Traditionally attributed to Vālmīki; dialogue of Vasiṣṭha and Rāma
śrīvasiṣṭha uvāca .
iti cintayatastasya śukrasya pituragrataḥ .
jagāmātitarāṃ kālo bahusaṃvatsarātmakaḥ
||1||atha kālena mahatā pavanātapajarjaraḥ .
kāyastasya papātorvyāṃ chinnamūla iva drumaḥ
||2||manastu cañcalābhogaṃ tāsu tāsu daśāsu ca .
babhrāmātivicitrāsu vanarājiṣvivaiṇakaḥ
||3||bhrāntamudbhrāntamabhitaścakrārpitamivākulam .
manastasya viśaśrāma samaṅgāsaritastaṭe
||4||anantavṛttāntaghanāṃ pelavāṃ sudṛḍhāmapi .
tāṃ saṃsṛtidaśāṃ śukro videho'nubhavansthitaḥ
||5||mandarācalasānusthā sā tanustasya dhīmataḥ .
tāpaprasarasaṃśuṣkā carmaśeṣā babhūva ha
||6||śarīrarandhrapravahadvātasītkārarūpayā .
ceṣṭā duḥkhakṣayānandātkākalyeva pragāyati
||7||manovarākamavaṭe luṭhitaṃ bhavabhūmiṣu .
hasatīveti śubhrābhrasitayā dantamālayā
||8||darśayantī jagacchūnyaṃ vapurakṣṇorakṛtrimam .
mukhāraṇyajaratkūparūpayā gartaśobhayā
||9||tāpopataptā saṃsiktā varṣājalabhareṇa sā .
prāganusmaraṇollāsamiva vāṣpaṃ vimuñcati
||10||candrānilavilāsena lulitā vanabhūmiṣu .
dhārānikarapātena vinunnā jaladāgame
||11||prāvṛṇnirjhararūpeṇa plutā girinadītaṭe .
pāṃśunā pavanotthena duṣkṛteneva rūṣitā
||12||śuṣkakāṣṭhavadālolā vāteṣu kṛtakhākṛtiḥ .
tāramārutasītkāre vane tapa ivāsthitā
||13||vakrā śuṣkāntratantrī ca bhūtabhāṅkārakāriṇī .
araṇyalakṣbhīrbālyeva śūnyā carmamayodarī
||14||rāgadveṣavihīnatvāttasya puṇyāśramasya tu .
mahātapastvācca bhṛgorna bhuktā mṛgapakṣibhiḥ
||15||yamaniyamakṛśīkṛtāṅgayaṣṭi-
ścarati tapaḥ sma bhṛgūdvahasya cetaḥ .
tanuratha pavanāpanītaraktā
ciramaluṭhanmahatīṣu sā śilāsu
||16||ityārṣe śrīvāsiṣṭhamahārāmāyaṇe vālmīkīye mokṣopāyeṣu sthitiprakaraṇe bhā0 bhārgavakalevaravarṇanaṃ nāma navamaḥ sargaḥ .. 9 ..