brahmāvartamiti khyātaṃ sarvapāpapraṇāśanam
śrīmārkaṇḍeya uvāca
tato gacchecca rājendra tīrthaṃ trailokyaviśrutam |
brahmāvartamiti khyātaṃ sarvapāpapraṇāśanam
||1||ततो गच्छेच्च राजेन्द्र तीर्थं त्रैलोक्यविश्रुतम् ।
ब्रह्मावर्तमिति ख्यातं सर्वपापप्रणाशनम्
tatra saṃnihito brahmā nityasevī yudhiṣṭhira |
ūrdhvabāhurnirālambacakāra bhramaṇaṃ sadā
||2||तत्र संनिहितो ब्रह्मा नित्यसेवी युधिष्ठिर ।
ऊर्ध्वबाहुर्निरालम्बचकार भ्रमणं सदा
ekāhāravaśe'tiṣṭhaddvādaśābdaṃ mahāvratī |
atra tīrthe vidhānena cintayan vai maheśvaram
||3||एकाहारवशेऽतिष्ठद्द्वादशाब्दं महाव्रती ।
अत्र तीर्थे विधानेन चिन्तयन् वै महेश्वरम्
tena tatpuṇyamākhyātaṃ brahmāvartamiti prabho |
tatra snātvā vidhānena tarpayetpitṛdevatāḥ
||4||तेन तत्पुण्यमाख्यातं ब्रह्मावर्तमिति प्रभो ।
तत्र स्नात्वा विधानेन तर्पयेत्पितृदेवताः
arcayeddevamīśānaṃ viṣṇuṃ vā parameśvaram |
yatphalaṃ sarvayajñānāṃ vidhivaddakṣiṇāvatām
||5||अर्चयेद्देवमीशानं विष्णुं वा परमेश्वरम् ।
यत्फलं सर्वयज्ञानां विधिवद्दक्षिणावताम्
tatphalaṃ samavāpnoti tattīrthasya prabhāvataḥ |
yasmiṃstīrthe tu yo devo dānavo vā dvijo'tha vā
||6||तत्फलं समवाप्नोति तत्तीर्थस्य प्रभावतः ।
यस्मिंस्तीर्थे तु यो देवो दानवो वा द्विजोऽथ वा
siddhastenaiva tannāmnā khyātaṃ loke mahacca tat |
na jalaṃ na sthalaṃ nāma kṣetraṃ vā hyūṣarāṇi ca
||7||सिद्धस्तेनैव तन्नाम्ना ख्यातं लोके महच्च तत् ।
न जलं न स्थलं नाम क्षेत्रं वा ह्यूषराणि च
pavitratvaṃ labhantyete pauruṣeṇa vinā nṛṇām |
sāmarthyānniścayāddhairyātsidhyanti puruṣā nṛpa
||8||पवित्रत्वं लभन्त्येते पौरुषेण विना नृणाम् ।
सामर्थ्यान्निश्चयाद्धैर्यात्सिध्यन्ति पुरुषा नृप
pramādāttasya lobhena patanti narake dhruvam
||9||प्रमादात्तस्य लोभेन पतन्ति नरके ध्रुवम्
saṃnirudhyendriyagrāmaṃ yatra yatra vasenmuniḥ |
tatra tatra kurukṣetraṃ naimiṣaṃ puṣkarāṇi ca
||10||संनिरुध्येन्द्रियग्रामं यत्र यत्र वसेन्मुनिः ।
तत्र तत्र कुरुक्षेत्रं नैमिषं पुष्कराणि च
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe brahmāvartatīrthamāhātmyavarṇanaṃ nāmaikatriṃśo'dhyāyaḥ ||