śaṅkhacūḍatīrthamāhātmyavarṇanam
śrīmārkaṇḍeya uvāca
narmadādakṣiṇe kūle tīrthaṃ paramaśobhanam |
śaṅkhacūḍasya nāmnā vai prasiddhaṃ bhūmimaṇḍale
||1||नर्मदादक्षिणे कूले तीर्थं परमशोभनम् ।
शङ्खचूडस्य नाम्ना वै प्रसिद्धं भूमिमण्डले
śaṅkhacūḍaḥ svayaṃ tatra saṃsthitaḥ pāṇḍunandana |
vainateyabhayātpārtha sukhadanarmadātaṭe
||2||शङ्खचूडः स्वयं तत्र संस्थितः पाण्डुनन्दन ।
वैनतेयभयात्पार्थ सुखदनर्मदातटे
tatra tīrthe tu yo bhaktyā śucirbhūtvā samāhitaḥ |
snāpayecchaṅkhacūḍaṃ tu kṣīrakṣaudreṇa sarpiṣā
||3||तत्र तीर्थे तु यो भक्त्या शुचिर्भूत्वा समाहितः ।
स्नापयेच्छङ्खचूडं तु क्षीरक्षौद्रेण सर्पिषा
rātrau jāgaraṇaṃ kuryāddevasyāgre narādhipa |
dadhibhaktena sampūjya brāhmaṇāñchaṃsitavratān |
gopradāne dvijendro'yaṃ sarvapāpakṣayaṃkaraḥ
||4||रात्रौ जागरणं कुर्याद्देवस्याग्रे नराधिप ।
दधिभक्तेन सम्पूज्य ब्राह्मणाञ्छंसितव्रतान् ।
गोप्रदाने द्विजेन्द्रोऽयं सर्वपापक्षयंकरः
tasmiṃstīrthe tu yaḥ pārtha sarpadaṣṭaṃ pratarpayet |
sa yāti paramaṃ lokaṃ śaṅkarasya vaco yathā
||5||तस्मिंस्तीर्थे तु यः पार्थ सर्पदष्टं प्रतर्पयेत् ।
स याति परमं लोकं शङ्करस्य वचो यथा
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śaṅkhacūḍatīrthamāhātmyavarṇanaṃ nāma pañcasaptatitamo'dhyāyaḥ ||