Traditionally attributed to Vālmīki; dialogue of Vasiṣṭha and Rāma
śrīvasiṣṭha uvāca .
atha te dānavāstatra baleranucarāstadā .
tadgehaṃ sphāṭikaṃ saudhamuccairāruruhuḥ kṣaṇāt
||1||ḍimbhādyā mantriṇo dhīrāḥ sāmantāḥ kumudādayaḥ .
surādyāścaiva rājāno vṛttādyā balahāriṇaḥ
||2||hayagrīvādayaḥ sainyāścākrājādyāśca bāndhavāḥ .
laḍukādyāśca suhṛdo valūkādyāśca lālakāḥ
||3||kuberayamaśakrādyā upāyanakarāḥ surāḥ .
yakṣavidyādharā nāgāḥ sevāvasarakāṅkṣiṇaḥ
||4||rambhātilottamādyāśca cāmariṇyo varāṅganāḥ .
sāgarāḥ saritaḥ śailā diśaśca vidiśastathā
||5||sevārthamāyayustasya taṃ pradeśaṃ tadā baleḥ .
anye ca bahavaḥ siddhāstrelokyodaravāsinaḥ
||6||dhyānamaunasamādhisthaṃ citrārpitamivācalam .
namatkirīṭāvalayo dadṛśurbalimādṛtāḥ
||7||taṃ dṛṣṭvā kṛtakartavyapraṇāmāste mahāsurāḥ .
viṣādavismayānandabhayamantharatāṃ yayuḥ
||8||mantriṇaḥ pravicāryātra kiṃ prāptamiti dānavāḥ .
bhārgavaṃ cintayāmāsurguruṃ sarvavidāṃvaram
||9||cintanānantaraṃ daityā bhārgavaṃ bhāsvaraṃ vapuḥ .
dadṛśuḥ kalpitaṃ prāptaṃ gandharvanagaraṃ yathā
||10||pūjyamāno'suragaṇairniviṣṭo guruviṣṭare .
dadarśa dhyānamaunasthaṃ bhārgavo dānaveśvaram
||11||viśramya sa kṣaṇamiva premavānavalokya ca .
baliṃ vicārayandṛṣṭvā parikṣīṇabhavabhramam
||12||deharaśmiśatairdattadīptibhiḥ kṣīrasāgaram .
kṣipanniva sabhāmāha hasanvākyamidaṃ guruḥ
||13||atimātramidaṃ daityāḥ svavicāraṇayaiva yat .
saṃprāptavimalāvāsaḥ siddho'yaṃ bhagavānbaliḥ
||14||ayaṃ tadevameveha tiṣṭhandānavasattamāḥ .
svātmani sthitimāpnotu padaṃ paśyatvanāmayam
||15||śrānto viśrāmamāyātaḥ kṣīṇacittabhavabhramaḥ .
śāntasaṃsāranīhāro vācanīyo na dānavāḥ
||16||sva evāloka etena saṃprāpto'jñānasaṃkaṭe .
śānte'tra saṃbhrame sauro dineneva karotkaraḥ
||17||svayameva hi kālena prabodhamayameṣyati .
bījakośātsvasaṃvittyā suptamūrtirivāṃkuraḥ
||18||kurudhvaṃ svāmikāryāṇi sarve dānavanāyakāḥ .
balirvarṣasahasreṇa samādherbodhameṣyati
||19||ityuktā guruṇā tatra harṣāmarṣaviṣādajām .
daityāścintāṃ jahuḥ śuṣkāṃ mañjarīmiva pādapāḥ
||20||vairocanisabhāsaṃsthāṃ vidhāya prāgvyavasthayā .
svavyāpāraparāstasthuḥ sarvaṃ evāsurāstataḥ
||21||narā mahī mahipatayo rasātalaṃ
grahā nabhastridaśagaṇāstriviṣṭapam .
diśo'drayo dikpatayaśca kaṃdarā-
nvanecarā gaganacarāśca khaṃ yayuḥ
||22||ityārṣe śrīvāsiṣṭhamahārāmāyaṇe vālmīkīye de0 mokṣopāyeṣūpaśamaprakaraṇe balisamādhānavarṇanaṃ nāmāṣṭāviṃśaḥ sargaḥ .. 28 ..