narmadāsnānaphalaśrutikathanam
yudhiṣṭhira uvāca
kasminkalpe mahābhāgā narmadeyaṃ dvijottama |
vibhaktā ṛṣibhiḥ sarvaistapoyuktairmahātmabhiḥ
||1||कस्मिन्कल्पे महाभागा नर्मदेयं द्विजोत्तम ।
विभक्ता ऋषिभिः सर्वैस्तपोयुक्तैर्महात्मभिः
etadvistarataḥ sarvaṃ brūhi me vadatāṃ vara |
kalpānte yadbhavetkaṣṭaṃ lokānāṃ tattvameva ca
||2||एतद्विस्तरतः सर्वं ब्रूहि मे वदतां वर ।
कल्पान्ते यद्भवेत्कष्टं लोकानां तत्त्वमेव च
atīte tu purā kalpe yatheyaṃ vartate'nagha |
asyāntyasya ca kalpasya vyavasthāṃ kathaya prabho |
evamuktaḥ sabhāmadhye mārkaṇḍo vākyamabravīt
||3||अतीते तु पुरा कल्पे यथेयं वर्ततेऽनघ ।
अस्यान्त्यस्य च कल्पस्य व्यवस्थां कथय प्रभो ।
एवमुक्तः सभामध्ये मार्कण्डो वाक्यमब्रवीत्
mārkaṇḍeya uvāca
vakṣye'haṃ śrūyatāṃ sarvaiḥ katheyaṃ pūrvataḥ śrutā
||4||वक्ष्येऽहं श्रूयतां सर्वैः कथेयं पूर्वतः श्रुता
mahatkatheyaṃ vaiśiṣṭī kalpādasmātparaṃ tu yā |
lokakṣayakaro ghora āsītkālaḥ sudāruṇaḥ
||5||महत्कथेयं वैशिष्टी कल्पादस्मात्परं तु या ।
लोकक्षयकरो घोर आसीत्कालः सुदारुणः
tasminnapi mahāghore yatheyaṃ vā mṛtā satī |
parituṣṭairvibhaktā ca śṛṇudhvaṃ tāṃ kathāmimām
||6||तस्मिन्नपि महाघोरे यथेयं वा मृता सती ।
परितुष्टैर्विभक्ता च शृणुध्वं तां कथामिमाम्
yugānte samanuprāpte pitāmahadinatraye |
mānasā brahmaṇaḥ putrāḥ sākṣādbrahmeva sattamāḥ
||7||युगान्ते समनुप्राप्ते पितामहदिनत्रये ।
मानसा ब्रह्मणः पुत्राः साक्षाद्ब्रह्मेव सत्तमाः
sanakādyā mahātmāno ye ca vaimānikā gaṇāḥ |
yamendravaruṇādyāśca lokapālā dinatraye
||8||सनकाद्या महात्मानो ये च वैमानिका गणाः ।
यमेन्द्रवरुणाद्याश्च लोकपाला दिनत्रये
kālāpekṣāstu tiṣṭhanti lokavṛttāntatatparāḥ |
tataḥ kalpakṣaye prāpte teṣāṃ jñānamanuttamam
||9||कालापेक्षास्तु तिष्ठन्ति लोकवृत्तान्ततत्पराः ।
ततः कल्पक्षये प्राप्ते तेषां ज्ञानमनुत्तमम्
sarveṣāṃ naśyate cāyuryugarūpānusārataḥ |
bhūrlokaṃ te parityajya agamaṃśca bhuvaṃ tadā
||10||सर्वेषां नश्यते चायुर्युगरूपानुसारतः ।
भूर्लोकं ते परित्यज्य अगमंश्च भुवं तदा
svarlokaṃ ca mahaścaiva janaścaiva tapastadā |
āśrayaṃ satyalokaṃ ca sarvalokamanuttamam
||11||स्वर्लोकं च महश्चैव जनश्चैव तपस्तदा ।
आश्रयं सत्यलोकं च सर्वलोकमनुत्तमम्
kālaṃ yugasahasrāntaṃ putrapautrasamanvitāḥ |
satyaloke ca tiṣṭhanti yāvatsaṃjāyate jagat
||12||कालं युगसहस्रान्तं पुत्रपौत्रसमन्विताः ।
सत्यलोके च तिष्ठन्ति यावत्संजायते जगत्
brahmaputrāśca ye kecitkalpādau na bhavanti ha |
trailokyaṃ te parityajya anādhāraṃ bhavanti ca
||13||ब्रह्मपुत्राश्च ये केचित्कल्पादौ न भवन्ति ह ।
त्रैलोक्यं ते परित्यज्य अनाधारं भवन्ति च
taiḥ sārdhaṃ ye tu te viprā anye cāpi tapodhanāḥ |
yakṣarakṣaḥpiśācāśca anye vaimānikā gaṇāḥ
||14||तैः सार्धं ये तु ते विप्रा अन्ये चापि तपोधनाः ।
यक्षरक्षःपिशाचाश्च अन्ये वैमानिका गणाः
ṛṣayaśca mahābhāgā varṇāścānye pṛthagvidhāḥ |
sīdanti bhūmyāṃ sahitā ye cānye talavāsinaḥ
||15||ऋषयश्च महाभागा वर्णाश्चान्ये पृथग्विधाः ।
सीदन्ति भूम्यां सहिता ये चान्ये तलवासिनः
anāvṛṣṭirabhūttatra mahatī śatavārṣikī |
lokakṣayakarī raudrā vṛkṣavīrudvināśinī
||16||अनावृष्टिरभूत्तत्र महती शतवार्षिकी ।
लोकक्षयकरी रौद्रा वृक्षवीरुद्विनाशिनी
trailokyasaṃkṣobhakarī saptārṇavaviśoṣaṇī |
tato lokāḥ kṣudhāviṣṭā bhramantīva diśo daśa
||17||त्रैलोक्यसंक्षोभकरी सप्तार्णवविशोषणी ।
ततो लोकाः क्षुधाविष्टा भ्रमन्तीव दिशो दश
kaṃdairmūlaiḥ phalairvāpi vartayante suduḥkhitāḥ |
saritaḥ sāgarāḥ kūpāḥ sevante pāvanāni ca
||18||कंदैर्मूलैः फलैर्वापि वर्तयन्ते सुदुःखिताः ।
सरितः सागराः कूपाः सेवन्ते पावनानि च
tatrāpi sarve śuṣyanti saridbhiḥ saha sāgarāḥ |
tato yānyalpasārāṇi sattvāni pṛthivītale
||19||तत्रापि सर्वे शुष्यन्ति सरिद्भिः सह सागराः ।
ततो यान्यल्पसाराणि सत्त्वानि पृथिवीतले
tānyevāgre pralīyante bhinnānyurujalena vai |
atha saṃkṣīyamāṇāsu saritsu saha sāgaraiḥ
||20||तान्येवाग्रे प्रलीयन्ते भिन्नान्युरुजलेन वै ।
अथ संक्षीयमाणासु सरित्सु सह सागरैः
ṛṣīṇāṃ ṣaṣṭisāhasraṃ kurukṣetranivāsinām |
ye ca vaikhānasā viprā dantolūkhalinastathā
||21||ऋषीणां षष्टिसाहस्रं कुरुक्षेत्रनिवासिनाम् ।
ये च वैखानसा विप्रा दन्तोलूखलिनस्तथा
himācalaguhāguhye ye vasanti tapodhanāḥ |
sarve te māmupāgamya kṣuttṛṣārtāstapodhanāḥ
||22||हिमाचलगुहागुह्ये ये वसन्ति तपोधनाः ।
सर्वे ते मामुपागम्य क्षुत्तृषार्तास्तपोधनाः
ūcuḥ prāñjalayaḥ sarve sīdayāmo mahāmune |
saritsāgaraśailāntaṃ jagatsaṃśuṣyate dvija
||23||ऊचुः प्राञ्जलयः सर्वे सीदयामो महामुने ।
सरित्सागरशैलान्तं जगत्संशुष्यते द्विज
kutra yāsyāma sahitā yāvatkālasya paryayaḥ |
dīrghāyurasi viprendra na mṛtastvaṃ yugakṣaye
||24||कुत्र यास्याम सहिता यावत्कालस्य पर्ययः ।
दीर्घायुरसि विप्रेन्द्र न मृतस्त्वं युगक्षये
bhūtaṃ bhavyaṃ bhaviṣyacca sarvaṃ tava hṛdi sthitam |
tasmāttvaṃ vetsi sarvaṃ ca kathayasva mahāvrata
||25||भूतं भव्यं भविष्यच्च सर्वं तव हृदि स्थितम् ।
तस्मात्त्वं वेत्सि सर्वं च कथयस्व महाव्रत
kīdṛkkālaṃ mahābhāga kṣapiṣyāmo'tha suvrata |
anāvṛṣṭihataṃ sarvaṃ sīdate sacarācaram
||26||कीदृक्कालं महाभाग क्षपिष्यामोऽथ सुव्रत ।
अनावृष्टिहतं सर्वं सीदते सचराचरम्
paritrāhi mahābhāga na yathā yāma saṃkṣayam |
tataḥ saṃcintya manasā tvaranviprānathābravam
||27||परित्राहि महाभाग न यथा याम संक्षयम् ।
ततः संचिन्त्य मनसा त्वरन्विप्रानथाब्रवम्
kurukṣetraṃ tyajadhvaṃ ca putradārasamanvitāḥ |
tyaktvodīcīṃ diśaṃ sarve yāmo yāmyāmanuttamām
||28||कुरुक्षेत्रं त्यजध्वं च पुत्रदारसमन्विताः ।
त्यक्त्वोदीचीं दिशं सर्वे यामो याम्यामनुत्तमाम्
nagaragrāmaghoṣāḍhyāṃ purapattanaśobhitām |
gacchāmo narmadātīraṃ bahusiddhaniṣevitam
||29||नगरग्रामघोषाढ्यां पुरपत्तनशोभिताम् ।
गच्छामो नर्मदातीरं बहुसिद्धनिषेवितम्
rudrāṅgīṃ tāṃ mahāpuṇyāṃ sarvapāpapraṇāśinīm |
paśyāmastāṃ mahābhāgāṃ nyagrodhāvārasaṃkulām
||30||रुद्राङ्गीं तां महापुण्यां सर्वपापप्रणाशिनीम् ।
पश्यामस्तां महाभागां न्यग्रोधावारसंकुलाम्
māheśvarairbhāgavataiḥ sāṃkhyaiḥ siddhaiḥ susevitām |
anāvṛṣṭibhayādbhītāḥ kūlayorubhayorapi
||31||माहेश्वरैर्भागवतैः सांख्यैः सिद्धैः सुसेविताम् ।
अनावृष्टिभयाद्भीताः कूलयोरुभयोरपि
āśrame hyāśramāndivyānkārayāmo jitavratāḥ |
evamuktāstu te sarve sametānucaraiḥ saha
||32||आश्रमे ह्याश्रमान्दिव्यान्कारयामो जितव्रताः ।
एवमुक्तास्तु ते सर्वे समेतानुचरैः सह
narmadātīramāsādya sthitāḥ sarve'kutobhayāḥ |
kiṃcitpūrvamanusmṛtya purā kalpādibhirbhayam
||33||नर्मदातीरमासाद्य स्थिताः सर्वेऽकुतोभयाः ।
किंचित्पूर्वमनुस्मृत्य पुरा कल्पादिभिर्भयम्
prāptāstu narmadātīramādāveva kalau yuge |
tato varṣaśataṃ pūrṇaṃ divyaṃ revātaṭe'vasan
||34||प्राप्तास्तु नर्मदातीरमादावेव कलौ युगे ।
ततो वर्षशतं पूर्णं दिव्यं रेवातटेऽवसन्
ṣaḍviṃśacca sahasrāṇi varṣāṇāṃ mānuṣāṇi ca |
tatrāścaryaṃ mayā dṛṣṭamṛṣīṇāṃ vasatāṃ nṛpa
||35||षड्विंशच्च सहस्राणि वर्षाणां मानुषाणि च ।
तत्राश्चर्यं मया दृष्टमृषीणां वसतां नृप
anāvṛṣṭihate loke saṃśuṣke sthāvare care |
bhinne yugādikalane hāhābhūte vicetane
||36||अनावृष्टिहते लोके संशुष्के स्थावरे चरे ।
भिन्ने युगादिकलने हाहाभूते विचेतने
cāturvarṇe pralīne tu naṣṭe homabalikrame |
niḥsvāhe nirvaṣaṭkāre śaucācāravivarjite
||37||चातुर्वर्णे प्रलीने तु नष्टे होमबलिक्रमे ।
निःस्वाहे निर्वषट्कारे शौचाचारविवर्जिते
iyamekā saricchreṣṭhā ṛṣikoṭiniṣevitā |
nānyā kācittriloke'pi ramaṇīyā nareśvara
||38||इयमेका सरिच्छ्रेष्ठा ऋषिकोटिनिषेविता ।
नान्या काचित्त्रिलोकेऽपि रमणीया नरेश्वर
yatheyaṃ puṇyasalilā indrasyevāmarāvatī |
devatāyatanaiḥ śubhrairāśramaiśca sukalpitaiḥ
||39||यथेयं पुण्यसलिला इन्द्रस्येवामरावती ।
देवतायतनैः शुभ्रैराश्रमैश्च सुकल्पितैः
śobhate narmadā devī svarge mandākinī yathā |
yāvadvṛkṣā mahāśailā yāvatsāgarasaṃbhavā
||40||शोभते नर्मदा देवी स्वर्गे मन्दाकिनी यथा ।
यावद्वृक्षा महाशैला यावत्सागरसंभवा
ubhayoḥ kūlayostāvanmaṇḍitāyatanaiḥ śubhaiḥ |
hūyadbhiragnihotraiśca havirdhūmasamākulā
||41||उभयोः कूलयोस्तावन्मण्डितायतनैः शुभैः ।
हूयद्भिरग्निहोत्रैश्च हविर्धूमसमाकुला
babhūva narmadā devī prāvṛṭkāla iva śarvarī |
devatāyatanairnaikaiḥ pūjāsaṃskāraśobhitā
||42||बभूव नर्मदा देवी प्रावृट्काल इव शर्वरी ।
देवतायतनैर्नैकैः पूजासंस्कारशोभिता
saridbhirbhrājate śreṣṭhā purī śākrī ca bhāskarī |
kecitpañcāgnitapasaḥ kecidapyagnihotriṇaḥ
||43||सरिद्भिर्भ्राजते श्रेष्ठा पुरी शाक्री च भास्करी ।
केचित्पञ्चाग्नितपसः केचिदप्यग्निहोत्रिणः
keciddhūmakamaśnanti tapasyugre vyavasthitāḥ |
ātmayajñaratāḥ kecidapare bhaktibhāginaḥ
||44||केचिद्धूमकमश्नन्ति तपस्युग्रे व्यवस्थिताः ।
आत्मयज्ञरताः केचिदपरे भक्तिभागिनः
vaiṣṇavajñānamāsādya kecicchaivaṃ vrataṃ tathā |
ekarātraṃ dvirātraṃ ca kecitṣaṣṭhāhabhojanāḥ
||45||वैष्णवज्ञानमासाद्य केचिच्छैवं व्रतं तथा ।
एकरात्रं द्विरात्रं च केचित्षष्ठाहभोजनाः
cāndrāyaṇavidhānaiśca kṛcchriṇaścātikṛcchriṇaḥ |
evaṃvidhaistapobhiśca narmadātīraśobhitaiḥ
||46||चान्द्रायणविधानैश्च कृच्छ्रिणश्चातिकृच्छ्रिणः ।
एवंविधैस्तपोभिश्च नर्मदातीरशोभितैः
yajadbhiḥ śaṃkaraṃ devaṃ keśavaṃ bhāti nityadā |
ekatve ca pṛthaktve ca yajatāṃ ca maheśvaram
||47||यजद्भिः शंकरं देवं केशवं भाति नित्यदा ।
एकत्वे च पृथक्त्वे च यजतां च महेश्वरम्
kalau yuge mahāghore prāptāḥ siddhimanuttamām |
yasya yasya hi yā bhaktirvijñānaṃ yasya yādṛśam
||48||कलौ युगे महाघोरे प्राप्ताः सिद्धिमनुत्तमाम् ।
यस्य यस्य हि या भक्तिर्विज्ञानं यस्य यादृशम्
yasminyasmiṃśca deve tu tāṃtāmīśo'dadātprabhuḥ |
svabhāvaikatayā bhaktyā tāmetyāntaḥ pralīyate
||49||यस्मिन्यस्मिंश्च देवे तु तांतामीशोऽददात्प्रभुः ।
स्वभावैकतया भक्त्या तामेत्यान्तः प्रलीयते
saṃsāre parivartante ye pṛthagbhājino narāḥ |
ye mahāvṛkṣamīśānaṃ tyaktvā śākhāvalambinaḥ
||50||संसारे परिवर्तन्ते ये पृथग्भाजिनो नराः ।
ये महावृक्षमीशानं त्यक्त्वा शाखावलम्बिनः
punarāvartamānāste jāyante hi caturyuge |
devānte sthāvarānte ca saṃsāre cābhramankramāt
||51||पुनरावर्तमानास्ते जायन्ते हि चतुर्युगे ।
देवान्ते स्थावरान्ते च संसारे चाभ्रमन्क्रमात्
punarjanma punaḥ svarge punarghore ca raurave |
ye punardevamīśānaṃ bhavaṃ bhaktisusaṃsthitāḥ
||52||पुनर्जन्म पुनः स्वर्गे पुनर्घोरे च रौरवे ।
ये पुनर्देवमीशानं भवं भक्तिसुसंस्थिताः
yajanti narmadātīre na punaste bhavanti ca |
ā dehapatanātkecidupāsantaḥ paraṃ gatāḥ
||53||यजन्ति नर्मदातीरे न पुनस्ते भवन्ति च ।
आ देहपतनात्केचिदुपासन्तः परं गताः
keciddvādaśabhirvarṣaiḥ ṣaḍbharanye tapodhanāḥ |
tribhiḥ saṃvatsaraiḥ kecitkecitsaṃvatsareṇa tu
||54||केचिद्द्वादशभिर्वर्षैः षड्भरन्ये तपोधनाः ।
त्रिभिः संवत्सरैः केचित्केचित्संवत्सरेण तु
ṣaḍbhirmāsaistu saṃsiddhāstribhirmāsaistathāpare |
munayo devamāśritya narmadāṃ ca yaśasvinīm
||55||षड्भिर्मासैस्तु संसिद्धास्त्रिभिर्मासैस्तथापरे ।
मुनयो देवमाश्रित्य नर्मदां च यशस्विनीम्
chittvā saṃsāradoṣāṃśca agamanbrahma śāśvatam |
evaṃ kaliyuge ghore śataśo'tha sahasraśaḥ
||56||छित्त्वा संसारदोषांश्च अगमन्ब्रह्म शाश्वतम् ।
एवं कलियुगे घोरे शतशोऽथ सहस्रशः
narmadātīramāśritya munayo rudramāviśan
||57||नर्मदातीरमाश्रित्य मुनयो रुद्रमाविशन्
ye narmadātīramupetya viprāḥ śaive vrate yatnamupaprapannāḥ |
trikālamambhaḥ pravigāhya bhaktyā devaṃ samabhyarcya śivaṃ vrajanti
||58||ये नर्मदातीरमुपेत्य विप्राः शैवे व्रते यत्नमुपप्रपन्नाः ।
त्रिकालमम्भः प्रविगाह्य भक्त्या देवं समभ्यर्च्य शिवं व्रजन्ति
dhyānārcanairjāpyamahāvrataiśca nārāyaṇaṃ vā satataṃ smaranti |
te dhautapāṇḍurapaṭā iva rājahaṃsāḥ saṃsārasāgarajalasya taranti pāram
||59||ध्यानार्चनैर्जाप्यमहाव्रतैश्च नारायणं वा सततं स्मरन्ति ।
ते धौतपाण्डुरपटा इव राजहंसाः संसारसागरजलस्य तरन्ति पारम्
satyaṃ satyaṃ punaḥ satyamutkṣipya bhujamucyate |
idamekaṃ suniṣpannaṃ dhyeyo nārāyaṇaḥ sadā
||60||सत्यं सत्यं पुनः सत्यमुत्क्षिप्य भुजमुच्यते ।
इदमेकं सुनिष्पन्नं ध्येयो नारायणः सदा
yo vā haraṃ pūjayate jitātmā māsaṃ ca pakṣaṃ ca vasennarendra |
revāṃ samāśritya mahānubhāvaḥ sa devadevo'tha bhavetpinākī
||61||यो वा हरं पूजयते जितात्मा मासं च पक्षं च वसेन्नरेन्द्र ।
रेवां समाश्रित्य महानुभावः स देवदेवोऽथ भवेत्पिनाकी
kīṭāḥ pataṃgāśca pipīlikāśca ye vai mriyante'mbhasi narmadāyāḥ |
te divyarūpāstu kulaprasūtāḥ śataṃ samā dharmaparā bhavanti
||62||कीटाः पतंगाश्च पिपीलिकाश्च ये वै म्रियन्तेऽम्भसि नर्मदायाः ।
ते दिव्यरूपास्तु कुलप्रसूताः शतं समा धर्मपरा भवन्ति
kālena vṛkṣāḥ prapatanti ye'pi mahātaraṃgaughanikṛttamūlāḥ |
te narmadāṃbhobhirapāstapāpā dedīpyamānāstridivaṃ prayānti
||63||कालेन वृक्षाः प्रपतन्ति येऽपि महातरंगौघनिकृत्तमूलाः ।
ते नर्मदांभोभिरपास्तपापा देदीप्यमानास्त्रिदिवं प्रयान्ति
akāmakāmāśca tathā sakāmā revāntamāśritya mriyanti tīre |
jaḍāndhamūkāstridivaṃ prayānti kimatra viprā bhavabhāvayuktāḥ
||64||अकामकामाश्च तथा सकामा रेवान्तमाश्रित्य म्रियन्ति तीरे ।
जडान्धमूकास्त्रिदिवं प्रयान्ति किमत्र विप्रा भवभावयुक्ताः
māsopavāsairapi śoṣitāṅgā na tāṃ gatiṃ yānti vimuktadehāḥ |
mriyanti revājalapūtakāyāḥ śivārcane keśavabhāvayuktāḥ
||65||मासोपवासैरपि शोषिताङ्गा न तां गतिं यान्ति विमुक्तदेहाः ।
म्रियन्ति रेवाजलपूतकायाः शिवार्चने केशवभावयुक्ताः
nīvāraśyāmākayaveṅgudādyairanyairmunīndrā iha vartayanti |
āpritya kūlaṃ tridaśānugītaṃ te narmadāyā na viśanti mṛtyum
||66||नीवारश्यामाकयवेङ्गुदाद्यैरन्यैर्मुनीन्द्रा इह वर्तयन्ति ।
आप्रित्य कूलं त्रिदशानुगीतं ते नर्मदाया न विशन्ति मृत्युम्
bhramanti ye tīramupetya devyāstrikāladevārcanasatyapūtāḥ |
viṇmūtracarmāsthitiropadhānāḥ kukṣau yuvatyā na vasanti bhūyaḥ
||67||भ्रमन्ति ये तीरमुपेत्य देव्यास्त्रिकालदेवार्चनसत्यपूताः ।
विण्मूत्रचर्मास्थितिरोपधानाः कुक्षौ युवत्या न वसन्ति भूयः
kiṃ yajñadānairbahubhiśca teṣāṃ niṣevitaistīrthavaraiḥ samastaiḥ |
revātaṭaṃ dakṣiṇamuttaraṃ vā sevanti te rudracarānupūrvam
||68||किं यज्ञदानैर्बहुभिश्च तेषां निषेवितैस्तीर्थवरैः समस्तैः ।
रेवातटं दक्षिणमुत्तरं वा सेवन्ति ते रुद्रचरानुपूर्वम्
te vañcitāḥ paṅgujaḍāndhabhūtā lokeṣu martyāḥ paśubhiśca tulyāḥ |
ye nāśritā rudraśarīrabhūtāṃ sopānapaṅktiṃ tridivasya revām
||69||ते वञ्चिताः पङ्गुजडान्धभूता लोकेषु मर्त्याः पशुभिश्च तुल्याः ।
ये नाश्रिता रुद्रशरीरभूतां सोपानपङ्क्तिं त्रिदिवस्य रेवाम्
yugaṃ kaliṃ ghoramimaṃ ya iccheddraṣṭuṃ kadācinna punardvijendraḥ |
sa narmadātīramupetya sarvaṃ sampūjayetsarvavimuktasaṃgaḥ
||70||युगं कलिं घोरमिमं य इच्छेद्द्रष्टुं कदाचिन्न पुनर्द्विजेन्द्रः ।
स नर्मदातीरमुपेत्य सर्वं सम्पूजयेत्सर्वविमुक्तसंगः
vighnairanekairatiyojyamānā ye tīramujhanti na narmadāyāḥ |
te caiva sarvasya hitārthabhūtā vandyāśca te sarvajanasya mānyāḥ
||71||विघ्नैरनेकैरतियोज्यमाना ये तीरमुझन्ति न नर्मदायाः ।
ते चैव सर्वस्य हितार्थभूता वन्द्याश्च ते सर्वजनस्य मान्याः
bhṛgvatrigārgeyavaśiṣṭhakaṅkāḥ śataiḥ sametairniyatāstvasaṃkhyaiḥ |
siddhiṃ parāṃ te hi jalaplutāṅgāḥ prāptāstu lokānmarutāṃ na cānye
||72||भृग्वत्रिगार्गेयवशिष्ठकङ्काः शतैः समेतैर्नियतास्त्वसंख्यैः ।
सिद्धिं परां ते हि जलप्लुताङ्गाः प्राप्तास्तु लोकान्मरुतां न चान्ये
jñānaṃ mahatpuṇyatamaṃ pavitraṃ paṭhantyado nityaviśuddhasattvāḥ |
gatiṃ parāṃ yānti mahānubhāvā rudrasya vākyaṃ hi yathā pramāṇam
||73||ज्ञानं महत्पुण्यतमं पवित्रं पठन्त्यदो नित्यविशुद्धसत्त्वाः ।
गतिं परां यान्ति महानुभावा रुद्रस्य वाक्यं हि यथा प्रमाणम्
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe narmadāmāhātmye narmadāsnānaphalaśrutikathanaṃ nāma daśamo'dhyāyaḥ ||