Traditionally attributed to Vālmīki; dialogue of Vasiṣṭha and Rāma
śrībhagavānuvāca .
idaṃ viddhi mahāścaryamarjuneha hi yatkila .
pūrvaṃ saṃjāyate citraṃ paścādbhittirudeti hi
||1||abhittāvutthite citre dṛśyate bhittirātatā .
aho vicitrā māyeyaṃ magnaṃ tumbaṃ śilā plutā
||2||cittasthacitrasadṛśe vyomātmani jagattraye .
vyomātmanaste kimiyamahantāvyomatoditā
||3||sarvaṃ vyomakṛtaṃ vyomnā vyomni vyoma vilīyate .
bhujyate vyomani vyoma vyoma vyomani cātatam
||4||veṣṭitaṃ vāsanārajjvā dīrghasaṃsṛti dāmavat .
vāsanodveṣṭanenaiva tadihodveṣṭyate'rjuna
||5||pratibimbaṃ yathādarśe tathedaṃ brahmaṇi svayam .
agamyaṃ chedabhedāderādhārānanyatāvaśāt
||6||ananyacchedabhedādi brahmaṇi brahmaṇāmbaram .
kiṃ kathaṃ kasya kenaiva cchidyate vā kva bhidyate
||7||teneha vāsanābhāvo bodhātsaṃpanna eva te .
yo na nirvāsano nūnaṃ sarvadharmaparo'pi san
||8||sarvajño'pyatibaddhātmā pañjarastho yathā hariḥ .
yasyāsti vāsanābījamatyalpaṃ citibhūmigam
||9||bṛhatsaṃjāyate tasya punaḥ saṃsṛtikānanam .
abhyāsāddhṛdi rūḍhena satyasaṃbodhavahninā .
nirdagdhaṃ vāsanābījaṃ na bhūyaḥ parirohati
||10||dagdhaṃ tu vāsanābījaṃ na nimajjati vastuṣu .
sukhaduḥkhādiṣu svacchaṃ padmapatramivāmbhasi
||11||śāntātmā vigatabhayojjhitāmitāśo
nirvāṇo galitamahāmanovimohaḥ .
samyaktvaṃ śrutamavagamya pāvanaṃ ta-
ttiṣṭhātmanyapahatirekaśāntirūpaḥ
||12||ityārṣe śrīvāsiṣṭhamahārāmāyaṇe vā0 de0 mo0 nirvāṇaprakaraṇe pū0 arjunopākhyāne arjunaviśrāntivarṇanaṃ nāma saptapañcāśaḥ sargaḥ ..57..