siddhalakṣmīmāhātmyavarṇanam
īśvara uvāca
tato gacchenmahādevi vaiṣṇavīṃ śaktimuttamām ||
someśādīśadigbhāge nātidūre vyavasthitām
||1||ततो गच्छेन्महादेवि वैष्णवीं शक्तिमुत्तमाम् ॥
सोमेशादीशदिग्भागे नातिदूरे व्यवस्थिताम्
siddhalakṣmīti vikhyātā hyatra pīṭhādhidevatā
||2||सिद्धलक्ष्मीति विख्याता ह्यत्र पीठाधिदेवता
brahmāṇḍe prathamaṃ pīṭhaṃ yatprabhāsaṃ vyavasthitam ||
tatra devi mahāpīṭhe yoginyo bhūcarāḥ khagāḥ ||
bhairaveṇa same tāstu krīḍante svecchayā priye
||3||ब्रह्माण्डे प्रथमं पीठं यत्प्रभासं व्यवस्थितम् ॥
तत्र देवि महापीठे योगिन्यो भूचराः खगाः ॥
भैरवेण समे तास्तु क्रीडन्ते स्वेच्छया प्रिये
jālaṃdharaṃ mahāpīṭhaṃ kāmarūpaṃ tathaiva ca ||
śrīmadrudranṛsiṃhaṃ ca caturthaṃ pīṭhamuttamam
||4||जालंधरं महापीठं कामरूपं तथैव च ॥
श्रीमद्रुद्रनृसिंहं च चतुर्थं पीठमुत्तमम्
ratnavīryaṃ mahāpīṭhaṃ kāśmīraṃ pīṭhameva ca ||
etāni devi pīṭhāni yo vetti sa ca mantravit
||5||रत्नवीर्यं महापीठं काश्मीरं पीठमेव च ॥
एतानि देवि पीठानि यो वेत्ति स च मन्त्रवित्
sarveṣāṃ caiva pīṭhānāmādhāraṃ pīṭhamuttamam ||
saurāṣṭre tu mahādevi nāmnā khyātaṃ mahodayam ||
kāmarūpadharaṃ jñānaṃ yatrādyāpi pravartate
||6||सर्वेषां चैव पीठानामाधारं पीठमुत्तमम् ॥
सौराष्ट्रे तु महादेवि नाम्ना ख्यातं महोदयम् ॥
कामरूपधरं ज्ञानं यत्राद्यापि प्रवर्तते
tatra pīṭhe sthitā devī mahālakṣmīti viśrutā ||
sarvapāpapraśamanī sarvakāryaśubhapradā
||7||तत्र पीठे स्थिता देवी महालक्ष्मीति विश्रुता ॥
सर्वपापप्रशमनी सर्वकार्यशुभप्रदा
śrīpañcamyāṃ naro yastu pūjayettāṃ vidhānataḥ ||
gandhapuṣpādibhirbhaktyā tasyālakṣmībhayaṃ kutaḥ
||8||श्रीपञ्चम्यां नरो यस्तु पूजयेत्तां विधानतः ॥
गन्धपुष्पादिभिर्भक्त्या तस्यालक्ष्मीभयं कुतः
uttarāṃ diśamāsthāya mahāla kṣmyāstu sannidhau ||
yo japenmantrarājñīṃ tāṃ siddhalakṣmīti viśrutām
||9||उत्तरां दिशमास्थाय महाल क्ष्म्यास्तु सन्निधौ ॥
यो जपेन्मन्त्रराज्ञीं तां सिद्धलक्ष्मीति विश्रुताम्
lakṣajāpyavidhānena dīkṣāsnānādipūrvakam ||
daśāṃśahomasaṃyuktaṃ trimadhu- śrīphalesubhiḥ
||10||लक्षजाप्यविधानेन दीक्षास्नानादिपूर्वकम् ॥
दशांशहोमसंयुक्तं त्रिमधु- श्रीफलेसुभिः
evaṃ pratyakṣatāṃ yāti tasya lakṣmīrna saṃśayaḥ ||
dadāti vāṃchitāṃ siddhimiha loke paratra ca
||11||एवं प्रत्यक्षतां याति तस्य लक्ष्मीर्न संशयः ॥
ददाति वांछितां सिद्धिमिह लोके परत्र च
tṛtīyāyāmathā ṣṭamyāṃ caturdaśyāṃ vidhānataḥ ||
yastāṃ pūjayate bhaktyā tasya siddhiḥ kare sthitā
||12||तृतीयायामथा ष्टम्यां चतुर्दश्यां विधानतः ॥
यस्तां पूजयते भक्त्या तस्य सिद्धिः करे स्थिता
iti śrīskāṃde mahāpurāṇa ekāśītisāhasryāṃ sahitāyāṃ saptame prabhāsakhaṇḍe prathame prabhāsakṣetramāhātmye siddhalakṣmīmāhātmyavarṇanaṃnāma dvātriṃśaduttaraśatatamo'dhyāyaḥ || 132 ||