Traditionally attributed to Vālmīki; dialogue of Vasiṣṭha and Rāma
śrīvasiṣṭha uvāca .
sarvadā sarvasaṃsthena sarveṇa saha tiṣṭhatā .
sarvakarmaratenāpi manaḥ kāryaṃ vijānatā
||1||na saktamiha ceṣṭāsu na cintāsu na vastuṣu .
nākāśe nāpyadho nāgre na dikṣu na latāsu ca
||2||na bahirvipulābhoge na caivendriyavṛttiṣu .
nābhyantare na ca prāṇe na mūrdhani na tāluni
||3||na bhrūmadhye na nāsānte na mukhe na ca tārake .
nāndhakāre na cābhāse na cāsminhṛdayāmbare
||4||na jāgrati na ca svapne na suṣupte na nirmale .
nāsite na ca vā pītaraktādau śabale na ca
||5||na cale na sthire nādau na madhye netaratra ca .
na dūre nāntike nāgre na padārthe na cātmani
||6||na śabdasparśarūpeṣu na mohānandavṛttiṣu .
na gamāgamaceṣṭāsu na kālakalanāsu ca
||7||kevalaṃ citi viśramya kiṃciccetyāvalambini .
sarvatra nīrasamiva tiṣṭhatvātmarasaṃ manaḥ
||8||tatrastho vigatāsaṅgo jīvo'jīvatvamāgataḥ .
vyavahāramimaṃ sarvaṃ mā karotu karotu vā
||9||akurvannapi kurvāṇo jīvaḥ svātmaratiḥ kriyāḥ .
kriyāphalairna saṃbandhamāyāti khamivāmbudaiḥ
||10||athavā tamapi tyaktvā cetyāṃśaṃ śāntaciddhanaḥ .
jīvastiṣṭhatu saṃśānto jvalanmaṇirivātmani
||11||nirvāṇamātmani gataḥ satatoditātmā
jīvo'rucirvyavaharannapi rāmabhadra .
no saṅgameti gatasaṅgatayā phalena
karmodbhavena sahatīva ca dehabhāram
||12||ityārṣe śrīvāsiṣṭhamahārāmāyaṇe vālmīkīye de0 mokṣopāyeṣūpaśamaprakaraṇe śāntisamāyātayogopadeśo nāmaikonasaptatitamaḥ sargaḥ69