kalakaleśvaratīrthaphalamāhātmyavarṇanam
śrīmārkaṇḍeya uvāca
narmadādakṣiṇe kūle tīrthaṃ kalakaleśvaram |
vikhyātaṃ sarvalokeṣu svayaṃ devena nirmitam
||1||नर्मदादक्षिणे कूले तीर्थं कलकलेश्वरम् ।
विख्यातं सर्वलोकेषु स्वयं देवेन निर्मितम्
andhakaṃ samare hatvā devadevo maheśvaraḥ |
sahito devagandharvaiḥ kinnaraiśca mahoragaiḥ
||2||अन्धकं समरे हत्वा देवदेवो महेश्वरः ।
सहितो देवगन्धर्वैः किन्नरैश्च महोरगैः
śaṅkhatūryaninādaiśca mṛdaṅgapaṇavādibhiḥ |
vīṇāveṇuravaiścānyaiḥ stutibhiḥ puṣkalādibhiḥ
||3||शङ्खतूर्यनिनादैश्च मृदङ्गपणवादिभिः ।
वीणावेणुरवैश्चान्यैः स्तुतिभिः पुष्कलादिभिः
gāyanti sāmāni yajūṃṣi cānye chandāṃsi cānye ṛcamudgiranti |
stotrairanekairapare gṛṇanti maheśvaraṃ tatra mahānubhāvāḥ
||4||गायन्ति सामानि यजूंषि चान्ये छन्दांसि चान्ये ऋचमुद्गिरन्ति ।
स्तोत्रैरनेकैरपरे गृणन्ति महेश्वरं तत्र महानुभावाः
pramathānāṃ ninādena kalkalena ca bandinām |
yasmātpratiṣṭhitaṃ liṅgaṃ tasmājjātaṃ tadākhyayā
||5||प्रमथानां निनादेन कल्कलेन च बन्दिनाम् ।
यस्मात्प्रतिष्ठितं लिङ्गं तस्माज्जातं तदाख्यया
tatra tīrthe tu yaḥ snātvā vīkṣetkalakaleśvaram |
vājapeyātparaṃ puṇyaṃ sa labhenmānavo bhuvi
||6||तत्र तीर्थे तु यः स्नात्वा वीक्षेत्कलकलेश्वरम् ।
वाजपेयात्परं पुण्यं स लभेन्मानवो भुवि
tena puṇyena pūtātmā prāṇatyāgāddivaṃ vrajet |
ārūḍhaḥ paramaṃ yānaṃ gīyamāno'psarogaṇaiḥ
||7||तेन पुण्येन पूतात्मा प्राणत्यागाद्दिवं व्रजेत् ।
आरूढः परमं यानं गीयमानोऽप्सरोगणैः
upabhujya mahābhogānkālena mahatā tataḥ |
martyaloke mahātmāsau jāyate vimale kule
||8||उपभुज्य महाभोगान्कालेन महता ततः ।
मर्त्यलोके महात्मासौ जायते विमले कुले
brāhmaṇaḥ subhago loke vedavedāṅgapāragaḥ |
vyādhiśokavinirmukto jīvecca śaradāṃ śatam
||9||ब्राह्मणः सुभगो लोके वेदवेदाङ्गपारगः ।
व्याधिशोकविनिर्मुक्तो जीवेच्च शरदां शतम्
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe kalakaleśvaratīrthaphalamāhātmyavarṇanaṃ nāma catuḥpañcāśadadhikaśatatamo'dhyāyaḥ ||