adhimāsaṃ samāsādya yo'nyatra sthitimātmanaḥ
sanatkumāra uvāca
adhimāsaṃ samāsādya yo'nyatra sthitimātmanaḥ ||
karoti sa naro mūrkho mahākālavanādṛte
||1||अधिमासं समासाद्य योऽन्यत्र स्थितिमात्मनः ॥
करोति स नरो मूर्खो महाकालवनादृते
adhimāse naro vyāsa tīrthe puruṣottamābhidhe ||
snātvā dattvā ca dānāni teṣāṃ lokāḥ sanātanāḥ
||2||अधिमासे नरो व्यास तीर्थे पुरुषोत्तमाभिधे ॥
स्नात्वा दत्त्वा च दानानि तेषां लोकाः सनातनाः
puruṣottamaṃ samabhyarcya ramālālitapādakam ||
tathaiva ca umāṃ devīṃ śaṃkareṇa ca pūjayet
||3||पुरुषोत्तमं समभ्यर्च्य रमालालितपादकम् ॥
तथैव च उमां देवीं शंकरेण च पूजयेत्
vāṃchitārthaśataṃ prāpya viṣṇuloke mahīyate ||
bhādrapade site pakṣe ekādaśyāṃ samāhitaḥ ||
upoṣya vidhivadvyāsa rātrau jāgaraṇaṃ caret
||4||वांछितार्थशतं प्राप्य विष्णुलोके महीयते ॥
भाद्रपदे सिते पक्षे एकादश्यां समाहितः ॥
उपोष्य विधिवद्व्यास रात्रौ जागरणं चरेत्
viṣṇośca pūjanaṃ kāryaṃ jalayātrā tathaiva ca ||
puruṣottamasare nityaṃ tasya puṇyaphalaṃ śṛṇu
||5||विष्णोश्च पूजनं कार्यं जलयात्रा तथैव च ॥
पुरुषोत्तमसरे नित्यं तस्य पुण्यफलं शृणु
putradāradhanaṃ samyagāyurārogyasaṃpadaḥ ||
na teṣāṃ durlabhaṃ kiṃcittriṣu lokeṣu vidyate
||6||पुत्रदारधनं सम्यगायुरारोग्यसंपदः ॥
न तेषां दुर्लभं किंचित्त्रिषु लोकेषु विद्यते
tasya pūrvatare bhāge jaṭeśvaramaheśvaraḥ ||
tiṣṭhati tāpasastīre yatra rājā bhagīrathaḥ
||7||तस्य पूर्वतरे भागे जटेश्वरमहेश्वरः ॥
तिष्ठति तापसस्तीरे यत्र राजा भगीरथः
tapastaptvā paraṃ lebhe puṇyaṃ puṇyavatāṃ varaḥ ||
gaṃgāṃ bhūtalamānīya sarvalokasukhāya vai
||8||तपस्तप्त्वा परं लेभे पुण्यं पुण्यवतां वरः ॥
गंगां भूतलमानीय सर्वलोकसुखाय वै
tasya tīrthe naraḥ snātvā tiladhenuṃ pradāpayet ||
sarvayajñaphalaṃ prāpya putravāñjā yate naraḥ
||9||तस्य तीर्थे नरः स्नात्वा तिलधेनुं प्रदापयेत् ॥
सर्वयज्ञफलं प्राप्य पुत्रवाञ्जा यते नरः
tasyeśānatare bhāge rāmo bhārgavasattamaḥ ||
tapastepe sudharmātmā ātmakāyaviśuddhaye
||10||तस्येशानतरे भागे रामो भार्गवसत्तमः ॥
तपस्तेपे सुधर्मात्मा आत्मकायविशुद्धये
kauśikī ca saricchreṣṭhā sarvatīrthavarapradā ||
tatra snātvā naro jātihatyādoṣavivarjitaḥ
||11||कौशिकी च सरिच्छ्रेष्ठा सर्वतीर्थवरप्रदा ॥
तत्र स्नात्वा नरो जातिहत्यादोषविवर्जितः
rāmeśvaraṃ samālokya dhūtapāpo bhavennaraḥ
||12||रामेश्वरं समालोक्य धूतपापो भवेन्नरः
iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe'vantīkṣetramāhātmye puruṣottameśvaramāhātmye'dhimāsasnānadānādimāhātmyavarṇanaṃnāmaikaṣaṣṭitamo'dhyāyaḥ || 61 ||