Traditionally attributed to Vālmīki; dialogue of Vasiṣṭha and Rāma
śrīvasiṣṭha uvāca .
ityuktavati vetāle vaktuṃ praśnānvihasya saḥ .
uvāca vacanaṃ rājā dantāṃśudhavalāmbaraḥ
||1||rājovāca .
āste kadāciccedaṃ hi brahmāṇḍamajaraṃ phalam .
uttarottaraṃ daśaguṇabhūtatvakpariveṣṭitam
||2||tādṛśānāṃ sahasrāṇi phalāni yatra santi hi .
atyuccaistādṛśī śākhā vipulā calapallavā
||3||tādṛśānāṃ sahasrāṇi śākhānāṃ yatra santyatha .
tādṛśo'sti mahāvṛkṣo durlakṣyo vipulākṛtiḥ
||4||tādṛśānāṃ sahasrāṇi yatra santi mahīruhām .
tādṛśaṃ vanamatyuccairanantatarugulmakam
||5||tādṛśānāṃ sahasrāṇi vanānāṃ yatra santyatha .
tādṛgasti vṛhacchṛṅgamatyuccairbharitākṛti
||6||tādṛśānāṃ sahasrāṇi śrṛṅgāṇāṃ yatra santyatha .
tādṛśo'styativistīrṇo deśo vipulakoṭaraḥ
||7||tādṛśānāṃ sahasrāṇi deśānāṃ yatra santyatha .
tādṛgasti vṛhaddvīpaṃ mahāhradanadīyutam
||8||tādṛśānāṃ sahasrāṇi dvīpānāṃ yatra santyatha .
tādṛgasti mahīpīṭhaṃ vicitraracanānvitam
||9||tādṛśānāṃ sahasrāṇi pṛthvīnāṃ yatra santyatha .
tādṛgasti mahāsphāraṃ mahābhuvanaḍambaram
||10||tādṛśānāṃ sahastrāṇi jagatāṃ yatra santyatha .
tādṛgasti mahaccāṇḍaṃ caṇḍamambarapīṭhavat
||11||tādṛśānāṃ sahasrāṇi yatrāṇḍāni karaṇḍakāḥ .
tādṛśo'sti gataspando vipulābdhiśca sāgaraḥ
||12||tādṛksāgaralakṣāṇi taraṅgo yatra pelavaḥ .
tādṛśaḥ svavilāsātmā nirmalo'sti mahārṇavaḥ
||13||tādṛgabdhisahasrāṇi yasyodarajalānyatha .
tādṛśo'sti pumānkaścidatyuccairbharitākṛtiḥ
||14||tādṛśānāṃ nṛṇāṃ lakṣairyasya mālorasi sthitā .
pradhānaṃ sarvasattānāṃ tādṛśo'sti paraḥ pumān
||15||tādṛśānāṃ sahasrāṇi puruṣāṇāṃ mahātmanām .
sphuranti maṇḍale yasya svatanūruhajālavat
||16||tādṛśo'sti mahādityaḥ śatamanyāsu dṛṣṭiṣu .
yā etāḥ kalanāḥ sarvāstā etāstasya dīptayaḥ
||17||asyādityasya dīptīnāṃ brahmāṇḍāstrasareṇavaḥ .
mayā citsūrya ityuktaḥ sarvametattapatyasau
||18||vijñānātmaiva paramo bhāskaro bhāvitāśayaḥ .
ime ye bhuvanābhogāstasyaiva trasareṇavaḥ
||19||vijñānaparamārkasya bhāsā bhānti bhavanti ca .
imā jagadaharlakṣmyaḥ kvacillakṣmyo raveriva
||20||vijñānamātrakacitātmani jantujāte
trailokyamaṇḍapamaṇeravikāsabhāji .
cijjanmanorbhavanasaṃbhramatāvalekhāḥ
santīha re na hi manāgapi śāntamāssva
||21||ityārṣe śrīvāsiṣṭhamahārāmāyaṇe vālmīkīye deva0 mokṣopāyeṣu nirvāṇaprakaraṇe pū0 vetālaprathamapraśnottaravarṇanaṃ nāmaikasaptatitamaḥ sargaḥ ..71..