Traditionally attributed to Vālmīki; dialogue of Vasiṣṭha and Rāma
śrīvasiṣṭha uvāca .
anahaṃvedanādevaṃ śubhāśubhaphalapradā .
saṃsāraphalinī nūnamicchāntarupaśāmyati
||1||anahaṃvedanābhyāsātsamaloṣṭāśmakāñcanaḥ .
bhūtvā śāntabhavāpīḍo na naraḥ paritāmyati
||2||ahaṃtāpuṭakoḍḍīnaparabodhabaleritaḥ .
ahamityarthapāṣāṇo na jāne kvāśu gacchati
||3||ahaṃtāpuṭakoḍḍīno brahmavīrabaleritaḥ .
ahamityarthapāṣāṇo na jāne kvāśu gacchati
||4||ahaṃtāpuṭakoḍḍīno brahmavīrabaleritaḥ .
śarīrayantrapāṣāṇo na jāne kvāśu gacchati
||5||ahamarthahimaṃ tvantaranahaṃtā cidarciṣā .
uḍḍīyeva vilīnaṃ sanna jāne kvāśu gacchati
||6||ahaṃraso vilīnontaranahaṃtācidarciṣā .
śarīraparṇādudvarṇānna jāne kvāśu gacchati
||7||śarīraparṇānniṣpītastvahaṃbhāvarasāsavaḥ .
anahaṃtārkamārgeṇa paratāmadhigacchati
||8||śayane kardame śaile gṛhe vyomni sthale jale .
sthūlā sūkṣmā nirākārā rūpāntaragatāpi ca
||9||yatra tatra sthitā suptā prabuddhā bhasmatāṃ gatā ..
dhṛtā nītā nimagnā ca dūrasthā nikaṭā satī
||10||śarīravaṭadhānāntaḥsthitāhaṃtvanavāṃkurā .
śāstrājālaṃ tanotyāśu saṃsārākhyamidaṃ kṣaṇāt
||11||ahaṃtvavaṭadhānāntaḥsthitadehabṛhaddrumaḥ .
saṃsāraśākhānivahaṃ yatra tatra tanotyalam
||12||śākhāśateddhadalapuṣpaphaladrumo'sti
bījodare nanu dṛśā paridṛśyate'sau .
deho'styahaṃtvakaṇikāntaraśeṣadṛśya-
saṃvitparīta iti buddhidṛśaiva dṛṣṭam
||13||dehādahaṃtvamanavāptavato vicārai-
ścidvyomamātravapuṣo vapuṣo'tha voccaiḥ .
nāhaṃtvabījajaṭharādasato'bhyudeti
saṃsāravṛkṣa iha bodhamahāgnidagdhāt
||14||ityārṣe śrīvāsiṣṭhamahārāmāyaṇe vālmī0 de0 mokṣo0 nirvāṇaprakaraṇe u0 ahaṃtvāsattāyogopadeśo nāma saptadaśaḥ sargaḥ ..17..