Traditionally attributed to Vālmīki; dialogue of Vasiṣṭha and Rāma
śrīvasiṣṭha uvāca .
iti saṃcintayanneva prahlādaḥ paravīrahā .
nirvikalpaparānandasamādhiṃ samupāyayau
||1||nirvikalpasamādhisthaścitrārpita ivācalaḥ .
śailādiva samutkīrṇo babhau svapadamāsthitaḥ
||2||tathānutiṣṭhatastasya kālo bahutaro yayau .
svagṛhe bhuvanasthasya meroriva suradviṣaḥ
||3||bodhito'pyasurādhīśairnābudhyata mahāmatiḥ .
akāle bahuseko'pi bījakośādivāṅkuraḥ
||4||evaṃ varṣasahasrāṇi pīnātmā'tiṣṭhadekadṛk .
śānta evāsurapure mārtaṇḍa iva copale
||5||parānandadaśaikāntapariṇāmitayā tayā .
nirānandaṃ parābhāsamivābhāsapadaṃ gataḥ
||6||etāvatātha kālena tadrasātalamaṇḍalam .
babhūvārājakaṃ tīkṣṇaṃ mātsyanyāyakadarthitam
||7||hiraṇyakaśipau kṣīṇe samādhau tatsute sthite .
na babhūvāparaḥ kaścidrājā danusutālaye
||8||asureśārthināṃ teṣāṃ dānavānāṃ samādhitaḥ .
pareṇāpi prayatnena prahlādo na vyabudhyata
||9||na prāpurvikasadrūpaṃ patiṃ tamamarārayaḥ .
lasatpatralatājālaṃ niśi padmamivālayaḥ
||10||saṃvidvādo na tasyāntarabodhyata vicetasaḥ .
bhuvaśceṣṭākrama iva pauruṣo gatabhāsvataḥ
||11||athodvigneṣu daityeṣu gateṣvabhimatāṃ diśam .
vicaratsu yathākāmamarājani pure purā
||12||cirāya pātālamabhūdabhūpālatayā tayā .
mātsyanyāyaviparyastamastaṃgataguṇakramam
||13||balimuktābalapuraṃ maryādākramavarjitam .
sarvārtāśeṣavanitaṃ parasparahṛtāmbaram
||14||pralāpākrandapuruṣaṃ visaṃsthānapurāntaram .
luṭhadudyānanagaraṃ vyarthānarthakadarthitam
||15||cintāparāsuragaṇaṃ nirannaphalabāndhavam .
akāṇḍotpātavivaśaṃ dhvastāśāmukhamaṇḍalam
||19||surārbhakaparābhūtaṃ bhūtairākrāntamantyajaiḥ .
bhūtariktamalakṣmīkamucchinnaprāyakoṭaram
||17||aniyatavanitārthamantrayuddhaṃ
hṛtadhanadāravirāvitaṃ samantāt .
kaliyugasamayodbhaṭotkaṭābhaṃ
tadasuramaṇḍalamākulaṃ babhūva
||18||ityārṣe śrīvāsiṣṭhamahārāmāyaṇe vālmīkīye de0 mokṣopāyeṣūpaśamaprakaraṇe asuramaṇḍalavyākulībhavanaṃ nāma saptatriṃśaḥ sargaḥ .. 37 ..