Traditionally attributed to Vālmīki; dialogue of Vasiṣṭha and Rāma
śrīvasiṣṭha uvāca .
dūrāddūramabhiplutya śanairuccaiḥ padaṃ gate .
hastaṃ haste samālambya yāntyau dadṛśaturnabhaḥ
||1||ekārṇavamivocchūnaṃ gambhīraṃ nirmalāntaram .
komalaṃ komalamarudāsaṅgasukhabhogadam
||2||āhlādakamalaṃ saumyaṃ śūnyatāmbhonimajjanāt .
atyantaśuddhaṃ gambhīraṃ prasannamapi sajjanāt
||3||śṛṅgasthanirmalāmbhodapīnodarasudhālaye .
viśaśramaturāśāsu pūrṇacandrodarāmale
||4||siddhagandharvamandāramālāmodamanohare .
candramaṇḍalaniṣkrānte remāte madhurānile
||5||sasnaturbhūrigharmānte taḍidraktābjasaṃkule .
sarasīva jalāpūramanthare meghamaṇḍale
||6||bhūtalaughamahāśailamṛṇālāṅkurakoṭiṣu. .
dikṣu babhramatuḥ svairaṃ bhramaryau sarasīṣviva
||7||dhārāgṛhadhiyā dhīragaṅgānirjharadhāriṇi .
bhrematurvātavikṣubdhameghamaṇḍalamaṇḍape
||8||tato madhuragāminyau viśrāmyantyau svaśaktitaḥ .
śūnye dadṛśaturvyoma mahārambhātimantharam
||9||adṛṣṭapūrvamanyonyaṃ sarvasaṃkaṭakoṭaram .
apūryamāṇamāśūnyaṃ jagatkoṭiśatairapi
||10||uparyuparyuparyuccairanyairanyairvṛtaṃ pṛthak .
vicitrābharaṇākārairbhūtalaiḥ suvimānakaiḥ
||11||paritaḥ pūritavyomnāṃ mervādikulabhūbhṛtām .
padmarāgataṭoddyotaiḥ kalpajvālopamodaram
||12||muktāśikharabhāpūrairhimavatsānusundaram .
kāñcanādristhalārcirbhiḥ kāñcanasthalabhāsuram
||13||mahāmarakatābhābhiḥ śādvalasthalanīlimam .
draṣṭṛdṛśyakṣayāsaktajātadhvāntotthakālimam
||14||pārijātalatālolavimānagaṇaketanam .
ato mañjarikākāramiva vaidūryabhūtalam
||15||manovegamahāsiddhajitavātagamāgamam .
vimānagṛhadevastrīgeyavādyasaghuṃghumam
||16||trailokyavarabhūtaughasaṃcārāviralāntaram .
anyonyādṛṣṭasaṃcārasurāsurakulākulam
||17||paryantasthitakūṣmāṇḍarakṣaḥpaiśācamaṇḍalam .
vātaskandhamahāvegavahadvaimānikavrajam
||18||vahadvimānasītkāramuṣṭigrāhyaghanadhvani .
graharkṣaghanasaṃcārātpracaladvātayantrakam
||19||nikaṭātapadagdhālpasiddhasiddhojjhitāspadam .
arkāśvamukhavātāstadagdhamugdhavimānakam
||20||lokapālāpsarovṛndasaṃcārācāracañcalama .
devyantaḥpurikādagdhadhūpadhūmāmbudāmbaram
||21||svasvargāhūtadevastrīsvāṅgavibhraṣṭabhūṣaṇam .
sāmānyasiddhasaṅghogratejaḥpuñjatamobalam
||22||valavatsiddhasaṃghaṭṭagamāgamavighaṭṭitaiḥ .
ghanaiḥ sāṃśukapārśvasthahimavanmerumandaram
||23||kākolūkairgṛdhrabhāsai rāśibhūtaiścalairvṛtam .
nṛtyadbhirḍākinīsaṅghaistaraṅgairiva vāridhim
||24||pravṛttairyoginīsaṅghaiḥ śvakākoṣṭrakharānanaiḥ .
nirarthaṃ yojanaśataṃ gatvāgacchadbhirāvṛtam
||25||lokapālapurodhvāntadhūmadhūmre'bhramandire .
siddhagandharvamithunaprārabdhasuratotsavam
||26||svargagītastavonmattamadanākrāntamārgagam .
anāratavahaddhiṣṇyacakralakṣitapakṣakam
||27||vātaskandhanikhātontarvahattripathagājalam .
āścaryālokanavyagrasaṃcarattridaśārbhakam
||28||sadehasaṃcaradvajracakraśūlāsiśaktimat .
kvacinnirbhitti bhavanaṃ gāyannāradatumburu
||29||meghamārgamahāmeghamahārambhākulaṃ kvacit .
citranyastasamākāramūkakalpāntavāridam
||30||utpatatkajjalādrīndrasundarāmbhodharaṃ kvacit .
kvacitkanakaniṣpandakāntatāpāntavāridam
||31||kvaciddigdāhatāpāḍhyamṛṣyamūkāmbudāṃśukam .
kvacinniṣpavanāmbhodhisaṃrambhaṃ śūnyatājalam
||32||kvacidvātanadīprauḍhavimānatṛṇapallavam .
kvaciccaladalivrātapṛṣṭhatvakkāntinirmalam
||33||kvacinmerunadīkalpavātadhūlividhūsaram .
kvacidvimānagīrvāṇaprabhācitrabalāṅgakam
||34||kvacinnirambaronnṛttamātṛmaṇḍalamālitam .
kvacinnityaṃ navakṣībakṣubdhayogīśvarīgaṇam
||35||kvacicchāntasamādhisthaviśrāntamunimālitam .
samaṃ dūrāstasaṃrambhasādhucittamanoharam
||36||gāyatkinnaragandharvasurastrīmaṇḍalaṃ kvacit .
kvacitstabdhapurākīrṇaṃ vahatpuravaraṃ kvacit
||37||kvacidrudrapurāpūrṇaṃ kvacidbrahmamahāpuram .
kvacinmāyākṛtapuraṃ kvacidāgāmipattanam
||38||kvacidbhramaccandrasaraḥ kvacitstabdhamayaṃsaraḥ .
kvacitsaratsiddhagaṇaṃ kvacidindukṛtodayam
||39||kvacitsūryodayamayaṃ kvacidrātritamomayam .
kvacitsaṃdhyāṃśukapilaṃ kvacinnīhāradhūsaram
||40||kvaciddhimābhradhavalaṃ kvacidvarṣatpayodharam .
kvacitsthala ivākāśa eva viśrāntalokapam
||41||ūrdhvādhogamanavyagrasurāsuragaṇaṃ kvacit .
pūrvāparottarāyāmyadiksaṃcārākulaṃ kvacit
||42||api yojanalakṣāṇi kvacidduṣprāpabhūdharam .
avināśitamaḥpūrṇaṃ dṛṣadgarbhopamaṃ kvacit
||43||avināśibṛhattejaḥ kvacidarkānalopamam .
himānījaṭharāśītaṃ kvaciccandrādisadmasu
||44||kvacidvahatpurovṛttakalpavṛkṣalatāvanam .
kvaciddaityahatottuṅgaprapataddevapattanam
||45||vaimānikanipātena vahilekhāṅkitaṃ kvacit .
kvacitketuśatotpātamithaḥsaṃghaṭṭapaṭṭitam ..
kvacicchubhagrahagaṇapragṛhītāgryamaṇḍalam .
kvacidrātritamovyāptaṃ kvaciddivasabhāsvaram
||47||kvacidudgarjadambhodaṃ kvacinmūkāmalāmbudam .
vātāvakīrṇaśuklābhrakhaṇḍapuṣpottaraṃ kvacit
||48||kvacidatyantaniḥśūnyamavadātamanantaram .
ānandamṛduśāntācchaṃ jñasyeva hṛdayaṃ tatam
||4||śukravāhanabhekaughaiḥ kvacidgalakṛtāravam .
śūnyatāvārivalitaṃ kṣetramākāśavāsinām
||50||mayūrahemacūḍādipakṣibhiḥ kvacidāvṛtam .
vidyādharīṇāṃ devīnāṃ vāhanairvihitāspadaiḥ
||51||kvacidabhrāntaronnṛtyadguhamāyūramaṇḍalam .
kvacidagniśukaiḥ śyāmaṃ śādvalānāmiva sthalam
||52||kvacitpreteśamahiṣamahimnā vāmanāmbudam .
kvacidaśvaistṛṇagrāmaśaṅkāgrastāsitāmbudam
||53||kvaciddevapuravyāptaṃ kvaciddaityapurānvitam .
anyonyāprāpyanagaraṃ nagarandhrakarānilam
||84||kvacitkulācalākāranṛtyadbhairavabhāsuram .
kvacitsapakṣaśailendrasamanṛtyadvināyakam
||515||kvaciddhargharavātaughapakṣaproḍḍīnaparvatam .
kvacidgandharvanagarasurastrīvṛndabandhuram
||56||kvacidvahadgiridhvastavṛkṣalakṣocchritāmbudam .
kvacinmāyākṛtākāśanalinījalaśītalam
||57||kvacidindukarākṛṣṭiśītalāhlādamārutam .
kvacittaptānilādagdhadrumaparvatavāridam
||58||kvacidatyantasaṃśāntavātādekāntanirdhvani .
kvacitparvatatulyābhraśikhākūṭaśatodayam
||59||kvacitprāvṛḍbhavonmattaghanābhraravaghargharam .
kvacitsurāsuragaṇapravṛttaraṇadugamam
||60||kvacidvyomābjinīhaṃsīsvanāhūtābjavāhanam .
kvacinmandākinītīranalinīluṇṭhakānilam
||61||svaśarīreṇa gaṅgādisaritāṃ sannidhānataḥ .
proḍḍīnamatsyamakarakulīrāmbujakūrmakam
||62||pātālagārkajanitabhūcchāyākākacopanaiḥ .
kvacitkvacinmaṇḍaleṣu grastacandrārkamaṇḍalam
||63||kvacitsargānilādhūtamāyākusumakānanam .
patatpuṣpahimāsāratrasadvaimānikāṅganam
||64||udumbarodaramaśakakramabhramajjagattrayāntaragatabhūtasaṃcayam .
vilaṅghya tadvaralalane khamuccakairmahītalaṃ punarapi gantumudyate
||65||