śakratīrthaṃ suvikhyātamaśeṣāghavināśanam
śrīmārkaṇḍeya uvāca
tato gacchetparaṃ puṇyaṃ narmadādakṣiṇe taṭe |
śakratīrthaṃ suvikhyātamaśeṣāghavināśanam
||1||ततो गच्छेत्परं पुण्यं नर्मदादक्षिणे तटे ।
शक्रतीर्थं सुविख्यातमशेषाघविनाशनम्
purā śakreṇa tatraiva tapo vai duratikramam |
prārabdhaṃ parayā bhaktyā devaṃ prati maheśvaram
||2||पुरा शक्रेण तत्रैव तपो वै दुरतिक्रमम् ।
प्रारब्धं परया भक्त्या देवं प्रति महेश्वरम्
tataḥ saṃtoṣito deva umāpatirnarādhipa |
devendratvaṃ varaṃ rājyaṃ dānavānāṃ vadhaṃ dadau
||3||ततः संतोषितो देव उमापतिर्नराधिप ।
देवेन्द्रत्वं वरं राज्यं दानवानां वधं ददौ
labdhaṃ śakreṇa nṛpate narmadātīrthabhāvataḥ |
tataḥ puṇyatamaṃ tīrthaṃ saṃjātaṃ vasudhātale
||4||लब्धं शक्रेण नृपते नर्मदातीर्थभावतः ।
ततः पुण्यतमं तीर्थं संजातं वसुधातले
kārttikasya tu māsasya kṛṣṇapakṣe trayodaśīm |
upoṣya vai naro bhaktyā sarvapāpaiḥ pramucyate
||5||कार्त्तिकस्य तु मासस्य कृष्णपक्षे त्रयोदशीम् ।
उपोष्य वै नरो भक्त्या सर्वपापैः प्रमुच्यते
duḥsvapnasambhavaiḥ pāpairdurnimittasamudbhavaiḥ |
grahaśākinisambhūtairmucyate pāṇḍunandana
||6||दुःस्वप्नसम्भवैः पापैर्दुर्निमित्तसमुद्भवैः ।
ग्रहशाकिनिसम्भूतैर्मुच्यते पाण्डुनन्दन
śakreśvaraṃ nṛpaśreṣṭha ye prapaśyanti bhaktitaḥ |
teṣāṃ janmakṛtaṃ pāpaṃ naśyate nātra saṃśayaḥ
||7||शक्रेश्वरं नृपश्रेष्ठ ये प्रपश्यन्ति भक्तितः ।
तेषां जन्मकृतं पापं नश्यते नात्र संशयः
agamyāgamane caiva avāhye caiva vāhite |
svāmimitravighāte yannaśyate nātra saṃśayaḥ
||8||अगम्यागमने चैव अवाह्ये चैव वाहिते ।
स्वामिमित्रविघाते यन्नश्यते नात्र संशयः
gopradānaṃ prakartavyaṃ śubhaṃ brāhmaṇapuṃgave |
dhuryaṃ vā dāpayettasmin sarvāṅgaruciraṃ nṛpa
||9||गोप्रदानं प्रकर्तव्यं शुभं ब्राह्मणपुंगवे ।
धुर्यं वा दापयेत्तस्मिन् सर्वाङ्गरुचिरं नृप
dātavyaṃ parayā bhaktyā svarge vāsamabhīpsatā |
etatte sarvamākhyātaṃ śakreśvaraphalaṃ nṛpa
||10||दातव्यं परया भक्त्या स्वर्गे वासमभीप्सता ।
एतत्ते सर्वमाख्यातं शक्रेश्वरफलं नृप
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śakreśvaratīrthamāhātmyavarṇanaṃ nāmaikaṣaṣṭitamo'dhyāyaḥ ||