tato gacchenmahādevi ketuliṃgaṃ mahāprabham
īśvara uvāca
tato gacchenmahādevi ketuliṃgaṃ mahāprabham ||
rāhvīśānāduttare ca maṃgalāyāśca dakṣiṇe
||1||ततो गच्छेन्महादेवि केतुलिंगं महाप्रभम् ॥
राह्वीशानादुत्तरे च मंगलायाश्च दक्षिणे
dhanuṣoṃtaramānena nātidūre vyavasthitam ||
liṃgaṃ mahāprabhāvaṃ hi sarvapātakanāśanam
||2||धनुषोंतरमानेन नातिदूरे व्यवस्थितम् ॥
लिंगं महाप्रभावं हि सर्वपातकनाशनम्
keturnāma grahotyugraḥ śivasadbhāvabhāvitaḥ ||
vartulo'tīva vistīrṇo locanābhyāṃ subhīṣaṇaḥ
||3||केतुर्नाम ग्रहोत्युग्रः शिवसद्भावभावितः ॥
वर्तुलोऽतीव विस्तीर्णो लोचनाभ्यां सुभीषणः
palāladhūmasaṃkāśo grahapīḍāpahārakaḥ ||
tatrākarottapaścograṃ divyābdānāṃ śataṃ priye
||4||पलालधूमसंकाशो ग्रहपीडापहारकः ॥
तत्राकरोत्तपश्चोग्रं दिव्याब्दानां शतं प्रिये
tasya tuṣṭo mahādevo graha tvaṃ pradadau priye ||
ekādaśaśatānāṃ ca grahāṇāmādhipatyatām
||5||तस्य तुष्टो महादेवो ग्रह त्वं प्रददौ प्रिये ॥
एकादशशतानां च ग्रहाणामाधिपत्यताम्
tatrasthaṃ pūjayedbhaktyā ketuliṃgaṃ mahāprabham ||
ketūdaye mahāghore tasmindṛṣṭe viśeṣataḥ
||6||तत्रस्थं पूजयेद्भक्त्या केतुलिंगं महाप्रभम् ॥
केतूदये महाघोरे तस्मिन्दृष्टे विशेषतः
grahapīḍāsu cogrāsu pūjayettaṃ vidhānataḥ ||
puṣpairgaṃdhaistathā dhūpairnaivedyairvividhaiḥ śubhaiḥ
||7||ग्रहपीडासु चोग्रासु पूजयेत्तं विधानतः ॥
पुष्पैर्गंधैस्तथा धूपैर्नैवेद्यैर्विविधैः शुभैः
toṣayedvidhivaddevaṃ ketuṃ kalmaṣanāśanam
||8||तोषयेद्विधिवद्देवं केतुं कल्मषनाशनम्
iti saṃkṣepataḥ proktaṃ ketuliṃgaṃ mahodayam ||
grahapīḍopaśamanaṃ sarvapātakanāśanam
||9||इति संक्षेपतः प्रोक्तं केतुलिंगं महोदयम् ॥
ग्रहपीडोपशमनं सर्वपातकनाशनम्
etāni nava liṃgāni grahāṇāṃ kathitāni te ||
yaḥ paśyati naro nityaṃ tasya pīḍābhayaṃ kutaḥ
||10||एतानि नव लिंगानि ग्रहाणां कथितानि ते ॥
यः पश्यति नरो नित्यं तस्य पीडाभयं कुतः
na daurbhāgyaṃ kule tasya na rogī naiva duḥkhitaḥ ||
jāyate putravaddevi taṃ rakṣaṃti mahāgrahāḥ
||11||न दौर्भाग्यं कुले तस्य न रोगी नैव दुःखितः ॥
जायते पुत्रवद्देवि तं रक्षंति महाग्रहाः
iti te kathitaṃ samyakcaturdaśāyatanaṃ priye ||
vighneśvaraṃ samārabhya yāvatketupratiṣṭhitam
||12||इति ते कथितं सम्यक्चतुर्दशायतनं प्रिये ॥
विघ्नेश्वरं समारभ्य यावत्केतुप्रतिष्ठितम्
navagraheśvarāṇāṃ tu māhātmyaṃ pāpanāśanam ||
tathaiva paṃcaliṃgānāṃ śrutvā pāpaiḥ pramucyate
||13||नवग्रहेश्वराणां तु माहात्म्यं पापनाशनम् ॥
तथैव पंचलिंगानां श्रुत्वा पापैः प्रमुच्यते
kaparddinaṃ samārabhya caṃḍanāthāṃtakāni ca ||
paṃcaiva mudrāliṃgāni nāpuṇyo veda mānavaḥ
||14||कपर्द्दिनं समारभ्य चंडनाथांतकानि च ॥
पंचैव मुद्रालिंगानि नापुण्यो वेद मानवः
sūryeśvaraṃ samārabhya ketuliṃgāṃtakāni vai ||
navagrahāṇāṃ liṃgāni nānyo jānāti kaścana
||15||सूर्येश्वरं समारभ्य केतुलिंगांतकानि वै ॥
नवग्रहाणां लिंगानि नान्यो जानाति कश्चन
caturdaśavidhā tvevaṃ proktā''yatanasaṃgatiḥ ||
yaścaināṃ veda bhāvena sa kṣetraphalamaśnute
||16||चतुर्दशविधा त्वेवं प्रोक्ताऽऽयतनसंगतिः ॥
यश्चैनां वेद भावेन स क्षेत्रफलमश्नुते
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye ketvīśvaramāhātmyavarṇananāmaikapaṃcāśo'dhyāyaḥ || 51 ||