mokṣatīrthamāhātmyavarṇanam
śrīmārkaṇḍeya uvāca
tato gacchetpāṇḍuputra mokṣatīrthamanuttamam |
sevitaṃ devagandharvairmunibhiśca tapodhanaiḥ
||1||ततो गच्छेत्पाण्डुपुत्र मोक्षतीर्थमनुत्तमम् ।
सेवितं देवगन्धर्वैर्मुनिभिश्च तपोधनैः
bahavastanna jānanti viṣṇumāyāvimohitāḥ |
yatra siddhā mahābhāgā ṛṣayaḥ satapodhanāḥ
||2||बहवस्तन्न जानन्ति विष्णुमायाविमोहिताः ।
यत्र सिद्धा महाभागा ऋषयः सतपोधनाः
pulastyaḥ pulaho vidvānkratuścaiva mahāmatiḥ |
prācetaso vasiṣṭhaśca dakṣo nārada eva ca
||3||पुलस्त्यः पुलहो विद्वान्क्रतुश्चैव महामतिः ।
प्राचेतसो वसिष्ठश्च दक्षो नारद एव च
ete cānye mahābhāgāḥ saptasāhasrasaṃjñitāḥ |
mokṣaṃ gatāḥ saha sutaistattīrthaṃ tena mokṣadam
||4||एते चान्ये महाभागाः सप्तसाहस्रसंज्ञिताः ।
मोक्षं गताः सह सुतैस्तत्तीर्थं तेन मोक्षदम्
tatra pravāhamadhye tu patitā tamahā nadī |
tatra tatsaṅgamaṃ tīrthaṃ sarvapāpakṣayaṃkaram
||5||तत्र प्रवाहमध्ये तु पतिता तमहा नदी ।
तत्र तत्सङ्गमं तीर्थं सर्वपापक्षयंकरम्
ṛgyajuḥsāmasaṃjñānāmabhyastānāṃ tu yatphalam |
samyagjaptvā tu vidhinā gāyatrīṃ tatra tallabhet
||6||ऋग्यजुःसामसंज्ञानामभ्यस्तानां तु यत्फलम् ।
सम्यग्जप्त्वा तु विधिना गायत्रीं तत्र तल्लभेत्
tatra dattaṃ hutaṃ japtaṃ tīrthasevārjitaṃ phalam |
sarvamakṣayatāṃ yāti mokṣasādhanamuttamam
||7||तत्र दत्तं हुतं जप्तं तीर्थसेवार्जितं फलम् ।
सर्वमक्षयतां याति मोक्षसाधनमुत्तमम्
tatra tīrthe mṛtānāṃ tu saṃnyāsena dvijanmanām |
anivartikā gatisteṣāṃ mokṣatīrthaprabhāvataḥ
||8||तत्र तीर्थे मृतानां तु संन्यासेन द्विजन्मनाम् ।
अनिवर्तिका गतिस्तेषां मोक्षतीर्थप्रभावतः
eṣa te vidhiruddiṣṭaḥ saṃkṣepeṇa mayānagha |
vyuṣṭistīrthasya mahatī purāṇe yābhidhīyate
||9||एष ते विधिरुद्दिष्टः संक्षेपेण मयानघ ।
व्युष्टिस्तीर्थस्य महती पुराणे याभिधीयते
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe mokṣatīrthamāhātmyavarṇanaṃ nāma ṣaṣṭyuttaraśatatamo'dhyāyaḥ ||