते शरणं यामि कमन्यं जगदीश्वरम्
mahadduḥkhaṃ mayā deva prāpta kena ca hetunā |
nāsmatpaṅktau pūjanīya iti yad dahate manaḥ
||19||महद्दुःखं मया देव प्राप्त केन च हेतुना ।
नास्मत्पङ्क्तौ पूजनीय इति यद् दहते मनः
brahmovāca
iti tadvacanaṃ śrutvā jagāda sa vināyakaḥ |
gaṇeśa uvāca |
anugrahāya samprāptaṃ viddhi māṃ gaṇanāyakam
||20||इति तद्वचनं श्रुत्वा जगाद स विनायकः ।
गणेश उवाच ।
अनुग्रहाय सम्प्राप्तं विद्धि मां गणनायकम्
sanakādibhiraprāpyaṃ ciraṃ niyamamāsthitaiḥ |
tyaktvā bhayaṃ brūhi yat te vāñchitaṃ munisattama
||21||सनकादिभिरप्राप्यं चिरं नियममास्थितैः ।
त्यक्त्वा भयं ब्रूहि यत् ते वाञ्छितं मुनिसत्तम
ekāṅguṣṭhena tapasā toṣito'haṃ tvayā'niśam |
brahmovāca |
niśamyetthaṃ vacastasya devadevasya śobhanam
||22||एकाङ्गुष्ठेन तपसा तोषितोऽहं त्वयाऽनिशम् ।
ब्रह्मोवाच ।
निशम्येत्थं वचस्तस्य देवदेवस्य शोभनम्
daṇḍavat praṇanāmainaṃ nijānandapariplutaḥ |
uvāca paramaprīto varadaṃ taṃ vināyakam
||23||दण्डवत् प्रणनामैनं निजानन्दपरिप्लुतः ।
उवाच परमप्रीतो वरदं तं विनायकम्
gṛtsamada uvāca
adya me saphalaṃ janma tapaso niyamasya ca |
akhaṇḍānandarūpo yo brahmabhūyo nirākṛtiḥ
||24||अद्य मे सफलं जन्म तपसो नियमस्य च ।
अखण्डानन्दरूपो यो ब्रह्मभूयो निराकृतिः
muñcannaśrūṇi netrābhyāmānandena nanarta ca |
cidānandaghano veda śāstrāṇāmapyagocaraḥ
||25||मुञ्चन्नश्रूणि नेत्राभ्यामानन्देन ननर्त च ।
चिदानन्दघनो वेद शास्त्राणामप्यगोचरः
sadyo dṛṣṭo mayā sākṣādataḥ kiṃ prārthaye vibho |
tavājñayā tathā'pyekaṃ prārthaye dviradānana
||26||सद्यो दृष्टो मया साक्षादतः किं प्रार्थये विभो ।
तवाज्ञया तथाऽप्येकं प्रार्थये द्विरदानन
caturaśītilakṣāsu yoniṣu śreṣṭhatāsu ca |
manuṣyāṇāṃ mahābhāga varṇāstatra mahattarāḥ
||27||चतुरशीतिलक्षासु योनिषु श्रेष्ठतासु च ।
मनुष्याणां महाभाग वर्णास्तत्र महत्तराः
tatrāpi brāhmaṇāḥ śreṣṭhāstatrāpi jñāninaḥ parāḥ |
jñāniṣvanuṣṭhānaparāsteṣu ca brahmavedinaḥ
||28||तत्रापि ब्राह्मणाः श्रेष्ठास्तत्रापि ज्ञानिनः पराः ।
ज्ञानिष्वनुष्ठानपरास्तेषु च ब्रह्मवेदिनः
brahmajñānaṃ tathā jñānaṃ de hi me jagadīśvara |
tvayi bhaktiñca sudṛḍhāmavismaraṇameva ca
||29||ब्रह्मज्ञानं तथा ज्ञानं दे हि मे जगदीश्वर ।
त्वयि भक्तिञ्च सुदृढामविस्मरणमेव च
tava bhakteṣu sarveṣu śreṣṭhatāṃ ca gajānana |
anyaṃ caikaṃ varaṃ yāce taṃ ca me dehi śaṅkara
||30||तव भक्तेषु सर्वेषु श्रेष्ठतां च गजानन ।
अन्यं चैकं वरं याचे तं च मे देहि शङ्कर
tava bhaktyaikanilayaṃ trailokyākarṣaṇakṣamam |
vikhyātaṃ triṣu lokeṣu namasyaṃ suramānuṣaiḥ
||31||तव भक्त्यैकनिलयं त्रैलोक्याकर्षणक्षमम् ।
विख्यातं त्रिषु लोकेषु नमस्यं सुरमानुषैः
evaṃ māṃ karū vighneśa yadi tuṣṭo'khilārthakṛt |
vanaṃ ca puṣpakaṃ nāmnā khyāti yātu sureśvara
||32||एवं मां करू विघ्नेश यदि तुष्टोऽखिलार्थकृत् ।
वनं च पुष्पकं नाम्ना ख्याति यातु सुरेश्वर
asmin sthitvā ca bhaktānāṃ kāmānpūraya nityadā |
idaṃ ca puṣpakapuraṃ caturdikṣu viśeṣataḥ
||33||अस्मिन् स्थित्वा च भक्तानां कामान्पूरय नित्यदा ।
इदं च पुष्पकपुरं चतुर्दिक्षु विशेषतः
gaṇeśapuramityevaṃ prathāṃ yātu gajānana |
brahmovāca |
iti tadvacanaṃ śrutvā jagāda dviradānanaḥ
||34||गणेशपुरमित्येवं प्रथां यातु गजानन ।
ब्रह्मोवाच ।
इति तद्वचनं श्रुत्वा जगाद द्विरदाननः
gaṇeśa uvāca
sādhu sādhu mahābāho prasanne mayi durlabham |
bhaktānāṃ triṣu lokeṣu na kiñcin munipuṅgava
||36||साधु साधु महाबाहो प्रसन्ने मयि दुर्लभम् ।
भक्तानां त्रिषु लोकेषु न किञ्चिन् मुनिपुङ्गव
tvayā yatprārthitaṃ vipra tatte sarvaṃ bhaviṣyati |
vipratvaṃ durlabhataraṃ prasannena mayā'rpitam
||36||त्वया यत्प्रार्थितं विप्र तत्ते सर्वं भविष्यति ।
विप्रत्वं दुर्लभतरं प्रसन्नेन मयाऽर्पितम्
gaṇānāntveti mantrasya vaidikasya yatastvayā |
japaḥ kṛto mune'tastvamṛṣirasya bhaviṣyasi
||37||गणानान्त्वेति मन्त्रस्य वैदिकस्य यतस्त्वया ।
जपः कृतो मुनेऽतस्त्वमृषिरस्य भविष्यसि
brahmādiṣu ca deveṣu vasiṣṭhādi muniṣvapi |
khyātiṃ yāsyasi sarvatra paraṃ śraiṣṭhayamupāgataḥ
||38||ब्रह्मादिषु च देवेषु वसिष्ठादि मुनिष्वपि ।
ख्यातिं यास्यसि सर्वत्र परं श्रैष्ठयमुपागतः
sarveṣvārabdhakāryeṣu pūrvaṃ te mama cāparam |
smaraṇaṃ ye kariṣyanti teṣāṃ siddhirbhaviṣyati
||39||सर्वेष्वारब्धकार्येषु पूर्वं ते मम चापरम् ।
स्मरणं ये करिष्यन्ति तेषां सिद्धिर्भविष्यति
ṛte jñānād devatarṣicchandasāṃ karma niṣphalam |
putraśca balavāna sarvadevānāṃ subhayaṅkaraḥ
||40||ऋते ज्ञानाद् देवतर्षिच्छन्दसां कर्म निष्फलम् ।
पुत्रश्च बलवान सर्वदेवानां सुभयङ्करः
bhaviṣyati mahākhyāti triṣu lokeṣu yāsyati |
ajeyaḥ sarvadevānāṃ vinā rudraṃ bhaviṣyati
||41||भविष्यति महाख्याति त्रिषु लोकेषु यास्यति ।
अजेयः सर्वदेवानां विना रुद्रं भविष्यति
madbhato madgataprāṇo manniṣṭho matparāyaṇaḥ |
idaṃ ca nagaraṃ deva yuge puṣpakasaṃjñitam
||42||मद्भतो मद्गतप्राणो मन्निष्ठो मत्परायणः ।
इदं च नगरं देव युगे पुष्पकसंज्ञितम्
tretāyāṃ maṇipūraṃ ca bhānakaṃ dvāpare'pi ca |
kalau tu bhadrakaṃ nāma khyātaṃ loke bhaviṣyati
||43||त्रेतायां मणिपूरं च भानकं द्वापरेऽपि च ।
कलौ तु भद्रकं नाम ख्यातं लोके भविष्यति
atra snānena dānena sarvān kāmānavāpnuyāt |
brahmovāca |
evaṃ datvā varāṃstasmai tatraivā'ntardadhe vibhuḥ
||44||अत्र स्नानेन दानेन सर्वान् कामानवाप्नुयात् ।
ब्रह्मोवाच ।
एवं दत्वा वरांस्तस्मै तत्रैवाऽन्तर्दधे विभुः
tasminnantarhite tatra sthāpayāmāsa vai muniḥ |
gaṇeśamūrtiṃ prāsādaṃ kārayāmāsa sundaram
||45||तस्मिन्नन्तर्हिते तत्र स्थापयामास वै मुनिः ।
गणेशमूर्तिं प्रासादं कारयामास सुन्दरम्
varadeti ca tannāma sthāpayāmāsa śāśvatam |
siddhisthānaṃ ca tatrāsīdgaṇeśasya prasādataḥ
||46||वरदेति च तन्नाम स्थापयामास शाश्वतम् ।
सिद्धिस्थानं च तत्रासीद्गणेशस्य प्रसादतः
kāmānpuṣṇāṇi sarveṣāṃ puṣpakaṃ kṣetramityapi |
pūjayāmāsa tāṃ mūrti bhaktibhāva samanvitaḥ
||47||कामान्पुष्णाणि सर्वेषां पुष्पकं क्षेत्रमित्यपि ।
पूजयामास तां मूर्ति भक्तिभाव समन्वितः
imāṃ kathāṃ yaḥ śaṛṇuyān munīndra śrīvighnarājasya varaprakāśam |
labheta kāmānakhilān gaṇeśabhaktiṃ dṛḍhā saṃsṛtimocanīṃ ca
||48||इमां कथां यः शृणुयान् मुनीन्द्र श्रीविघ्नराजस्य वरप्रकाशम् ।
लभेत कामानखिलान् गणेशभक्तिं दृढा संसृतिमोचनीं च
iti śrīgaṇeśapurāṇe upāsanākhaṇḍe varadākhyānaṃ nāma saptatriṃśattamo'dhyāyaḥ || 37 ||