nandāhradatīrthamāhātmyavarṇanam
mārkaṇḍeya uvāca
tato gacchenmahārāja nandāhradamanuttamam |
yatra siddhā mahābhāgā nandā devī varapradā
||1||ततो गच्छेन्महाराज नन्दाह्रदमनुत्तमम् ।
यत्र सिद्धा महाभागा नन्दा देवी वरप्रदा
mahiṣāsure mahākāye purā devabhayaṃkare |
śūlinyā śūlabhinnāṅge kṛte dānavasattame
||2||महिषासुरे महाकाये पुरा देवभयंकरे ।
शूलिन्या शूलभिन्नाङ्गे कृते दानवसत्तमे
yenaikādaśarudrāśca hyādityāḥ samarudgaṇāḥ |
vasavo vāyunā sārddhaṃ candrādityau sureśvara
||3||येनैकादशरुद्राश्च ह्यादित्याः समरुद्गणाः ।
वसवो वायुना सार्द्धं चन्द्रादित्यौ सुरेश्वर
balinā nirjitā yena brahmaviṣṇumaheśvarāḥ |
saṅgrāme sumahāghore kṛte devabhayaṃkare
||4||बलिना निर्जिता येन ब्रह्मविष्णुमहेश्वराः ।
सङ्ग्रामे सुमहाघोरे कृते देवभयंकरे
kṛtvā tatkadanaṃ ghoraṃ nandā devī sureśvarī |
yasmātsnātā viśālākṣī tena nandāhradaḥ smṛtaḥ
||5||कृत्वा तत्कदनं घोरं नन्दा देवी सुरेश्वरी ।
यस्मात्स्नाता विशालाक्षी तेन नन्दाह्रदः स्मृतः
tatra tīrthe tu yaḥ snātvā nandāmuddiśya bhārata |
dadāti dānaṃ viprebhyaḥ so'śvamedhaphalaṃ labhet
||6||तत्र तीर्थे तु यः स्नात्वा नन्दामुद्दिश्य भारत ।
ददाति दानं विप्रेभ्यः सोऽश्वमेधफलं लभेत्
bhairavaṃ caiva kedāraṃ tathā rudraṃ mahālayam |
nandāhradaścaturthaḥ syātpañcamaṃ bhuvi durlabham
||7||भैरवं चैव केदारं तथा रुद्रं महालयम् ।
नन्दाह्रदश्चतुर्थः स्यात्पञ्चमं भुवि दुर्लभम्
bahavastaṃ na jānanti kāmarāgasamanvitāḥ |
narmadāyā hradaṃ puṇyaṃ sarvapātakanāśanam
||8||बहवस्तं न जानन्ति कामरागसमन्विताः ।
नर्मदाया ह्रदं पुण्यं सर्वपातकनाशनम्
tatra tīrthe tu yaḥ snātvā nandāṃ devīṃ prapūjayet |
kiṃ tasya himavanmadhyagamanena prayojanam
||9||तत्र तीर्थे तु यः स्नात्वा नन्दां देवीं प्रपूजयेत् ।
किं तस्य हिमवन्मध्यगमनेन प्रयोजनम्
paramārthamavijñāya paryaṭanti tamovṛtāḥ |
teṣāṃ samāgame pārtha śrama eva hi kevalam
||10||परमार्थमविज्ञाय पर्यटन्ति तमोवृताः ।
तेषां समागमे पार्थ श्रम एव हि केवलम्
pṛthivyāṃ sāgarāntāyāṃ snānadānena yatphalam |
tatphalaṃ samavāpnoti snātvā nandāhrade nṛpa
||11||पृथिव्यां सागरान्तायां स्नानदानेन यत्फलम् ।
तत्फलं समवाप्नोति स्नात्वा नन्दाह्रदे नृप
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe nandāhradatīrthamāhātmyavarṇanaṃ nāma catvāriṃśadadhikaśatatamo'dhyāyaḥ ||