Traditionally attributed to Vālmīki; dialogue of Vasiṣṭha and Rāma
śrīvasiṣṭha uvāca . .
prahrāda iti saṃcintya kṛtvā nārāyaṇīṃ tanum .
punaḥ saṃcintayāmāsa pūjārthamasuradviṣaḥ
||1||vapuṣo vaiṣṇavādasmānmā bhūnmūrtiḥ parāvarā .
ayaṃ prāṇapravāheṇa bahirviṣṇuḥ sthito'paraḥ
||2||vainateyasamārūḍhaḥ sphuracchakticatuṣṭayaḥ .
śaṅkhacakragadāpāṇiḥ śyāmalāṅgaścaturbhujaḥ
||3||candrārkanayanaḥ śrīmānkāntanandakanandanaḥ .
padmapāṇirviśālākṣaḥ śārṅgadhanvā mahādyutiḥ
||4||tadenaṃ pūjayāmyāśu parivārasamanvitam .
saparyayā manomayyā sarvasaṃbhāraramyayā
||5||tata enaṃ mahādevaṃ pūjayiṣyāmyahaṃ punaḥ .
pūjayā bāhyasaṃbhogamahatyā bahuratnayā
||6||prahrāda iti saṃcintya saṃbhārabharabhāriṇā .
manasā pūjayāmāsa mādhavaṃ kamalādhavam
||7||ratnaughapātrapaṭalaiścandanādivilepanaiḥ .
dhūpairdīpairvicitraiśca nānāvibhavabhūṣaṇaiḥ
||8||mandāramālāvalanairhemābjapaṭalotkaraiḥ .
kalpavṛkṣalatāgucchai ratnastabakamaṇḍalaiḥ
||9||pallavairdivyavṛkṣāṇāṃ nānākusumadāmabhiḥ .
kiṃkirātairbakaiḥ kundaiścampakairasitotpalaiḥ
||10||kahlāraiḥ kumudaiḥ kāśaiḥ kharjūraiścūtakiṃśukaiḥ .
aśokairmadanairbilvaiḥ karṇikāraiḥ kirātakaiḥ
||11||kadambairbakulairnimbaiḥ sinduvāraiḥ sayūthakaiḥ .
pāribhadraiguggulībhirbindukaiḥ puṣpakotkaraiḥ
||12||priyaṅgupaṭalaiḥ pāṭaiḥ pāṭalairdhātupāṭalaiḥ .
āmrairāmrātakairgavyairharītakabibhītakaiḥ
||13||śālatālatamālānāṃ latākusumapallavaiḥ .
komalaiḥ kalikājālaiḥ sahakāraiḥ sakuṅkumaiḥ
||14||ketakaiḥ śatapatraiśca tathailāmañjarīgaṇaiḥ .
sarvasaundaryasaṃmānaiḥ svayamātmārpaṇairapi
||15||hariṃ paramayā bhaktyā jagadvibhavabhavyayā .
manasā pūjayāmāsa prahrādo'ntaḥpure patim
||16||atha devagṛhe tasminbāhyārthaiḥ paripūrṇayā .
pūjayā pūjayāmāsa dānaveśo janārdanam
||17||bahirdravyairanenaiva krameṇa parameśvaram .
punaḥpunaḥ pūjayitvā tuṣṭimāndānavo'bhavat
||18||tatastataḥ prabhṛtyeva prahrādaḥ parameśvaram .
tathaiva pratyahaṃ bhaktyā pūjayāmāsa pūrṇayā
||19||atha tasminpure daityāstataḥ prabhṛti vaiṣṇavāḥ .
sarva evābhavanbhavyā rājā hyācārakāraṇam
||20||jagāma vārtā gaganaṃ devalokamathārihan .
viṣṇordveṣaṃ parityajya bhaktā daityāḥ sthitā iti
||21||devā vismayamājagmuḥ śakrādyāḥ samarudgaṇāḥ .
gṛhītā vaiṣṇavī bhaktirdaityaiḥ kimiti rāghava
||22||kṣīrode bhogibhogasthaṃ vibudhā vismayākulāḥ .
jagmuramvaramutsṛjya harimāhavaśālinam
||23||tatrainaṃ daityavṛttāntaṃ kathayāmāsurasya te .
papracchuścainamāsīnamapūrvāścaryavismayam
||24||vibudhā ūcuḥ .
kimetadbhagavandaityā viruddhā ye sadaiva te .
te hi tanmayatāṃ yātā māyeyamiti bhāvyate
||25||kva kilātyantadurvṛttā dānavā dalitādrayaḥ .
kva pāścātyamahājanmalabhyā bhaktirjanārdane
||26||prākṛto guṇavāñjāta ityeṣā bhagavankathā .
akālapuṣpamāleva sukhāyodvejanāya ca
||27||nopapannaṃ hi yadyatra tatra tanna virājate .
madhye kācakalāpasya mahāmūlyo maṇiryathā
||28||yo yo yādṛgguṇo jantuḥ sa tāmevaiti saṃsthitim .
sadṛśeṣvapyajeṣu śvā na madhye ramate kvacit
||29||na tathā duḥkhayantyaṅge majjantyo vajrasūcayaḥ .
vaisādṛśyena saṃbaddhā yathaitā vastudṛṣṭayaḥ
||30||yadyatra kramasaṃprāptamupapannamaninditam .
tadeva rājate tatra jale'mbhojaṃ natu sthale
||31||kvādhamaḥ prākṛtārambho hīnakarmaratiḥ sadā .
varāko dānavo hīnajātirbhaktiḥ kva vaiṣṇavī
||32||kamalinī paruṣoṣarabhūgatā sukhayatīha yathā na durāśrayā .
ditisuto'pi hi mādhavabhaktimāniti kathā na tatheśa sukhāya naḥ
||33||ityārṣe śrīvāsiṣṭhamahārāmāyaṇe vālmīkīye de0 mokṣopāyeṣūpaśamaprakaraṇe vibudhavākyaṃ nāma dvātriṃśaḥ sargaḥ .. 32 ..