revāyāścottare kūle sarvapāpavināśanam
śrīmārkaṇḍeya uvāca
tato gacchettu rājendra kahloḍītīrthamuttamam |
revāyāścottare kūle sarvapāpavināśanam
||1||ततो गच्छेत्तु राजेन्द्र कह्लोडीतीर्थमुत्तमम् ।
रेवायाश्चोत्तरे कूले सर्वपापविनाशनम्
hitārthaṃ sarvabhūtānāmṛṣibhiḥ sthāpitaṃ purā |
tapasā tu samuddhṛtya narmadāyāṃ mahāmbhasi
||2||हितार्थं सर्वभूतानामृषिभिः स्थापितं पुरा ।
तपसा तु समुद्धृत्य नर्मदायां महाम्भसि
snātvā tu kapilātīrthe kapilāṃ yaḥ prayacchati |
śrutvā cākhyānakaṃ divyaṃ brāhmaṇāñchṛṇu yatphalam
||3||स्नात्वा तु कपिलातीर्थे कपिलां यः प्रयच्छति ।
श्रुत्वा चाख्यानकं दिव्यं ब्राह्मणाञ्छृणु यत्फलम्
sarveṣāmeva dānānāṃ kapilādānamuttamam |
brāhmaṇānveṣitaṃ pūrvamṛṣidevasamāgame
||4||सर्वेषामेव दानानां कपिलादानमुत्तमम् ।
ब्राह्मणान्वेषितं पूर्वमृषिदेवसमागमे
sadyaḥ prasūtāṃ kapilāṃ śobhanāṃ yaḥ prayacchati |
sopavāso jitakrodhastasya puṇyaphalaṃ śṛṇu
||5||सद्यः प्रसूतां कपिलां शोभनां यः प्रयच्छति ।
सोपवासो जितक्रोधस्तस्य पुण्यफलं शृणु
sasamudraguhā tena saśailavanakānanā |
dattā caiva mahābāho pṛthivī nātra saṃśayaḥ
||6||ससमुद्रगुहा तेन सशैलवनकानना ।
दत्ता चैव महाबाहो पृथिवी नात्र संशयः
vācikaṃ mānasaṃ pāpaṃ karmaṇā yatpurā kṛtam |
naśyate kapilāṃ dattvā saptajanmārjitaṃ nṛpa
||7||वाचिकं मानसं पापं कर्मणा यत्पुरा कृतम् ।
नश्यते कपिलां दत्त्वा सप्तजन्मार्जितं नृप
bhūmidānaṃ dhanaṃ dhānyaṃ hastyaśvakanakādikam |
kapilādānasyaikasya kalāṃ nārhanti ṣoḍaśīm
||8||भूमिदानं धनं धान्यं हस्त्यश्वकनकादिकम् ।
कपिलादानस्यैकस्य कलां नार्हन्ति षोडशीम्
tatra tīrthe naraḥ snātvā kapilāṃ yaḥ prayacchati |
mṛto viṣṇupuraṃ yāti gīyamāno'psarogaṇaiḥ
||9||तत्र तीर्थे नरः स्नात्वा कपिलां यः प्रयच्छति ।
मृतो विष्णुपुरं याति गीयमानोऽप्सरोगणैः
yāvanti tasyā romāṇi savatsāyāstu bhārata |
tāvadvarṣasahasrāṇi sa svarge krīḍate ciram
||10||यावन्ति तस्या रोमाणि सवत्सायास्तु भारत ।
तावद्वर्षसहस्राणि स स्वर्गे क्रीडते चिरम्
tato'vakīrṇakālena tviha mānuṣyatāṃ gataḥ |
dhanadhānyasamopeto jāyate vipule kule
||11||ततोऽवकीर्णकालेन त्विह मानुष्यतां गतः ।
धनधान्यसमोपेतो जायते विपुले कुले
vedavidyā vratasnātaḥ sarvaśāstraviśāradaḥ |
vyādhiśokavinirmukto jīvecca śaradāṃ śatam
||12||वेदविद्या व्रतस्नातः सर्वशास्त्रविशारदः ।
व्याधिशोकविनिर्मुक्तो जीवेच्च शरदां शतम्
etatte sarvamākhyātaṃ kalhoḍītīrthamuttamam |
yatkṛtvā sarvapāpebhyo mucyate nātra saṃśayaḥ
||13||एतत्ते सर्वमाख्यातं कल्होडीतीर्थमुत्तमम् ।
यत्कृत्वा सर्वपापेभ्यो मुच्यते नात्र संशयः
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe kahloḍītīrthamāhātmyavarṇanaṃ nāmaikonaviṃśatyuttaraśatatamo'dhyāyaḥ ||