uttare narmadākūle sarvapāpakṣayaṃkaram
śrīmārkaṇḍeya uvāca
tato gacchenmahīpāla tīrthamaṅgārakaṃ śivam |
uttare narmadākūle sarvapāpakṣayaṃkaram
||1||ततो गच्छेन्महीपाल तीर्थमङ्गारकं शिवम् ।
उत्तरे नर्मदाकूले सर्वपापक्षयंकरम्
caturthyaṅgārakadine saṃkalpya kṛtaniścayaḥ |
snāyādastaṃ gate sūrye sandhyopāsanatatparaḥ
||2||चतुर्थ्यङ्गारकदिने संकल्प्य कृतनिश्चयः ।
स्नायादस्तं गते सूर्ये सन्ध्योपासनतत्परः
pūjayellohitaṃ bhaktyā gandhamālyavibhūṣaṇaiḥ |
saṃsthāpyasthaṇḍile devaṃ raktacandanacarcitam
||3||पूजयेल्लोहितं भक्त्या गन्धमाल्यविभूषणैः ।
संस्थाप्यस्थण्डिले देवं रक्तचन्दनचर्चितम्
aṅgārakāyeti namaḥ karṇikāyāṃ prapūjayet |
kujāya bhūmiputrāya raktāṅgāya suvāsase
||4||अङ्गारकायेति नमः कर्णिकायां प्रपूजयेत् ।
कुजाय भूमिपुत्राय रक्ताङ्गाय सुवाससे
harakopodbhavāyeti svedajāyātibāhave |
sarvakāmapradāyeti pūrvādiṣu daleṣu ca
||5||हरकोपोद्भवायेति स्वेदजायातिबाहवे ।
सर्वकामप्रदायेति पूर्वादिषु दलेषु च
evaṃ sampūjya vidhivaddadyādarghyaṃ vidhānataḥ |
bhūmiputra mahāvīrya svedodbhava pinākinaḥ
||6||एवं सम्पूज्य विधिवद्दद्यादर्घ्यं विधानतः ।
भूमिपुत्र महावीर्य स्वेदोद्भव पिनाकिनः
aṅgāraka mahātejā lohitāṅga namo'stu te |
karakaṃ vārisaṃyuktaṃ śālitaṃdulapūritam
||7||अङ्गारक महातेजा लोहिताङ्ग नमोऽस्तु ते ।
करकं वारिसंयुक्तं शालितंदुलपूरितम्
sahiraṇyaṃ savastraṃ ca modakopari saṃsthitam |
brāhmaṇāya nivedyaṃ tatkujo me prīyatāmiti
||8||सहिरण्यं सवस्त्रं च मोदकोपरि संस्थितम् ।
ब्राह्मणाय निवेद्यं तत्कुजो मे प्रीयतामिति
arghaṃ dattvā vidhānena raktacandanavāriṇā |
raktapuṣpasamākīrṇaṃ tilataṃdulamiśritam
||9||अर्घं दत्त्वा विधानेन रक्तचन्दनवारिणा ।
रक्तपुष्पसमाकीर्णं तिलतंदुलमिश्रितम्
kṛtvā tāmramaye pātre maṇḍale vartule śubhe |
kṛtvā śirasi tatpātraṃ jānubhyāṃ dharaṇīṃ gataḥ
||10||कृत्वा ताम्रमये पात्रे मण्डले वर्तुले शुभे ।
कृत्वा शिरसि तत्पात्रं जानुभ्यां धरणीं गतः
mantrapūtaṃ mahābhāga dadyādarghyaṃ vicakṣaṇaḥ |
tato bhuñjīta maunena kṣāratilāmlavarjitam
||11||मन्त्रपूतं महाभाग दद्यादर्घ्यं विचक्षणः ।
ततो भुञ्जीत मौनेन क्षारतिलाम्लवर्जितम्
snigdhaṃ mṛdusamadhuramātmanaḥ śreya icchatā |
evaṃ caturthe samprāpte caturthyaṅgārake nṛpa
||12||स्निग्धं मृदुसमधुरमात्मनः श्रेय इच्छता ।
एवं चतुर्थे सम्प्राप्ते चतुर्थ्यङ्गारके नृप
sauvarṇaṃ kārayeddevaṃ yathāśakti surūpiṇam |
sthāpayettāmrake pātre guḍapīṭhasamanvite
||13||सौवर्णं कारयेद्देवं यथाशक्ति सुरूपिणम् ।
स्थापयेत्ताम्रके पात्रे गुडपीठसमन्विते
gandhapuṣpādibhirdevaṃ pūjayedguḍasaṃsthitam |
īśānyāṃ sthāpayeddevaṃ guḍatoyasamanvitam
||14||गन्धपुष्पादिभिर्देवं पूजयेद्गुडसंस्थितम् ।
ईशान्यां स्थापयेद्देवं गुडतोयसमन्वितम्
kāsāreṇa tathāgneyyāṃ sthāpayetkarakaṃ param |
raktatandulasaṃmiśraṃ nairṛtyāṃ vāyugocare
||15||कासारेण तथाग्नेय्यां स्थापयेत्करकं परम् ।
रक्ततन्दुलसंमिश्रं नैरृत्यां वायुगोचरे
sthāpayenmodakaiḥ sārdhaṃ caturthaṃ karakaṃ budhaḥ |
sūtreṇa veṣṭitagrīvaṃ gandhamālyairalaṃkṛtam
||16||स्थापयेन्मोदकैः सार्धं चतुर्थं करकं बुधः ।
सूत्रेण वेष्टितग्रीवं गन्धमाल्यैरलंकृतम्
śaṅkhatūryaninādena jayaśabdādimaṅgalaiḥ |
raktāmbaradharaṃ vipraṃ raktamālyānulepanam
||17||शङ्खतूर्यनिनादेन जयशब्दादिमङ्गलैः ।
रक्ताम्बरधरं विप्रं रक्तमाल्यानुलेपनम्
vedimadhyagataṃ vāpi mahadāsanasaṃsthitam |
surūpaṃ subhagaṃ śāntaṃ sarvabhūtahite ratam
||18||वेदिमध्यगतं वापि महदासनसंस्थितम् ।
सुरूपं सुभगं शान्तं सर्वभूतहिते रतम्
vedavidyāvratasnātaṃ sarvaśāstraviśāradam |
pūjayitvā yathānyāyaṃ vācayetpāṇḍunandana
||19||वेदविद्याव्रतस्नातं सर्वशास्त्रविशारदम् ।
पूजयित्वा यथान्यायं वाचयेत्पाण्डुनन्दन
raktāṃ gāṃ ca tato dadyādraktenānaḍuhā saha |
prīyatāṃ bhūmijo devaḥ sarvadaivatapūjitaḥ
||20||रक्तां गां च ततो दद्याद्रक्तेनानडुहा सह ।
प्रीयतां भूमिजो देवः सर्वदैवतपूजितः
vipraṃ pradakṣiṇīkṛtya patnīputrasamanvitaḥ |
pitṛmātṛsuhṛtsārddhaṃ kṣamāpya ca visarjayet
||21||विप्रं प्रदक्षिणीकृत्य पत्नीपुत्रसमन्वितः ।
पितृमातृसुहृत्सार्द्धं क्षमाप्य च विसर्जयेत्
evaṃ kṛtasya tasyātha tasmiṃstīrthe viśeṣataḥ |
yatpuṇyaṃ phalamuddiṣṭaṃ tatte sarvaṃ vadāmyaham
||22||एवं कृतस्य तस्याथ तस्मिंस्तीर्थे विशेषतः ।
यत्पुण्यं फलमुद्दिष्टं तत्ते सर्वं वदाम्यहम्
sapta janmāni rājendra surūpaḥ subhago bhavet |
tīrthasyāsya prabhāvena nātra kāryā vicāraṇā
||23||सप्त जन्मानि राजेन्द्र सुरूपः सुभगो भवेत् ।
तीर्थस्यास्य प्रभावेन नात्र कार्या विचारणा
akāmo vā sakāmo vā tatra tīrthe mṛto naraḥ |
aṅgārakapuraṃ yāti devagandharvapūjitaḥ
||24||अकामो वा सकामो वा तत्र तीर्थे मृतो नरः ।
अङ्गारकपुरं याति देवगन्धर्वपूजितः
upabhujya yathānyāyaṃ divyānbhogānanuttamān |
iha mānuṣyaloke vai rājā bhavati dhārmikaḥ
||25||उपभुज्य यथान्यायं दिव्यान्भोगाननुत्तमान् ।
इह मानुष्यलोके वै राजा भवति धार्मिकः
surūpaḥ subhagaścaiva sarvavyādhivivarjitaḥ |
jīvedvarṣaśataṃ sāgraṃ sarvalokanamaskṛtaḥ
||26||सुरूपः सुभगश्चैव सर्वव्याधिविवर्जितः ।
जीवेद्वर्षशतं साग्रं सर्वलोकनमस्कृतः
iti śrīskānde mahāpurāṇe ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe maṅgaleśvaratīrthamāhātmyavarṇanaṃ nāmāṣṭācatvāriṃśadadhikaśatatamo'dhyāyaḥ ||