Traditionally attributed to Vālmīki; dialogue of Vasiṣṭha and Rāma
śrīvasiṣṭha uvāca .
siddhānto'dhyātmaśāstrāṇāṃ sarvāpahnava eva hi .
nāvidyāstīha no māyā śāntaṃ brahmedamakramam
||1||śānta eva cidābhāse svacche samasamātmani .
samagraśaktikhacite brahmeti kalitābhidhe
||2||nirṇīya kecicchūnyatvaṃ kecidvijñānamātratām .
kecidīśvararūpatvaṃ vivadante parasparam
||3||sarvameva parityajya mahāmaunī bhavānagha .
nirvāṇavānnirmananaḥ kṣīṇacittaḥ praśāntadhīḥ
||4||ātmanyevāssva śāntātmā mūkāndhabadhiropamaḥ .
nityamantarmukho bhūtvā svātmanāntaḥ prapūrṇadhīḥ
||5||jāgratyeva suṣuptasthaḥ kuru karmāṇi rāghava .
antaḥ sarvaparityāgī bahiḥ kuru yathāgatam
||6||cittasattā paraṃ duḥkhaṃ cittāsattā paraṃ sukham .
ataścittaṃ cidekātmā naya kṣayamavedanāt
||7||dṛṣṭā ramyamaramyaṃ vā stheyaṃ pāṣāṇavatsamam .
etāvatātmayatnena jitā bhavati saṃsṛtiḥ
||8||saṃvedanīyaṃ na sukhaṃ nāsukhaṃ na ca madhyamam .
etāvatātmayatnena duḥkhānto'nanta āpyate
||9||āpīnamaṇḍalaśaśāṅkavadantareva
śrīmadrasāyanamayaḥ sukhameti tajjñaḥ .
vijñātasarvabhuvanatrayavastusāraḥ
kurvanna nāma kurute paramabhyupetaḥ
||10||ityārṣe śrīvāsiṣṭhamahārāmāyaṇe vālmīkīye de0 mo0 nirvāṇaprakaraṇe pū0 turye sthairyopāyakathanaṃnāma pañcaviṃśatyuttaraśatatamaḥ sargaḥ ..125..