snātvā tatrāgnitīrtheṣu kaṃ devaṃ pūrvamarccayet
devyuvāca
snātvā tatrāgnitīrtheṣu kaṃ devaṃ pūrvamarccayet ||
nirvighnā jāyate yena yātrā nṛṇāṃ sureśvara ||
tanme yātrāvidhānaṃ tu yathāvadvaktumarhasi
||1||स्नात्वा तत्राग्नितीर्थेषु कं देवं पूर्वमर्च्चयेत् ॥
निर्विघ्ना जायते येन यात्रा नृणां सुरेश्वर ॥
तन्मे यात्राविधानं तु यथावद्वक्तुमर्हसि
īśvara uvāca
evaṃ snātvā vidhānena dattvārghyaṃ ca mahodadhau ||
saṃpūjya gaṃdhapuṣpaiśca vastraiḥ puṣpāvalepanaiḥ
||2||एवं स्नात्वा विधानेन दत्त्वार्घ्यं च महोदधौ ॥
संपूज्य गंधपुष्पैश्च वस्त्रैः पुष्पावलेपनैः
hiraṇmayaṃ yathāśaktyā prakṣipettatra kaṃkaṇam ||
tataḥ pitṝṃstarpayitvā gaccheddevaṃ kapardinam
||3||हिरण्मयं यथाशक्त्या प्रक्षिपेत्तत्र कंकणम् ॥
ततः पितॄंस्तर्पयित्वा गच्छेद्देवं कपर्दिनम्
puṣpairdhūpaistathā gandhairvastraiḥ saṃpūjya bhaktitaḥ ||
gaṇānāṃ tveti mantreṇa arghyaṃ cāsmai nivedayet
||4||पुष्पैर्धूपैस्तथा गन्धैर्वस्त्रैः संपूज्य भक्तितः ॥
गणानां त्वेति मन्त्रेण अर्घ्यं चास्मै निवेदयेत्
śūdrāṇāmatha deveśi maṃtraścāṣṭākṣaraḥ smṛtaḥ ||
tatra someśvaraṃ gaccheddevaṃ pāpaharaṃ param
||5||शूद्राणामथ देवेशि मंत्रश्चाष्टाक्षरः स्मृतः ॥
तत्र सोमेश्वरं गच्छेद्देवं पापहरं परम्
snāpayitvā vidhānena japecca śatarudriyam ||
tathā rudrānsapañcāṃgāstathānyā rudrasaṃhitāḥ
||6||स्नापयित्वा विधानेन जपेच्च शतरुद्रियम् ॥
तथा रुद्रान्सपञ्चांगास्तथान्या रुद्रसंहिताः
snāpayetpayasā caiva dadhnā ghṛtayutena ca ||
madhunekṣurasenaiva kuṃkumena vilepayet
||7||स्नापयेत्पयसा चैव दध्ना घृतयुतेन च ॥
मधुनेक्षुरसेनैव कुंकुमेन विलेपयेत्
karpūrośīramiśreṇa mṛganābhiyutena ca ||
candanena sugandhena pūjyaṃ saṃpūjayettataḥ
||8||कर्पूरोशीरमिश्रेण मृगनाभियुतेन च ॥
चन्दनेन सुगन्धेन पूज्यं संपूजयेत्ततः
dhūpairbahuvidhairdevaṃ dhūpayitvā yathāvidhi ||
vastraiḥ saṃveṣṭayetpaścāddadyānnaivedyamuttamam
||9||धूपैर्बहुविधैर्देवं धूपयित्वा यथाविधि ॥
वस्त्रैः संवेष्टयेत्पश्चाद्दद्यान्नैवेद्यमुत्तमम्
ārārtikaṃ tataḥ kṛtvā nṛtyaṃ kuryādyathecchayā ||
aṣṭāṃgaṃ praṇipatyaivaṃ gītavādyādikaṃ tataḥ
||10||आरार्तिकं ततः कृत्वा नृत्यं कुर्याद्यथेच्छया ॥
अष्टांगं प्रणिपत्यैवं गीतवाद्यादिकं ततः
dharmaśravaṇasaṃyuktaṃ kāryaṃ prekṣaṇakaṃ vibhoḥ ||
tato dadyāddvijātibhyastapasvibhyaśca śaktitaḥ
||11||धर्मश्रवणसंयुक्तं कार्यं प्रेक्षणकं विभोः ॥
ततो दद्याद्द्विजातिभ्यस्तपस्विभ्यश्च शक्तितः
dīnāṃdhakṛpaṇebhyaśca dānaṃ kārpaṭikeṣu ca ||
vṛṣabhastatra dātavyaḥ pravṛtte krūrakarmaṇi ||
upavāsaṃ tataḥ kuryāttasminnahani bhāmini
||12||दीनांधकृपणेभ्यश्च दानं कार्पटिकेषु च ॥
वृषभस्तत्र दातव्यः प्रवृत्ते क्रूरकर्मणि ॥
उपवासं ततः कुर्यात्तस्मिन्नहनि भामिनि
yasminnahani paśyeta devaṃ someśvaraṃ naraḥ ||
sā tithirvarṣamekaṃ tu upoṣyā bhaktitatparaiḥ
||13||यस्मिन्नहनि पश्येत देवं सोमेश्वरं नरः ॥
सा तिथिर्वर्षमेकं तु उपोष्या भक्तितत्परैः
evaṃ kṛtvā naro bhaktyā labhate janmanaḥ phalam ||
tathā ca sarvatīrthānāṃ sakalaṃ labhate phalam
||14||एवं कृत्वा नरो भक्त्या लभते जन्मनः फलम् ॥
तथा च सर्वतीर्थानां सकलं लभते फलम्
uddharetpitṛvargaṃ ca mātṛvargaṃ ca bhāmini ||
bālye vayasi yatpāpaṃ vārdhakye yauvane'pi vā
||15||उद्धरेत्पितृवर्गं च मातृवर्गं च भामिनि ॥
बाल्ये वयसि यत्पापं वार्धक्ये यौवनेऽपि वा
kṣālayeccaiva tatsarvaṃ dṛṣṭvā someśvaraṃ naraḥ ||
na duḥkhito na dāridro durbhago vā na jāyate
||16||क्षालयेच्चैव तत्सर्वं दृष्ट्वा सोमेश्वरं नरः ॥
न दुःखितो न दारिद्रो दुर्भगो वा न जायते
saptajanmāntareṇaiva dṛṣṭe someśvare vibhau ||
dhanadhānyasamāyukte sphīte sañjāyate kule
||17||सप्तजन्मान्तरेणैव दृष्टे सोमेश्वरे विभौ ॥
धनधान्यसमायुक्ते स्फीते सञ्जायते कुले
bhaktirbhavati bhūyo'pi somanāthaṃ prati prabhum ||
kṣīreṇa snapanaṃ pūrvaṃ tato dhārāsamudbhavam
||18||भक्तिर्भवति भूयोऽपि सोमनाथं प्रति प्रभुम् ॥
क्षीरेण स्नपनं पूर्वं ततो धारासमुद्भवम्
prathame prathame yāme mahāsnā namataḥ param ||
madhyāhne devadevasya ye prapaśyanti mānavāḥ ||
saṃdhyāmārārtikaṃ bhūyo na jāyante ca mānuṣāḥ
||19||प्रथमे प्रथमे यामे महास्ना नमतः परम् ॥
मध्याह्ने देवदेवस्य ये प्रपश्यन्ति मानवाः ॥
संध्यामारार्तिकं भूयो न जायन्ते च मानुषाः
matvā kaliyugaṃ raudraṃ bahupāpaṃ varānane ||
nānyena tarate durgāṃ karmaṇā durgatiṃ naraḥ
||20||मत्वा कलियुगं रौद्रं बहुपापं वरानने ॥
नान्येन तरते दुर्गां कर्मणा दुर्गतिं नरः
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetra māhātmye someśvaramāhātmye someśvarapūjāmāhātmyavarṇanaṃnāma triṃśodhyāyaḥ || 30 ||