yatra siddho mahādevo varuṇo nṛpasattama
śrīmārkaṇḍeya uvāca
tato gacchenmahārāja varuṇeśvaramuttamam |
yatra siddho mahādevo varuṇo nṛpasattama
||1||ततो गच्छेन्महाराज वरुणेश्वरमुत्तमम् ।
यत्र सिद्धो महादेवो वरुणो नृपसत्तम
piṇyākaśākaparṇaiśca kṛcchracāndrāyaṇādibhiḥ |
ārādhya girijānāthaṃ tataḥ siddhiṃ parāṃ gataḥ
||2||पिण्याकशाकपर्णैश्च कृच्छ्रचान्द्रायणादिभिः ।
आराध्य गिरिजानाथं ततः सिद्धिं परां गतः
tatra tīrthe tu yaḥ snātvā saṃtarpya pitṛdevatāḥ |
pūjayecchaṅkaraṃ bhaktyā sa yāti paramāṃ gatim
||3||तत्र तीर्थे तु यः स्नात्वा संतर्प्य पितृदेवताः ।
पूजयेच्छङ्करं भक्त्या स याति परमां गतिम्
kuṇḍikāṃ vardhanīṃ vāpi mahadvā jalabhājanam |
annena sahitaṃ pārtha tasya puṇyaphalaṃ śṛṇu
||4||कुण्डिकां वर्धनीं वापि महद्वा जलभाजनम् ।
अन्नेन सहितं पार्थ तस्य पुण्यफलं शृणु
yatphalaṃ labhate martyaḥ satre dvādaśavārṣike |
tatphalaṃ samavāpnoti nātra kāryā vicāraṇā
||5||यत्फलं लभते मर्त्यः सत्रे द्वादशवार्षिके ।
तत्फलं समवाप्नोति नात्र कार्या विचारणा
sarveṣāmeva dānānāmannadānaṃ paraṃ smṛtam |
sadyaḥ prītikaraṃ toyamannaṃ ca nṛpasattama
||6||सर्वेषामेव दानानामन्नदानं परं स्मृतम् ।
सद्यः प्रीतिकरं तोयमन्नं च नृपसत्तम
tatratīrthe mṛtānāṃ tu narāṇāṃ bhāvitātmanām |
varuṇasya pure vāso yāvadābhūtasaṃplavam
||7||तत्रतीर्थे मृतानां तु नराणां भावितात्मनाम् ।
वरुणस्य पुरे वासो यावदाभूतसंप्लवम्
paścātpūrṇe tataḥ kāle martyaloke prajāyate |
annadānaprado nityaṃ jīvedvarṣaśataṃ naraḥ
||8||पश्चात्पूर्णे ततः काले मर्त्यलोके प्रजायते ।
अन्नदानप्रदो नित्यं जीवेद्वर्षशतं नरः
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe varuṇeśvaratīrthamāhātmyavarṇanaṃ nāmaikāśītitamo'dhyāyaḥ ||