narādityamāhātmye'rjunastutivarṇanam
sanatkumāra uvāca
athānyatsaṃpravakṣyāmi narādityaṃ divākaram ||
yasya darśanamātreṇa sarvarogairvimucyate
||1||अथान्यत्संप्रवक्ष्यामि नरादित्यं दिवाकरम् ॥
यस्य दर्शनमात्रेण सर्वरोगैर्विमुच्यते
sthāpanāṃ te pravakṣyāmi narādityasya yādṛśī ||
yuddhe nivārite tasminraktasvedajayoḥ purā
||2||स्थापनां ते प्रवक्ष्यामि नरादित्यस्य यादृशी ॥
युद्धे निवारिते तस्मिन्रक्तस्वेदजयोः पुरा
naranārāyaṇau devāvavatīrṇau dharātale ||
kuṃtyāṃ devyāṃ ca devakyāṃ mathurāyāmajāyatām
||3||नरनारायणौ देवाववतीर्णौ धरातले ॥
कुंत्यां देव्यां च देवक्यां मथुरायामजायताम्
evaṃ tau vartitau loke kāṃtau vṛddhiṃ parāṃ gatau ||
anyasmātkāraṇātkṛṣṇo 'nyasmājjāto dhanaṃjayaḥ
||4||एवं तौ वर्तितौ लोके कांतौ वृद्धिं परां गतौ ॥
अन्यस्मात्कारणात्कृष्णो ऽन्यस्माज्जातो धनंजयः
kaṃsādīndānavānsarvānnijaghāna raṇe hi saḥ ||
svargaṃ gatastataḥ pārtho vāsavādastrasiddhaye
||5||कंसादीन्दानवान्सर्वान्निजघान रणे हि सः ॥
स्वर्गं गतस्ततः पार्थो वासवादस्त्रसिद्धये
kṛtāstreṇa tu vīreṇa devarājasya dakṣiṇā ||
saṃstutā devarājastu yayāce tāṃ hi dakṣiṇām
||6||कृतास्त्रेण तु वीरेण देवराजस्य दक्षिणा ॥
संस्तुता देवराजस्तु ययाचे तां हि दक्षिणाम्
nivātakavacā hyugrā hiraṇyapuravāsinaḥ ||
vadhyaṃtāmarjuna kṣiprameṣā me gurudakṣiṇā
||7||निवातकवचा ह्युग्रा हिरण्यपुरवासिनः ॥
वध्यंतामर्जुन क्षिप्रमेषा मे गुरुदक्षिणा
arjunena pratijñāto vadhasteṣāṃ durātmanām ||
aiṃdraṃ sa rathamāsthāya gṛhītvā saśaraṃ dhanuḥ
||8||अर्जुनेन प्रतिज्ञातो वधस्तेषां दुरात्मनाम् ॥
ऐंद्रं स रथमास्थाय गृहीत्वा सशरं धनुः
nihatya tāṃstataḥ pārthaḥ kṛtvā karma suduṣkaram ||
prītimutpādayāmāsa sarveṣāṃ ca divaukasām
||9||निहत्य तांस्ततः पार्थः कृत्वा कर्म सुदुष्करम् ॥
प्रीतिमुत्पादयामास सर्वेषां च दिवौकसाम्
kṛtakāryaṃ tadā śakrastvarjunaṃ vākyamabravīt ||
yatte'bhiruciraṃ vīra mṛtyuloke sudurlabham
||10||कृतकार्यं तदा शक्रस्त्वर्जुनं वाक्यमब्रवीत् ॥
यत्तेऽभिरुचिरं वीर मृत्युलोके सुदुर्लभम्
manasā kāṃkṣitaṃ pārtha varaṃ tvaṃ varayottamam ||
sa vavre pratime dve tu ye'rcite brahmaṇā svayam
||11||मनसा कांक्षितं पार्थ वरं त्वं वरयोत्तमम् ॥
स वव्रे प्रतिमे द्वे तु येऽर्चिते ब्रह्मणा स्वयम्
brahmaṇā prītiyuktena dakṣāya pratipādite ||
dakṣeṇāpi yugaṃ sāgraṃ pūjite timirāpahe
||12||ब्रह्मणा प्रीतियुक्तेन दक्षाय प्रतिपादिते ॥
दक्षेणापि युगं साग्रं पूजिते तिमिरापहे
surāṇāmasurāṇāṃ ca vigrahe samupasthite ||
dānavairnirjitaḥ śakro hṛtarājyo vanaṃ gataḥ
||13||सुराणामसुराणां च विग्रहे समुपस्थिते ॥
दानवैर्निर्जितः शक्रो हृतराज्यो वनं गतः
tapaścacāra durdharṣamekapādaḥ śatakratuḥ ||
divyavarṣasahasraṃ tu dhiṣaṇastaṃ dadarśa ha
||14||तपश्चचार दुर्धर्षमेकपादः शतक्रतुः ॥
दिव्यवर्षसहस्रं तु धिषणस्तं ददर्श ह
dṛṣṭvā tu devarājaṃ taṃ bṛhaspatiruvāca ha ||
hitvā tridivamāyātaḥ kathaṃ śakra tvidaṃ vanam
||15||दृष्ट्वा तु देवराजं तं बृहस्पतिरुवाच ह ॥
हित्वा त्रिदिवमायातः कथं शक्र त्विदं वनम्
ekākinā vanasthena na sādhyāḥ śatravastvayā ||
jñātvaivaṃ devarāja tvaṃ śīghraṃ dakṣāśramaṃ vraja
||16||एकाकिना वनस्थेन न साध्याः शत्रवस्त्वया ॥
ज्ञात्वैवं देवराज त्वं शीघ्रं दक्षाश्रमं व्रज
pūjārthe brahmaṇā datte pārijātasamudbhave ||
cakāra viśvakarmā ye te yācasva prajāpatim
||17||पूजार्थे ब्रह्मणा दत्ते पारिजातसमुद्भवे ॥
चकार विश्वकर्मा ये ते याचस्व प्रजापतिम्
śatrūṇāṃ ca kṣayo bhāvī prasādādarcayo stayoḥ ||
gurostu tena vākyena hṛṣṭo devaḥ śatakratuḥ
||18||शत्रूणां च क्षयो भावी प्रसादादर्चयो स्तयोः ॥
गुरोस्तु तेन वाक्येन हृष्टो देवः शतक्रतुः
jagāma satvarastatra yatra dakṣaḥ prajāpatiḥ ||
vinayāvanato bhūtvā yayāce pratime śubhe ||
19 pūjite pratime vyāsa śakreṇa śaradāṃ śatam ||
tayostu tejasā sarve vināśaṃ dānavā gatāḥ
||20||जगाम सत्वरस्तत्र यत्र दक्षः प्रजापतिः ॥
विनयावनतो भूत्वा ययाचे प्रतिमे शुभे ॥
१९ पूजिते प्रतिमे व्यास शक्रेण शरदां शतम् ॥
तयोस्तु तेजसा सर्वे विनाशं दानवा गताः
pratime cocutuḥ śakraṃ varayasva varottamam ||
bhaktyānayā paraṃ tuṣṭāvāvāṃ jānīhi vāsava
||21||प्रतिमे चोचुतुः शक्रं वरयस्व वरोत्तमम् ॥
भक्त्यानया परं तुष्टावावां जानीहि वासव
varaṃ vavre tadā śakraḥ prasannātmā dvijotma ||
asmākaṃ pratipakṣā ye dānavāḥ pāpacetasaḥ
||22||वरं वव्रे तदा शक्रः प्रसन्नात्मा द्विजोत्म ॥
अस्माकं प्रतिपक्षा ये दानवाः पापचेतसः
sarve te nāśamṛcchaṃtu vara eṣa mato mama ||
yuvāṃ pūjitumicchāmi yāvadiṃdro bhavāmyaham
||23||सर्वे ते नाशमृच्छंतु वर एष मतो मम ॥
युवां पूजितुमिच्छामि यावदिंद्रो भवाम्यहम्
tatheti coktvā pratime te nākaṃ prati jagmatuḥ ||
tattu yāce hyavaśyārthe varārthe pratimādvayam
||24||तथेति चोक्त्वा प्रतिमे ते नाकं प्रति जग्मतुः ॥
तत्तु याचे ह्यवश्यार्थे वरार्थे प्रतिमाद्वयम्
iṃdra uvāca
sādhu pārtha punaḥ sādhu yatretthaṃ pratitiṣṭhataḥ ||
ime ca pratime pārtha śaṃkareṇa mahātmanā
||25||साधु पार्थ पुनः साधु यत्रेत्थं प्रतितिष्ठतः ॥
इमे च प्रतिमे पार्थ शंकरेण महात्मना
suraktaiḥ śatapatraiśca pūjite brahmaṇo dinam ||
trailokyapālanārthāya pūjite viṣṇunā purā
||26||सुरक्तैः शतपत्रैश्च पूजिते ब्रह्मणो दिनम् ॥
त्रैलोक्यपालनार्थाय पूजिते विष्णुना पुरा
nīlotpalaiḥ sugaṃdhaiśca sahasraparivatsarān ||
tataḥ prajāpatiḥ sṛṣṭiṃ kartukāmaḥ samā hitaḥ
||27||नीलोत्पलैः सुगंधैश्च सहस्रपरिवत्सरान् ॥
ततः प्रजापतिः सृष्टिं कर्तुकामः समा हितः
pūjayāmāsa pratime padmai raktotpalaiḥ śubhaiḥ ||
tvameva hi kathaṃ pārtha mṛtyuloke nayiṣyati
||28||पूजयामास प्रतिमे पद्मै रक्तोत्पलैः शुभैः ॥
त्वमेव हि कथं पार्थ मृत्युलोके नयिष्यति
etābhyāṃ rahitaḥ svargo mṛtyutulyo bhaviṣyati ||
adātukāmaṃ deveṃdraṃ praṇipatya tamarjunaḥ
||29||एताभ्यां रहितः स्वर्गो मृत्युतुल्यो भविष्यति ॥
अदातुकामं देवेंद्रं प्रणिपत्य तमर्जुनः
uvāca nāhamarthyasminvareṇānena vai prabho ||
tataḥ śakraḥ punaḥ pārthamuvāca munipuṃgava
||30||उवाच नाहमर्थ्यस्मिन्वरेणानेन वै प्रभो ॥
ततः शक्रः पुनः पार्थमुवाच मुनिपुंगव
gṛhītvā tvamime vīra kuśasthalyāṃ niveśaya ||
śiprāyā uttare tīre keśavārkaṃ tu keśavaḥ
||31||गृहीत्वा त्वमिमे वीर कुशस्थल्यां निवेशय ॥
शिप्राया उत्तरे तीरे केशवार्कं तु केशवः
prati tiṣṭhati vai yatra sarvapāpapraṇāśanaḥ ||
saṃsthāpayasva vai tatra sarvapāpapraṇāśane ||
bhaviṣyati tadā yātrā āṣāḍhī cātha kaumudī
||32||प्रति तिष्ठति वै यत्र सर्वपापप्रणाशनः ॥
संस्थापयस्व वै तत्र सर्वपापप्रणाशने ॥
भविष्यति तदा यात्रा आषाढी चाथ कौमुदी
āgamiṣyāmyahaṃ tatra sahito'psarasāṃ gaṇaiḥ ||
marutaścāgamiṣyaṃti meghāścaiva savidyutaḥ
||33||आगमिष्याम्यहं तत्र सहितोऽप्सरसां गणैः ॥
मरुतश्चागमिष्यंति मेघाश्चैव सविद्युतः
meghakhaṇḍe samudbhūte mayi tatra pravarṣati ||
pravadiṣyaṃti vai lokāḥ prāpto devaḥ puraṃdaraḥ
||34||मेघखण्डे समुद्भूते मयि तत्र प्रवर्षति ॥
प्रवदिष्यंति वै लोकाः प्राप्तो देवः पुरंदरः
bhāskaraṃ ca namaskṛtya brahmādyaiḥ pūjitaṃ vibhum ||
pratiyāmi tu bībhatso punareva yathāgatam
||35||भास्करं च नमस्कृत्य ब्रह्माद्यैः पूजितं विभुम् ॥
प्रतियामि तु बीभत्सो पुनरेव यथागतम्
evaṃ mṛrtidvayaṃ vyāsa dattvā pārthāya vāsavaḥ ||
bhūrlokaṃ preṣayāmāsa sūtena saha pāṃḍavam
||36||एवं मृर्तिद्वयं व्यास दत्त्वा पार्थाय वासवः ॥
भूर्लोकं प्रेषयामास सूतेन सह पांडवम्
nārado dvārakāyāṃ tu kṛṣṇasyāhvānakāraṇāt ||
devarājasya tadvākyaṃ sarahasyaṃ ca keśavam
||37||नारदो द्वारकायां तु कृष्णस्याह्वानकारणात् ॥
देवराजस्य तद्वाक्यं सरहस्यं च केशवम्
śrāvayāmāsa vipreṃdraṃ ehi kṛṣṇa kuśasthalīm ||
arcce hi pārijātasya viśvakarmasukārite
||38||श्रावयामास विप्रेंद्रं एहि कृष्ण कुशस्थलीम् ॥
अर्च्चे हि पारिजातस्य विश्वकर्मसुकारिते
iṃdreṇātha pradatte vai te tubhyaṃ pāṃḍavāya ca ||
śrutvā śauristu tadvākyaṃ pratasthe'vaṃtinīpurīm
||39||इंद्रेणाथ प्रदत्ते वै ते तुभ्यं पांडवाय च ॥
श्रुत्वा शौरिस्तु तद्वाक्यं प्रतस्थेऽवंतिनीपुरीम्
avātaracca ākāśāttamāliṃgya ca pāṃḍavam ||
prītaḥ provāca vacanaṃ pariṣvajya ca phālgunam
||40||अवातरच्च आकाशात्तमालिंग्य च पांडवम् ॥
प्रीतः प्रोवाच वचनं परिष्वज्य च फाल्गुनम्
janma me saphalaṃ jātaṃ prītirme janitārjuna ||
yato me prītiratulā kriyatāṃ kāryamuttamam
||41||जन्म मे सफलं जातं प्रीतिर्मे जनितार्जुन ॥
यतो मे प्रीतिरतुला क्रियतां कार्यमुत्तमम्
ityuktvā tau tadā vyāsa samāyātau kuśasthalīm ||
pārthaṃ prāha tadā kṛṣṇaḥ susaṃpūrṇamanorathaḥ
||42||इत्युक्त्वा तौ तदा व्यास समायातौ कुशस्थलीम् ॥
पार्थं प्राह तदा कृष्णः सुसंपूर्णमनोरथः
gatvārjuna diśaṃ prācīṃ mūrtimekāṃ niveśaya ||
pūrvāhne hi śubhaṃ lagnaṃ bhaviṣyati manoramam
||43||गत्वार्जुन दिशं प्राचीं मूर्तिमेकां निवेशय ॥
पूर्वाह्ने हि शुभं लग्नं भविष्यति मनोरमम्
ahamapyuttarāṃ yāmi sthāpanārthaṃ nadīṃ mune ||
mama śaṃkhasya nādena pratitiṣṭha raviṃ prabhum
||44||अहमप्युत्तरां यामि स्थापनार्थं नदीं मुने ॥
मम शंखस्य नादेन प्रतितिष्ठ रविं प्रभुम्
pūrvāṃ gatvā tataḥ pārtha śubhaṃ sthānaṃ vyalokayat ||
vyāsa saṃsthāpayāmāsa dinanāthaṃ ca susthiram
||45||पूर्वां गत्वा ततः पार्थ शुभं स्थानं व्यलोकयत् ॥
व्यास संस्थापयामास दिननाथं च सुस्थिरम्
arkaṃ devaṃ sthāpayāmi yāvaddadhyau ca pāṃḍavaḥ ||
tāvatsa cābravīdenaṃ sthānaṃ kāraya śobhanam
||46||अर्कं देवं स्थापयामि यावद्दध्यौ च पांडवः ॥
तावत्स चाब्रवीदेनं स्थानं कारय शोभनम्
kathayāmāsa pārthāya tejasā tena duḥsaham ||
savyasācī tato bhīto dṛṣṭvārccāṃ tāṃ prajalpatīm
||47||कथयामास पार्थाय तेजसा तेन दुःसहम् ॥
सव्यसाची ततो भीतो दृष्ट्वार्च्चां तां प्रजल्पतीम्
tejastvasahamāno vai devaṃ vacanamabravīt ||
kva deva tvāṃ sthāpayāmi kiṃ sthānaṃ tava rocate
||48||तेजस्त्वसहमानो वै देवं वचनमब्रवीत् ॥
क्व देव त्वां स्थापयामि किं स्थानं तव रोचते
saumya rūpaḥ sudarśaśca prajābhyo bhava gopate ||
divisaṃsthāśca ye devā nāgāḥ pātālasaṃśrayāḥ
||49||सौम्य रूपः सुदर्शश्च प्रजाभ्यो भव गोपते ॥
दिविसंस्थाश्च ये देवा नागाः पातालसंश्रयाः
bhuvisthā mānavāḥ pūtā bhavaṃtu tava darśanāt ||
so'rjunamabravīddevo mā bhaistvaṃ mama darśanāt
||50||भुविस्था मानवाः पूता भवंतु तव दर्शनात् ॥
सोऽर्जुनमब्रवीद्देवो मा भैस्त्वं मम दर्शनात्
dakṣiṇena kareṇātha hyabhayenābhayapradaḥ ||
samāśvāsyātha taṃ śāṃtaṃ saumyamūrtirbabhūva ha
||51||दक्षिणेन करेणाथ ह्यभयेनाभयप्रदः ॥
समाश्वास्याथ तं शांतं सौम्यमूर्तिर्बभूव ह
prabhākareṇa devena nijaṃ tejaḥ pradarśitama ||
tataḥ sūryo'bravītsthānametadevācalaṃ mama
||52||प्रभाकरेण देवेन निजं तेजः प्रदर्शितम ॥
ततः सूर्योऽब्रवीत्स्थानमेतदेवाचलं मम
prāpte lagne ca hariṇā śaṃkhaścāpūrito mahān ||
nareṇa ca sa vai sūryaḥ sthāpito'marasaṃstutaḥ
||53||प्राप्ते लग्ने च हरिणा शंखश्चापूरितो महान् ॥
नरेण च स वै सूर्यः स्थापितोऽमरसंस्तुतः
arjuna uvāca
jayati kiraṇamālī bhāsuraḥ śrāṃtasaptiḥ sakalabhuvanadhāmā prāgdigaṃtāṭṭahāsaḥ ||
bhavati vigatapāpaṃ kīrtanādeva yasya pracurakaluṣadoṣairgrastamaṃgaṃ narāṇām
||54||जयति किरणमाली भासुरः श्रांतसप्तिः सकलभुवनधामा प्राग्दिगंताट्टहासः ॥
भवति विगतपापं कीर्तनादेव यस्य प्रचुरकलुषदोषैर्ग्रस्तमंगं नराणाम्
brahmādyairmunibhirabhiṣṭutaṃ pataṃgaṃ kaḥ stotuṃ kavirabhivāṃchate prakāmam ||
stoṣyehaṃ tadapi suvistarātsubuddhe kiṃ dīpo jvalati hi nodite śaśāṃke
||55||ब्रह्माद्यैर्मुनिभिरभिष्टुतं पतंगं कः स्तोतुं कविरभिवांछते प्रकामम् ॥
स्तोष्येहं तदपि सुविस्तरात्सुबुद्धे किं दीपो ज्वलति हि नोदिते शशांके
śāstrārthakāmanipuṇairmunibhiḥ stutasya kiṃ vastu yanna racitaṃ vividhaiḥ prayogaiḥ ||
dvaipāyanaprabhṛtibhirmunibhiḥ purāṇairāpītasāramiha bhāti jagatsamastam
||56||शास्त्रार्थकामनिपुणैर्मुनिभिः स्तुतस्य किं वस्तु यन्न रचितं विविधैः प्रयोगैः ॥
द्वैपायनप्रभृतिभिर्मुनिभिः पुराणैरापीतसारमिह भाति जगत्समस्तम्
kāmaṃ tathāpyahamatīva vicārya bruddhyā bhānostrilokagurupūjitapādayugmam ||
vṛttaiḥ sphuṭārthamadhurākṣarasaṃdhiyuktaistvāṃ vai vicitragatibhiḥ parikīrtayiṣye
||57||कामं तथाप्यहमतीव विचार्य ब्रुद्ध्या भानोस्त्रिलोकगुरुपूजितपादयुग्मम् ॥
वृत्तैः स्फुटार्थमधुराक्षरसंधियुक्तैस्त्वां वै विचित्रगतिभिः परिकीर्तयिष्ये
tāvajjagadbhavati niścalameva sarvaṃ tāvatkriyāśca vividhā na ca yāṃti siddhim ||
yāvacca nātha kamalāmalamaṃḍala tvamuttiṣṭhase vyapanayankiraṇaistamāṃsi
||58||तावज्जगद्भवति निश्चलमेव सर्वं तावत्क्रियाश्च विविधा न च यांति सिद्धिम् ॥
यावच्च नाथ कमलामलमंडल त्वमुत्तिष्ठसे व्यपनयन्किरणैस्तमांसि
tāvanna bhāṃti śikharāṇi mahīruhāṇāṃ gucchaistu phullavanamīlitalocanāni ||
suptāni bodhayasi ṣaṭcaraṇākulāni yāvanna bhābhiramalābhiranuttamābhiḥ
||59||तावन्न भांति शिखराणि महीरुहाणां गुच्छैस्तु फुल्लवनमीलितलोचनानि ॥
सुप्तानि बोधयसि षट्चरणाकुलानि यावन्न भाभिरमलाभिरनुत्तमाभिः
udyaṃtamaṃbaratale surasiddhasaṃghāḥ sabrahmadaityamunikinnaranāgayakṣāḥ ||
tvāmarcayaṃti vibudhāḥ praṇataiḥ śirobhiścañcatkirīṭamaṇibhābhiranuttamābhiḥ
||60||उद्यंतमंबरतले सुरसिद्धसंघाः सब्रह्मदैत्यमुनिकिन्नरनागयक्षाः ॥
त्वामर्चयंति विबुधाः प्रणतैः शिरोभिश्चञ्चत्किरीटमणिभाभिरनुत्तमाभिः
astaṃ gate tvayi jagadbhavati prasuptaṃ bhūyastvayi pratapati pratibodhameti ||
evaṃ sadā varada lokahitārthahetorekastvameva bhagavaṃstimirasya haṃtā
||61||अस्तं गते त्वयि जगद्भवति प्रसुप्तं भूयस्त्वयि प्रतपति प्रतिबोधमेति ॥
एवं सदा वरद लोकहितार्थहेतोरेकस्त्वमेव भगवंस्तिमिरस्य हंता
utsāhaśaktinayaśauryasamanvitānāṃ sevāprayogaracanāvidhitatparāṇām ||
kāryāṇi yanna phaladāni bhavaṃti puṃsāṃ hetustvabhaktiriha nātha veti nūnam ||
yatsaṃyugeṣu rathakuñjarakuntaśaktinārācacakraśaratomarabhīmakhaḍgaiḥ ||
kṣipraṃ narāḥ samupayāṃti vijitya śatrūnsarvaṃ sadā praṇatavatsala veṣṭitaṃ te
||63||उत्साहशक्तिनयशौर्यसमन्वितानां सेवाप्रयोगरचनाविधितत्पराणाम् ॥
कार्याणि यन्न फलदानि भवंति पुंसां हेतुस्त्वभक्तिरिह नाथ वेति नूनम् ॥
यत्संयुगेषु रथकुञ्जरकुन्तशक्तिनाराचचक्रशरतोमरभीमखड्गैः ॥
क्षिप्रं नराः समुपयांति विजित्य शत्रून्सर्वं सदा प्रणतवत्सल वेष्टितं ते
kāṃtāradurgaviṣameṣvapi vartamānā ṛkṣebhasiṃhabahukaṇṭakataskareṣu ||
tṛṣṇānvitāśca bahuśokavimūḍhacittāstvatkīrtanāddhi gatamṛtyu bhayā bhavaṃti
||64||कांतारदुर्गविषमेष्वपि वर्तमाना ऋक्षेभसिंहबहुकण्टकतस्करेषु ॥
तृष्णान्विताश्च बहुशोकविमूढचित्तास्त्वत्कीर्तनाद्धि गतमृत्यु भया भवंति
tejorāśistvamiha śaraṇaṃ sarvatoduḥkhitānāṃ tvattulyo'nyo jagati sakale nāsti kaściddayāluḥ ||
tvayyekasminbhavati sakalā bhaktiranviṣyamāṇā tvāmāsādya prabhavati kuto vyādhiduḥkhaṃ narāṇām
||65||तेजोराशिस्त्वमिह शरणं सर्वतोदुःखितानां त्वत्तुल्योऽन्यो जगति सकले नास्ति कश्चिद्दयालुः ॥
त्वय्येकस्मिन्भवति सकला भक्तिरन्विष्यमाणा त्वामासाद्य प्रभवति कुतो व्याधिदुःखं नराणाम्
kaḥ kuṣṭhābhihataḥ kva cāribhiratho ko vyādhibhiḥ pīḍitaḥ ke paṃgvaṃdhajaḍāḥ kva śīrṇacaraṇaḥ ko vā vipannakriyaḥ ||
ityevaṃ prasamīkṣya deva kṛpayā doṣātparitrāyase kasyānyasya paropakāraniratā ceṣṭā yathaiṣā tava
||66||कः कुष्ठाभिहतः क्व चारिभिरथो को व्याधिभिः पीडितः के पंग्वंधजडाः क्व शीर्णचरणः को वा विपन्नक्रियः ॥
इत्येवं प्रसमीक्ष्य देव कृपया दोषात्परित्रायसे कस्यान्यस्य परोपकारनिरता चेष्टा यथैषा तव
dharmaḥ paratra kila tiṣṭhati sevito'sau kālāṃtareṇa vibudhā varadā bhavaṃti ||
tvaṃ sevitaḥ praṇatavatsala bhūtikāmaiḥ sadyaḥ prayacchasi phalaṃ yadabhīpsitaṃ taiḥ
||67||धर्मः परत्र किल तिष्ठति सेवितोऽसौ कालांतरेण विबुधा वरदा भवंति ॥
त्वं सेवितः प्रणतवत्सल भूतिकामैः सद्यः प्रयच्छसि फलं यदभीप्सितं तैः
vibhrāṃtakāṃtahariṇīsadṛśekṣaṇābhiḥ kāṃtoruhāramaṇikuṇḍalamekhalābhiḥ ||
teṣāṃ bhavaṃti bhavanāni vilāsinībhiryeṣāṃ nṛṇāṃ tvamasi vai varadaḥ prasannaḥ
||68||विभ्रांतकांतहरिणीसदृशेक्षणाभिः कांतोरुहारमणिकुण्डलमेखलाभिः ॥
तेषां भवंति भवनानि विलासिनीभिर्येषां नृणां त्वमसि वै वरदः प्रसन्नः
yaistvaṃ naraiḥ sakṛdapi praṇataḥ kathaṃciddhyāto'thavā bhuvananātha tathāṃtakāle ||
niṣkalmaṣā jagati duṣkṛtino bhavaṃti te nirmalāḥ sukṛtino gatimāpnuvaṃti
||69||यैस्त्वं नरैः सकृदपि प्रणतः कथंचिद्ध्यातोऽथवा भुवननाथ तथांतकाले ॥
निष्कल्मषा जगति दुष्कृतिनो भवंति ते निर्मलाः सुकृतिनो गतिमाप्नुवंति
ye tvāṃ kutarkamatibhirna namaṃti bhaktyā romāṃcakaṃcukaśatākulitaiḥ śarīraiḥ ||
te nirdhanāḥ paragṛheṣvavabhūtamannaṃ kṣutkṣāmakaṇṭhavadanāḥ paritarkayaṃti
||70||ये त्वां कुतर्कमतिभिर्न नमंति भक्त्या रोमांचकंचुकशताकुलितैः शरीरैः ॥
ते निर्धनाः परगृहेष्ववभूतमन्नं क्षुत्क्षामकण्ठवदनाः परितर्कयंति
udadhijalataraṃgakṣobhalolākṣiyugmaiḥ saphaṇimaṇimayūkhodbhāsitairlelihadbhiḥ ||
praṇipatitaśirobhirnāgamukhyairajasraṃ śrutibhiranupamābhiḥ stūyase puṣkalābhiḥ
||71||उदधिजलतरंगक्षोभलोलाक्षियुग्मैः सफणिमणिमयूखोद्भासितैर्लेलिहद्भिः ॥
प्रणिपतितशिरोभिर्नागमुख्यैरजस्रं श्रुतिभिरनुपमाभिः स्तूयसे पुष्कलाभिः
tava suravara gacchato'nusaraṃti tridaśanadīkamalodga tāni vātaiḥ ||
kanakakamalareṇupiṃjaritāni bhramarakulāni pataṃga cāmarāṇi
||72||तव सुरवर गच्छतोऽनुसरंति त्रिदशनदीकमलोद्ग तानि वातैः ॥
कनककमलरेणुपिंजरितानि भ्रमरकुलानि पतंग चामराणि
tattvadhyānaṃ jalanidhinivahe sthitvā sthitvā caraṇanivahaiḥ ||
ājīvārthaṃ pratapasi bhagavankaste tulyastribhuvanasamaye
||73||तत्त्वध्यानं जलनिधिनिवहे स्थित्वा स्थित्वा चरणनिवहैः ॥
आजीवार्थं प्रतपसि भगवन्कस्ते तुल्यस्त्रिभुवनसमये
udayādrinitaṃbasaṃsthitasya hyudayeṣvastamayeṣu cāvṛtasya ||
kiraṇāstapanīyasaprabhāste vilasantastaḍito viḍaṃbayaṃti
||74||उदयाद्रिनितंबसंस्थितस्य ह्युदयेष्वस्तमयेषु चावृतस्य ॥
किरणास्तपनीयसप्रभास्ते विलसन्तस्तडितो विडंबयंति
yathāyathā vrajati rathastavāṃbare vipāṭayandhanatimiraughasaṃcayān ||
tathātathā kṣubhitamahānilāsṛtaṃ pratīyate muhuriva dundubhiryathā
||75||यथायथा व्रजति रथस्तवांबरे विपाटयन्धनतिमिरौघसंचयान् ॥
तथातथा क्षुभितमहानिलासृतं प्रतीयते मुहुरिव दुन्दुभिर्यथा
cārupadmavinimīlitekṣaṇāṃ cakravākakalahaṃsamekhalām ||
kāminīmiva ratiśramālasāṃ tāṃ vibodhayasi padminīṃ karaiḥ
||76||चारुपद्मविनिमीलितेक्षणां चक्रवाककलहंसमेखलाम् ॥
कामिनीमिव रतिश्रमालसां तां विबोधयसि पद्मिनीं करैः
nīlalolamatikāntamutpalaṃ bhṛṃgatuṃgacaraṇākulīkṛtam ||
tvatprabhābhiranurāgaraṃjitaṃ padmarāgamiva śobhate bhṛśam
||77||नीललोलमतिकान्तमुत्पलं भृंगतुंगचरणाकुलीकृतम् ॥
त्वत्प्रभाभिरनुरागरंजितं पद्मरागमिव शोभते भृशम्
sphuracchaśāṃkahāranirmalaṃ khaga tvadaṃkeṣvacaṃcalam ||
vibhātyatīva kāṃtamaṃbaraṃ samaṃ bṛhaccaika pāṭalam
||78||स्फुरच्छशांकहारनिर्मलं खग त्वदंकेष्वचंचलम् ॥
विभात्यतीव कांतमंबरं समं बृहच्चैक पाटलम्
hariti ca tāvanmuhirniṣevitatamasyaśubhaṃ bhavati ca yāvadaiva kiraṇaistava pūjitataram ||
ṛṣibhirmunibhirudāradhībhiḥ śāśva tamārgaparairvarada na śakyate tava guṇastutirāśrayitum
||79||हरिति च तावन्मुहिर्निषेविततमस्यशुभं भवति च यावदैव किरणैस्तव पूजिततरम् ॥
ऋषिभिर्मुनिभिरुदारधीभिः शाश्व तमार्गपरैर्वरद न शक्यते तव गुणस्तुतिराश्रयितुम्
tvaṃ viṣṇustvaṃ śaśāṃkastvamasuramathanaḥ śaṇmukhastvaṃ dhaneśastvaṃ kālastvaṃ ca dhātā kṣitidharamalayāpāśrayastvaṃ hutāśaḥ ||
oṃkārastvaṃ dvijānāṃ tvamiha jalanidhitvaṃ śarastvaṃ ca rudrastvaṃ mukhyastvaṃ payodo vratayamaniyamāstvaṃ jagatsarvameva
||80||त्वं विष्णुस्त्वं शशांकस्त्वमसुरमथनः शण्मुखस्त्वं धनेशस्त्वं कालस्त्वं च धाता क्षितिधरमलयापाश्रयस्त्वं हुताशः ॥
ॐकारस्त्वं द्विजानां त्वमिह जलनिधित्वं शरस्त्वं च रुद्रस्त्वं मुख्यस्त्वं पयोदो व्रतयमनियमास्त्वं जगत्सर्वमेव
tvamaniṃdya gopate tripuramathana manmathadāhakarastvamasurabhīmadarpahā pāhi mām ||
tridaśādhipakamalavarānanastvamiha devagururbhagavāṃ stribhuvanamaṇḍale'sti katamastava tulyaguṇaḥ
||81||त्वमनिंद्य गोपते त्रिपुरमथन मन्मथदाहकरस्त्वमसुरभीमदर्पहा पाहि माम् ॥
त्रिदशाधिपकमलवराननस्त्वमिह देवगुरुर्भगवां स्त्रिभुवनमण्डलेऽस्ति कतमस्तव तुल्यगुणः
āditya bhāskara divākara saptasapte mārtaṃḍa sūrya haridaśvapate ca bhāno ||
aśrāṃtavāhana kharūpa gabhastimāliṃstvāṃ lokanātha śaraṇaṃ pratipadyate'sau
||82||आदित्य भास्कर दिवाकर सप्तसप्ते मार्तंड सूर्य हरिदश्वपते च भानो ॥
अश्रांतवाहन खरूप गभस्तिमालिंस्त्वां लोकनाथ शरणं प्रतिपद्यतेऽसौ
prāgdigvadhūtilakabhāsurakarṇapūra maṃdākinīdayitanātha jagatpradīpa ||
hemādritāpana nabhastalahāriratna sandhyāṃganāvadanarāga namonamaste
||83||प्राग्दिग्वधूतिलकभासुरकर्णपूर मंदाकिनीदयितनाथ जगत्प्रदीप ॥
हेमाद्रितापन नभस्तलहारिरत्न सन्ध्यांगनावदनराग नमोनमस्ते
brahmaiva satya śubhamaṃgala lokanātha vyomāṃgaṇeśa munisaṃstuta viśvamūrte ||
ārtasya śokahara kiṃkarapālakaśca tvaṃ me prasīda bhagavañcharaṇāgatasya
||84||ब्रह्मैव सत्य शुभमंगल लोकनाथ व्योमांगणेश मुनिसंस्तुत विश्वमूर्ते ॥
आर्तस्य शोकहर किंकरपालकश्च त्वं मे प्रसीद भगवञ्छरणागतस्य
kṛtvāṃjaliṃ śirasi paṃkajakuḍmalābhaṃ yatsaṃstutastvamiha deva mayādya bhaktyā ||
tena prabho bhava mamopari saumyamūrtirdharme matiṃ kuru sadā śriyamūrjitāṃ ca
||85||कृत्वांजलिं शिरसि पंकजकुड्मलाभं यत्संस्तुतस्त्वमिह देव मयाद्य भक्त्या ॥
तेन प्रभो भव ममोपरि सौम्यमूर्तिर्धर्मे मतिं कुरु सदा श्रियमूर्जितां च
namaḥ savitre jagadekacakṣuṣe jagatprasūtisthitināśahe tave ||
trayīmayāya triguṇātmadhāraṇe viraṃcinārāyaṇaśaṃkarātmane
||86||नमः सवित्रे जगदेकचक्षुषे जगत्प्रसूतिस्थितिनाशहे तवे ॥
त्रयीमयाय त्रिगुणात्मधारणे विरंचिनारायणशंकरात्मने
sūrya uvāca
tuṣṭohamadhunā pārtha stotreṇānena suvrata ||
varaṃ dāsyāmi yatnena yatte manasi vartate
||87||तुष्टोहमधुना पार्थ स्तोत्रेणानेन सुव्रत ॥
वरं दास्यामि यत्नेन यत्ते मनसि वर्तते
maddarśanaṃ hi viphalaṃ na kadācitprajāyate ||
śūrāṇāṃ ca viśeṣeṇa hyadeyaṃ nāsti yatnataḥ
||88||मद्दर्शनं हि विफलं न कदाचित्प्रजायते ॥
शूराणां च विशेषेण ह्यदेयं नास्ति यत्नतः
arjuna uvāca
eṣa eva varo mahyaṃ varāṇāmuttamottamaḥ ||
atra saṃnihito deva sarvakālaṃ bhava prabho
||89||एष एव वरो मह्यं वराणामुत्तमोत्तमः ॥
अत्र संनिहितो देव सर्वकालं भव प्रभो
ye ca tvāṃ mānavā bhaktyā sto ṣyaṃti praṇatāḥ sadā ||
teṣāṃ dhanaṃ ca dhānyaṃ ca putradārādikaṃ vasu
||90||ये च त्वां मानवा भक्त्या स्तो ष्यंति प्रणताः सदा ॥
तेषां धनं च धान्यं च पुत्रदारादिकं वसु
manasaścepsitaṃ sarva dātavyaṃ hi varo mama ||
sanatkumāra uvāca ||
ādityo 'smai varaṃ dattvā hyuvāca vacanaṃ śubham
||91||मनसश्चेप्सितं सर्व दातव्यं हि वरो मम ॥
सनत्कुमार उवाच ॥
आदित्यो ऽस्मै वरं दत्त्वा ह्युवाच वचनं शुभम्
yastvatkṛtena stotreṇa māṃ stoṣyati narottamaḥ ||
śriyā na vicyutistasya bhavedeṣa varo mama
||92||यस्त्वत्कृतेन स्तोत्रेण मां स्तोष्यति नरोत्तमः ॥
श्रिया न विच्युतिस्तस्य भवेदेष वरो मम
iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe'vantīkṣetramāhātmye narādityamāhātmye'rjunastutivarṇanaṃnāma dvātriṃ śo'dhyāyaḥ || 32 ||