karkaṭeśvaratīrthamāhātmyavarṇanam
mārkaṇḍeya uvāca
dharmaputra tato gacchetkarkaṭeśvaramuttamam |
uttare narmadākūle sarvapāpakṣayaṃkaram
||1||धर्मपुत्र ततो गच्छेत्कर्कटेश्वरमुत्तमम् ।
उत्तरे नर्मदाकूले सर्वपापक्षयंकरम्
tatra snātvā vidhānena yastu pūjayate śivam |
anivartikā gatistasya rudralokādasaṃśayam
||2||तत्र स्नात्वा विधानेन यस्तु पूजयते शिवम् ।
अनिवर्तिका गतिस्तस्य रुद्रलोकादसंशयम्
tasya tīrthasya māhātmyaṃ purāṇe yacchrutaṃ mayā |
na tadvarṇayituṃ śakyaṃ saṃkṣepeṇa vadāmyataḥ
||3||तस्य तीर्थस्य माहात्म्यं पुराणे यच्छ्रुतं मया ।
न तद्वर्णयितुं शक्यं संक्षेपेण वदाम्यतः
tatra tīrthe tu yaḥ kuryātkiṃcitkarma śubhāśubham |
harṣānmadānmahārāja tatsarvaṃ jāyate'kṣayam
||4||तत्र तीर्थे तु यः कुर्यात्किंचित्कर्म शुभाशुभम् ।
हर्षान्मदान्महाराज तत्सर्वं जायतेऽक्षयम्
tatra tīrthe tapastaptvā vālakhilyā marīcayaḥ |
ramante'dyāpi lokeṣu svecchayā kurunandana
||5||तत्र तीर्थे तपस्तप्त्वा वालखिल्या मरीचयः ।
रमन्तेऽद्यापि लोकेषु स्वेच्छया कुरुनन्दन
tatrasthāstanna jānanti narājñānabahiṣkṛtāḥ |
śarīrasthamivātmānamakṣayaṃ jyotiravyayam
||6||तत्रस्थास्तन्न जानन्ति नराज्ञानबहिष्कृताः ।
शरीरस्थमिवात्मानमक्षयं ज्योतिरव्ययम्
tatra tīrthe nṛpaśreṣṭha devī nārāyaṇī purā |
adyāpi tapate ghoraṃ tapo yāvatkilārbudam
||7||तत्र तीर्थे नृपश्रेष्ठ देवी नारायणी पुरा ।
अद्यापि तपते घोरं तपो यावत्किलार्बुदम्
tatra tīrthe tu yaḥ snātvā tarpayetpitṛdevatāḥ |
tasya te dvādaśābdāni tṛptiṃ yānti pitāmahāḥ
||8||तत्र तीर्थे तु यः स्नात्वा तर्पयेत्पितृदेवताः ।
तस्य ते द्वादशाब्दानि तृप्तिं यान्ति पितामहाः
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe karkaṭeśvaratīrthamāhātmyavarṇanaṃ nāma saptatriṃśadadhikaśatatamo'dhyāyaḥ ||