yatra somastapastaptvā nakṣatrapathamāsthitaḥ
śrīmārkaṇḍeya uvāca
tato gacchenmahārāja somatīrthamanuttamam |
yatra somastapastaptvā nakṣatrapathamāsthitaḥ
||1||ततो गच्छेन्महाराज सोमतीर्थमनुत्तमम् ।
यत्र सोमस्तपस्तप्त्वा नक्षत्रपथमास्थितः
tatra tīrthe tu yaḥ snāyādācamya vidhipūrvakam |
kṛtajāpyo raviṃ dhyāyettasya puṇyaphalaṃ śṛṇu
||2||तत्र तीर्थे तु यः स्नायादाचम्य विधिपूर्वकम् ।
कृतजाप्यो रविं ध्यायेत्तस्य पुण्यफलं शृणु
ṛgvedayajurvedābhyāṃ sāmavedena bhārata |
japato yatphalaṃ proktaṃ gāyatryā cātra tatphalam
||3||ऋग्वेदयजुर्वेदाभ्यां सामवेदेन भारत ।
जपतो यत्फलं प्रोक्तं गायत्र्या चात्र तत्फलम्
tatra tīrthe tu yo bhaktyā brāhmaṇān bhojayecchuciḥ |
tena samyagvidhānena koṭirbhavati bhojitā
||4||तत्र तीर्थे तु यो भक्त्या ब्राह्मणान् भोजयेच्छुचिः ।
तेन सम्यग्विधानेन कोटिर्भवति भोजिता
pādukopānahau chatraṃ vastrakambalavājinaḥ |
yo datte vipramukhyāya tasya tatkoṭisaṃmitam
||5||पादुकोपानहौ छत्रं वस्त्रकम्बलवाजिनः ।
यो दत्ते विप्रमुख्याय तस्य तत्कोटिसंमितम्
sahasraṃ tu sahasrāṇāmanṛcāṃ yastu bhojayet |
ekasya mantrayuktasya kalāṃ nārhati ṣoḍaśīm
||6||सहस्रं तु सहस्राणामनृचां यस्तु भोजयेत् ।
एकस्य मन्त्रयुक्तस्य कलां नार्हति षोडशीम्
evaṃ tu bhojayettatra bahvṛcaṃ vedapāragam |
śākhāntargamathādhvaryuṃ chandogaṃ vā samāptigam
||7||एवं तु भोजयेत्तत्र बह्वृचं वेदपारगम् ।
शाखान्तर्गमथाध्वर्युं छन्दोगं वा समाप्तिगम्
agnihotrasahasrasya yatphalaṃ prāpyate budhaiḥ |
samaṃ tadvedaviduṣā tīrthe somasya tatphalam
||8||अग्निहोत्रसहस्रस्य यत्फलं प्राप्यते बुधैः ।
समं तद्वेदविदुषा तीर्थे सोमस्य तत्फलम्
bhojayedyaḥ śataṃ teṣāṃ sahasraṃ labhate naraḥ |
ekasya yogayuktasya tatphalaṃ kavayo viduḥ
||9||भोजयेद्यः शतं तेषां सहस्रं लभते नरः ।
एकस्य योगयुक्तस्य तत्फलं कवयो विदुः
saṃnirudhyendriyagrāmaṃ yatrayatra vasenmuniḥ |
tatratatra kurukṣetraṃ naimiṣaṃ puṣkarāṇi ca
||10||संनिरुध्येन्द्रियग्रामं यत्रयत्र वसेन्मुनिः ।
तत्रतत्र कुरुक्षेत्रं नैमिषं पुष्कराणि च
tasmātsarvaprayatnena grahaṇe candrasūryayoḥ |
saṃkrāntau ca vyatīpāte yogī bhojyo viśeṣataḥ
||11||तस्मात्सर्वप्रयत्नेन ग्रहणे चन्द्रसूर्ययोः ।
संक्रान्तौ च व्यतीपाते योगी भोज्यो विशेषतः
saṃnyāsaṃ kurute yastu tatra tīrthe yudhiṣṭhira |
vimānena mahābhāgāḥ sa yāti tridivaṃ naraḥ
||12||संन्यासं कुरुते यस्तु तत्र तीर्थे युधिष्ठिर ।
विमानेन महाभागाः स याति त्रिदिवं नरः
somasyānucaro bhūtvā tenaiva saha modate
||13||सोमस्यानुचरो भूत्वा तेनैव सह मोदते
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe somatīrthamāhātmyavarṇanaṃ nāmaikonacatvāriṃśadadhikaśatatamo'dhyāyaḥ ||