Traditionally attributed to Vālmīki; dialogue of Vasiṣṭha and Rāma
śrīvasiṣṭha uvāca .
kirātamaṇḍale tasminye bhavanti mahībhṛtaḥ .
taistaiḥ saha parā maitrī tasyāḥ samabhijāyate
||1||sarvāṃstatra mahotpātānpiśācādibhayānyapi .
rogāṃśca yogasaṃsiddhā nivārayati rākṣasī
||2||bahuvarṣagaṇenaiṣā dhyānādviratimāgatā .
tatrāgatya samastāṃstānvadhyāñjantūnsusaṃcitān
||3||adyāpi tatra ye vadhyāste tadarthaṃ mahībhujā .
nīyante mitrasanmāne ke hi nādhyavasāyinaḥ
||4||tasyāṃ dhyānaniṣaṇṇāyāṃ kirātajanamaṇḍale .
anāyāntyāṃ ciraṃ kālaṃ janairdoṣapraśāntaye
||5||sā devī kandarānāmnī maṅgaletaranāmikā .
saṃpratiṣṭhāpitā mūrtyā pure gaganakoṭare
||6||tataḥprabhṛti tatratyo yo yo bhavati bhūmipaḥ .
sa kandarāṃ bhagavatīṃ pratiṣṭhāpayati svayam
||7||yaḥ kandarāpratiṣṭhāṃ ca na karoti nṛpādhamaḥ .
tasyopatāpanicayāḥ prajā nighnanti yatnataḥ
||8||tatpūjanādavāpnoti janastannikhilaṃ phalam .
svavāsanāvaśocchūnamanarthaṃ yātyapūjanāt
||9||vadhyalokopahāreṇa sā devī paripūjyate .
pratimā sā sthitādyāpi citrasthā phaladāyinī
||10||sakalakomalamaṅgalakāriṇī kavalitākhilavadhyamahājanā .
jayati sātra kirātajanāspade paramabodhavatī ciradevatā
||11||ityārṣe śrīvāsiṣṭhamahārāmāyaṇe vālmīkīye utpattiprakaraṇe karka0 kandarāpūjanaṃ nāma tryaśītitamaḥ sargaḥ .. 83 ..