Traditionally attributed to Vālmīki; dialogue of Vasiṣṭha and Rāma
śrīvasiṣṭhauvāca .
atha varṣasahasreṇa tāṃ pitāmaha āyayau .
dāruṇaṃ hi tapaḥ siddhyai viṣāgnirapi śītalaḥ
||1||manasaiva praṇamyainaṃ sā tathaiva sthitā satī .
ko varaḥ kṣucchamāyālamiti cintānvitābhavat
||2||ā smṛtaṃ prārthayiṣye'haṃ varamekamimaṃ vibhum .
anāyasī cāyasī ca syāmahaṃ jīvasūcikā
||3||asyoktyā dvividhā sūcirbhūtvālakṣyā viśāmyaham.
prāṇināṃ saha sarveṣāṃ hṛdayaṃ surabhiryathā
||4||yathābhimatametena graseyaṃ sakalaṃ jagat .
krameṇa kṣudvināśāya kṣudvināśaḥ paraṃ sukham
||5||iti saṃcintayantīṃ tāmuvāca kamalālayaḥ .
anyādṛśyāstathā dṛṣṭvā stanitābhrāravopamam
||6||brahmovāca .
putri karkaṭike rakṣaḥkulaśailābhramālike .
uttiṣṭha tvaṃ tu tuṣṭo'smi gṛhāṇābhimataṃ varam
||7||karkaṭyuvāca .
bhagavanbhūtabhavyeśa syāmahaṃ jīvasūcikā .
anāyasī cāyasī ca vidhe'rpayasi cedvaram
||8||śrīvasiṣṭha uvāca .
evamastviti tāmuktvā punarāha pitāmahaḥ .
sūcikā sopasargā tvaṃ bhaviṣyasi viṣūcikā
||9||sūkṣmayā māyayā sarvalokahiṃsāṃ kariṣyasi .
durbhojanā durārambhā mūrkhā duḥsthitayaśca ye
||10||durdeśavāsino duṣṭāsteṣāṃ hiṃsāṃ kariṣyasi .
praviśyā''hṛdayaṃ prāṇaiḥ padmaplīhādibādhanāt
||11||vātalekhātmikā vyādhirbhaviṣyasi viṣūcikā .
saguṇaṃ viguṇaṃ caiva janamāsādayiṣyasi
||12||guṇānvitacikitsārthaṃ mantro'yaṃ tu mayocyate .
brahmovāca .
himādreruttare pārśve karkaṭī nāma rākṣasī
||13||viṣūcikābhidhānā sā nāmnāpyanyāyabādhikā .
tasyā mantraḥ .
'oṃhrīṃhrāṃrīṃrāṃ viṣṇuśaktaye namaḥ .
oṃnamo bhagavati viṣṇuśaktimenāṃ oṃharahara nayanaya pacapaca
mathamatha utsādaya dūrekuru svāhā himavantaṃ gaccha jīva saḥ saḥ saḥ candramaṇḍalagato'si svāhā .'
iti mantrī mahāmantraṃ nyasya vāmakarodare .
mārjayedāturākāraṃ tena hastena saṃyutaḥ
||14||himaśailābhimukhyena vidrutāṃ tāṃ vicintayet .
karkaṭīkarkaśākrandāṃ mantramudgaramarditām
||15||āturaṃ cintayeccandre rasāyanahṛdi sthitam .
ajarāmaraṇaṃ yuktaṃ muktaṃ sarvādhivibhramaiḥ
||16||sādhako hi śucirbhūtvā svācāntaḥ susamāhitaḥ .
krameṇānena sakalāṃ procchinatti viṣūcikām
||17||iti gaganagatastrilokanātho
gaganagasiddhagrahītasiddhamantraḥ .
gata upagataśakravandyamāno
nijapuramakṣayamāyamujjvalaśrīḥ
||18||ityārṣe śrīvāsiṣṭhamahārāmāyaṇe vālmīkīye utpatti0 sūcyupākhyāne viṣūcikāmantrakathanaṃ nāmaikonasaptatitamaḥ sargaḥ .. 69 ..