Traditionally attributed to Vālmīki; dialogue of Vasiṣṭha and Rāma
anyamuniruvāca .
tatra te nagaraṃ tāni gṛhāṇi taravaśca te .
kṣipreṇa śuṣkatṛṇavatsarvaṃ bhasmatvamāgatam
||1||tatraivaṃ bhasmatāṃ prāpte supte te bhavatastava .
tanū tathātisaṃtāpavidāritamahāśile
||2||sa śaśāma śanairvahnirniḥśeṣīkṛtakānanaḥ .
paripītārṇavo'gastya ivāstaṃ samupāyayau
||3||tasminnastaṃ gatevahnau tadbhasmeddhaṃ suśītalam .
dudhāva kaṇaśo vāyuraśeṣaṃ puṣparāśivat
||4||tato na jñāyate nāsītkvāśramaḥ kva tanū tathā .
kva peṭakaṃ bahūnāṃ tatsvapnapūrjāgrato yathā
||5||abhāvamupayāte te yadaivaṃ bhavatastanū .
svapataste bhramavataḥ saṃvideva vijṛmbhate
||6||tasmātka tadgalabilaṃ virāḍātmā sa ca kva te .
dagdho dagdhasya saujaskaḥ saujaskasyaiva dehakaḥ
||7||labdhavānasi no tasmāddhetordehadvayaṃ mune .
anante svapnasaṃsārajāgratīhāvatiṣṭhase
||8||tadevaṃ svapna evāyaṃ jāgradbhāvamupāgataḥ .
sarve vayamiha svapnapuruṣāstava suvrata
||9||asmākaṃ tvaṃ svapnanarastava svapnanarā vayam .
ayameva cidākāśaḥ sarvadātmātmani sthitaḥ
||10||tataḥ prabhṛti saṃpanno bhavānsvapnanaro bhavan .
jāgratpratyayavāñjāgrannaro gārhasthyasusthitaḥ
||11||etatte kathitaṃ sarvaṃ yathāvṛttamaśeṣataḥ .
anubhūtaṃ sudṛśyaṃ ca dhyānenaitacca paśyasi
||12||ityādimadhyarahito'yamanantarūpaḥ
saṃviddhanaḥ kacati kāñcanatāpavatkhe .
tatphālalolavapurātmani cinmayātmā
sargātmabhirvikasitairasitaiḥ sitaiśca
||13||ityārṣe śrīvāsiṣṭha0 vālmī0 de0 mo0 ni0 u0 avi0 vi0 śa0 abhāvadarśanaṃ nāmaikapañcāśadadhikaśatatamaḥ sargaḥ .. 151 ..