Traditionally attributed to Vālmīki; dialogue of Vasiṣṭha and Rāma
śrīvasiṣṭha uvāca .
astyastamitasarvāpadudyatsaṃpadudāradhīḥ .
videhānāṃ mahīpālo janako nāma vīryavān
||1||kalpavṛkṣo'rthisārthānāṃ mitrālānāṃ divākaraḥ .
mādhavo bandhupuṣpāṇāṃ strīṇāṃ makaraketanaḥ
||2||dvijakairavaśītāṃśurdvipattimirabhāskaraḥ .
saujanyaratnajaladhirbhuvaṃ viṣṇurivāsthitaḥ
||3||praphullavālalatike mañjarīpuñjapiñjare .
sa kadācinmadhau matte kokilālāpalāsini
||4||yayau kusumitābhogaṃsuvilāsalatāṅganam .
līlayopavanaṃ kāntaṃ nandanaṃ vāsavo yathā
||5||tasminvaravane hṛdye kesaroddāmamārute .
dūrasthānucaraḥ sānukuñjeṣu vicacāra ha
||6||atha śuśrāva kasmiṃścittamālavanagulmake .
siddhānāmapradṛśyānāṃ svaprasaṅgādudāhṛtāḥ
||7||viviktavāsināṃ nityaṃ śailakandaracāriṇām .
imāḥ kamalapatrākṣa gītā gītātmabhāvanāḥ
||8||siddhā ūcuḥ ..
draṣṭṛdṛśyasamāyogātpratyayānandaniścayaḥ .
yastaṃ svamātmatattvotthaṃ niḥspandaṃ samupāsmahe
||9||anye ūcuḥ .
draṣṭṛdarśanadṛśyāni tyaktvā vāsanayā saha .
darśanaprathamābhāsamātmānaṃ samupāsmahe
||10||anye ūcuḥ .
dvayormadhyagataṃ nityamastināstīti pakṣayoḥ .
prakāśanaṃ prakāśyānāmātmānaṃ samupāsmahe
||11||anye ūcuḥ .
yasminsarvaṃ yasya sarvaṃ yataḥ sarvaṃ yasmāyidam .
yena sarvaṃ yaddhi sarvaṃ tatsatyaṃ samupāsmahe
||12||anye ūcuḥ .
aśiraskaṃ hakārāntamaśeṣākārasaṃsthitam .
ajasramuccarantaṃ svaṃ tamātmānamupāsmahe
||13||anye ūcuḥ .
saṃtyajya hṛdguheśānaṃ devamanyaṃ prayānti ye .
te ratnamabhivāñchanti tyaktahastasthakaustubhāḥ
||14||anye ūcuḥ .
sarvāśāḥ kila saṃtyajya phalametadavāpyate .
yenāśāviṣavallīnāṃ mūlamālā vilūyate
||15||anye ūcuḥ .
buddhvāpyatyantavairasyaṃ yaḥ padārtheṣu durmatiḥ .
badhnāti bhāvanāṃ bhūyo naro nāsau sa gardabhaḥ
||16||anye ūcuḥ .
utthitānutthitānetānindriyāhīnpunaḥ punaḥ .
hanyādvivekadaṇḍena vajreṇeva harirgirīn
||17||anye ūcuḥ .
upaśamasukhamāharetpavitraṃ
suśamavataḥ śamameti sādhucetaḥ .
praśamitamanasaḥ svake svarūpe
bhavati sukhe sthitiruttamā cirāya
||18||ityārṣe śrīvāsiṣṭhamahārāmāyaṇe vālmīkīye de0 mokṣopāyeṣūpaśamaprakaraṇe siddhagītānāmāṣṭamaḥ sargaḥ .. 8 ..