Traditionally attributed to Vālmīki; dialogue of Vasiṣṭha and Rāma
śrīvasiṣṭha uvāca .
garjantamatisaṃrabdhaṃ suralokamathārihā .
uvāca mādhavo vākyaṃ śikhivṛndamivāmbudaḥ
||1||śrībhagavānuvāca .
vibudhā mā viṣaṇṇāḥ stha prahlādo bhaktimāniti .
pāścātyaṃ janma tasyedaṃ mokṣārho'sāvariṃdamaḥ
||2||ata uttarametena garbhatā danujanmanā .
na kartavyā pradagdhena bījenevāṅkurakriyā
||3||guṇavānnirguṇo jāta ityanarthakramaṃ viduḥ .
nirguṇo guṇavāñjāta ityāhuḥ siddhidaṃ kramam
||4||ātmīyāni vicitrāṇi bhuvanānyamarottamāḥ .
prayāta nāsukhāyaiṣā prāhlādī guṇiteha vaḥ
||5||śrīvasiṣṭha uvāca .
ityuktvā vibudhāṃstatra kṣīrodārṇavavīciṣu .
antardhānaṃ yayau devastaṭatāpicchagucchavat
||6||so'pi saṃpūjitahariḥ suraugho vrajadambaram .
punarmandaranirdhūtātkaṇajālamivārṇavāt
||7||prahlādaṃ prati gīrvāṇāstataḥ snigdhatvamāyayuḥ .
mahānto yatra nodvignāstatra viśvāsavanmanaḥ
||8||pratyahaṃ pūjayāmāsa devadevaṃ janārdanam .
manasā karmaṇā vācā prahlādo bhaktimāniti
||9||atha pūjāparasyāsya samavardhanta kālataḥ .
vivekānandavairāgyavibhavapramukhā guṇāḥ
||10||nābhyanandadasau bhogapūgaṃ śuṣkamiva drumam .
na cāramata kāntāsu mṛgo lokamahīṣviva
||11||na reme lokacaryāsu śāstrārthakathanādṛte .
na jāyate ratistasya dṛśye sthala ivājinī
||12||na viśaśrāma ceto'sya bhogarogānurañjane .
muktāphalamasaṃśliṣṭaṃ muktāphala ivāmale
||13||tyaktabhogādikalanaṃ viśrāntimanupāgatam .
cetaḥ kevalamasyāsīddolāyāmiva yojitam
||14||prāhlādīṃ tāṃ sthitiṃ viṣṇurdevaḥ kṣīrodamandirāt .
viveda sarvagatayā dhiyā paramakāntayā
||15||atha pātālamārgeṇa viṣṇurāhlāditāgrataḥ .
pūjādevagṛhaṃ tasya prahlādasya samāyayau
||16||vijñāyābhyāgataṃ devaṃ pūjayā dviguṇeddhayā .
daityendraḥ puṇḍarīkākṣamādarātparyapūjayat
||17||pūjāgṛhagataṃ devaṃ pratyakṣāvasthitaṃ harim .
prahlādaḥ paramaprīto girā tuṣṭāva puṣṭayā
||18||prahlāda uvāca .
tribhuvanabhavanābhirāmakośaṃ sakalakalaṅkaharaṃ paraṃ prakāśam .
aśaraṇaśaraṇaṃ śaraṇyamīśaṃ harimajamacyutamīśvaraṃ prapadye
||19||kuvalayadalanīlasaṃnikāśaṃ śaradamalāmbarakoṭaropamānam .
bhramaratimirakajjalāñjanābhaṃ sarasijacakragadādharaṃ prapadye
||20||vimalamalikalāpakomalāṅgaṃ sitadalapaṅkajakuḍmalābhaśaṅkham .
śrutiraṇitavirañcicañcarīkaṃ svahṛdayapadmadalāśrayaṃ prapadye
||21||sitanakhagaṇatārakāvakīrṇaṃ smitadhavalānanapīvarendubimbam .
hṛdayamaṇimarīcijālagaṅgaṃ hariśaradambaramātataṃ prapadye
||22||aviralakṛtasṛṣṭisarvalīnaṃ satatamajātamavardhanaṃ viśālam .
guṇaśatajaraṭhābhijātadehaṃ tarudalaśāyinamarbhakaṃ prapadye
||23||navavikasitapadmareṇugauraṃ sphuṭakamalāvapuṣā vibhūṣitāṅgam .
dinaśamasamayāruṇāṅgarāgaṃ kanakanibhāmbarasundaraṃ prapadye
||24||ditisutanalinītuṣārapātaṃ suranalinīsatatoditārkabimbam .
kamalajanalinījalāvapūraṃ hṛdi nalinīnilayaṃ vibhuṃ prapadye
||25||tribhuvananalinīsitāravindaṃ timirasamānavimohadīpamagryam .
sphuṭataramajaḍaṃ cidātmatattvaṃ jagadakhilārtiharaṃ hariṃ prapadye
||26||śrīvasiṣṭha uvāca .
iti guṇabahulābhirvāgbhirabhyarcito'sau harirasuravināśaḥ śrīniṣaṇṇāṃsadeśaḥ .
jalada iva mayūraṃ prītimānprīyamāṇaṃ kuvalayadalanīlaḥ pratyuvācāsurendram
||27||ityārṣe śrīvāsiṣṭhamahārāmāyaṇe vālmīkīye de0 mokṣopāyeṣūpaśamaprakaraṇe nārāyaṇāgamanaṃ nāma trayastriṃśaḥ sargaḥ .. 33 ..