kālāgnirudratīrthamāhātmyavarṇanam
śrīmārkaṇḍeya uvāca
jāleśvaraṃ tato gacchelliṅgamādyaṃ svayambhuvaḥ |
kālāgnirudraṃ vikhyātaṃ bhṛgukacche vyavasthitam
||1||जालेश्वरं ततो गच्छेल्लिङ्गमाद्यं स्वयम्भुवः ।
कालाग्निरुद्रं विख्यातं भृगुकच्छे व्यवस्थितम्
sarvapāpapraśamanaṃ sarvopadravanāśanam |
kṣetrapāpavināśāya kṛpayā ca samutthitam
||2||सर्वपापप्रशमनं सर्वोपद्रवनाशनम् ।
क्षेत्रपापविनाशाय कृपया च समुत्थितम्
purā kalpe'suragaṇairākrānte bhuvanatraye |
vedoktakarmanāśe ca dharme ca vilayaṃ gate
||3||पुरा कल्पेऽसुरगणैराक्रान्ते भुवनत्रये ।
वेदोक्तकर्मनाशे च धर्मे च विलयं गते
devarṣimunisiddheṣu viśvāsaparameṣu ca |
kālāgnirudrādutpanno dhūmaḥ kālodbhavodbhavaḥ
||4||देवर्षिमुनिसिद्धेषु विश्वासपरमेषु च ।
कालाग्निरुद्रादुत्पन्नो धूमः कालोद्भवोद्भवः
dhūmātsamutthitaṃ liṅgaṃ bhittvā pātālasaptakam |
avaṭaṃ dakṣiṇe kṛtvā liṅgaṃ tatraiva tiṣṭhati
||5||धूमात्समुत्थितं लिङ्गं भित्त्वा पातालसप्तकम् ।
अवटं दक्षिणे कृत्वा लिङ्गं तत्रैव तिष्ठति
tatra tīrthe nṛpaśreṣṭha kuṇḍaṃ jvālāsamudbhavam |
yatra sā patitā jvālā śivasya dahataḥ puram
||6||तत्र तीर्थे नृपश्रेष्ठ कुण्डं ज्वालासमुद्भवम् ।
यत्र सा पतिता ज्वाला शिवस्य दहतः पुरम्
tatrāvaṭaṃ samudbhūtaṃ dhūmāvartastato'bhavat |
tasminkuṇḍe tu yaḥ snānaṃ kṛtvā vai narmadājale
||7||तत्रावटं समुद्भूतं धूमावर्तस्ततोऽभवत् ।
तस्मिन्कुण्डे तु यः स्नानं कृत्वा वै नर्मदाजले
kuryācchrāddhaṃ pitṛbhyo vai pūjayecca trilocanam |
kālāgnirudranāmāni sa gacchetparamāṃ gatim
||8||कुर्याच्छ्राद्धं पितृभ्यो वै पूजयेच्च त्रिलोचनम् ।
कालाग्निरुद्रनामानि स गच्छेत्परमां गतिम्
yatkiṃcitkāmikaṃ karma hyābhicārikameva vā |
ripusaṃkṣayakṛdvāpi sāṃtānikamathāpi vā |
atra tīrthe kṛtaṃ sarvamacirātsidhyate nṛpa
||9||यत्किंचित्कामिकं कर्म ह्याभिचारिकमेव वा ।
रिपुसंक्षयकृद्वापि सांतानिकमथापि वा ।
अत्र तीर्थे कृतं सर्वमचिरात्सिध्यते नृप
iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe kālāgnirudratīrthamāhātmyavarṇanaṃ nāma saptāśītyuttaraśatatamo'dhyāyaḥ ||