mahārṇavasya madhyastho bāhubhyāmataraṃ jalam
mārkaṇḍeya uvāca
naṣṭe loke punaścānye salilena samāvṛte |
mahārṇavasya madhyastho bāhubhyāmataraṃ jalam
||1||नष्टे लोके पुनश्चान्ये सलिलेन समावृते ।
महार्णवस्य मध्यस्थो बाहुभ्यामतरं जलम्
divye varṣaśate pūrṇe śrānto'haṃ nṛpasattama |
dhyātuṃ samārabhaṃ devaṃ mahadarṇavatāraṇam
||2||दिव्ये वर्षशते पूर्णे श्रान्तोऽहं नृपसत्तम ।
ध्यातुं समारभं देवं महदर्णवतारणम्
dhyāyamānastataḥ kāle apaśyaṃ pakṣiṇaṃ param |
hārakundendusaṃkāśaṃ bakaṃ gokṣīrapāṇḍuram
||3||ध्यायमानस्ततः काले अपश्यं पक्षिणं परम् ।
हारकुन्देन्दुसंकाशं बकं गोक्षीरपाण्डुरम्
tato'haṃ vismayāviṣṭastaṃ bakaṃ samudīkṣya vai |
asminmahārṇave ghore kuto'yaṃ pakṣisaṃbhavaḥ
||4||ततोऽहं विस्मयाविष्टस्तं बकं समुदीक्ष्य वै ।
अस्मिन्महार्णवे घोरे कुतोऽयं पक्षिसंभवः
taranbāhubhiraśrāntastaṃ bakaṃ pratyabhāṣiṣi |
pākṣarūpaṃ samāsthāya kastvamekārṇavīkṛte
||5||तरन्बाहुभिरश्रान्तस्तं बकं प्रत्यभाषिषि ।
पाक्षरूपं समास्थाय कस्त्वमेकार्णवीकृते
bhramase divyayogātmanmohayanniva māṃ prabho |
etatkathaya me sarvaṃ yo'si so'si namo'stu te
||6||भ्रमसे दिव्ययोगात्मन्मोहयन्निव मां प्रभो ।
एतत्कथय मे सर्वं योऽसि सोऽसि नमोऽस्तु ते
so'bravīnmāṃ mahādevo brahmāhaṃ viṣṇureva ca |
jagatsarvaṃ mayā vatsa saṃhṛtaṃ kiṃ na budhyase
||7||सोऽब्रवीन्मां महादेवो ब्रह्माहं विष्णुरेव च ।
जगत्सर्वं मया वत्स संहृतं किं न बुध्यसे
tava mātā pitāhaṃ vai viśvasya ca mahāmune |
kāruṇyaṃ mama saṃjātaṃ dṛṣṭvā magnaṃ mahārṇave
||8||तव माता पिताहं वै विश्वस्य च महामुने ।
कारुण्यं मम संजातं दृष्ट्वा मग्नं महार्णवे
pakṣirūpaṃ samāsthāya ato'trāhaṃ samāgataḥ |
kimarthamāturo bhūtvā bhramasītthaṃ mahārṇave
||9||पक्षिरूपं समास्थाय अतोऽत्राहं समागतः ।
किमर्थमातुरो भूत्वा भ्रमसीत्थं महार्णवे
śīghraṃ praviśa matpakṣau yena viśramase dvija |
evamuktastatastena devenāhaṃ nareśvara
||10||शीघ्रं प्रविश मत्पक्षौ येन विश्रमसे द्विज ।
एवमुक्तस्ततस्तेन देवेनाहं नरेश्वर
tato'haṃ tasya pakṣānte pralīnastu bhramañjale |
kāle yugasāhasrānte aśrānto'rṇavamadhyagaḥ
||11||ततोऽहं तस्य पक्षान्ते प्रलीनस्तु भ्रमञ्जले ।
काले युगसाहस्रान्ते अश्रान्तोऽर्णवमध्यगः
tataḥ śṛṇomi sahasā dikṣu sarvāsu suvrata |
kiṃcinnūpurasaṃmiśramadbhutaṃ śabdamuttamam
||12||ततः शृणोमि सहसा दिक्षु सर्वासु सुव्रत ।
किंचिन्नूपुरसंमिश्रमद्भुतं शब्दमुत्तमम्
tadārṇavajalaṃ sarvaṃ saṃkṣiptaṃ sahasābhavat |
kimetaditi saṃcintya diśaḥ samavalokayam
||13||तदार्णवजलं सर्वं संक्षिप्तं सहसाभवत् ।
किमेतदिति संचिन्त्य दिशः समवलोकयम्
daśa kanyāstato dikṣu āgatāśca mahārṇave |
vastrālaṃkārasahitā digbhyo nūpurabhūṣitāḥ
||14||दश कन्यास्ततो दिक्षु आगताश्च महार्णवे ।
वस्त्रालंकारसहिता दिग्भ्यो नूपुरभूषिताः
kāciccandrasamābhāsā kācidādityasaprabhā |
kācidaṃjanapuñjābhā kācidraktotpalaprabhā
||15||काचिच्चन्द्रसमाभासा काचिदादित्यसप्रभा ।
काचिदंजनपुञ्जाभा काचिद्रक्तोत्पलप्रभा
nānārūpadharā saumyā nānābharaṇabhūṣitā |
arghyapādyādibhirmālyairbakamabhyarcya suvratāḥ
||16||नानारूपधरा सौम्या नानाभरणभूषिता ।
अर्घ्यपाद्यादिभिर्माल्यैर्बकमभ्यर्च्य सुव्रताः
tatastaṃ parvatākāraṃ guhyaṃ pakṣiṇamavyayam |
praviveśa mahāghoraṃ parvato hyarṇavaṃ svarāṭ
||17||ततस्तं पर्वताकारं गुह्यं पक्षिणमव्ययम् ।
प्रविवेश महाघोरं पर्वतो ह्यर्णवं स्वराट्
yojanānāṃ sahasrāṇi tāvantyeva śatāni ca |
triṃśadyojanasāhasraṃ yāvadbhūmaṇḍalaṃ tviti
||18||योजनानां सहस्राणि तावन्त्येव शतानि च ।
त्रिंशद्योजनसाहस्रं यावद्भूमण्डलं त्विति
tato bhūmaṇḍalaṃ divyaṃ pañcaratnasamākulam |
divyasphaṭikasopānaṃ rukmastaṃbhamanoramam
||19||ततो भूमण्डलं दिव्यं पञ्चरत्नसमाकुलम् ।
दिव्यस्फटिकसोपानं रुक्मस्तंभमनोरमम्
yojanānāṃ sahasraṃ tu vistarāddviguṇāyatam |
vāpīkūpasamākīrṇaṃ prāsādāṭṭālakāvṛtam
||20||योजनानां सहस्रं तु विस्तराद्द्विगुणायतम् ।
वापीकूपसमाकीर्णं प्रासादाट्टालकावृतम्
kalpavṛkṣasamākīrṇaṃ dhvajaṣaṣṭivibhūṣitam |
tasminpuravare ramye nānāratnopaśobhitam
||21||कल्पवृक्षसमाकीर्णं ध्वजषष्टिविभूषितम् ।
तस्मिन्पुरवरे रम्ये नानारत्नोपशोभितम्
tathānyacca puraṃ ramyaṃ patākojjvalavedikam |
śatayojanavistīrṇaṃ tāvaddviguṇamāyatam
||22||तथान्यच्च पुरं रम्यं पताकोज्ज्वलवेदिकम् ।
शतयोजनविस्तीर्णं तावद्द्विगुणमायतम्
puramadhye tatastasminnadī paramaśobhanā |
mahatī puṇyasalilā nānāratnaśilā tathā
||23||पुरमध्ये ततस्तस्मिन्नदी परमशोभना ।
महती पुण्यसलिला नानारत्नशिला तथा
tasyāstīre mayā dṛṣṭaṃ taḍitsūryasamaprabham |
indranīlamahānīlaiścitaṃ ratnaiḥ samantataḥ
||24||तस्यास्तीरे मया दृष्टं तडित्सूर्यसमप्रभम् ।
इन्द्रनीलमहानीलैश्चितं रत्नैः समन्ततः
kvacidvahnisamākāraṃ kvacidindrāyudhaprabham |
kvaciddhūmraṃ kvacitpītaṃ kvacidraktaṃ kvacitsitam
||25||क्वचिद्वह्निसमाकारं क्वचिदिन्द्रायुधप्रभम् ।
क्वचिद्धूम्रं क्वचित्पीतं क्वचिद्रक्तं क्वचित्सितम्
nānāvarṇaiḥ samāyuktaṃ liṅgamadbhutadarśanam |
brahmaviṣṇvindrasādhyaiśca samantātparivāritam
||26||नानावर्णैः समायुक्तं लिङ्गमद्भुतदर्शनम् ।
ब्रह्मविष्ण्विन्द्रसाध्यैश्च समन्तात्परिवारितम्
nandīśvaragaṇādhyakṣaiścendrādityaiśca tadvṛtam |
paśyāmi liṅgamīśānaṃ mahāliṅgaṃ tameva ca
||27||नन्दीश्वरगणाध्यक्षैश्चेन्द्रादित्यैश्च तद्वृतम् ।
पश्यामि लिङ्गमीशानं महालिङ्गं तमेव च
parivārya tatastaṃ tu prasuptāndevadānavān |
nimīlitākṣānpaśyāmi divyābharaṇabhūṣitān
||28||परिवार्य ततस्तं तु प्रसुप्तान्देवदानवान् ।
निमीलिताक्षान्पश्यामि दिव्याभरणभूषितान्
tatastāḥ padmapatrākṣyo nāryaḥ paramasaṃmatāḥ |
nadyāstasyā jale snātvā divyapuṣpairmanoramaiḥ
||29||ततस्ताः पद्मपत्राक्ष्यो नार्यः परमसंमताः ।
नद्यास्तस्या जले स्नात्वा दिव्यपुष्पैर्मनोरमैः
dattvārghapādyaṃ vidhivalliṃgasya saha pakṣiṇā |
arcayantīrvarārohā daśa tāḥ pramadottamāḥ
||30||दत्त्वार्घपाद्यं विधिवल्लिंगस्य सह पक्षिणा ।
अर्चयन्तीर्वरारोहा दश ताः प्रमदोत्तमाः
tatastvabhyarcya talliṅgaṃ tasminneva purottame |
sarvā adarśanaṃ jagmurvidyuto'bhragaṇeṣviva
||31||ततस्त्वभ्यर्च्य तल्लिङ्गं तस्मिन्नेव पुरोत्तमे ।
सर्वा अदर्शनं जग्मुर्विद्युतोऽभ्रगणेष्विव
na cāsau pakṣirāṭtasminna striyo na ca devatāḥ |
tadevaikaṃ sthitaṃ liṅgamarcayanvismayānvitaḥ
||32||न चासौ पक्षिराट्तस्मिन्न स्त्रियो न च देवताः ।
तदेवैकं स्थितं लिङ्गमर्चयन्विस्मयान्वितः
tato'haṃ duḥkhamūḍhātmā rudramāyeti cintayan |
tataḥ kanyāḥ samuttīrya divyāṃbaravibhūṣaṇāḥ
||33||ततोऽहं दुःखमूढात्मा रुद्रमायेति चिन्तयन् ।
ततः कन्याः समुत्तीर्य दिव्यांबरविभूषणाः
bhāsayantyo jagatsarvaṃ vidyuto'bhragaṇāniva |
padmairhiraṇmayairdivyairarcayitvā śubhānanāḥ
||34||भासयन्त्यो जगत्सर्वं विद्युतोऽभ्रगणानिव ।
पद्मैर्हिरण्मयैर्दिव्यैरर्चयित्वा शुभाननाः
viviśustajjalaṃ kṣipraṃ samaṃtādvarabhūṣaṇāḥ |
tasminpuravare cānye tāmevāhaṃ punaḥpunaḥ
||35||विविशुस्तज्जलं क्षिप्रं समंताद्वरभूषणाः ।
तस्मिन्पुरवरे चान्ये तामेवाहं पुनःपुनः
paśyāmi hyamarāṃ kanyāmarcayantīṃ maheśvaram |
tato'haṃ tāṃ varārohāmapṛcchaṃ kamalekṣaṇām
||36||पश्यामि ह्यमरां कन्यामर्चयन्तीं महेश्वरम् ।
ततोऽहं तां वरारोहामपृच्छं कमलेक्षणाम्
kā tvamasminpure devi vasase śivamarcatī |
tāścāgatāḥ striyaḥ sarvāḥ kva gatāste gaṇeśvarāḥ
||37||का त्वमस्मिन्पुरे देवि वससे शिवमर्चती ।
ताश्चागताः स्त्रियः सर्वाः क्व गतास्ते गणेश्वराः
namo'stu te mahābhāge brūhi puṇye maheśvari |
tava prasādādvijñātumetadicchāmi suvrate |
dayāṃ kṛtvā mahādevi kathayasva mamānaghe
||38||नमोऽस्तु ते महाभागे ब्रूहि पुण्ये महेश्वरि ।
तव प्रसादाद्विज्ञातुमेतदिच्छामि सुव्रते ।
दयां कृत्वा महादेवि कथयस्व ममानघे
śryuvāca
vismṛtāhaṃ kathaṃ vipra dṛṣṭvā kalpe purātane |
mā te'bhūtsmṛtivibhraṃśaḥ sā cāhaṃ kalpavāhinī
||39||विस्मृताहं कथं विप्र दृष्ट्वा कल्पे पुरातने ।
मा तेऽभूत्स्मृतिविभ्रंशः सा चाहं कल्पवाहिनी
narmadā nāma vikhyātā rudradehādviniḥsṛtā |
yāstāḥ kanyāstvayā dṛṣṭā hyarcayantyo maheśvaram
||40||नर्मदा नाम विख्याता रुद्रदेहाद्विनिःसृता ।
यास्ताः कन्यास्त्वया दृष्टा ह्यर्चयन्त्यो महेश्वरम्
yābhistviha samānītaḥ pakṣirājasamanvitāḥ |
diśastā viddhi sarveśāḥ sarvāstvaṃ munisattama
||41||याभिस्त्विह समानीतः पक्षिराजसमन्विताः ।
दिशस्ता विद्धि सर्वेशाः सर्वास्त्वं मुनिसत्तम
tiryakpakṣisvarūpeṇa mahāyogī maheśvaraḥ |
ebhiḥ śivapurādvipra ānītaḥ sa maheśvaraḥ
||42||तिर्यक्पक्षिस्वरूपेण महायोगी महेश्वरः ।
एभिः शिवपुराद्विप्र आनीतः स महेश्वरः
saiṣa devo mahādevo liṅgamūrtirvyavasthitaḥ |
arcyate brahmaviṣṇvindraiḥ surāsurajagadguruḥ
||43||सैष देवो महादेवो लिङ्गमूर्तिर्व्यवस्थितः ।
अर्च्यते ब्रह्मविष्ण्विन्द्रैः सुरासुरजगद्गुरुः
layamāyāti yasmāddhi jagatsarvaṃ carācaram |
tena liṅgamiti proktaṃ purāṇajñairmaharṣibhiḥ
||44||लयमायाति यस्माद्धि जगत्सर्वं चराचरम् ।
तेन लिङ्गमिति प्रोक्तं पुराणज्ञैर्महर्षिभिः
tena devagaṇāḥ sarve saṃkṣiptā māyayā purā |
pralīnāścaiva lokeśa na dṛśyante hi sāṃpratam
||45||तेन देवगणाः सर्वे संक्षिप्ता मायया पुरा ।
प्रलीनाश्चैव लोकेश न दृश्यन्ते हि सांप्रतम्
punardṛśyā bhaviṣyanti sṛjamānāḥ svayaṃbhuvā |
sāhaṃ liṅgārcanaparā narmadā nāma nāmataḥ
||46||पुनर्दृश्या भविष्यन्ति सृजमानाः स्वयंभुवा ।
साहं लिङ्गार्चनपरा नर्मदा नाम नामतः
kālaṃ yugasahasrasya rudrasya paricārikā |
asya prasādādamarastathā tvaṃ dvijapuṃgava
||47||कालं युगसहस्रस्य रुद्रस्य परिचारिका ।
अस्य प्रसादादमरस्तथा त्वं द्विजपुंगव
satyārjavadayāyuktaḥ siddho'si tvaṃ śivārcanāt |
evamuktvā tu sā devī tatraivāntaradhīyata
||48||सत्यार्जवदयायुक्तः सिद्धोऽसि त्वं शिवार्चनात् ।
एवमुक्त्वा तु सा देवी तत्रैवान्तरधीयत
tāḥ striyaḥ sa ca deveśo bakarūpo maheśvaraḥ |
tasyāstadvacanaṃ śrutvā avatīrya mahānadīm
||49||ताः स्त्रियः स च देवेशो बकरूपो महेश्वरः ।
तस्यास्तद्वचनं श्रुत्वा अवतीर्य महानदीम्
snātvā samarcaya tvaṃ hi vidhinā mantrapūrvakam |
tato'haṃ sahasā tasmātsamuttīrya jalāśayāt
||50||स्नात्वा समर्चय त्वं हि विधिना मन्त्रपूर्वकम् ।
ततोऽहं सहसा तस्मात्समुत्तीर्य जलाशयात्
na ca paśyāmi talliṅgaṃ na ca tāṃ nimnagāṃ nṛpa |
tadaiva lokāḥ saṃjātāḥ kṣitiścaiva sakānanā
||51||न च पश्यामि तल्लिङ्गं न च तां निम्नगां नृप ।
तदैव लोकाः संजाताः क्षितिश्चैव सकानना
ṛkṣacandrārkavitataṃ tadeva ca nabhastalam |
yathāpūrvamadṛṣṭaṃ tu tathaiva ca punaḥ kṛtam |
nato'haṃ manasā devamapūjayaṃ maheśvaram
||52||ऋक्षचन्द्रार्कविततं तदेव च नभस्तलम् ।
यथापूर्वमदृष्टं तु तथैव च पुनः कृतम् ।
नतोऽहं मनसा देवमपूजयं महेश्वरम्
evaṃ bake purā kalpe mayā dṛṣṭeyamavyayā |
narmadā martyalokasya mahāpātakanāśinī
||53||एवं बके पुरा कल्पे मया दृष्टेयमव्यया ।
नर्मदा मर्त्यलोकस्य महापातकनाशिनी
tasmāddharmaparairvipraiḥ kṣatraśūdraviśādibhiḥ |
sadā sevyā mahābhāgā dharmavṛddhyarthakāribhiḥ
||54||तस्माद्धर्मपरैर्विप्रैः क्षत्रशूद्रविशादिभिः ।
सदा सेव्या महाभागा धर्मवृद्ध्यर्थकारिभिः
ye'pi bhaktayā sakṛttoye narmadāyā maheśvaram |
snātvā te sarvaṃ pāpaṃ nāśayantyasaṃśayam
||55||येऽपि भक्तया सकृत्तोये नर्मदाया महेश्वरम् ।
स्नात्वा ते सर्वं पापं नाशयन्त्यसंशयम्
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe narmadāmāhātmye bakakalpasamudbhavo nāmāṣṭamo'dhyāyaḥ ||