citrapathānadīmāhātmyavarṇanam
tato gacchenmahādevi nadīṃ citrapathāṃ tataḥ ||
brahmakuṇḍasamīpasthāṃ citrādityasya madhyataḥ
||1||ततो गच्छेन्महादेवि नदीं चित्रपथां ततः ॥
ब्रह्मकुण्डसमीपस्थां चित्रादित्यस्य मध्यतः
yadā ca citraḥ saṃnīto yamadūtaiḥ surapriye ||
saśarīro mahāprājño yamādeśaparāyaṇaiḥ
||2||यदा च चित्रः संनीतो यमदूतैः सुरप्रिये ॥
सशरीरो महाप्राज्ञो यमादेशपरायणैः
evaṃ jñātvā tu tatrasthā bhaginī tasya duḥkhitā ||
citrā nadī tato bhūtvā svasā tasya mahātmanaḥ
||3||एवं ज्ञात्वा तु तत्रस्था भगिनी तस्य दुःखिता ॥
चित्रा नदी ततो भूत्वा स्वसा तस्य महात्मनः
praviṣṭā sāgare devi anveṣantī ca bāṃdhavam ||
tataścitrapathānāma tasyāścakrurdvijātayaḥ
||4||प्रविष्टा सागरे देवि अन्वेषन्ती च बांधवम् ॥
ततश्चित्रपथानाम तस्याश्चक्रुर्द्विजातयः
evaṃ tatra samutpannā sā nadī varavarṇini
||5||एवं तत्र समुत्पन्ना सा नदी वरवर्णिनि
tasyāṃ snātvā naro yastu citrādityaṃ prapaśyati ||
sa yāti paramaṃ sthānaṃ yatra devo divākaraḥ
||6||तस्यां स्नात्वा नरो यस्तु चित्रादित्यं प्रपश्यति ॥
स याति परमं स्थानं यत्र देवो दिवाकरः
asminkaliyuge devi aṃtardhānaṃ gatā nadī ||
prāvṛṭkāle ca dṛśyeta durlabhaṃ tatra darśanam
||7||अस्मिन्कलियुगे देवि अंतर्धानं गता नदी ॥
प्रावृट्काले च दृश्येत दुर्लभं तत्र दर्शनम्
snānaṃ dānaṃ viśeṣeṇa sarvapātakanāśanam
||8||स्नानं दानं विशेषेण सर्वपातकनाशनम्
bhukto vāpyathavā'bhukto rātrau vā yadi vā divā ||
parvakāle'thavā'kāle pavitro'pyathavā'śuciḥ
||9||भुक्तो वाप्यथवाऽभुक्तो रात्रौ वा यदि वा दिवा ॥
पर्वकालेऽथवाऽकाले पवित्रोऽप्यथवाऽशुचिः
yadaiva dṛśyate tatra nadī citrapathā priye ||
pramāṇaṃ darśanaṃ tasyā na kālastatra kāraṇam
||10||यदैव दृश्यते तत्र नदी चित्रपथा प्रिये ॥
प्रमाणं दर्शनं तस्या न कालस्तत्र कारणम्
dṛṣṭvā nadīṃ mahādevi pitaraḥ svargasaṃsthitāḥ ||
gāyaṃti tatra sāmāni nṛtyanti ca hasaṃti ca
||11||दृष्ट्वा नदीं महादेवि पितरः स्वर्गसंस्थिताः ॥
गायंति तत्र सामानि नृत्यन्ति च हसंति च
asmākaṃ vaṃśajaḥ kaścicchrāddhamatra kariṣyati ||
yāvatkalpaṃ tathā'smākaṃ prītimutpādayiṣyati
||12||अस्माकं वंशजः कश्चिच्छ्राद्धमत्र करिष्यति ॥
यावत्कल्पं तथाऽस्माकं प्रीतिमुत्पादयिष्यति
evaṃ jñātvā narastatra snānaṃ śrāddhaṃ ca kārayet ||
sarvapāpavināśārthaṃ pitṝṇāṃ prītaye tathā
||13||एवं ज्ञात्वा नरस्तत्र स्नानं श्राद्धं च कारयेत् ॥
सर्वपापविनाशार्थं पितॄणां प्रीतये तथा
ityetatkathitaṃ devi yathā citrapathā nadī ||
prabhāsakṣetramāsādya saṃsthitā pāpanāśinī
||14||इत्येतत्कथितं देवि यथा चित्रपथा नदी ॥
प्रभासक्षेत्रमासाद्य संस्थिता पापनाशिनी
iti śrīskāṃde mahāpurāṇa ekā śītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye citrapathānadīmāhātmyavarṇanaṃnāma catvāriṃśaduttaraśatatamo'dhyāyaḥ || 140 ||