ādityeśvaratīrthamāhātmyavarṇanam
śrīmārkaṇḍeya uvāca
bhūyo'pyahaṃ pravakṣyāmi ādityeśvaramuttamam |
sarvaduḥkhaharaṃ pārtha sarvavighnavināśanam
||1||भूयोऽप्यहं प्रवक्ष्यामि आदित्येश्वरमुत्तमम् ।
सर्वदुःखहरं पार्थ सर्वविघ्नविनाशनम्
āyuḥśrīvarddhanaṃ nityaṃ putradaṃ svargadaṃ śivam |
yasya tīrthasya cānyāni tīrthāni kurunandana
||2||आयुःश्रीवर्द्धनं नित्यं पुत्रदं स्वर्गदं शिवम् ।
यस्य तीर्थस्य चान्यानि तीर्थानि कुरुनन्दन
nālabhanta śriyaṃ nāke martye pātālagocare |
kurukṣetraṃ gayā gaṅgā naimiṣaṃ puṣkaraṃ tathā
||3||नालभन्त श्रियं नाके मर्त्ये पातालगोचरे ।
कुरुक्षेत्रं गया गङ्गा नैमिषं पुष्करं तथा
vārāṇasī ca kedāraṃ prayāgaṃ rudranandanam |
mahākālaṃ sahasrākṣaṃ śuklatīrthaṃ nṛpottama
||4||वाराणसी च केदारं प्रयागं रुद्रनन्दनम् ।
महाकालं सहस्राक्षं शुक्लतीर्थं नृपोत्तम
ravitīrthasya sarvāṇi kalāṃ nārhanti ṣoḍaśīm |
ravitīrthe hi yadvṛttaṃ tacchṛṇuṣva nṛpottama
||5||रवितीर्थस्य सर्वाणि कलां नार्हन्ति षोडशीम् ।
रवितीर्थे हि यद्वृत्तं तच्छृणुष्व नृपोत्तम
snehātte kathayiṣyāmi vārddhakenātipīḍitaḥ |
śṛṇvantu ṛṣayaḥ sarve taponiṣṭhā mahaujasaḥ
||6||स्नेहात्ते कथयिष्यामि वार्द्धकेनातिपीडितः ।
शृण्वन्तु ऋषयः सर्वे तपोनिष्ठा महौजसः
śrutaṃ me rudrasāṃnidhye nandiskandagaṇaiḥ saha |
pārvatyā pṛṣṭaḥ śambhuśca ravitīrthasya yatphalam
||7||श्रुतं मे रुद्रसांनिध्ये नन्दिस्कन्दगणैः सह ।
पार्वत्या पृष्टः शम्भुश्च रवितीर्थस्य यत्फलम्
śambhunā ca yadākhyātaṃ girijāyāḥ sasambhramam |
tatsarvamekacittena rudrodgītaṃ śrutaṃ mayā
||8||शम्भुना च यदाख्यातं गिरिजायाः ससम्भ्रमम् ।
तत्सर्वमेकचित्तेन रुद्रोद्गीतं श्रुतं मया
tatte'haṃ sampravakṣyāmi śṛṇu yatnena pāṇḍava |
durbhikṣopahatā viprā narmadāṃ tu samāśritāḥ
||9||तत्तेऽहं सम्प्रवक्ष्यामि शृणु यत्नेन पाण्डव ।
दुर्भिक्षोपहता विप्रा नर्मदां तु समाश्रिताः
uddālako vaśiṣṭhaśca māṇḍavyo gautamastathā |
yājñavalkyo'tha gargaśca śāṇḍilyo gālavastathā
||10||उद्दालको वशिष्ठश्च माण्डव्यो गौतमस्तथा ।
याज्ञवल्क्योऽथ गर्गश्च शाण्डिल्यो गालवस्तथा
nāciketo vibhāṇḍaśca vālakhilyādayastathā |
śātātapaśca śaṅkhaśca jaiminirgobhilastathā
||11||नाचिकेतो विभाण्डश्च वालखिल्यादयस्तथा ।
शातातपश्च शङ्खश्च जैमिनिर्गोभिलस्तथा
jaigīṣavyaḥ śatānīkaḥ sarva eva samāgatāḥ |
tīrthayātrā kṛtā taistu narmadāyāḥ samantataḥ
||12||जैगीषव्यः शतानीकः सर्व एव समागताः ।
तीर्थयात्रा कृता तैस्तु नर्मदायाः समन्ततः
ādityeśvaramāyātāḥ prasaṅgādṛṣipuṃgavāḥ |
vṛkṣaiḥ saṃchāditaṃ śubhraṃ dhavatindukapāṭalaiḥ
||13||आदित्येश्वरमायाताः प्रसङ्गादृषिपुंगवाः ।
वृक्षैः संछादितं शुभ्रं धवतिन्दुकपाटलैः
jambīrairarjunaiḥ kubjaiḥ śamīkesarakiṃśukaiḥ |
tasmiṃstīrthe mahāpuṇye sugandhikusumākule
||14||जम्बीरैरर्जुनैः कुब्जैः शमीकेसरकिंशुकैः ।
तस्मिंस्तीर्थे महापुण्ये सुगन्धिकुसुमाकुले
punnāganālikeraiśca khadiraiḥ kalpapādapaiḥ |
anekaśvāpadākīrṇaṃ mṛgamārjārasaṃkulam
||15||पुन्नागनालिकेरैश्च खदिरैः कल्पपादपैः ।
अनेकश्वापदाकीर्णं मृगमार्जारसंकुलम्
ṛkṣahastisamākīrṇaṃ citrakaiścopaśobhitam |
praviṣṭā ṛṣayaḥ sarve vane puṣpasamākule
||16||ऋक्षहस्तिसमाकीर्णं चित्रकैश्चोपशोभितम् ।
प्रविष्टा ऋषयः सर्वे वने पुष्पसमाकुले
vanānte ca striyo dṛṣṭvā raktā raktāmbarānvitāḥ |
raktamālyānuśobhāḍhyā raktacandanacarcitāḥ
||17||वनान्ते च स्त्रियो दृष्ट्वा रक्ता रक्ताम्बरान्विताः ।
रक्तमाल्यानुशोभाढ्या रक्तचन्दनचर्चिताः
raktābharaṇasaṃyuktāḥ pāśahastā bhayāvahāḥ |
tāsāṃ samīpagā dṛṣṭāḥ kṛṣṇajīmūtasannibhāḥ
||18||रक्ताभरणसंयुक्ताः पाशहस्ता भयावहाः ।
तासां समीपगा दृष्टाः कृष्णजीमूतसन्निभाः
mahākāyā bhīmavaktrāḥ pāśahastā bhayāvahāḥ |
anāvṛṣṭyupamā dṛṣṭā āturāḥ piṅgalocanāḥ
||19||महाकाया भीमवक्त्राः पाशहस्ता भयावहाः ।
अनावृष्ट्युपमा दृष्टा आतुराः पिङ्गलोचनाः
dīrghajihvā karālāsyā tīkṣṇadaṃṣṭrā durāsadā |
vṛddhā nārī kuruśreṣṭha dṛṣṭānyā ṛṣipuṃgavaiḥ
||20||दीर्घजिह्वा करालास्या तीक्ष्णदंष्ट्रा दुरासदा ।
वृद्धा नारी कुरुश्रेष्ठ दृष्टान्या ऋषिपुंगवैः
tataḥ samīpagā vṛddhā tasya vṛndasya bhārata |
svādhyāyaniratā viprā dṛṣṭāstaiḥ pāpakarmabhiḥ
||21||ततः समीपगा वृद्धा तस्य वृन्दस्य भारत ।
स्वाध्यायनिरता विप्रा दृष्टास्तैः पापकर्मभिः
ūcuste tu samūhena brāhmaṇāṃstapasi sthitān |
asmākaṃ svāminaḥ sarve tiṣṭhante tīrthamadhyataḥ |
te prasthāpyā mahābhāgāḥ sarvathaiva tvarānvitāḥ
||22||ऊचुस्ते तु समूहेन ब्राह्मणांस्तपसि स्थितान् ।
अस्माकं स्वामिनः सर्वे तिष्ठन्ते तीर्थमध्यतः ।
ते प्रस्थाप्या महाभागाः सर्वथैव त्वरान्विताः
tacchrutvā vacanaṃ teṣāṃ sarve caiva tvarānvitāḥ |
jagmuste narmadākakṣaṃ dṛṣṭvā revāṃ dvijottamāḥ
||23||तच्छ्रुत्वा वचनं तेषां सर्वे चैव त्वरान्विताः ।
जग्मुस्ते नर्मदाकक्षं दृष्ट्वा रेवां द्विजोत्तमाः
tataḥ kecitstuvantyanye jaya devi namo'stu te
||24||ततः केचित्स्तुवन्त्यन्ये जय देवि नमोऽस्तु ते
namo'stu te siddhagaṇairniṣevite namo'stu te sarvapavitramaṅgale |
namo'stu te viprasahasrasevite namo'stu rudrāṅgasamudbhave vare
||25||नमोऽस्तु ते सिद्धगणैर्निषेविते नमोऽस्तु ते सर्वपवित्रमङ्गले ।
नमोऽस्तु ते विप्रसहस्रसेविते नमोऽस्तु रुद्राङ्गसमुद्भवे वरे
namo'stu te sarvapavitrapāvane namo'stu te devi varaprade śive |
namāmi te śītajale sukhaprade saridvare pāpahare vicitrite
||26||नमोऽस्तु ते सर्वपवित्रपावने नमोऽस्तु ते देवि वरप्रदे शिवे ।
नमामि ते शीतजले सुखप्रदे सरिद्वरे पापहरे विचित्रिते
anekabhūtaughasusevitāṅge gandharvayakṣoragapāvitāṅge |
mahāgajaughairmahiṣairvarāhairāpīyase toyamahormimāle
||27||अनेकभूतौघसुसेविताङ्गे गन्धर्वयक्षोरगपाविताङ्गे ।
महागजौघैर्महिषैर्वराहैरापीयसे तोयमहोर्मिमाले
namāmi te sarvavare sukhaprade vimocayāsmānaghapāśabaddhān
||28||नमामि ते सर्ववरे सुखप्रदे विमोचयास्मानघपाशबद्धान्
bhramanti tāvannarakeṣu martyā yāvattavāmbho nahi saṃśrayanti |
spṛṣṭaṃ karaiścandramaso raveścettaddevi dadyātparamaṃ padaṃ tu
||29||भ्रमन्ति तावन्नरकेषु मर्त्या यावत्तवाम्भो नहि संश्रयन्ति ।
स्पृष्टं करैश्चन्द्रमसो रवेश्चेत्तद्देवि दद्यात्परमं पदं तु
anekasaṃsārabhayārditānāṃ pāpairanekairabhiveṣṭitānām |
gatistvamambhojasamānavaktre dvandvairanekairabhisaṃvṛtānām
||30||अनेकसंसारभयार्दितानां पापैरनेकैरभिवेष्टितानाम् ।
गतिस्त्वमम्भोजसमानवक्त्रे द्वन्द्वैरनेकैरभिसंवृतानाम्
nadyaśca pūtā vimalā bhavanti tvāṃ devi samprāpya na saṃśayo'tra |
duḥkhāturāṇāmabhayaṃ dadāsi śiṣṭairanekairabhipūjitāsi
||31||नद्यश्च पूता विमला भवन्ति त्वां देवि सम्प्राप्य न संशयोऽत्र ।
दुःखातुराणामभयं ददासि शिष्टैरनेकैरभिपूजितासि
viṇmūtradehāśca nimagnadehā bhramanti tāvannarakeṣu martyāḥ |
mahābaladhvastataraṅgabhaṅgaṃ jalaṃ na yāvattava saṃspṛśanti
||32||विण्मूत्रदेहाश्च निमग्नदेहा भ्रमन्ति तावन्नरकेषु मर्त्याः ।
महाबलध्वस्ततरङ्गभङ्गं जलं न यावत्तव संस्पृशन्ति
mlecchāḥ pulindāstvatha yātudhānāḥ pibanti ye'ṃbhastava devi puṇyam |
te'pi pramucyanti bhayācca ghorātkimatra viprā bhavapāśabhītāḥ
||33||म्लेच्छाः पुलिन्दास्त्वथ यातुधानाः पिबन्ति येऽंभस्तव देवि पुण्यम् ।
तेऽपि प्रमुच्यन्ति भयाच्च घोरात्किमत्र विप्रा भवपाशभीताः
sarāṃsi nadyaḥ kṣayamabhyupetā ghore yuge'sminkalināvasṛṣṭe |
tvaṃ bhrājase devi jalaughapūrṇā divīva nakṣatrapathe ca gaṅgā
||34||सरांसि नद्यः क्षयमभ्युपेता घोरे युगेऽस्मिन्कलिनावसृष्टे ।
त्वं भ्राजसे देवि जलौघपूर्णा दिवीव नक्षत्रपथे च गङ्गा
tava prāsādādvarade viśiṣṭe kālaṃ yathemaṃ paripālayitvā |
yāsyāma mokṣaṃ tava suprasādādvayaṃ yathā tvaṃ kuru naḥ prasādam
||35||तव प्रासादाद्वरदे विशिष्टे कालं यथेमं परिपालयित्वा ।
यास्याम मोक्षं तव सुप्रसादाद्वयं यथा त्वं कुरु नः प्रसादम्
tvāmāśritā ye śaraṇaṃ gatāśca gatistvamambeva piteva putrān |
tvatpālitā yāvadimaṃ sughoraṃ kālaṃ tvanāvṛṣṭihataṃ kṣipāmaḥ
||36||त्वामाश्रिता ये शरणं गताश्च गतिस्त्वमम्बेव पितेव पुत्रान् ।
त्वत्पालिता यावदिमं सुघोरं कालं त्वनावृष्टिहतं क्षिपामः
evaṃ stutā tadā devī narmadā saritāṃ varā |
pratyakṣā sā parā mūrtirbrāhmaṇānāṃ yudhiṣṭhira
||37||एवं स्तुता तदा देवी नर्मदा सरितां वरा ।
प्रत्यक्षा सा परा मूर्तिर्ब्राह्मणानां युधिष्ठिर
śrīmārkaṇḍeya uvāca
paṭhanti ye stotramidaṃ narendra śṛṇvanti bhaktyā parayā praśāntāḥ |
te yānti rudraṃ vṛṣasaṃyutena yānena divyāmbarabhūṣitāṅgāḥ
||38||पठन्ति ये स्तोत्रमिदं नरेन्द्र शृण्वन्ति भक्त्या परया प्रशान्ताः ।
ते यान्ति रुद्रं वृषसंयुतेन यानेन दिव्याम्बरभूषिताङ्गाः
ye stotrametatsatataṃ japanti snātvā ca toyena tu narmadāyāḥ |
tebhyo'ntakāle sariduttameyaṃ gatiṃ viśuddhāmacirāddadāti
||39||ये स्तोत्रमेतत्सततं जपन्ति स्नात्वा च तोयेन तु नर्मदायाः ।
तेभ्योऽन्तकाले सरिदुत्तमेयं गतिं विशुद्धामचिराद्ददाति
prātaḥ samutthāya tathā śayāno yaḥ kīrtayetānudinaṃ stavendram |
dehakṣayaṃ sve salile dadāti samāśrayaṃ tasya mahānubhāva
||40||प्रातः समुत्थाय तथा शयानो यः कीर्तयेतानुदिनं स्तवेन्द्रम् ।
देहक्षयं स्वे सलिले ददाति समाश्रयं तस्य महानुभाव
pāpairvimuktā divi modamānāḥ sambhoginaścaiva tu nānyathā ca
||41||पापैर्विमुक्ता दिवि मोदमानाः सम्भोगिनश्चैव तु नान्यथा च
prasannā narmadā devī stotreṇānena bhārata |
jalenāpyāyitān viprān dakṣiṇāpathavāhinī
||42||प्रसन्ना नर्मदा देवी स्तोत्रेणानेन भारत ।
जलेनाप्यायितान् विप्रान् दक्षिणापथवाहिनी
amṛtatvaṃ tu vo dadmi yogibhiryanna gamyate |
durlabhaṃ yatsuraiḥ sarvairmatprasādāllabhiṣyatha
||43||अमृतत्वं तु वो दद्मि योगिभिर्यन्न गम्यते ।
दुर्लभं यत्सुरैः सर्वैर्मत्प्रसादाल्लभिष्यथ
iti te brāhmaṇā rājaṃllabdhā varamanuttamam |
gamiṣyantaḥ prītacittā dadṛśuścitramadbhutam
||44||इति ते ब्राह्मणा राजंल्लब्धा वरमनुत्तमम् ।
गमिष्यन्तः प्रीतचित्ता ददृशुश्चित्रमद्भुतम्
śrīmārkaṇḍeya uvāca
dṛṣṭāstaiḥ puruṣāḥ pārtha narmadātaṭasaṃsthitāḥ |
snānadevārcanāsaktāḥ pañca eva mahābalāḥ
||45||दृष्टास्तैः पुरुषाः पार्थ नर्मदातटसंस्थिताः ।
स्नानदेवार्चनासक्ताः पञ्च एव महाबलाः
te dṛṣṭā brāhmaṇaiḥ sarvairvedavedāṅgapāragaiḥ |
saṃpṛṣṭāstairmahārāja yathā tadavadhāraya
||46||ते दृष्टा ब्राह्मणैः सर्वैर्वेदवेदाङ्गपारगैः ।
संपृष्टास्तैर्महाराज यथा तदवधारय
viprā ūcuḥ
vanānte strīyugaṃ dṛṣṭvā mahāraudraṃ bhayāvaham |
vṛddhāśca puruṣāstatra pāśahastā bhayāvahāḥ
||47||वनान्ते स्त्रीयुगं दृष्ट्वा महारौद्रं भयावहम् ।
वृद्धाश्च पुरुषास्तत्र पाशहस्ता भयावहाः
durdharṣā durnirīkṣyāśca itaścetaśca cañcalāḥ |
vyāharantaḥ śubhāṃ vācaṃ na tatra gatirasti vai
||48||दुर्धर्षा दुर्निरीक्ष्याश्च इतश्चेतश्च चञ्चलाः ।
व्याहरन्तः शुभां वाचं न तत्र गतिरस्ति वै
aparasparayoḥ sarve nirīkṣantaḥ punaḥpunaḥ |
taistu yadvacanaṃ proktaṃ tatsarvaṃ kathyatāmiti
||49||अपरस्परयोः सर्वे निरीक्षन्तः पुनःपुनः ।
तैस्तु यद्वचनं प्रोक्तं तत्सर्वं कथ्यतामिति
asmākaṃ puruṣāḥ pañca tiṣṭhanti tatra sattamāḥ |
te prasthāpyā mahābhāgāḥ sarvathaiva tvarānvitāḥ
||50||अस्माकं पुरुषाः पञ्च तिष्ठन्ति तत्र सत्तमाः ।
ते प्रस्थाप्या महाभागाः सर्वथैव त्वरान्विताः
atha te puruṣāḥ pañca śrutvā vākyamidaṃ śubham |
parasparaṃ nirīkṣanto vadanti ca punaḥpunaḥ
||51||अथ ते पुरुषाः पञ्च श्रुत्वा वाक्यमिदं शुभम् ।
परस्परं निरीक्षन्तो वदन्ति च पुनःपुनः
kva te kasya kuto yātāḥ kimuktaṃ tairbhayāvahaiḥ
||52||क्व ते कस्य कुतो याताः किमुक्तं तैर्भयावहैः
puruṣā ūcuḥ
tīrthāvagāhanaṃ sarvaiḥ pūrvadakṣiṇapaścimaiḥ |
uttaraiśca kṛtaṃ bhaktyā na pāpaṃ tairvyapohitam
||53||तीर्थावगाहनं सर्वैः पूर्वदक्षिणपश्चिमैः ।
उत्तरैश्च कृतं भक्त्या न पापं तैर्व्यपोहितम्
niṣpāpāścātha saṃjātāstīrthasyāsya prabhāvataḥ |
śṛṇvantu ṛṣayaḥ sarve vahnikālopamā dvijāḥ
||54||निष्पापाश्चाथ संजातास्तीर्थस्यास्य प्रभावतः ।
शृण्वन्तु ऋषयः सर्वे वह्निकालोपमा द्विजाः
pātakāni ca ghorāṇi yānyacintyāni dehinām |
pāpiṣṭhena tu caikena gurudārā niṣevitā
||55||पातकानि च घोराणि यान्यचिन्त्यानि देहिनाम् ।
पापिष्ठेन तु चैकेन गुरुदारा निषेविता
hṛtaṃ cānyena mitrasvaṃ suvarṇaṃ ca dhanaṃ tathā |
brahmahatyā mahāraudrā kṛtā cānyena pātakam
||56||हृतं चान्येन मित्रस्वं सुवर्णं च धनं तथा ।
ब्रह्महत्या महारौद्रा कृता चान्येन पातकम्
surāpānaṃ tu cānyasya saṃjātaṃ cāpyakāmataḥ |
govadhyā cāpyakāmena kṛtā caikena pāpinā
||57||सुरापानं तु चान्यस्य संजातं चाप्यकामतः ।
गोवध्या चाप्यकामेन कृता चैकेन पापिना
akāmato'pi sarveṣāṃ pātakāni narādhipa |
brāhmaṇānāṃ tu te śrutvā vākyaṃ tadvismayānvitāḥ
||58||अकामतोऽपि सर्वेषां पातकानि नराधिप ।
ब्राह्मणानां तु ते श्रुत्वा वाक्यं तद्विस्मयान्विताः
sadya eva tadā jātāḥ pāpiṣṭhā gatakalmaṣāḥ |
tīrthasyāsya prabhāvena narmadāyāḥ prabhāvataḥ
||59||सद्य एव तदा जाताः पापिष्ठा गतकल्मषाः ।
तीर्थस्यास्य प्रभावेन नर्मदायाः प्रभावतः
na kvacitpātakānāṃ tu praveśaścātra jāyate |
evaṃ saṃcitya te sarve pāpiṣṭhāśca parasparam
||60||न क्वचित्पातकानां तु प्रवेशश्चात्र जायते ।
एवं संचित्य ते सर्वे पापिष्ठाश्च परस्परम्
citrabhānuḥ smṛtastaistu vicintya hṛdaye harim |
snātvā revājale puṇye tarpitāḥ pitṛdevatāḥ
||61||चित्रभानुः स्मृतस्तैस्तु विचिन्त्य हृदये हरिम् ।
स्नात्वा रेवाजले पुण्ये तर्पिताः पितृदेवताः
natvā tu bhāskaraṃ devaṃ hṛdi dhyātvā janārdanam |
pradakṣiṇaṃ tu taṃ bhaktyā jvalantaṃ jātavedasam
||62||नत्वा तु भास्करं देवं हृदि ध्यात्वा जनार्दनम् ।
प्रदक्षिणं तु तं भक्त्या ज्वलन्तं जातवेदसम्
patitāḥ pāṇḍavaśreṣṭha pāpodvignā mahīpate |
sāttvikīṃ vāsanāṃ kṛtvā tyaktvā rajastamastathā
||63||पतिताः पाण्डवश्रेष्ठ पापोद्विग्ना महीपते ।
सात्त्विकीं वासनां कृत्वा त्यक्त्वा रजस्तमस्तथा
hataṃ taiḥ pāvake sarvaṃ revāyā uttare taṭe |
vimānasthāstadā dṛṣṭā brāhmaṇaiste yudhiṣṭhira
||64||हतं तैः पावके सर्वं रेवाया उत्तरे तटे ।
विमानस्थास्तदा दृष्टा ब्राह्मणैस्ते युधिष्ठिर
āścaryamatulaṃ dṛṣṭamṛṣibhirnarmadātaṭe |
tadāprabhṛti te sarve rāgadveṣavivarjitāḥ
||65||आश्चर्यमतुलं दृष्टमृषिभिर्नर्मदातटे ।
तदाप्रभृति ते सर्वे रागद्वेषविवर्जिताः
ravitīrthaṃ dvijā hṛṣṭāḥ sevante mokṣakāṅkṣayā |
tīrthasyāsya ca yatpuṇyaṃ tacchṛṇuṣva narādhipa
||66||रवितीर्थं द्विजा हृष्टाः सेवन्ते मोक्षकाङ्क्षया ।
तीर्थस्यास्य च यत्पुण्यं तच्छृणुष्व नराधिप
pīḍito vṛddhabhāvena bhaktyā prīto nareśvara |
uddeśaṃ kathayiṣyāmi dvikrośābhyantare sthitaḥ
||67||पीडितो वृद्धभावेन भक्त्या प्रीतो नरेश्वर ।
उद्देशं कथयिष्यामि द्विक्रोशाभ्यन्तरे स्थितः
kurukṣetraṃ yathā puṇyaṃ ravitīrthaṃ śrutaṃ mayā |
īśvareṇa purā khyātaṃ ṣaṇmukhasya narādhipa
||68||कुरुक्षेत्रं यथा पुण्यं रवितीर्थं श्रुतं मया ।
ईश्वरेण पुरा ख्यातं षण्मुखस्य नराधिप
śrutaṃ rudrācca taiḥ sarvairahaṃ tatra samīpagaḥ |
īśvara uvāca - mārtaṇḍagrahaṇe prāpte ye vrajanti ṣaḍānana |
ravitīrthe kurukṣetre tulyametatphalaṃ labhet
||69||श्रुतं रुद्राच्च तैः सर्वैरहं तत्र समीपगः ।
ईश्वर उवाच - मार्तण्डग्रहणे प्राप्ते ये व्रजन्ति षडानन ।
रवितीर्थे कुरुक्षेत्रे तुल्यमेतत्फलं लभेत्
snāne dāne tathā japye home caiva viśeṣataḥ |
kurukṣetre samaṃ puṇyaṃ nātra kāryā vicāraṇā
||70||स्नाने दाने तथा जप्ये होमे चैव विशेषतः ।
कुरुक्षेत्रे समं पुण्यं नात्र कार्या विचारणा
grāme vā yadi vāraṇye puṇyā sarvatra narmadā |
ravitīrthe viśeṣeṇa revā puṇyaphalapradā
||71||ग्रामे वा यदि वारण्ये पुण्या सर्वत्र नर्मदा ।
रवितीर्थे विशेषेण रेवा पुण्यफलप्रदा
ṣaṣṭhyāṃ sūryadine bhaktyā vyatīpāte ca vai dhṛtau |
saṃkrāntau grahaṇe'māyāṃ ye vrajanti jitendriyāḥ
||72||षष्ठ्यां सूर्यदिने भक्त्या व्यतीपाते च वै धृतौ ।
संक्रान्तौ ग्रहणेऽमायां ये व्रजन्ति जितेन्द्रियाः
kāmakrodhairvimuktāśca rāgadveṣaistathaiva ca |
upoṣya parayā bhaktyā devasyāgre narādhipa
||73||कामक्रोधैर्विमुक्ताश्च रागद्वेषैस्तथैव च ।
उपोष्य परया भक्त्या देवस्याग्रे नराधिप
rātrau jāgaraṇaṃ kṛtvā dīpaṃ devasya bodhayet |
kathāṃ vai vaiṣṇavīṃ pārtha vedābhyasanameva ca
||74||रात्रौ जागरणं कृत्वा दीपं देवस्य बोधयेत् ।
कथां वै वैष्णवीं पार्थ वेदाभ्यसनमेव च
ṛgvedaṃ vā yajurvedaṃ sāmavedamatharvaṇam |
ṛcamekāṃ japedyastu sa vedaphalamāpnuyāt
||75||ऋग्वेदं वा यजुर्वेदं सामवेदमथर्वणम् ।
ऋचमेकां जपेद्यस्तु स वेदफलमाप्नुयात्
gāyatryā ca caturvedaphalamāpnoti mānavaḥ |
prabhāte pūjayedviprānannadānahiraṇyataḥ
||76||गायत्र्या च चतुर्वेदफलमाप्नोति मानवः ।
प्रभाते पूजयेद्विप्रानन्नदानहिरण्यतः
bhūmidānena vastreṇa annadānena śaktitaḥ |
chatropānahaśayyādigṛhadānena pāṇḍava
||77||भूमिदानेन वस्त्रेण अन्नदानेन शक्तितः ।
छत्रोपानहशय्यादिगृहदानेन पाण्डव
grāmadhūrvahadānena gajakanyāhayena ca |
vidyāśakaṭadānena sarveṣāmabhayaṃ bhavet
||78||ग्रामधूर्वहदानेन गजकन्याहयेन च ।
विद्याशकटदानेन सर्वेषामभयं भवेत्
śatruśca mitratāṃ yāti viṣaṃ caivāmṛtaṃ bhavet |
grahā bhavanti suprītāḥ prītastasya divākaraḥ
||79||शत्रुश्च मित्रतां याति विषं चैवामृतं भवेत् ।
ग्रहा भवन्ति सुप्रीताः प्रीतस्तस्य दिवाकरः
etatte sarvamākhyātaṃ ravitīrthaphalaṃ nṛpa |
ye śṛṇvanti narā bhaktyā ravitīrthaphalaṃ śubham
||80||एतत्ते सर्वमाख्यातं रवितीर्थफलं नृप ।
ये शृण्वन्ति नरा भक्त्या रवितीर्थफलं शुभम्
te'pi pāpavinirmuktā raviloke vasanti hi |
godānena ca yatpuṇyaṃ yatpuṇyaṃ bhṛgudarśane
||81||तेऽपि पापविनिर्मुक्ता रविलोके वसन्ति हि ।
गोदानेन च यत्पुण्यं यत्पुण्यं भृगुदर्शने
kedāra udakaṃ pītvā tatpuṇyaṃ jāyate nṛṇām |
abdamaśvatthasevāyāṃ tilapātraprado bhavet
||82||केदार उदकं पीत्वा तत्पुण्यं जायते नृणाम् ।
अब्दमश्वत्थसेवायां तिलपात्रप्रदो भवेत्
tatphalaṃ samavāpnoti ādityeśvarakīrtanāt |
śrute yasya prabhāve na jāyate yannṛpātmaja
||83||तत्फलं समवाप्नोति आदित्येश्वरकीर्तनात् ।
श्रुते यस्य प्रभावे न जायते यन्नृपात्मज
tatsarvaṃ kathayiṣyāmi bhaktyā tava mahīpate |
pāpāni ca pralīyante bhinnapātre yathā jalam
||84||तत्सर्वं कथयिष्यामि भक्त्या तव महीपते ।
पापानि च प्रलीयन्ते भिन्नपात्रे यथा जलम्
tīrthasyābhimukho nityaṃ jāyate nātra saṃśayaḥ |
guhyādguhyataraṃ tīrthaṃ kathitaṃ tava pāṇḍava
||85||तीर्थस्याभिमुखो नित्यं जायते नात्र संशयः ।
गुह्याद्गुह्यतरं तीर्थं कथितं तव पाण्डव
pāpiṣṭhānāṃ kṛtaghnānāṃ svāmimitrāvaghātinām |
tīrthākhyānaṃ śubhaṃ teṣāṃ gopitavyaṃ sadā budhaiḥ
||86||पापिष्ठानां कृतघ्नानां स्वामिमित्रावघातिनाम् ।
तीर्थाख्यानं शुभं तेषां गोपितव्यं सदा बुधैः
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ādityeśvaratīrthamāhātmyavarṇanaṃ nāma ṣaṣṭitamo'dhyāyaḥ ||